Lí-kang lō͘ thoat chhut ê bûn-ha̍k kang-chok chiá

Chit nn̄g ji̍t, lán kā siōng-pan ji̍t leh siūⁿ ê thêng-sek, koh siūⁿ chi̍t piàn, chiò chatGPT kap gemini ê la̍t oân-sêng siu-kái LibreOffice ê macro:

1. LibreOffice writer ê Tâi-gí code choán-oāⁿ thêng-sek, iā tio̍h sī chìn-chêng kan-taⁿ ē-tàng tī Word thang ēng ê Tâi-gí Lô-má-jī 101, che sī àn lán ê chiân-pòe Lâu Kia̍t-ga̍k khai-hoat ê Taiwanese Package 2.10 (che tio̍h sī Word ê Tâi-gí jī-hû choán-oāⁿ Macro) update kái-siá jî-lâi--ê kang-khū, sui-bóng chín chin chió lâng leh ēng ah. M̄-kú, lán siūⁿ-kóng che iah sī pit-iàu, tī chhut-pán phín, phian-chi̍p nńg-thé chi-oān bô oân-bí ê chōng-thāi khoân-kéng.

2. Tāi-khí-seng, lán seng kā i rewrite chò Python, in-ūi LibreOffice chi-oān Python. Chin kín tio̍h sêng-kong ah. Khak-si̍t python tùi chit khoán khang-khòe kē chin ū châi-tiāu. Lán iā tam-sim, lâng nā beh ēng, káⁿ tio̍h ài an-chng python, kiat-kio̍k, LibreOffice chāi-lâi ū Python ki-chhó͘ tī-teh. Án-ni-siⁿ tio̍h bián hoân-ló ah.
2. lán ia̍h hoat-kiàn, LibreOffice tùi Tâi-gí lô-má-jī Unicode ê chi-oān ke chiok súi-khùi.

3. choán-oāⁿ ê sok-tō͘ ia̍h ke chiok kín.

4. Koh lán tōa sim-koaⁿ, siūⁿ kóng kā i kái chòe LibreOffice Basic hó ah. Goân-té TaigiLMJ101 tio̍h sī VBA siá--ê. Chìn-chêng ChatGPT iah bē hoat-piáu chìn chêng 2 tang, lán ti̍t-chiap kā i the̍h lâi ēng tī LibreOffice, tong-jiân bē-sái ēng tit. Hit-kú lán gián-kiù chi̍t-khún-á kú tio̍h hioh ti̍ām, pàng sak ah.

  

Chit pang liān-si̍p ēng ChatGPT, siá kóa Python, Javascript, Powershell téng-téng, siūⁿ-kóng lâi chhì khoàⁿ māi. Kiat-kó chin kín, sui-bóng lán ê pe̍h-ōe-jī kui-kí ū tām-po̍h-á mâ-hoân, m̄-koh, chin kín tio̍h kái hó-sè ah.

Sóng lah.

Chăng lán siūⁿ-khí chìn-chêng ia̍h siūⁿ beh siá Tâi-gí su-ji̍p-hoat. Ka-kī bo͘, sa bô cháng-thâu, chai-iáⁿ ài ēng Microsoft ê he̍k-sim nńg-thé iah-sī chu-liāu, he lán lóng bô. Chí-hó chiò lâng tī Linux téng hoat-tián ê mi̍h. Koh khah-chá mā ū lán ê chiân-pòe ū khai-hoat vanilla su-ji̍p-hoat 香草輸入法. M̄-kú, bāng-chām chá tio̍h tó khì ah. Liáu-āu ū ibus kap chi̍t kóa kî-tha--ê , sǹg bē-bái M̄-kú he lóng sī leh su-ji̍p hàn-jī lō͘-ēng niâ. Beh su-ji̍p Tâi-gí pe̍h-ōe-jī, chin oh. Che lán siūⁿ chiok kú. Chhiūⁿ chit-má lán tng-teh blog phah-jī ê POJIME sī lán lia̍h lâng Lô-sà lâng siá ê Chrome Cyrillic on-fly su-ji̍p extension. Chit ê theng-sek ēng chhiau-kòe 15 nî ū ah. Hit chūn koh siūⁿ beh kā i khǹg khí-lih Google hō͘ lâng lia̍h, m̄-kú, i it-tēng ài soán chi̍t chióng Language, soán-hāng lāi-té bô Tâi-gí, lán tio̍h bô ài khǹg ah, koh in-ūi án-ni lán choan-kang siá phoe khì hō͘ Google, kiat-kó, lâng kun-pún to lóng m̄ chhap--lán.

Kū-nî mā chioh tiōng ChatGPT kap BlackBox koh ū Gemini siu-kái chòe sin-pán. M̄-koh che m̄ sī general ê su-ji̍p hoat, mā sī ài kap Chrome pa̍k tiâu-tiâu, sūi-jiân lán hoat-hiān mā ē-sái tī Firefox, Edge ēng. Chóng--sī, kám-kak bô kàu khùi.

Lán iā ū siūⁿ beh siá chhiú-ki-á ê poj su-ji̍p-hoat, m̄-kú ... lú ho̍k-cha̍p, lán ū-iáⁿ m̄-sī choan-gia̍p, tha̍k he soeh-bêng bûn-su, tha̍k kah thâu-khak beh piak, mā pìⁿ bô lō͘, koh sî-kan ia̍h bô hiah liōng-siōng. Koh chit kúi tang, Hê-bí chiâⁿ gâu, chin chōe Tâi-gí ke-si, i lóng chhòng kah chin hó-sè, iû-kî chhiú-ki-á ê su-ji̍p-hoat.

Ū chi̍t ê siūⁿ-hoat, chi̍t hong-bīn in-iû, Windows 8,10, 11 FHL Tâi-gí Kheh-gí sū-ji̍t-hoat tio̍h ū lâng an-chng bē hó-sè. Koh ū, su-ji̍p ê sî, thê-sī kheng-á cháu bē kàu sū-ji̍p ê só͘-chái, piàn chòe chin bô iú-siān.

Koh chi̍t hāng, KIP koh sak chi̍t pán sin ê su-ji̍p hoat ah, in to kan-na beh hō͘ lâng o̍h hàn-jī niâ, Bân-lô kan-na chù-im ê lō͘-ēng, lán mā ēng bē koàn-sì.

Kin-á-ji̍t, thàu-chá cheng-sîn, tio̍h khai-sí chhì sin--ê, kiò-chòe weasel, èng-tong Tiong-kok lâng siá--ê. Chìn-chêng ū khoàⁿ lâng chhì poj, i kóng ná ē-sái, m̄-koh, lán bô khoàⁿ tio̍h sêng-kó. Taⁿ, lán ka-kī lâi pìⁿ. Ia̍h hō͘ góa pìⁿ sêng kong ah. Che sī base on RIME ê su-ji̍p-hoat. Che lí-lō͘ eng-kái kah ibus sio--siāng. Tio̍h sī siu-kái chi̍t kóa yaml siat-tēng tóng-àn, kap dictionary án-ni. Í-chá ēng ibus, to-sò͘ sī ēng sú-iōng-chiá ka-kī phian sû-khò͘ lâi ēng. Che mā sī án-ni.

Chhòng chhoaih liáu-āu, hoat-kiàn kèng-jiân kap 意傳 hia sio-kāng lah.

Eng-àm thang hó khùn ah lah. Kám ē koh chò he chhōe bô kàu-sek kiaⁿ-lâng ê ok-bāng leh?