2015年11月30日 星期一

Tām-chúi ka-pi-tiàm

路草 saⁿ 百tang chia 收ê新民
透早月娘
對生活 紅磚 á 牆堵中學 káⁿ bōe-tio̍h
小 kā ak-chak tāi 放 lerh mah
Oat過文化 Rhine tī 淡水
舊街路去 chih-chiap 探聽leh

Taⁿ,汝 jōa 久無taⁿ頭看天 ah
日--時暝--時,汝chiâu teh趕狂東西
無 chùn-būn che he
Chiâu 放hō͘ 精英專權改換
滬尾光景 汝知--無
水碓崙 á 頂 看--出去
月暗淡水烏濁船燈光 hàiⁿ來搖去
永樂茶店 àm-sàm chi̍t pha 粉紅
Káⁿ 無人chia̍h 菜 ê 龍山寺

金字 金 iu 金 iu
樓á厝大路邊起 kah koân tuh 天
Khah贏崎頂街祖師廟
燕 á 飛天

飛過黃昏海岸chi̍t時黃金
砲台埔鐵砲 teh顧守 chit 窟
海水直直溢來溢去 擋bōe tiâu
紅毛起城落去
傳教烏鬚番街醫館koh peh 崎
Hia 有真理縛 tī Oxford 學堂
頭前活水tiām-chīⁿ 浮影
Chit 跡 chit-ê 冬天鬱熱鬱熱
Seine河邊 Paris有淡水咖啡店

PS: 延伸閱讀 從「馬尼拉手稿」看16世紀的雞籠人與淡水人  文/陳宗仁

2015年11月29日 星期日

chhim-tang loān bāng

chit ê 夢, kài 清楚。

Lán 夢 tio̍h, Sêng-hiân 兄 lâi sio chhōe-chē。 Lán tī 台文系辦公室thèng-hāu i。I 人kàu 了後,
soah 開始 動手煮料理,真簡單ê 料理。 Lán kā mn̄g, án-ni kám 免 加摻kóa 菜? I kóng 有 也 好。 Lán  kā 講, 有lah, 離 chia 無gōa 遠,我 載汝去。出門ê 時, koh lerh 想講 足近, 隨thang tńg--來, 所以, 火 iáu 無禁, kan-taⁿ 禁 khah 細niâ。Bóe--á koh 想想leh 無妥當,禁火chiah 出去。

行kàu,外口, 路草 soah 足生份,saⁿ oat sì oat, 行m̄ 知路。Kài-sêng 新民街 hia,m̄-koh,菜園是 tī 麻豆往學甲lioh,ah 台文系辦公室也terh淡水。Soah koh 看tio̍h 有人 lerh 拖車,頭chi̍t台, kō͘  jeep 載 走,lán lerh 驚hiâⁿ kám ē 拖 lán ê, 趕緊berh chhōe,kap Sêng-hiân hiaⁿ 分頭去揣。Ǹg-bāng in 拖chìn-chêng chhōe tio̍h, m̄-koh 巷路 實在生份。

Chhōe 1 tia̍p-á 久, 隨看tio̍h lán ê 車也 hông 載去, 車後斗 koh hō͘ in kiāu phái 開開。Lán hn̄g-hn̄g 看tio̍h lán 後斗貼 彼 nn̄g 塊 黃黃反中國課綱ê黏紙認chhoaih ê。Lán 緊 隨 chhōe 警察, in chhēng 青色制服,有 白色反光帶。 Kah i 理論,i 口氣 sǹg ta̍h 硬,m̄-koh, soah the̍h 1900 hō͘ 我。

Lán soah 精神。 Lán 想phah-sńg he sī 警察berh 作業績niâ iā-kú-káⁿ。Ē 記kah chiah 清楚, lán 也 感覺sim-sek 稀奇。

2015年11月28日 星期六

châu-khut ōe

榮光 kap名聲 chiâu 有
機緣 tài kóa 世俗臭hiàn
錢銀 siōng有路用khah 實在
Caesar chiah 有 khùi力 起造
Tú 天功業

是講 天khòng-chhiⁿ tiām-chīⁿ
塗 kha 人 趕狂東西
聲sàu 對 mài-khuh 吐出來
擾亂 tài 詩意hia-ê白雲
Soah 牽絲牽絲

搭 liâm時 念詩ê 台á hō͘ --人
講 he 面前話 無sêng lán 人話
Oh tit 聽明 hia-ê 理路
有gōa 崇高 gōa 美妙 汝 kám 知機
機會hoān-sè 人人有 iā-kú-káⁿ
M̄-koh,人leh ?Caesar leh?

tok-bo̍k-chiáu

為tio̍h 桌椅,3 ê 教授 kàn-kiāu kui po͘,
知識聖殿竟然 椅桌 to͘ 做 hiah爛, 凝心
Koh 致 kàu lán hō͘ 同事 恥笑 無格破格
講 lán bōe-hiáu 堅持保護言論自由
美麗ê 面前話 確實 有chhàng 崩敗 ê 種子
Thài-thó 凝心? 不如看鳥 che chi̍t 對 小啄木鳥
來 tàu鬧熱
Lán 心悶
Kám 有 才調 kā 聖殿ê 蛀蟲 清除leh?

鵝 kiōng-berh 絕種
Chhun 鴨 á 聽雷 ê hàm-kó͘
鳥 á che 發狂了後
Chit 對 小啄樹鳥
Thài-thó m̄是 pigeon
送來希望ê 橄欖葉

Noah khiā 船頭心悶心悶
A-pa-pē 四十kang ê 旨意
直心人想無上帝恩賜
汝 也免koh想
上帝 kiáⁿ兒kan-ta 上帝 ē-tàng 管教

做船ê時 i mā m̄知
人間奸淫污穢 tú 天 hiah koân
致kàu  Pē 悲哀 tńg 憤怒 lú 強狂
直心人 Noah 也是gōng 人
無頭殼 照旨意做
一直kàu 四十kang 雨停 iáu-koh m̄知
放烏鴉 去 soah 無消無息
I khiā 船頭 心悶
隨 koh 放粉鳥去

來ê soah 是 chit 對 小啄樹鳥
船也無蛀蟲

感恩節大揭密:為什麼安潔莉娜裘莉不過感恩節?

Thanksgiving Day

Lán 在來m̄是 上帝 牽教ê 族群iā-kú-káⁿ,厝nih sī-tōa 人 siáⁿ-mih 神chiâu 拜,祖公媽也拜,石頭, 大樹箍 也 thèng好拜。 拜求心安,也bô人thang 干證tó 1 ê khah siàⁿ,khah 靈感。善書讀kui 百本去,應驗文看來看去,lóng chha m̄-chiâⁿ mi̍h,kám ē 抄來抄去 haⁿh?總--是,gún 阿母所求, 無 chi̍t pái 應驗, che 是確實。

Lán 看 i 拜,理解做 lerh o͘-se 巴結hia-ê 無形ê,的確是世間布賂ê 延伸應用也無的確,tio̍h是講lán ê 神 tio̍h kap lán 交換條件chiah ē 保護--lán,賜福賜平安 hō͘--lán。 人間道理pān-phoe án-ni 無siáⁿ têng-tâⁿ,所以講 lán chia天神 kap  人cheng-chha 無gōa大,也有人愛講 "天人合一" ê 宇宙人生觀,生活哲學,kài 有chhàu-iāng ê 意味。是講,án-ni lán lerh 拜sáⁿ leh?

所致,lán 看lán 人足逆天ê kiâⁿ-pàng phah-sǹg 也真phó͘-sū-phián。天地無條件賞賜,i 看做是ka-kī 骨力,phah-phún,phah-piàⁿ ê 成果,另chi̍t 方面 koh tiāⁿ siàu-siūⁿ thang 不勞而收獲。Bōe thang 體會 lán 人ê 一切,nā m̄ khéng 認上帝,事實lóng 完全是 天地賞賜。O̍h bōe ē 感恩, kan-ta ē曉 條件,利益交換。

Lán看lán ka-kī 過去一直也是án-ni,soah 對 in chit ê Thanksgiving 真心反感,ià-siān。M̄-koh,lán 也無, 也bōe 因為lán chit 款態度,得tio̍h 任何好khang。有--無?交換慣勢koh puh--出來ah。顛倒, hō͘ 人看做是無文明,無教養ê 番,比 真正ê 番 khah 番,人in 不時 lóng teh 感謝天地賞賜。Lán人leh?

Lán 講老實,lán "感恩" chit ê 美德是牽手ngī-tō͘ 教出--來ê。I 出世tio̍h tòe sī-tōa 信上帝ê 教義,內底 chi̍t 項tio̍h是 隨時o-ló 上帝ê 工,隨時感激上帝ê 賞賜。Án-ni, 人看--起來, ke 真chiâⁿ 人, 真正!

2015年11月25日 星期三

hún-chiáu

天光 總送人siōng 開闊 ê 美景
無! 是創世日頭
也 kā 好人 chhiō光
也 kā phái人chhiō光
自 光 kap 暗分開 hit 日
I 看是好
Lán 看 也是好
日頭花
掖 lerh 聖殿紅磚 á 路
也掖 lerh 水波池
也掖落 MANNA
Kan-taⁿ hit tīn pigeons 粉鳥
貪chia̍h 餌料
Bōe 記得 橄欖葉ê 任務
Kā tiām-chīⁿ ê peace phah 破



2015年11月23日 星期一

Sim tio̍h-bôa

上帝巴別塔ê 用心
Lán 順服靠北旨意
人soah 不時 tio̍h phun 馳 bōe soah
石磨á 心 án-ni 真chia̍h力
Wise men 有講心 tio̍h 磨
心 tio̍h 磨 soah 也著磨
為 siáⁿ事 著磨
Lán 想是心帶刺 tio̍h磨
Wise men 講
心tio̍h傷 tio̍h ē 發刺 iā-kú-káⁿ









========================
23 November

路尾, 著磨 ê 結局
Ē是siáⁿ ?
Pān-phoe lán sa 無 cháng iā-kú-káⁿ
心願天頂 A-pa Pē 引chhōa
Hō͘ lán bōe 後悔也 bōe見笑
Koh-khah 要緊 
無得失 A-pa Pē
也 心願 A-pa Pē
賜福hō͘ 台灣 kap 台灣新生代代
Hō͘ in 免得 kàu 經歷承受bōe起 ê試煉

A-mén

phiau-liû


Lán tio̍h kiâⁿ 進前
頭前 àm-sàm chi̍t phiàn
無thang選擇 ê àm-chīⁿ 光景
心 m̄ 肯隨波漂流

激力逆流 soah 波紋暗淡
Tòe che twilight 漸漸 ka-nn̂g
出發 berh ǹg tó chi̍t 方?

潮流既然 tiāⁿ-tio̍h án-ni àm-sàm無明
Lán 也bōe得 thang 入
管thài--伊
束信 chit 隻孤帆 thiau工出航
Put-kò
天色berh tńg烏隱隱無明
大風將透 聽講北風
漸漸
我看見 che 黑暗中
也聽見 àm-chīⁿ nih
有不安 kàu 無限驚懼

2015年11月19日 星期四

chòe-āu gán-kong

和平粉鳥
閒時 teh 圍 lerh 大殿 se̍rh
本成照早暗三支清 hiuⁿ
儀式進行nn̄g 千gōa tang
lóng 照起工莊嚴 展現
Siak 落厝頂 thèng-hāu
在野 ê 最後眼光
Ē 怎樣 ê 光景?

2015年11月18日 星期三

se̍rh koe

Lán 細漢tòe pē-bú koh 有 阿媽度日,phah算 cha-po͘ gín-á 疼惜少缺,góa hia-ê 姊妹á tio̍h 無
thang 有我 chit 款ê 樂暢。M̄-koh,總--是家伙無 liōng-siōng,也chia̍h口chōe,錢項tio̍h khah ha̍t, tiāⁿ-tiāⁿ terh hah-tah hah-tah。 Án-ni, 所致,四界行踏 也tio̍h khah 少,khah chōe 是 chhin-chiâⁿ 五十 有好bái事 sio 請,chiah thang 去離厝khah hn̄g--sió-khóa ê 所在, ah 也無thang 加去認bat 了解當地ê siáⁿ-mih 人、物、地、景、產, koh hit時 iáu 細漢mā bōe曉。

Chit pái thàn 赴宴 提早kàu,時間khah liōng, lán tio̍h 去 koh se̍rh。  行 kah khah 早 bat 去chia̍h a-bu-la-ke hia, chia̍h chi̍t óaⁿ 肉圓,nn̄g lia̍p。 以早 lán lóng 人服務周至,坐tio̍h kā chia̍h,chit pái 坐leh soah 無thang chia̍h, 原來 in tio̍h ka-kī 先納錢 ka-kī phâng。 Chit 種炊 ê 肉圓 lán khah 無路,滋味也普普,khah 鹹niâ。

Tio̍h lah, 宴sī 叔伯阿兄嫁 大漢cha-bó͘ kiáⁿ。講--起來,chin 稀微, 人ê 感情, 親chiâⁿ ê 感情 terh chit ê  社會時代大lián pháng 落去,chi̍t 絲á 也 sa bōe tiâu。I 偏名叫 生--á,犯khia tio̍h 阿叔,所致學名無kāng,gín-á 時,阿ḿ bōe曉教kiáⁿ, 專kō͘ 摃ê, i 走無路, lóng 來 hō͘ gún 阿母 惜。 所致, kap gún 阿母 感情 bē輸母á囝, gún 兜 siáⁿ 艱苦困難, 伊 lóng 無怨無悔 出錢出力出感情!是講ē chi̍t 代,無siáⁿ 來去。原因 oh得 póe會 ē 清,tio̍h gún 兜 有人ka-kī 烏白變 lah,chi̍t ê家 soah oai-chhoa̍h 去,人mā 真諒情,不時來探, lán chit 頭 做人han-bān...

I 對面hit 間 bōe 牛軌糖ê iáu 有terh 做生理, m̄ 知有chhiūⁿ 文化阿給店 賣--人 iah 無,印象nih,hit-chūn in chiah kā 店面盤--起來niâ。渡船頭整理kah chiâⁿ 新嫣, 渡船也 加真清氣siùⁿ, án-ni tio̍h súi。無詳細kā 看 船班,kan-ta確定 有 kàu 八里,  koh 有kàu 另chi̍t ê 所在,iah 是 khah 外口? Ē-sái 用悠遊卡。

來淡水,ē記ê siōng 早,我已經teh 讀大學ah。陪同窗ê 來會cha-bó͘ gín-á,hit-chūn 火車iáu 有thang坐,kan-ta chi̍t 種慢車。 Lán 也有hip 相 做紀念, 無gōa 久, 鐵枝路著 拆sak,改 hō͘ 捷運電車走, lán 想無hiah 大ê 計劃,kan-ta 條直想講為siáⁿ-mih,ná m̄加pho͘ 1 條 鐵枝路?汝看 chit-chūn ta̍k 班車 都插插插。

Hit-chūn koh tiāⁿ-tiāⁿ 聽講 he 飆車族 tī 大渡路 phe ê新聞。後--來,參加台灣研究社,chiah ē曉看chit 跡 庄社ê人文kap歷史地理。Koh 有來 幾ā pái, 淡水舊街kap 祖師廟 sió-khóa 有印象,koh 講 chia 有全台灣siōng 早 外國人起造 ê 下水道, 紅毛城, 小白宮、砲台 hit-chūn kám 有看? 無印象。阿給,鐵卵,海產魚箍 lóng 是 tòe 人 chia̍h, 無特別感受, 也bōe 記得tī tó 位chia̍h。印象khah 深ê,過八里 chiah 孔雀ham,赤翅á。

有chi̍t pái tio̍h 是 kap A-hun á 來,寫tī 1991 年ê 自立晚報 hit 篇〈滬尾黃昏行〉,lán 透世人頭chi̍t 篇台語散文。M̄-ku, A-hun 伊講伊無來。疑~~ Lán bat tòe i 來 夜遊,koh 有行金山hit條路,吹海風看光景,chiah 鴨肉。 尾--á,也有來 竹圍基督教病院探訪lah,koh 姊--á 也 pat tī hia tòa院。 講 che lán 心tio̍h 酸,khioh 起先mài 講。

Siōng 北pêng ê 紅樹林,有風聲, kàu taⁿ 也無親身行kha kàu。顛倒,三芝pat 去,有社團同學,也有kāng班同窗三芝人sio 招。三oat 四oat,根本m̄ 知南北東西,phēng lán ê 記tî 無可能chhōe 有,連渡船頭 tī toh 都茫茫渺渺leh。Tio̍h是lán tùi che 地號名,風水方位記tî chiâⁿ bái iā-kú-káⁿ。

Só͘-tì, lán 深想台灣人是按怎記tî 普遍足bái,尤其lú 大條ê tāi-chì, lú 記bōe 清,記bōe tiâu!Lín 知無? Lán pháng chhōe tio̍h 答案 ah。


2015年11月17日 星期二

Paris ê sū-kiāⁿ

別人gín-á 死bē 了,做兵為國去hông刁,破病m̄ hō͘ 去醫療,冤枉死亡恨難消。
 土匪政權khàm 頭頂,天理tī時會清明,直路thang kiâⁿ bē 僥倖,m̄ 免枉死大頭兵。
見講都是政治tāi,理路白白kám m̄知,走閃bē離足厲害,短短幾年看kah 獃。
 汝m̄ chhap 伊伊 ah 汝,管理利便據在伊,放棄權利汝ka-kī,現代社會tio̍h知機。
寶貴選票烏白tǹg,惡業tio̍h ē 繼續thn̂g,kiáⁿ孫受害bē 按算,看che 汝kám bē心酸


13 日, Paris 有 3 位 發生爆炸事件,真緊 法國總統tio̍h 發表, 講是 恐怖攻擊,koh 宣佈 kā 國界封鎖。

Lán tòe 人哀傷,反省, 也緊手 換FB 頭相, 來 標示 lán ka-kī ê 態度。 有人án-ni, 鬧 kah kap 朋友 拆破面, 事實 in 也m̄-bat 見面。 Che hō͘ lán 心肝bōe清hiu。 Lán 今á日 靈感tio̍h, lán ê 日子, 過kah chiah-nih-á 無閒 koh 封閉,是 怎樣,FB tio̍h ta̍k 日 開,ta̍k日 不時起lih巡,ná-sêng 斷bōe離ê 癮頭症?

也是án-ni lah, lán 足驚hō͘ 人 看做 涵孔龜,古井水蛙,欠缺國際觀só͘-tì。Lán 為防備媒體kā lán 污染,愚弄 20 外tang 前 tio̍h kā 電視 piàⁿ--出去ah, 牽手態度mā án-ni, che 是lán ê 福氣。是講, lán 猶原ē驚 kap 世情脫離siuⁿ hn̄g, siuⁿ 疏遠,iā ē驚 無現代人ê 國際社會觀,koh欠缺人類共識, lán 開FB 連結chi̍t kóa 朋友, 利用in ê 國際觀 來彌補 lán ka-kī ê。

Che 竟然也 難免, hō͘ in ê 眼光束縛tio̍h, 就算 lán 朋友真chōe, 真多元,究竟lán 篩選kòe, kap lán 意向也 差 m̄-chiâⁿ mi̍h, 按呢。

總講, lán chit 幾 禮拜 siàu想 ê work, soah lóng 一直hē teh  頭殼內,連 影跡 也 無,恐驚liam-mi, tāi-chì 過, lán ê 記tî 也tòe leh 消無。 也 che tio̍h是 lán chit-chūn siōng 驚ê, 一事無成,kan-taⁿ khong-khong tòe 人 喊喝 國際觀 國際觀, 人道人道。

台灣ê 事件也khah chōe 貓á 毛,khah 近ê林奕華 高中課綱,兵á 枉死,PM2.5,外交部護照,khah hn̄g ê,台灣經濟,母語教育,228,直直來
,也 lóng 無解決ê 報頭, kan-ta kui 台灣leh siáu 選舉, kā ǹg-bāng 寄teh 正月16, liam-mi kàu ah neh!


2015年11月16日 星期一

ki-chhia-thâu ê Romantic

人束信 thèng-hāu môa年櫻花開
足 chió 人
看 I 烏金烏金
古錐古錐 ê 身軀
無 koh 來來去去 tín動
換chi̍t 款榮華ê  新車頭
是講,永bōe thòe 時行 ê Romantic
情緒 iáu teh chia 不時上場
搬演男男女女 也 來來去去
輕輕 á 互相溫存巴結
行對河岸渡船頭 ta̍uh-ta̍uh-á 是
電火iah teh 閃熠
海 nih ê 觀音山 phōa 1 鉤 金金 ê 月娘
Ang-á 頭 bōe 輸溪水 iah 天色
Siōng 好情人 sio 攬
Kap lán tiām-chīⁿ 聽歌聲
Tùi 海 hit pêng 浮踏過來
有 The Earth ê 節奏
 Lán ê melody ta̍uh-ta̍uh-á spends out


ok khia̍k-khia̍k kóng bōe-hiáu

台灣母語無地位,家己又閣𠢕奇攲,21世紀強欲死,選舉若到像白痴。
選舉才通有提起,平時放咧據在伊,放屁狗心安未是,選票過手看白痴。

 頂pang, lán pho͘ lán ê 手誌簿á, 結局 soah pháng 去~"~
------------------- 偶然 被打頭了 ---------------
你進到書店是否所有的中文書都讀得懂?
或是 退一萬步, 你小學的所有課本,你現在有把握都全明白了? -
--------------------------------------------- 為何一直在說, 你寫那個台語誰懂?

2015年11月6日 星期五

Kng

報盡 kui-ê 秋天
共識九點二紅chi̍t phìⁿ 葉
樹頂
風 teh 樹 á kha 流轉
khah 過 hia 水流轉
看bōe-tio̍h káⁿ tio̍h m̄免 khòa意

Pān-phoe liam-mi 入冬
風 吹 tio̍h人 kám bōe 致覺
Chhiⁿ 冷
無 mā 紅葉chi̍t phìⁿ
報頭 現現
有目睭 ê  tio̍h 看
有耳 ê tio̍h 聽
先知曠野 teh 吵chhùi 

2015年11月3日 星期二

hioh-tàu bāng

[hioh tàu 夢] 人 ah, m̄ 敢去面對 ka-kī ê 脆弱 nńg-chiáⁿ, 連看都m̄ káⁿ, kap gún 兜 烏麻á kâng款,汝kā i khap tio̍h i 也ē 起性地。Kan-ta 甘願 ta̍k 日 睏so͘-so͘,chia̍h 飽飽,外口無pōng 炮, 無落雨tân 雷,chiah 四界 bóng lau thit-thô。

汝kā i 講,汝 m̄ 是 狗á, 報i 身軀有寶貝tio̍h是珍珠,i m̄-nā m̄信顛倒翻頭 kā 汝咬。 Soah m̄知, 人 nā 按 ka-kī 脆弱 nńg-chiáⁿ ê 鍛鍊, he tio̍h 是 lán 身軀 ê 珍珠。

無目睭 thang 看, 無 耳孔 thang 聽,kui sin 不時 刺 giâ-giâ, hō͘ lín ioh 看 是 sáⁿ 貨?

馬太福音 第七章第六節 ê 教示, 是講, án-chóaⁿ 知影 豬 iah 狗耶穌無kā lán 教! a-mén

2015年11月2日 星期一

mî-mî-á hō͘ tú-hó

綿綿 á 雨 tú 好
Kā 路燈 ê 刺目光鬚  phah phú niâ
也 kā 頭前ê 路 phah kah hóaⁿ-hóaⁿ
Gín-á 伴 chhêng-chāi sńg kah 天烏
老母 hiám-hoah 幾 lō 聲 chiah 甘願
Chit kak
Khau 風 塗 kha 兜 bōe tâm
是講 hit chūn 回南風起
Lán kan-taⁿ 顧 lán ka-kī ê 飛龍機
Teh 手 nih  hiah-nih 寶惜溫柔
Siōng 路尾 thài ē tiāⁿ-tiāⁿ kan-taⁿ chhun lán tī hia


Ē 記得阿姊 chiah lâi kā lán 牽
Hiah-nih-á 寶惜溫柔
阿母講 天烏 ah 叫汝緊轉去
Kha 手洗洗 leh thang chia̍h 飯
Lán 乖乖 kap 小妹 chia̍h 飯
Koh 乖乖功課寫了 chiah 問
Ah 阿母 leh ?
我 m̄ 知, 加班 ē 款,汝 seng 去睏
Hiah-nih 寶惜溫柔

前後事件重重疊疊 tī 記持 tǹg 印
路尾 soah 因果擾亂
連 siàu 念 都無力
Chiah 無 gōa 久 chìn-chêng ê 日子 niâ tio̍h 混沌 phú-phú
頭前 ê 路途 看 也是 hóaⁿ-hóaⁿ

PS: 講 beh 學習 感恩: chang 暗 七點外 kàu, 顧口ê 大哥 ná teh 練 golf, tú 好 有 1 ê súi 姑娘á 按 人文學院 出, Lán 緊緊 走去, oan-nā bōe 赴, lán 拜托i, I 真 溫柔 也真仁慈kā lán 開門 Tih chhìn-chhìn 綿綿á 雨暝頭 特別 溫暖 願 上帝賜 i 平安 喜樂, a-mén


Iū-koh leh siá he ah

 Iū-koh leh siá he ah bô thâu bô bóe Khoài pō͘ oh kái--ê  In-iû lâng bat  kā i kiò-chòe si-jîn sim-koaⁿ tòe kha-chhng phû kah pòaⁿ-thiⁿ-tén...