Mp3Player

Thursday, 10 December 2015

kian-kiông kap léng-bô͘

Kan-ta chi̍t chōa 路程 tio̍h 奔波 5 6 點鐘,nā koh 算 回程 tio̍h 超過 10 點鐘久。 Lán 無計較chia̍h tòa,iah是小歇ê 所在都是流動ê,給料也無補貼,一切 tio̍h ka-kī hoa̍t-lo̍h,lán 也 順in。Chóng ǹg-bāng 無應該ê ǹg-bāng。 Terh 拜一, lán ê 心肝真正ná  lak 去leh。

事實,lán 是ka-kī leh 安慰 ka-kī,主要是kā in 留 chi̍t-sut-á 機會 kap 人情體面, lán chá tio̍h 知影 in tio̍h 是 án-ni  m̄-bat 世事 koh m̄ 聽人講話,甚至 教育。

所致,同事講,建議lán 教書tio̍h好,m̄-thang 想berh 教育in,lán 一直bōe 死心,lia̍h tio̍h 機會tio̍h 發揮,是講真正死kah chin phái 看 to̍h tio̍h!

Lán 也 知影, 學生kàn-kiāu老師, 是常情常理, lán 也 án-ni 安慰 學生。是講 kàn-kiāu liáu, chóng--sī ài ka-kī koh chhōe 出路chiah tio̍h ah。Iā ài 去了解 ka-kī 所tú--tio̍h-ê 是siáⁿ-mih 困難 阻礙,ka-kī 無法度應付是siáⁿ 因端 ah。汝 kā chit-ê 人 消滅,汝 ê 問題kám tio̍h 解決ah? Che hō͘ 我想--tio̍h,另chi̍t ê 學生,大學三年á,作業 iah tio̍h kap in 老母做。Lán 實在... 無法度 chhò-kàn-kiāu ah。

是講,Lán ê 心也是 肉做ê,oan-na ē hông chha̍k 破,oan-na ē 流血。In án-ni 講 bōe輸 lán gōa pùn-sò leh。M̄-koh,lán chit-má kan-ta ē-tang 要求ka-kī 對上帝,對ka-kī ē 得過。Ǹg-bāng in 學 有起,tio̍h 看破。Lán 一直認定大學生m̄ 是幼稚園 iah teh chia̍h 奶,chit 幾年tio̍h 覺醒, tio̍h 接受現實 ah。

Lán chiah m̄是 chhiūⁿ i 講 ê hiah 強大ê 心。In lóng kan-ta lia̍h lán ê 話有刺niâ,bōe-tàng 體會lán ê 好心好意。Lán 實話實講,koh 是針對tāi-chì,lán 在來 bōe 針對人,in 無leh信táu, 也 tio̍h 擋bōe-tiâu ah。何況,人人心理差不多lóng tài 傷痕, 也lóng chiâu 是 刺。

Lán 自大學tio̍h 開始訓練ka-kī,聽話聽入心 講,lán 發現講 老實話lán 上自在,無khòa 別人m̄ 愛, bōe kham 得承受,朋友也án-ni,koh chi̍t-ê chi̍t-ê kap lán 拆lī,漸漸 lán了解,人人背後chi̍t 大phāiⁿ 故事、委屈、因由,總--是 lóng 罕得肯 照實講, lán 也tio̍h lú 來lú 無愛講話 ah。

Chit ê 事件, 反應 常人bōe曉面對困難,無才調講問題,kan-ta ē曉 發洩情緒, hō͘ 情緒拖lerh 走。而且, 造成chit khoán 困難問題 iā m̄是 chi̍t kang nn̄g kang,上課大部分時間lóng terh hôe 手機á,開講,bōe 自覺, 下課mā bōe 用時間去 了解內容,去研究。

Wednesday, 9 December 2015

Gōng-lâng Chûn

Lí ba̍k-thâu kat-kat, mn̄g--góa
 " Sī án-chóaⁿ
Si-jîn ná-ē lóng hiah thòng-khó͘
Pi-siong"
"Ēng ka-kī thòng-khó͘ pi-siong
Lâi siá si, sī--m̄ "

Góa siūⁿ góa sió-khóa chai-iáⁿ
Si-jîn ū thài-chōe sim-su sim-būn
Thàm-tō͘ ji̍t-ji̍t ê seng-o̍ah
Bih-chhih iap-thiap ê pi-siong
Sè-kan lâng bô liáu-kái
Bōe liáu-kái
Lêng-khó ji̍t-ji̍t kap yahoo sńg
Tàu-tīn
Chò-hóe ê lâng
Si-jîn ǹg-bāng pān-phoe
Thiàⁿ-thàng ê tông-lūi cheng-sîn
Hoe tńg jîn-kan Ai-tiân

Kiat-kio̍k sè-kan tian-tó
Narrenschiff[1] phiau-liû
Gōng-lâng chûn àn chín khí
Sè chhut sè-kan
Ta̍h bōe tio̍h si̍t-si̍t ê thó͘-tōe 
M̄-sī lah,
I Ūi-tio̍h lán chit sè-kan
Chin-si̍t siá si kap chin-si̍t
Pí pi-siong koh-khah pi-siong ê an-ùi

[1] The ship of fools, gōng-lâng chûn, tiong-kó͘ Au-chiu kā cheng-sîn sit-siông ê lâng kóaⁿ lo̍h chûn, hō͘ in tī khoe, tī hái-piⁿ phiau-liû, bōe-sái chiūⁿ-hōaⁿ.

Monday, 7 December 2015

Tâi-gí lâng khó-pi kap khó͘-ò͘ⁿ

陳芳明式台語為害人ê 鬧劇!

Lán 暗時 10點10分 berh 去 thiah 車單,phah 票。Kàu 轉運站, 人 疏疏,m̄-koh 櫃台有別人, lán óa 去, 鼻tio̍h 臭酒hiàn。

Hit ê 人,面sió-khóa 紅,目睭吊吊bōe tiāⁿ-tio̍h, khiā 也 bōe tiāⁿ-tio̍h。 Lán 警覺 i pān-phoe ē 亂, liâm-mi óa, liâm-mi 走。

I 開chhùi 問 櫃台,kō͘ 台語,"我 beh台南, án-chóaⁿ?"
小姐真輕快kā ìn,mā是 kō͘ 台語," tī chia 等,無時間。" I "hâⁿ" 聽無。小姐koh 講 1 pái。I  koh 講 聽無。 來去 saⁿ-sì pái。小姐 chiah ko͘-put-chiong 換國語kā 講,"在這等,沒時間。" I iah是 聽無, chit pái soah khí-mo͘ bái。

I 講,"你講那個國語我聽不懂,你是不是外勞?"  小姐硬氣kā ìn,"我是台灣人。"
"你以為我聽不懂台語嗎?" "台灣人講國語怎麼這樣?我聽不懂,你一定是外勞!" 小姐只好順--i,望 i 脾氣khah leh loeh。I ná 唱聲 beh 叫 警察 chhùi koh nga̍uh-nga̍uh 唸,tio̍h 走ah。 Koh teh 門chhùi 嚷講," 汝態度ná ē án-ni?"

換我, beh 台北, mîn-á-chài e晡。無 saⁿ 分鐘  tio̍h 好勢。Lán kā 小姐安慰 講, lán ē-sái kā i 做人證。Koh kā 講,"汝 tú-á kā i 講ê 確實 ē hō͘人聽無,汝 ē-sái 改講,tī chia 現場tán, 有車 隨ē-sái 坐, 無限定車班。" I 苦chhiò 無ìn。

I koh 入--來,hoah 講 "" 你什麼態度?"你們主管人呢?" 小姐kā 講,"主管下班了。"  隔壁ê 也走來關心,講nā koh 亂 ē-sái 叫警察 來。

Lán 去 外口巡, i teh hia。 Kā lán 講" 汝mā kāng款,台灣人m̄ chhiàⁿ chhiàⁿ  外勞!無理lah。" Lán 想講 kâng 講berh 做證,也hò͘ⁿ-hiân tio̍h 留--leh, ná tham 頭看。 果然, nn̄g ê 警察 ko-chhiâng 大漢 koh 褲頭lóng chah chhèng來, kap i tī 外口 會--chi̍t-khùn-á。入--內, 警察直接kàu 櫃台,"發生什麼事?" 小姐kā 講無幾句。警察 lia̍h tio̍h 大意。 Oa̍t 頭 kā i 講,"外勞也可以工作,外勞也有人權。"  對i 聲sàu kài bái,i chi̍h-iāng 頭tám-tám, 無意無意 soah 講 "我 lim 酒醉。"  警察beh kā háⁿ,"Lim 酒醉,汝 也敢 亂!" 警察目睭 掃--chi̍t-liàn tio̍h 出去ah。

Chit ê 路頭兄,頭 tio̍h lóng chhih-chhih, ka-kī 回手機á。
--------------------------------- ------------------------
情理,chit ê 酒醉--ê lóng khah 失氣,iā khah 失禮。 Lán tī 邊a 自頭看kah 尾。 M-koh, lán 看tio̍h, lán 失教育ê台語,kap 當今台語人中間發生ê 悲情, nn̄g 頭 lóng 是 。 了後, lóng 想berh óa靠強勢 ê 國語,結局國語也是kō͘ chhèng  硬壓。

台灣小小語言鬧劇,phah算 四界不時terh發生。




Like · Comment · Turn off Notifications · Share
龍崎Mattel HsuMorrison Iûnn and 15 others like this.
Comments
Ioghoong Sof 外來的中國人希望大家勿講台語,這我有法度了解,阿若台灣人叫我勿講台語,這我就無法度理解啊!偏偏此種人足濟,濟駕你家己會僥疑講阿迹敢是台灣?
UnlikeReply39 hrs
Tōo Sìn-liông Masa Tu Chit pun pitki u ketat.
UnlikeReply13 hrs
Chuniok Lim 願咱台灣受外來政權thún踏ê命運緊來結束!Goān lán Tâi-oân siū gōa-lâi chèng-koân thún-ta̍h ê miā-ūn kín lâi kiat-sok!
UnlikeReply13 hrs
Thai Boi-Nguyen 有--个台灣人偏差認為,伊个囡仔會曉講華語就會使,語言只是溝通个工具,袂曉講台語無遐要緊 ><
UnlikeReply13 hrs
Jū-khái Piãbér Lîm chit 篇 beh thâi 起來 ah , Lín ê留話 ē khǹg blog
LikeReplyJust now

Saturday, 5 December 2015

Tōa-biō chêng lāu chhù

大廟前老厝 phî-phî chhoah
倒落去--ê是同年--ê
菜市á terh 隔壁 niâ
為tio̍h 新ian ê 嬌頭 kap 榮華
暗暗á tìm頭極端手腕
割捨人世情緣 koh有kha跡記tî
碎身斷骨了後 chhûn chi̍t ê 希望

大廟神chhùi am-leh 目睭thí 開 看
榮華tio̍h siáⁿ-mih 人kiáⁿ 孫
I 實在m̄知
Chiah-ê ngiauh-ngiauh chhoa̍h ê 人心
Tī 時 ē 停 iah 是 變換
手路實在粗殘 有--無
對待hit 間醫館chiah 無gōa久
Lán驚hiâⁿ terh 半月池 iáu-bōe chhê 底 leh


Tuesday, 1 December 2015

sai-lâm ko͘-chhiⁿ

西南孤星 the lerh hia
白雲輕輕浮tī 天闊 bóng-bóng
風絲 á chūn-chūn 弄 kòe 樹oe kap 頭鬃
地球chheh 聲 kē-kē
汝 un-liâu-á kā 算 chi̍t 分鐘 十二 chheh
溢來現世臭hiàn
溪流照原tī chia入海 iā-kú-káⁿ
渡船頭 碼頭也原在 nn̄g 世紀
M̄-koh chit phiàn海 變 kah chhiⁿ-hūn--去

外來船隻 載來 ê 外來物 hām人客
Lán 看 in 起山 歡喜
聲嗽 bōe 輸 主人家
面 chhiuⁿ kap 話語 chiâu tòe leh 變換
Chi̍t 分鐘 十二 款 ka-ia̍h

Sio 報sio 牽 入街路 oe-oe tīn-tīn
店頭 ngī-tō͘ 激 kóa 文化歷史
媽祖 kap 祖師爺 kâng-khoán êng-éng êng-éng
Lán 看 in 神威時代過 ah
路頭烏鬚番koh tiām-chīⁿ lerh 傳教
道理講--出來 pān-phoe 無人berh 信
十 ê 看有 chi̍t ê ē 無?
佳chài i 石頭鑿ê m̄驚酸風雨

Lán 人bē 輸厝角鳥
不時為 ka-kī ê 孤單吵chhùi
Lán 插 tī 人phāng 內 chhùi開開
Berh 祈求 toh chi̍t hāng
人聽無,A-pa-pē 定規聽有
厝角鳥 I 都也保領
何況 lán 人leh
M̄-bián 煩惱 m̄-thang憂傷

Monday, 30 November 2015

Tām-chúi ka-pi-tiàm

路草 saⁿ 百tang chia 收ê新民
透早月娘
對生活 紅磚 á 牆堵中學 káⁿ bōe-tio̍h
小 kā ak-chak tāi 放 lerh mah
Oat過文化 Rhine tī 淡水
舊街路去 chih-chiap 探聽leh

Taⁿ,汝 jōa 久無taⁿ頭看天 ah
日--時暝--時,汝chiâu teh趕狂東西
無 chùn-būn che he
Chiâu 放hō͘ 精英專權改換
滬尾光景 汝知--無
水碓崙 á 頂 看--出去
月暗淡水烏濁船燈光 hàiⁿ來搖去
永樂茶店 àm-sàm chi̍t pha 粉紅
Káⁿ 無人chia̍h 菜 ê 龍山寺

金字 金 iu 金 iu
樓á厝大路邊起 kah koân tuh 天
Khah贏崎頂街祖師廟
燕 á 飛天

飛過黃昏海岸chi̍t時黃金
砲台埔鐵砲 teh顧守 chit 窟
海水直直溢來溢去 擋bōe tiâu
紅毛起城落去
傳教烏鬚番街醫館koh peh 崎
Hia 有真理縛 tī Oxford 學堂
頭前活水tiām-chīⁿ 浮影
Chit 跡 chit-ê 冬天鬱熱鬱熱
Seine河邊 Paris有淡水咖啡店

PS: 延伸閱讀 從「馬尼拉手稿」看16世紀的雞籠人與淡水人  文/陳宗仁

Sunday, 29 November 2015

chhim-tang loān bāng

chit ê 夢, kài 清楚。

Lán 夢 tio̍h, Sêng-hiân 兄 lâi sio chhōe-chē。 Lán tī 台文系辦公室thèng-hāu i。I 人kàu 了後,
soah 開始 動手煮料理,真簡單ê 料理。 Lán kā mn̄g, án-ni kám 免 加摻kóa 菜? I kóng 有 也 好。 Lán  kā 講, 有lah, 離 chia 無gōa 遠,我 載汝去。出門ê 時, koh lerh 想講 足近, 隨thang tńg--來, 所以, 火 iáu 無禁, kan-taⁿ 禁 khah 細niâ。Bóe--á koh 想想leh 無妥當,禁火chiah 出去。

行kàu,外口, 路草 soah 足生份,saⁿ oat sì oat, 行m̄ 知路。Kài-sêng 新民街 hia,m̄-koh,菜園是 tī 麻豆往學甲lioh,ah 台文系辦公室也terh淡水。Soah koh 看tio̍h 有人 lerh 拖車,頭chi̍t台, kō͘  jeep 載 走,lán lerh 驚hiâⁿ kám ē 拖 lán ê, 趕緊berh chhōe,kap Sêng-hiân hiaⁿ 分頭去揣。Ǹg-bāng in 拖chìn-chêng chhōe tio̍h, m̄-koh 巷路 實在生份。

Chhōe 1 tia̍p-á 久, 隨看tio̍h lán ê 車也 hông 載去, 車後斗 koh hō͘ in kiāu phái 開開。Lán hn̄g-hn̄g 看tio̍h lán 後斗貼 彼 nn̄g 塊 黃黃反中國課綱ê黏紙認chhoaih ê。Lán 緊 隨 chhōe 警察, in chhēng 青色制服,有 白色反光帶。 Kah i 理論,i 口氣 sǹg ta̍h 硬,m̄-koh, soah the̍h 1900 hō͘ 我。

Lán soah 精神。 Lán 想phah-sńg he sī 警察berh 作業績niâ iā-kú-káⁿ。Ē 記kah chiah 清楚, lán 也 感覺sim-sek 稀奇。

Saturday, 28 November 2015

châu-khut ōe

榮光 kap名聲 chiâu 有
機緣 帶 kóa 世俗臭hiàn
錢銀 siōng有路用khah 實在
Caesar chiah 有 khùi力 起造
Tú 天功業

是講 天khòng-chhiⁿ tiām-chīⁿ
塗 kha 人 趕狂東西
聲sàu 對 mái-kuh 吐出來
擾亂帶詩意hia-ê白雲
Soah 牽絲牽絲

搭 liâm時 念詩ê 台á hō͘ 人
講 he 面前話 無sêng lán 人話
Oh tit 聽明 hia-ê 理路
有gōa 崇高 gōa 美妙 汝 kám 知機
機會hoān-sè 人人有 iā-kú-káⁿ
M̄-koh,人leh ?Caesar leh?

tok-bo̍k-chiáu

為tio̍h 桌椅,3 ê 教授 kàn-kiāu kui po͘,
知識聖殿竟然 椅桌 to͘ 做 hiah爛, 凝心
Koh 致到lán hō͘ 同事 恥笑 無keh
Kóng lán bōe-hiáu 堅持保護言論自由
美麗ê 面前話 確實 有藏崩敗 ê 種子
Thài-thó 凝心? 不如看鳥 che chi̍t 對 小啄木鳥 來 鬥鬧熱 Kám 有 才調 kā 聖殿ê 蛀蟲 清除leh?

鵝 kiōng-berh 絕種
Chhun 鴨 á 聽雷 ê hàm-kó͘
鳥 á che 發狂了後
Chit 對 小啄樹鳥
Thài-thó m̄是 pigeon
送來希望ê 橄欖葉

Noah khiā 船頭心悶心悶
A-pa-pē 四十kang ê 旨意
直心人想無上帝恩賜
汝 也免koh想
上帝kiáⁿ兒kan-ta 上帝ē-tàng 管教

做船ê時 i mā m̄知
人間奸淫污穢 tú 天 hiah koân
致到 Pē 悲哀 tńg 憤怒 lú koân
直心人 Noah 也是gōng 人
無頭殼 照旨意做
一直kàu 四十kang 雨停 iáu-koh m̄知
放烏鴉 去 soah 無消無息
I khiā 船頭 心悶
隨 koh 放粉鳥去

來ê soah 是 chit 對 小啄樹鳥
船也無蛀蟲

感恩節大揭密:為什麼安潔莉娜裘莉不過感恩節?

Thanksgiving Day

Lán 在來m̄是 上帝 牽教ê 族群iā-kú-káⁿ,厝nih sī-tōa 人 siáⁿ-mih 神chiâu 拜,祖公媽也拜,石頭, 大樹箍 也 thèng好拜。 拜求心安,也bô人thang 干證tó 1 ê khah siàⁿ,khah 靈感。善書讀kui 百本去,應驗文看來看去,lóng chha m̄-chiâⁿ mi̍h,kám ē 抄來抄去 haⁿh?總--是,gún 阿母所求, 無 chi̍t pái 應驗, che 是確實。

Lán 看 i 拜,理解做 lerh o͘-se 巴結hia-ê 無形ê,的確是世間布賂ê 延伸應用也無的確,tio̍h是講lán ê 神 tio̍h kap lán 交換條件chiah ē 保護--lán,賜福賜平安 hō͘--lán。 人間道理pān-phoe án-ni 無siáⁿ têng-tâⁿ,所以講 lán chia天神 kap  人cheng-chha 無gōa大,也有人愛講 "天人合一" ê 宇宙人生觀,生活哲學,kài 有chhàu-iāng ê 意味。是講,án-ni lán lerh 拜sáⁿ leh?

所致,lán 看lán 人足逆天ê kiâⁿ-pàng phah-sǹg 也真phó͘-sū-phián。天地無條件賞賜,i 看做是ka-kī 骨力,phah-phún,phah-piàⁿ ê 成果,另chi̍t 方面 koh tiāⁿ siàu-siūⁿ thang 不勞而收獲。Bōe thang 體會 lán 人ê 一切,nā m̄ khéng 認上帝,事實lóng 完全是 天地賞賜。O̍h bōe ē 感恩, kan-ta ē曉 條件,利益交換。

Lán看lán ka-kī 過去一直也是án-ni,soah 對 in chit ê Thanksgiving 真心反感,ià-siān。M̄-koh,lán 也無, 也bōe 因為lán chit 款態度,得tio̍h 任何好khang。有--無?交換慣勢koh puh--出來ah。顛倒, hō͘ 人看做是無文明,無教養ê 番,比 真正ê 番 khah 番,人in 不時 lóng teh 感謝天地賞賜。Lán人leh?

Lán 講老實,lán "感恩" chit ê 美德是牽手ngī-tō͘ 教出--來ê。I 出世tio̍h tòe sī-tōa 信上帝ê 教義,內底 chi̍t 項tio̍h是 隨時o-ló 上帝ê 工,隨時感激上帝ê 賞賜。Án-ni, 人看--起來, ke 真chiâⁿ 人, 真正!

Wednesday, 25 November 2015

hún-chiáu

天光 總送人siōng 開闊 ê 美景
無! 是創世日頭
也 kā 好人 chhiō光
也 kā phái人chhiō光
自 光 kap 暗分開 hit 日
I 看是好
Lán 看 也是好
日頭花
掖 lerh 聖殿紅磚 á 路
也掖 lerh 水波池
也掖落 MANNA
Kan-taⁿ hit tīn pigeons 粉鳥
貪chia̍h 餌料
Bōe 記得 橄欖葉ê 任務
Kā tiām-chīⁿ ê peace phah 破



Monday, 23 November 2015

Sim tio̍h-bôa

上帝巴別塔ê 用心
Lán 順服靠北旨意
人soah 不時 tio̍h phun 馳 bōe soah
石磨á 心 án-ni 真chia̍h力
Wise men 有講心 tio̍h 磨
心 tio̍h 磨 soah 也著磨
為 siáⁿ事 著磨
Lán 想是心帶刺 tio̍h磨
Wise men 講
心tio̍h傷 tio̍h ē 發刺 iā-kú-káⁿ









========================
23 November

路尾, 著磨 ê 結局
Ē是siáⁿ ?
Pān-phoe lán sa 無 cháng iā-kú-káⁿ
心願天頂 A-pa Pē 引chhōa
Hō͘ lán bōe 後悔也 bōe見笑
Koh-khah 要緊 
無得失 A-pa Pē
也 心願 A-pa Pē
賜福hō͘ 台灣 kap 台灣新生代代
Hō͘ in 免得 kàu 經歷承受bōe起 ê試煉

A-mén

phiau-liû


Lán tio̍h kiâⁿ 進前
頭前 àm-sàm chi̍t phiàn
無thang選擇 ê àm-chīⁿ 光景
心 m̄ 肯隨波漂流

激力逆流 soah 波紋暗淡
Tòe che twilight 漸漸 ka-nn̂g
出發 berh ǹg tó chi̍t 方?

潮流既然 tiāⁿ-tio̍h án-ni àm-sàm無明
Lán 也bōe得 thang 入
管thài--伊
束信 chit 隻孤帆 thiau工出航
Put-kò
天色berh tńg烏隱隱無明
大風將透 聽講北風
漸漸
我看見 che 黑暗中
也聽見 àm-chīⁿ nih
有不安 kàu 無限驚懼

Thursday, 19 November 2015

chòe-āu gán-kong

和平粉鳥
閒時 teh 圍 lerh 大殿 se̍rh
本成照早暗三支清 hiuⁿ
儀式進行nn̄g 千gōa tang
lóng 照起工莊嚴 展現
Siak 落厝頂 thèng-hāu
在野 ê 最後眼光
Ē 怎樣 ê 光景?

Wednesday, 18 November 2015

se̍rh koe

Lán 細漢tòe pē-bú koh 有 阿媽度日,phah算 cha-po͘ gín-á 疼惜少缺,góa hia-ê 姊妹á tio̍h 無
thang 有我 chit 款ê 樂暢。M̄-koh,總--是家伙無 liōng-siōng,也chia̍h口chōe,錢項tio̍h khah ha̍t, tiāⁿ-tiāⁿ terh hah-tah hah-tah。 Án-ni, 所致,四界行踏 也tio̍h khah 少,khah chōe 是 chhin-chiâⁿ 五十 有好bái事 sio 請,chiah thang 去離厝khah hn̄g--sió-khóa ê 所在, ah 也無thang 加去認bat 了解當地ê siáⁿ-mih 人、物、地、景、產, koh hit時 iáu 細漢mā bōe曉。

Chit pái thàn 赴宴 提早kàu,時間khah liōng, lán tio̍h 去 koh se̍rh。  行 kah khah 早 bat 去chia̍h a-bu-la-ke hia, chia̍h chi̍t óaⁿ 肉圓,nn̄g lia̍p。 以早 lán lóng 人服務周至,坐tio̍h kā chia̍h,chit pái 坐leh soah 無thang chia̍h, 原來 in tio̍h ka-kī 先納錢 ka-kī phâng。 Chit 種炊 ê 肉圓 lán khah 無路,滋味也普普,khah 鹹niâ。

Tio̍h lah, 宴sī 叔伯阿兄嫁 大漢cha-bó͘ kiáⁿ。講--起來,chin 稀微, 人ê 感情, 親chiâⁿ ê 感情 terh chit ê  社會時代大lián pháng 落去,chi̍t 絲á 也 sa bōe tiâu。I 偏名叫 生--á,犯khia tio̍h 阿叔,所致學名無kāng,gín-á 時,阿ḿ bōe曉教kiáⁿ, 專kō͘ 摃ê, i 走無路, lóng 來 hō͘ gún 阿母 惜。 所致, kap gún 阿母 感情 bē輸母á囝, gún 兜 siáⁿ 艱苦困難, 伊 lóng 無怨無悔 出錢出力出感情!是講ē chi̍t 代,無siáⁿ 來去。原因 oh得 póe會 ē 清,tio̍h gún 兜 有人ka-kī 烏白變 lah,chi̍t ê家 soah oai-chhoa̍h 去,人mā 真諒情,不時來探, lán chit 頭 做人han-bān...

I 對面hit 間 bōe 牛軌糖ê iáu 有terh 做生理, m̄ 知有chhiūⁿ 文化阿給店 賣--人 iah 無,印象nih,hit-chūn in chiah kā 店面盤--起來niâ。渡船頭整理kah chiâⁿ 新嫣, 渡船也 加真清氣siùⁿ, án-ni tio̍h súi。無詳細kā 看 船班,kan-ta確定 有 kàu 八里,  koh 有kàu 另chi̍t ê 所在,iah 是 khah 外口? Ē-sái 用悠遊卡。

來淡水,ē記ê siōng 早,我已經teh 讀大學ah。陪同窗ê 來會cha-bó͘ gín-á,hit-chūn 火車iáu 有thang坐,kan-ta chi̍t 種慢車。 Lán 也有hip 相 做紀念, 無gōa 久, 鐵枝路著 拆sak,改 hō͘ 捷運電車走, lán 想無hiah 大ê 計劃,kan-ta 條直想講為siáⁿ-mih,ná m̄加pho͘ 1 條 鐵枝路?汝看 chit-chūn ta̍k 班車 都插插插。

Hit-chūn koh tiāⁿ-tiāⁿ 聽講 he 飆車族 tī 大渡路 phe ê新聞。後--來,參加台灣研究社,chiah ē曉看chit 跡 庄社ê人文kap歷史地理。Koh 有來 幾ā pái, 淡水舊街kap 祖師廟 sió-khóa 有印象,koh 講 chia 有全台灣siōng 早 外國人起造 ê 下水道, 紅毛城, 小白宮、砲台 hit-chūn kám 有看? 無印象。阿給,鐵卵,海產魚箍 lóng 是 tòe 人 chia̍h, 無特別感受, 也bōe 記得tī tó 位chia̍h。印象khah 深ê,過八里 chiah 孔雀ham,赤翅á。

有chi̍t pái tio̍h 是 kap A-hun á 來,寫tī 1991 年ê 自立晚報 hit 篇〈滬尾黃昏行〉,lán 透世人頭chi̍t 篇台語散文。M̄-ku, A-hun 伊講伊無來。疑~~ Lán bat tòe i 來 夜遊,koh 有行金山hit條路,吹海風看光景,chiah 鴨肉。 尾--á,也有來 竹圍基督教病院探訪lah,koh 姊--á 也 pat tī hia tòa院。 講 che lán 心tio̍h 酸,khioh 起先mài 講。

Siōng 北pêng ê 紅樹林,有風聲, kàu taⁿ 也無親身行kha kàu。顛倒,三芝pat 去,有社團同學,也有kāng班同窗三芝人sio 招。三oat 四oat,根本m̄ 知南北東西,phēng lán ê 記tî 無可能chhōe 有,連渡船頭 tī toh 都茫茫渺渺leh。Tio̍h是lán tùi che 地號名,風水方位記tî chiâⁿ bái iā-kú-káⁿ。

Só͘-tì, lán 深想台灣人是按怎記tî 普遍足bái,尤其lú 大條ê tāi-chì, lú 記bōe 清,記bōe tiâu!Lín 知無? Lán pháng chhōe tio̍h 答案 ah。


Tuesday, 17 November 2015

Paris ê sū-kiāⁿ

別人gín-á 死bē 了,做兵為國去hông刁,破病m̄ hō͘ 去醫療,冤枉死亡恨難消。
 土匪政權khàm 頭頂,天理tī時會清明,直路thang kiâⁿ bē 僥倖,m̄ 免枉死大頭兵。
見講都是政治tāi,理路白白kám m̄知,走閃bē離足厲害,短短幾年看kah 獃。
 汝m̄ chhap 伊伊 ah 汝,管理利便據在伊,放棄權利汝ka-kī,現代社會tio̍h知機。
寶貴選票烏白tǹg,惡業tio̍h ē 繼續thn̂g,kiáⁿ孫受害bē 按算,看che 汝kám bē心酸


13 日, Paris 有 3 位 發生爆炸事件,真緊 法國總統tio̍h 發表, 講是 恐怖攻擊,koh 宣佈 kā 國界封鎖。

Lán tòe 人哀傷,反省, 也緊手 換FB 頭相, 來 標示 lán ka-kī ê 態度。 有人án-ni, 鬧 kah kap 朋友 拆破面, 事實 in 也m̄-bat 見面。 Che hō͘ lán 心肝bōe清hiu。 Lán 今á日 靈感tio̍h, lán ê 日子, 過kah chiah-nih-á 無閒 koh 封閉,是 怎樣,FB tio̍h ta̍k 日 開,ta̍k日 不時起lih巡,ná-sêng 斷bōe離ê 癮頭症?

也是án-ni lah, lán 足驚hō͘ 人 看做 涵孔龜,古井水蛙,欠缺國際觀só͘-tì。Lán 為防備媒體kā lán 污染,愚弄 20 外tang 前 tio̍h kā 電視 piàⁿ--出去ah, 牽手態度mā án-ni, che 是lán ê 福氣。是講, lán 猶原ē驚 kap 世情脫離siuⁿ hn̄g, siuⁿ 疏遠,iā ē驚 無現代人ê 國際社會觀,koh欠缺人類共識, lán 開FB 連結chi̍t kóa 朋友, 利用in ê 國際觀 來彌補 lán ka-kī ê。

Che 竟然也 難免, hō͘ in ê 眼光束縛tio̍h, 就算 lán 朋友真chōe, 真多元,究竟lán 篩選kòe, kap lán 意向也 差 m̄-chiâⁿ mi̍h, 按呢。

總講, lán chit 幾 禮拜 siàu想 ê work, soah lóng 一直hē teh  頭殼內,連 影跡 也 無,恐驚liam-mi, tāi-chì 過, lán ê 記tî 也tòe leh 消無。 也 che tio̍h是 lán chit-chūn siōng 驚ê, 一事無成,kan-taⁿ khong-khong tòe 人 喊喝 國際觀 國際觀, 人道人道。

台灣ê 事件也khah chōe 貓á 毛,khah 近ê林奕華 高中課綱,兵á 枉死,PM2.5,外交部護照,khah hn̄g ê,台灣經濟,母語教育,228,直直來
,也 lóng 無解決ê 報頭, kan-ta kui 台灣leh siáu 選舉, kā ǹg-bāng 寄teh 正月16, liam-mi kàu ah neh!


Monday, 16 November 2015

ki-chhia-thâu ê Romantic

人束信 thèng-hāu môa年櫻花開
足 chió 人
看 I 烏金烏金
古錐古錐 ê 身軀
無 koh 來來去去 tín動
換chi̍t 款榮華ê  新車頭
是講,永bōe thòe 時行 ê Romantic
情緒 iáu teh chia 不時上場
搬演男男女女 也 來來去去
輕輕 á 互相溫存巴結
行對河岸渡船頭 ta̍uh-ta̍uh-á 是
電火iah teh 閃熠
海 nih ê 觀音山 phōa 1 鉤 金金 ê 月娘
Ang-á 頭 bōe 輸溪水 iah 天色
Siōng 好情人 sio 攬
Kap lán tiām-chīⁿ 聽歌聲
Tùi 海 hit pêng 浮踏過來
有 The Earth ê 節奏
 Lán ê melody ta̍uh-ta̍uh-á spends out


ok khia̍k-khia̍k kóng bōe-hiáu

台灣母語無地位,家己又閣𠢕奇攲,21世紀強欲死,選舉若到像白痴。
選舉才通有提起,平時放咧據在伊,放屁狗心安未是,選票過手看白痴。

 頂pang, lán pho͘ lán ê 手誌簿á, 結局 soah pháng 去~"~
------------------- 偶然 被打頭了 ---------------
你進到書店是否所有的中文書都讀得懂?
或是 退一萬步, 你小學的所有課本,你現在有把握都全明白了? -
--------------------------------------------- 為何一直在說, 你寫那個台語誰懂?

Friday, 6 November 2015

Kng

報盡 kui-ê 秋天
共識九點二紅chi̍t phìⁿ 葉
樹頂
風 teh 樹 á kha 流轉
khah 過 hia 水流轉
看bōe-tio̍h káⁿ tio̍h m̄免 khòa意

Pān-phoe liam-mi 入冬
風 吹 tio̍h人 kám bōe 致覺
Chhiⁿ 冷
無 mā 紅葉chi̍t phìⁿ
報頭 現現
有目睭 ê  tio̍h 看
有耳 ê tio̍h 聽
先知曠野 teh 吵chhùi 

Tuesday, 3 November 2015

hioh-tàu bāng

[hioh tàu 夢] 人 ah, m̄ 敢去面對 ka-kī ê 脆弱 nńg-chiáⁿ, 連看都m̄ káⁿ, kap gún 兜 烏麻á kâng款,汝kā i khap tio̍h i 也ē 起性地。Kan-ta 甘願 ta̍k 日 睏so͘-so͘,chia̍h 飽飽,外口無pōng 炮, 無落雨tân 雷,chiah 四界 bóng lau thit-thô。

汝kā i 講,汝 m̄ 是 狗á, 報i 身軀有寶貝tio̍h是珍珠,i m̄-nā m̄信顛倒翻頭 kā 汝咬。 Soah m̄知, 人 nā 按 ka-kī 脆弱 nńg-chiáⁿ ê 鍛鍊, he tio̍h 是 lán 身軀 ê 珍珠。

無目睭 thang 看, 無 耳孔 thang 聽,kui sin 不時 刺 giâ-giâ, hō͘ lín ioh 看 是 sáⁿ 貨?

馬太福音 第七章第六節 ê 教示, 是講, án-chóaⁿ 知影 豬 iah 狗耶穌無kā lán 教! a-mén

Monday, 2 November 2015

mî-mî-á hō͘ tú-hó

綿綿 á 雨 tú 好
Kā 路燈 ê 刺目光鬚  phah phú niâ
也 kā 頭前ê 路 phah kah hóaⁿ-hóaⁿ
Gín-á 伴 chhêng-chāi sńg kah 天烏
老母 hiám-hoah 幾 lō 聲 chiah 甘願
Chit kak
Khau 風 塗 kha 兜 bōe tâm
是講 hit chūn 回南風起
Lán kan-taⁿ 顧 lán ka-kī ê 飛龍機
Teh 手 nih  hiah-nih 寶惜溫柔
Siōng 路尾 thài ē tiāⁿ-tiāⁿ kan-taⁿ chhun lán tī hia


Ē 記得阿姊 chiah lâi kā lán 牽
Hiah-nih-á 寶惜溫柔
阿母講 天烏 ah 叫汝緊轉去
Kha 手洗洗 leh thang chia̍h 飯
Lán 乖乖 kap 小妹 chia̍h 飯
Koh 乖乖功課寫了 chiah 問
Ah 阿母 leh ?
我 m̄ 知, 加班 ē 款,汝 seng 去睏
Hiah-nih 寶惜溫柔

前後事件重重疊疊 tī 記持 tǹg 印
路尾 soah 因果擾亂
連 siàu 念 都無力
Chiah 無 gōa 久 chìn-chêng ê 日子 niâ tio̍h 混沌 phú-phú
頭前 ê 路途 看 也是 hóaⁿ-hóaⁿ

PS: 講 beh 學習 感恩: chang 暗 七點外 kàu, 顧口ê 大哥 ná teh 練 golf, tú 好 有 1 ê súi 姑娘á 按 人文學院 出, Lán 緊緊 走去, oan-nā bōe 赴, lán 拜托i, I 真 溫柔 也真仁慈kā lán 開門 Tih chhìn-chhìn 綿綿á 雨暝頭 特別 溫暖 願 上帝賜 i 平安 喜樂, a-mén


Wednesday, 28 October 2015

Prometheus

看 chit-khoán 都市ê 夜景, lán m̄ 知影恐懼àn toh 來, to̍h 是始終 bōe-bat 消失 ....


源起頭上帝講光kap 暗 tio̍h 分開
Chi̍t 半光kap chi̍t 半暗做頭 chi̍t kang
Hit-tia̍p 無善惡分別
創造人 kap i 同行

願神 Chiús kap 永恆共存
Chiús 英明 裁決 kā 汝
鍊 tī 山石頂 致到
連 hit 粒 石頭 也變做永恆

I 也持守 講出--去 hiah-ê 話
Ta̍k日sio-kâng 化身 bā-hio̍h 來
Kap 精牲 對目睭 siòng 目睭
無話無句 連目神都無
Ang-á頭 nih 有平行世界 ê 堅定
針對汝 對心肝頭開破

理路是機械的無變竅餘地
Chi̍t 日 過 chi̍t 日 日日相kâng
Días i 至高天神的確深深體會 che
到極恐怖ê
永恆無聊 chhin-chhiūⁿ
I kā 汝練leh ê hit 粒 Causasus 山石

是講, 汝 káⁿ ē  chiaⁿ 無聊 ho͘ⁿh
無chi̍t日特別ê 著磨 也渺茫去
著磨也無滋無味
Kám 有toh chi̍t 日體會tio̍h he
永恆 bōe 變化ê 恐怖

To̍h 是汝 m̄-bat 人 短短 sìⁿ命 ê 寶貴
也 bōe 透徹烏暗 ê 價值
大主大意kā 天火偷渡 hō͘ 人
Taⁿ 汝看 in 短短時間 niâ
In tio̍h lia̍h 準 ka-kī ē thang 做神
Kap lán kâng款 日日做 che
到極無聊 違逆神 ê 齣頭
無 khòa in 短短sìⁿ命 liâm-mi 盡

Sunday, 25 October 2015

Âng-sek Tâi-oân

藍博洲 有寫 chi̍t 本 《紅色客家庄》,意思 ná lerh 講 in 客家庄 真chōe 熱性ê 少年人, tī hit ê 時代 lóng 加入 共產黨, ǹg-bāng 盡ka-kī 一己之力 kiâⁿ tī 建改新世界 ê 行列nih。Góa 想 hit kú in 應當 bōe kā ka-kī 看做 客人!因為 chit 款 民族主義思想 kap 共產主義 bōe合。

昨hng,lán terh 台南 府城區,浸tih PM2.5 ê 大氣 nih 散步siû 街。無tiuⁿ-tî 影tio̍h che 紅色ê 台灣。壁堵破爛,厝蓋也無看見影,恐驚--ê 是賣sak ah。氣勢bōe-bái,鹿á 真 大chiah, kā 台灣 咬 lerh,bōe-su 咬 han-chîr leh。

厝蓋kha 消失ê  chhiâⁿ隔, 椅桌,門枋,kap  人來客去kha-pō͘  聲,喊喝,bih聲,chheh聲,薰味, 酒味 iah  粉味也 lóng 消絲 無 影跡。孤孤 Àu phú 味 iah bōe 褪。Hit tah 紅 iah ná 血。真chōe  台灣人古ê 台灣,也是 kiâⁿ kah chit ê 地步。Lia̍h 牛, 蕃薯 chit 款 bōe 自主自覺 ê mi̍h-kiāⁿ 做 ka-kī ê symbol 代表,khah 講 mā 是悲情憤慨,講久 oan-nā àu phú,失去感動人ê 質素, chhin-chhiūⁿ Snow White, 本質性質 lóng 好, tio̍h 是 無自覺,無ka-kī ê 行動,所致,kan-taⁿ siàu-siūⁿ chi̍t ê 變態ê 王子 賜 i chi̍t 世人幸福。M̄肯 iah 是 m̄ 知影 tio̍h ka-kī 去面對敵人,惡行,去討回公道正義,汝ê 人生tio̍h kan-taⁿ chhun àu phú ê 滋味 niâ。

所以,hit chūn ê 共產黨人 比lán chit-chūn chōe chōe 人 khah 值得lán 來欣賞,來tam 味 iah 記述,iah 傳揚,In 無的確有成就,無的確有成果,是講 in  弄揚熱情,理想,koh 有走chông,phah phún,有犧牲。人tio̍h是 án-ni, chiah 證明i oa̍h lerh iā-kú-káⁿ。

所以,lán 無想tio̍h, 也無去ioh 主人意是sáⁿ,iā 無khòa 講 he 有可能代表中國侵領lán 台灣。要緊ê lán 想 m̄ 是 siáⁿ-mih 國家 m̄ 國家,lán 台灣 70 m̄是國家 ah, lán 也 慣勢慣勢 ah。Lán 心肝頭 khah khòa-ì  是人 m̄-chiâⁿ 人ê 日子 ài koh gōa 久?

ka-kī ê bó-gí ka-kī kiù

Ka-kī ê bó-gí ka-kī kiù

Tn̂g-bóe-soaⁿ-niû, ē kui ka-cho̍k chò-hóe tàu khan-khioh chiáu-á-kiáⁿ. In sin-hêng sek-chúi kài súi, chit-má iā chiâⁿ-chòe bó͘ chi̍t chióng Tâi-oân ê cheng-sîn symbol, tiāⁿ hông the̍h khì chòe siong-phiau iah-sī ìn tī pau-chong.

Tâi-oân te̍k-iú ê mn̍gh ū siáⁿ-mih leh? Soaⁿ, hái, thian-jiân ê sán-bu̍t chōe kah sǹg bōe liáu, iā iah bô  gián-kiú kah liáu. M̄-ku, he lán lâng lóng bô chò chi̍t-sut-á chō͘-chàn ê khang-khoeh, tian-tò lóng teh sńg-tn̄g siong-hāi. Phah-sǹg chìn-chêng lóng m̄-bat pó, chit-kú, ta̍uh-ta̍uh-á bat, ū sió-khóa khah ké-pìⁿ ah.

M̄-bat pó phah sńg-khì ê pó-pòe, tī Tâi-oân si̍t-chāi chiok phó͘-phiàn koh phó͘-phiàn. Khòaⁿ ē-tio̍h--ê tio̍h giâm-tiōng kah án-ni ah, he khòaⁿ bé-tio̍h--ê koh lú giâm-tiōng. Só͘-tí, lán Tâi-oân lâng khah sū tn̂g-bóe-soaⁿ-niû, Tâi-oân chhù, chhēng-chhah, nî-cheh hong-sio̍k, chia̍h-si̍t, siáⁿ-mih lóng bô--khì, kan-taⁿ chhun chîⁿ, kan-taⁿ ē-hiáu tùi-tiōng chîⁿ. Siáⁿ-mih lóng bōe-hiáu iah bōe-tàng lia̍p-chek chòe kiáⁿ-sun éng-kiú ê chu-goân châi-sán. Koh ûi-it chhun-tiông ê chiⁿ iā lóng hông phiàⁿ--khì khah khoài.Bo̍k-kòe ji̍t-ji̍t chia̍h ê si̍t-phín iā chiâu-chiâu tài to̍k. M̄-bat pó, m̄-pat hó-bái, m̄-pat phang-chhàu, khó-lîn!

Gōa-lâi ê mn̍gh ti̍t-ti̍t sóe-thōa lán tō͘-oa̍h ê khong-kan sî-kan. Jû-kim, liân chòe-āu chi̍t tiâu hông-sòaⁿ iā berh phòa ah. Tio̍h sī Tâi-gí. Mài kóng tōa Tâi-pak  tē-khu, pháng chhun bô 1 siâⁿ gín-á ē kóng ah, liân lán Tâi-lâm, Ko-hiông, Pin-tong khah chng-kha só͘-chai to͘ chin chhám. Lán khòaⁿ ē tio̍h ê  lóng sī kiaⁿ gín-á tòe bōe tio̍h ha̍k-hāu ê kok-gí niâ.Lóng  bô leh khòa in ka-kī kok-gí chiok àu, kin-pún kóng bōe lō͘-lâi, iā sī ngī kóng tian-tò kā gín-á kà pháiⁿ--khì iā m̄-chai. Gín-á khì ha̍k-hāu hō͘ lāu-su kiú-chèng bōe kòe koh lú chhám iā-kú-káⁿ?

Lán Tâi-gí lâng  kám bô  khah bat pó--sió-khóa?Iah-sī khah sū  he  tn̂g-bóe-soaⁿ-niû bōe-hiáu kò͘ kiáⁿ, bōe-hiáu chhī-kiáⁿ? Bó-gí chit tiâu nā tn̄g, chit cho̍k m̄-sī bia̍t-choa̍t tio̍h sī éng-sè chò lô ah lah. M̄-bián koh-leh ūi-tio̍h siū pek-hāi khàu pi-ai ah lah, ka-kī ê bó-gí ka-kī kiù, kám m̄-chai ?


Friday, 23 October 2015

hù chóng-pian ê ōe

hù chóng-pian ê ōe

Chū Tâi-gí thang ji̍p kok-hāu kà liáu-āu, kām Tâi-gí sū-gia̍p ū kan-gāi ê  lâng,  sò͘-gia̍h sī ū lerh cheng-tióng. M̄-ku, lán tō͘-oa̍h ê khoân-kéng nih, Tâi-gí siaⁿ-sàu khêng-si̍t kiông-kiông berh tn̄g-khùi khì ah. Che iā sī lán tī  Facebook khòaⁿ tio̍h lerh lūn Tâi-gí bī-lâi ê nn̄g ke̍k khòaⁿ-hoat.

Hiān-tāi seng-oa̍h ê ji̍t-chí, lán lân-bián hô sio̍k tèr lâng ka-ji̍p Facebook(FB ū-lâng kóng  lâng-bīn chheh, ū-lâng kō͘ liám-chheh, lán koàn-sì FB) chit khoán  siā-kûn bāng-chām.Chho͘-khí-thâu i lāi-tóe ū chin-chōe hó thit-thô ê games bián hùi hō͘ lâng sńg lâi khip-ín lâng ka-ji̍p, Tī hin ê lâng bô gōa-kú tio̍h chiūⁿ bān chiūⁿ ek, iā  ū lâng  lī-iōng i chòe kóng-kò soan-thoân ê kang-khū chō͘ ka-kī ê su gia̍p, iā ū-lâng chiah i khui-chhong sin ê sîn-hûn kap sū-gia̍p, chóng-kóng, lāu-jia̍t kún-kún.

Lán hôe-sióng lán ê Tâi-gí-bûn ūn-tōng le̍k-thêng, iā ū kóa sio-kāng ê só͘-chai. Chhín khai-thâu, lán iú-chì só͘ pān ê chhui-kóng oa̍h-tāng kap  iōng-sim chè-chok ê bûn-bu̍t khan-bu̍t iā chha-put-to bián-hùi pun-tiuⁿ hō͘  lán hiah-ê Tâi-gí hiong-chhin. Sī-kóng kàu taⁿ, Tâi-gí bûn ê chheh, khan-bu̍t, chhī-chháu lóng iah chin chhìn-léng.

Tī FB, lán khòaⁿ-kìⁿ lú lâi lú chōe lâng, siōng bô sī lán ê FB friends, iā bô hān-tiāⁿ chōe-hòe-lâng, lerh tùi-tiōng Tâi-gí, iah-sī bó-gí ê gī-tôe, iā chin-chōe kóng iā ū lerh chòe ê, khui siā-thoân káng-kái ê, lūn-piān-ê lóng ū, tio̍h chhui-sak Tâi-gí kàu-io̍k ê. Khoaⁿ--khiaih, sè-bīn nā-chún chin hó. Koh lán ū khìr chòe Tâi-lâm chhī gí-bûn pí-sài phêng-sím, iā khòaⁿ tio̍h bōe-su chhài-chhī-á ê chéng-hông.  Sī án-chóaⁿ Tâi-gí-bûn cha̍p-chì chhī-chháu iû-goân chiah-nih léng?

Tâi-lâm chhī, sǹg Tâi-gí-bûn siú-to͘, m̄-ku, chit-má ê chhī-tiúⁿ khiok kan-ta ē-hiáu sîn lâng ê chhùi-nōa, kóng berh kui-tēng Eng-gí chòe  tē jī  koaⁿ-hong gí. Si̍t-chāi hàm koa̍h-koa̍h. Kin-ki bó-gí m̄ kò͘, khì kò͘ lâng ê  chhùi-nōa phóe.  Che  pháng tio̍h sī Tâi-gí lâng phó͘-phiaⁿ siōng giâm-tiōng ê chèng-thâu iā-kú-káⁿ.

Lán tiâu-ti̍t lâng, tiâu-ti̍t siūⁿ, só͘-ū hó-thiaⁿ ê giân-gí, lóng m̄-ta̍t si̍t-si̍t lâi chòe. Tâi-gí bī-lâi su-iàu khí kó͘-mi̍h thang thn̂g bûn-hòa,  iā su-iàu kiàn sin-mi̍h chhòng-chok thang hùn-khoah lán Tâi-gí ê khong-kan, iā chiah thang hō͘ bī-lâi ê Tâi-gí oa̍h lo̍h-khì ê sin ióng-hun.   Só͘-tí, lán chia-ê nā-chún lerh chòe o͘-chhiú-ê, ū-sî iā tio̍h kiam chòe gōa-bū chhui-sak. Tâi-gí hiong-chhin ah, lán Tâi-gí kám berh pàng hō͘ sí?

Thursday, 22 October 2015

thiⁿ gōa koân

轉--來麻豆, 親眼 koh 確定 1 pái,lán chhím 轉台北ê 印象, 看--起來 淡水ê 天 真正加真 koân, 無 m̄-tio̍h。Lán 麻豆 ê 天 tio̍h 茫茫渺渺。

正港無piah--人, tú-á lán 出去看, 月娘 nā-chún 摸 會tio̍h leh。人間leh, ná in 講 ê 紅塵chhèng chiūⁿ 天,紅毛塗 隔界,電報線牽連 兼分割 siáng ê天 ho͘ i chi̍t 角 chi̍t 角。無的確平行世界起點 tio̍h terh che 電報線發明出--來ê 時。

有時lán 寫 ê mn̍gh-kiāⁿ, 人 講無滋無味,lán ē phái勢 lioh。是講 無sáⁿ-mih滋 無 siáⁿ-mih 味 leh? 聽講,chhōe he 滋味是作家ê 責任, 也tio̍h 是 i  ka-kī  ài 擔起ê 本職 kap berh 完成ê 任務。也是 chi̍t 種 美學觀點,換人 tio̍h 無kâng ê 觀點,也 ē 無kâng 滋味。Pháng 人度活ê 滋味 無tâⁿ,親身經歷,去chn̂g, 去 tam,了後 動筆 寫--落來,kā ka-kī 得-tio̍h-ê  滋味分張hō͘ 別人。Án-ni  講--起來,lán he 無滋無味ê 日子, 寫 成 無滋無味ê 文章 kám m̄是 tú-á 好? Siōng 無,有 老實呈現 lán ê 生活滋味。美感 leh kap  味感 saⁿ 連 sioh?無 ná ē 用 chit ê 滋味 來 分說leh?

窮實講,lán 究真去想,美學基礎 是 tī lán 人ê 五官感覺,chiah koh kā chia-ê 外來資訊傳輸入lán人ê 心智 hō͘ 人去知覺,引起人ê 情緒,也 hō͘ 人ê 知能去分析,了解,建立理路。 關鍵tī 情緒,lán ē kā 好ê,爽ê,讚ê 情緒 反應, 也 lia̍h 做 外界有 好ê,爽ê, 讚ê mi̍h-kiāⁿ, iā tio̍h 是美感。

聽講 下營 ê 鵝 lóng 絕滅ah, 連 鵝á kiáⁿ, nn̄g 也 lóng 無ah! Che 實在恐怖kàu 極! M̄-koh,人 kan-ta 煩惱 有錢 iah無錢 niâ。 Gōng kah kan-ta 顧錢 bōe pê chiūⁿ ê 族群 iah 是 社會主流。

Chit 禮拜, 心情 chiaⁿ siān,iū-koh 拜一睏bōe 落眠,致到身軀足thiám。 Chit 款情形, 人tio̍h 會 khah 悲觀--淡薄á,lán 講是 對別人 siuⁿ 樂觀, ka-kī siuⁿ 悲觀。 Kám 有影? 悲觀ê 眼光, kám 有 樂觀ê 種子?

Tuesday, 20 October 2015

gín-á ê bāng

TED演講:生活很簡單,為何你過得這麼難!

Lán gín-á 時 siōng 歡喜是, 禮拜 pē-á-母, lán lóng 放假, kui 家 閒閒 tiàm 厝, 看電視, 唱歌 快樂,有時 會 話東話西, 阿爸 恬靜, 阿母 會講 i 少年時 ê 戀愛古 hō͘ gún 聽。

Thiu phòng-se, 做 la-liān, ... 有ah, 做kah 無暝無日, m̄-ku, tī 我ê kì-tî, che lóng bô 算 phái 命, tian-tò 有 1 種 幸福感, kui 家口 á 做伙 做sit, phah-piàⁿ。無 chhiūⁿ chit-má tak-gê 五路去, 罕得thang koh 聚集重溫hit khoán 單純ê 溫暖感情。

Lán 也 幻想 ka-kī 大漢了後, ē-tàng 安穩chia̍h 頭路, 下昏 下班 沿路看夕陽 天色 kap 白鴒鷥 做伙 轉厝。 Koh kā 大部分時間 家人sio陪, iah 是 厝邊頭尾,  tàu-tīn 欣賞 日出 日落, 落雨, iah是 秋風起, iah 是 春花開, 暝時 看 月娘天星, tiām-chīⁿ 欣賞, iah 是 開講 講kóa 海王子 iah 是鐵船長 ê 冒險 ê tāi-chì。

輕鬆 m̄免 煩惱kat tī 目頭, koh khah 免 kat tī 心肝頭, án-ni lán tio̍h 感覺 幸福無比 ah, a-mén!


PS: 是講, 小王子, in he a-tok-á, 追求 ê 是khah 屬個人ê成就感, 出外奮鬥,開新天地。 Lán 也 真 him-soān。