lâu

Kóng i 是日本作品，流，koh 是台灣人 去日本寫ê， tio̍h 直木獎，全數評審lóng 通過。 有夠gâu。

欣羡人 讀書人數 足chōe 足 普遍。 閱讀 ē-sái ná chia̍h食慣勢， ē-sái chhùi-pe̍h， ē-sái 揀chia̍h， M̄-koh， m̄ chia̍h, 無chia̍h 人 bē 活！ 無讀書， 人 kám ē 活？

asleep till awaken...

Lán 看i 1 句："台灣 ta̍uh-ta̍uh-á 換過愛迪達慢跑 鞋ê 氣氛"。 Lán beh 論 寫作 tio̍h 輸人 thiám-thiám ah。I 減 lán 2 歲， 人 tī 台灣有活leh， lán leh？ 茫茫渺渺，有魂無體稻草人， ài 讀 人 寫ê mn̍gh，hip ê 影像 chiah 有才調kā hit-chūn ê 生活 khioh--轉來tām-po̍h-á。

Lán chit chām， 不時 回想。 Tiāⁿ-tiāⁿ 發見 人in ê 經歷 有夠 精彩多姿，lán leh？ Chhiūⁿ i 講ê 愛迪達慢跑鞋，lán mā tòe bē tio̍h tīn。 Che koh hō͘ lán 想起 hit ê 夢。

Lán iáu 是 gín-á， teh 國校， 下課時間， lán 走去 學校ê遊樂園， 想 beh 去 hàiⁿ-kong-chhiu。 Lán kàu tè，he 位 早tio̍h 無chhun ah， lán khiā 邊--á，一直siòng，一直siòng。 In hàiⁿ kah 歡喜  kī-kā 叫， 無人beh 讓lán hàiⁿ， 根本 無人注意tio̍h lán tī 邊á tán。尾--á， in hoah 1 聲 四散， lán 心肝 浮 1 ê 光，歡喜ê 時，上課鐘á tân。Lán ka-kī 知影人在世，罕得 thang 自在 háu。應該講，m̄-nā háu，任何情緒宣洩 lóng hông 禁止。 Lán soah háu kah phēng he 鐘á khah 大聲。自án-ni 精神。4 5十歲 做 chit 款夢，是 siáⁿ 報頭， lán mā m̄ 知。

Lán ê 現實生活， 大概tio̍h 是án-ni 慢人 幾ā phek，無的確是 lán 頭殼 gōng，kha手慢tūn 所致。世間事， 了解oh，體會慢，認bat koh ē 走chhoa̍h khì。Thèng-hāu 人 kā lán tiám-tuh， lán chiah sió-khóa 長進， 有時koh ē gōng-sèng，ngī-khì m̄ 肯 受人 牽教。 Kàu kah 最近chiah khah 知影人肯 出聲kā lán hiám 1ē，hoah 1ē， he 是人 leh kā lán khan-khioh。是講， kám bē siuⁿ chōe 歲ah haⁿh？ Lán tiāⁿ-tiāⁿ án-ni ka-kī giâu 疑 ka-kī。

Koh再講，lán ê té-tì，beh kín mā kín 無路來，beh 巧 mā 巧無步。Chit ê 世間，lán oa̍h tih 慢鈍ê 世界， lán 是慢鈍 ê 人。

思想、情感、語言， lán 感覺 lóng 有 sio liân-sòa ê 性質，是 cháiⁿ-iūⁿ 寫做文字（尤其漢字，漢字kám m̄ 是 表意？）， lán hit 種 連續性 tio̍h ē hō͘ i phah 薄 去， 甚至， phah 斷去？ Beh 寫作， án-ni m̄是足bái-châi？是講， 別人ê 文字 雖bóng khah 讚， khah súi， 總hō͘ lán 感覺 欣慕， m̄-koh sa 無 siáⁿ niau-á-mn̂g， 無 hiah kín 入心。

文字 kap 文字 中間 互相牽in，互相 kau-tîⁿ， 互相khan-kiⁿ， 的確ài ū sió-khóa thian-hūn lah， che  lán phah-sǹg 無 夠額 iā-kú-káⁿ。親身sìⁿ-miā ê 經歷 lán 也 欠缺，tio̍h 算講 有經歷， lán 也 是 gōng-tuh， 感應極差， 只好靠讀書來 彌補、加強，好ê lán 讀hō͘ khah chōe pái leh。總 ē-tàng khioh 2 3--ê-á 好mi̍h。 Koh 驚 kan-ta o̍h tio̍h 人 ê 話屎， sîn 人ê chhùi-nōa niâ！實在 為難 ah！