kian-kiông kap léng-bô͘

Kan-ta chi̍t chōa 路程 tio̍h 奔波 5 6 點鐘，nā koh 算 回程 tio̍h 超過 10 點鐘久。 Lán 無計較chia̍h tòa，iah是小歇ê 所在都是流動ê，給料也無補貼，一切 tio̍h ka-kī hoa̍t-lo̍h，lán 也 順--in。Chóng ǹg-bāng 無應該 ê ǹg-bāng。 Terh 拜一， lán ê 心肝真正ná  lak 去leh。

 

事實，lán 是ka-kī leh 安慰 ka-kī，主要是kā in 留 chi̍t-sut-á 機會 kap 人情體面， lán chá tio̍h 知影 in tio̍h 是 án-ni  m̄-bat 世事 koh m̄ 聽人講話，hô-hóng教育。

 

所致，同事講，建議lán 教書tio̍h好，m̄-thang 想berh 教育in，lán 一直bōe 死心，lia̍h tio̍h 機會tio̍h 發揮，是講真正死kah chin phái 看 to̍h tio̍h！

 

Lán 也 知影， 學生kàn-kiāu老師， 是常情常理， lán 也 án-ni 安慰 學生。是講 kàn-kiāu liáu， chóng--sī ài ka-kī koh chhōe 出路chiah tio̍h ah。Iā ài 去了解 ka-kī 所tú--tio̍h-ê 是siáⁿ-mih 困難 阻礙，ka-kī 無法度應付是siáⁿ 因端 ah。汝 kā chit-ê 人 消滅，汝 ê 問題kám tio̍h 解決ah？ Che hō͘ 我想--tio̍h，另chi̍t ê 學生，大學三年 á，作業 iah tio̍h kap in 老母tàu-tīn做。Lán 實在... 無法度 chhoh-kàn-kiāu ah。

 

是講，Lán ê 心也是 肉做 ê，oan-na ē hông chha̍k 破，oan-na ē 流血。In án-ni 講 bōe輸 lán gōa pùn-sò leh。M̄-koh，lán chit-má kan-ta ē-tang 要求ka-kī 對上帝，對ka-kī ē 得過。Ǹg-bāng in 學 有起，tio̍h 看破。Lán 一直認定大學生m̄ 是幼稚園 iah teh chia̍h 奶，chit 幾年tio̍h 覺醒， tio̍h 接受現實 ah。

 

Lán chiah m̄是 chhiūⁿ i 講 ê hiah 強大ê 心。In lóng kan-ta lia̍h lán ê 話有刺niâ，bōe-tàng 體會lán ê 好心好意。Lán 實話實講，koh 是針對tāi-chì，lán 在來 bōe 針對人，in 無leh信táu， 也 tio̍h 擋bōe-tiâu ah。何況，人人心理差不多lóng tài 傷痕， 也lóng chiâu 是 刺。

 

Lán 自大學tio̍h 開始訓練ka-kī，聽話聽入心 講，lán 發現講 老實話lán  siōng自在，無khòa 別人m̄ 愛， bōe kham 得承受，朋友也 án-ni，koh chi̍t-ê chi̍t-ê kap lán 拆lī，漸漸 lán了解，人人背後chi̍t 大phāiⁿ 故事、委屈、因由，總--是 lóng 罕得肯 照實講， lán 也tio̍h lú 來lú 無愛講話 ah。

 

Chit ê 事件， 反應 常人bōe-hiáu面對困難，無才調講問題，kan-ta ē-hiáu 發洩情緒， hō͘ 情緒拖lerh 走。而且， 造成chit khoán 困難問題 iā m̄是 chi̍t kang nn̄g kang，上課大部分時間lóng terh hôe 手機 á，開講，睏，bōe 自覺， 下課mā bōe 用時間去 了解內容，去研究。