chia̍h-pn̄g

台灣人tiāⁿ-tiāⁿ lerh 講 chia̍h飯皇帝大, 應當 真看重chia̍h-si̍t chiah tio̍h. Koh 路頭sio-tú, 開chhùi相借問ê 時 tio̍h 講 "chia̍h 飽bōe？"  Kám m̄ 是 kài 對重 "chia̍h飯" chit chân tāi-chì ê 表現leh？

是講, chit 幾年 ná chiah chōe 食品, 食物 ê 安全, 信用問題, koh lú hàm ê是, chiah ê問題 lóng是 心態不良ê 人 造成, 了後 罪犯 koh lóng 無 tāi-chì. in 錢照thàn, 所致 台灣全境 食品問題照出。

Lán mài 講 khah hn̄g  統一 ê 問題。 Lán 就 看 最近 屏東 發生ê. kan-taⁿ 煮 白飯, tio̍h thang hông 報 ê tāi-chì。 有雜誌人講 廠商siuⁿ 過頭烏心肝, 連 gín-á 錢 也berh chia̍h, 也有人, 連 政府也跳出來解說講 he lóng 合法, chit chân tāi-chì 是 he 雜誌講了siuⁿ 超過。如今, ná-sêng 是非難明, kài 在人 去講。

Lán 無berh lia̍h chit 點做話柄, lán chia來講 是 án-chóaⁿ lán 台灣 chiah chōe 人 bōe-tàng 好好á chia̍h chi̍t 頓飯？是cháiⁿ-iūⁿ, chiah chōe 人 自細漢 tio̍h 慣勢無tīr-lerh 厝lih chia̍h飯？ Lán 認為 chit ê現象, kài 悲情 lioh, 也 kài 惡質。Sī 大人 到底 lerh 無閒siáⁿ 貨？ 透世人無閒, che kám是 lán tèng-ì lán 欣慕, 愛過 ê 生活？ Koh 下輩人, 出世tio̍h lóng 罕得 kap 家人 好好á chia̍h 飯。Lán 認為 kài 要緊, che tio̍h是 chi̍t口灶ê feel ah, 也是 家人ê感情生活 kài 要緊ê tàu-tīn 時間 lioh。

Lán 先輩犧牲得來ê 自由, 汝kám 有 好好á 發揮？ Iah 是 tòe hiah-ê gōng 人 嫌自由, 留戀過去戒嚴 kap 束縛kǹg 鼻 ê 時代？人 尤其 是lín sī大人, 慣勢 hông 管制, ta̍k 日 chiú tòa 電視頭前 chiah 屎, 汝 kám tio̍h tòer lerh chia̍h 屎？ 王昭華 講, lán m̄ thang tòer 人 chia̍h 屎heh。 Khah 清醒 leh, kám tio̍h 萬項kap人saⁿ 比較, kám tio̍h lóng chìⁿ kah 贏。 Siáng lerh 贏 lah。

汝 kám bōe 認為, 居家生活 是 人 一生lih, 生活siōng 重要ê部分. Ná ē 是 作sit, 工作？Án-ni 豈無 比 hō͘ 人飼ê厝內狗 khah 慘慼？人生ê 品質 kám m̄是 tīr chia？Sió-khóa 做--chi̍t-ē, 大部分時間 變東變西, 弄豬弄狗, thit-thô 樂暢？ Ná ē 變做 hiah kah-ì 去做人ê奴隸, 做人ê 奴才leh, koh 超過做ka-kī kiáⁿ 兒 iah是pē-bú 身份 koh-khah 久長, koh-khah dominant ？ 竟然 koh 歡喜 oeh-oeh, chia̍p-chia̍p kâng 展風神！

Ka-ki ê靈魂tio̍h ka-kī 救, 汝 若berh 過 hit 款 奴ê 生活, 準我kāu siáu話, 無 汝 tio̍h 開始 暫hioh, sió 停leh,  小思考 ka-kī ê 日子leh。 無人有法度替汝思考 汝 ê人生, 也無人ē-tang 替汝度活, 汝ê 一生也 bōe 因為別人 thang 得救。 獨獨 汝ka-kī 有 法度改變汝ka-kī ê未來。 汝taⁿ安排 ka-kī ê 時間, che 是 上帝掌權 也 賞賜 hō͘ lán ê。 Bōe 變kín 也 bōe 變bān, 也 bōe 停, 也bōe-tàng khiām 起來khǹg lerh 後擺 thang 用。 Án-ni, 汝ê 日子 berh 算siáⁿ ？ 真正tio̍h 深想ah。