Chìn-chêng有 hit lō 已讀不回 造成悲劇ê 新聞無。Lán tīr 虛幻ê社交網站, lerh做人, kiâⁿ做, 事實也真虛幻, 不而過, lán kā 當做第二身份, 態度無 放lēng, kāng-khoán tiâu-ti̍t 做人。 有時, lán ē 迷茫, lia̍h 準 chit-ê網路世界 比 lán 肉體世界 koh-khah 真實。所致, lán chi̍t 出聲 tio̍h ǹg-bāng聽tio̍h 回音。 Che 顛倒夢想 niā-niā。M̄-ku, 痴迷者痴迷, 也tio̍h以虛假來修真實。 無入迷城, 怎樣渡迷人leh？a-mén！
Lán 耐性sǹg bōe-bái, chiah thang chhōa tio̍h好牽手, 輕鬆快樂後半世人。 有時lán 看tio̍h chi̍t kóa新聞事件, chhóng-pōng m̄ 是趕狂 ô͘, iah 是 真快 siūⁿ氣ê 人 造作 bōe-tàng 彌補 ê 後悔tāi。 Lán 真正無法度同理, 雖罔lán 知影 he 也是 人性常情。 總--是, 離經 無知ê tāi-chì koh ē 不時上演, lán 所知所khiā起 soah 變做 顛倒khah 離經。Siat-thái 顛倒眾生 ah。
Lán terh 車頂, chia̍p-chia̍p看 tio̍h chōe-chōe 人, 手時時不離手機á smartphone. 是講, 有影, 有歲頭層次ê 差別, 不如講 語言層次。 Lán看tio̍h chōe-hōe o͘jisang, o͘bahsang, 概無giâ 手機á, koh ē 互相講話, 開講。 Khah少 lán ê 歲ê 人, 男男女女 tio̍h khah 無差別 ah。 有ê chiūⁿ 車 tio̍h 一直講, 聽ê 人 kāng-khoán 目睭, 手 不離手機á, 致kàu hit ê 講ê 人 chia̍p-chia̍p tio̍h 重講, koh 大聲重講, lán看 i bōe 輸 過動症頭。有ê, 耳á lah-pah 掛lerh, lán也 聽ē tio̍h i 聽ê 歌, iah 是糞埽笑詼。
Cho--日, 趕坐bus, 人khoeh 人, koh 有 4 5 ê 兵, 大包細包, kā 車門 tha̍t kah bōe 出入leh。 汝也知, 憂憂卡 lóng 設tī ùn-chiàng 邊a, 所致, 人 berh koh 起來 也lù bōe-tio̍h。 Chit 時 司機大ê tio̍h 叫已經上車terh 邊aê 小姐人 替hiah-ê 人 lù. 人 mā lù kah chiaⁿ soah 手。 是講, 面lóng 無表情, m̄ 知有歡喜iah無。 橫直, hia ê 人 lán 看tio̍h lóng 感覺 孝男孝女面, m̄ 知tī時tio̍h ē 發作 terh lán chia 。Chit-má lán 都市人 m̄敢 互相對看相借問, iah 是 kan-na lán 感覺án-ni niâ, lán m̄ 知。 Koh-chài kóng, he 司機大ê m̄ 知是刁工 iah古意, 車 真走tio̍h bōe sù-sī, lán khiā lerh mo͘h 柱á, 也 bōe 堪得 i hàiⁿ。 看別人, kāng-khoán lóng 無表情。
Koh 有 chi̍t 項： chit-kú, 公車車牌á lóng 集中做伙, 是利便siáⁿ人咧！ 十幾條路線 kan-ta 1 支 牌á, 人 等車, 少ê 時 無問題, 人nā chōe, tio̍h 問題來ah。 排列算lán 台灣國民ê 水準, chit 時, soah m̄ 知 berh 怎樣排, 車nā 來, 是berh按toh 位 開始 上車leh。 Che, lán也 困擾, 是講 phah算有90% ê 人kap 路線重疊, 所致 無人complain ê 款。 Lán tio̍h 看tio̍h 排siōng 頭前ê, 也無的確siōng kín 上車. 無排列ê 人, 顛倒 khah kín, m̄-ku lán 也 oh得講siáⁿ 貨。
Chit pái lán 無berh kóng khioh 怨. Berh 來講 耐性, 耐心. 汝看, 人人對 手機á lóng hiah 有耐心, 好禮á kā 愛護 珍惜 chng-thāⁿ。 事實, 手機á無ta̍k 支 好, tio̍h 看 品質 kap 牌子, koh OS 系統. M̄-ku, 無論 toh chi̍t ê 規格, lán lóng 嫌i, bōe-tàng 隨時 反應, koh kah kài chōe lán 透世人bōe berh 用ê mi̍h。
He bōe ēng tio̍h ê mi̍h siōng 大ê 欠點tio̍h 是佔資源, 佔資源了 koh 妨礙機á 運作, lán koh 無法度kā 清理tàn-sak, che kap PC 電腦 sio-siāng lah。 Tio̍h 是講, lán 開錢 bóe lán m̄ 知 koh bōe 用tio̍h ê mn̍gh-kiāⁿ。 Che kám是 lán 知識 不足 niā-niā？
汝kā 想, 開發 OS 需要 gōa chōe 知識？ Lán chi̍t 人 niā-niā kám 有才調 bat chiâu 透？ 也 kám有需要bat chiâu透？ 答案真顯明. 所致, in 大企業 總kā 產品 設計tī 總包ê 概念lih。 Che lán 先hē leh。
OS kap 機á tio̍h kah hō͘ 好勢, kan-taⁿ apple iphone 有án-ni ê 想法 kap 做法。 其他ê lóng 是 kō͘ tàu ê, 硬體 選選leh, 軟體khiā tī linux 基礎 發包 叫人改裝, 開發。 有gâu-ê, 好ê, 也 有 chhìn-chhái ê, koh 有 pháiⁿ 心ê , kā 汝 偷藏 mn̍gh-kiāⁿ-ê, chit 款m̄ 是 咱 tú á 講ê lán ēng bōe-tio̍h ê hit 堆, 是 i 有 特殊路用 ê mn̍gh-kiāⁿ。
Án-ni, 人lerh 使用ê 時, khioh 起個人需求, koh ū 機á ê 本質差別。 總--是, lán 看 眾人 lerh用, lóng 真有耐心 去download, 去 調教, 了後, koh 用 siōng 大ê 耐性 忍耐 i 有時 無回應, 有時當掉, 有出chhê, siōng chōe kiāu--chi̍t-ē niâ, bōe khòa tīr 心肝gōa 久, koh ē 體諒 i ê 狀態kap 能力 不足。 論真講, che chin 值得lán o-ló--i。
是講, chiah-ê 人 lerh對待 別人 ê 時, kám 有 chit 款ê 耐性？ Lán 講ê 社會, 家庭事件新聞lih, 在在 顯示, 眾生顛倒ah。Koh-khah 免講 he, 網路 bat 幾分鐘á tio̍h ē-sái kā 人, 錢拐--去ê。
Lán頭殼chiah 大khian mā 想bōe曉得。
沒有留言:
張貼留言