kè-ōe

N. Mandela 講siáⁿ？I walked out the door toward the gate that would lead to my freedom, I knew if I didn't leave my bitterness and hatred behind, I'd still be in prison. 換lán ê 話來講，就是：我 àn  監牢 chit ê 門 行出去，我 tio̍h 恢復自由ah， hit 時 góa tio̍h知影 我 nā 無 kā góa ê 痛苦 kap 怨恨 hē leh，我 tio̍h iáu hông 關 tī 監嶽。

生是苦。自sòe-hàn， 人 tio̍h 教 lán ài 計劃，Lán 卻是 o̍h 無 半phiat。一生度活 lóng 隨心所願，也隨身所至 leh 做 tāi-chì。 是講， 心有siáⁿ 願？

環境 ân-ha̍t、chō-sêng 身心衝突、後悔，tio̍h kā 日子that kah tīⁿ-tīⁿ，心 bē 平和，日日亂紛紛，chi̍t日化消 chiah 有 1 日 ê 清hiu niâ。未來，lán m̄-bat kā 看，m̄-bat kā 想， 根本 bē-hiáu 看 bē-hiáu 想，ta̍k 日 beh 度 to͘ 是 艱難，精神 khùi-la̍t用盡，連 慢慢á chhoán-khùi to͘ 算做 討債。

少也微賤， 故多能鄙事。 是lah，生活瑣事， lán 項項tio̍h ka-kī 親身備辦，bē-hiáu mā tio̍h chhòng kah ē-hiáu，ē-tàng 度過 1 關 算1 關。心神荒狂 bē-su hô͘-sîn iāⁿ-iāⁿ 飛， m̄-chai 頭尾，m̄-chai 目標，siōng 慘 連 身在 何處 都 m̄-chai。

Lán 足想 beh chai， m̄-koh，lán 眼界 微弱， siáⁿ mi̍h lóng 看無，koh-khah 免講 未來。Kàu taⁿ 知天命 時機過ah， iáu kâng 款。M̄-koh， 聽人講 有 未來 tio̍h考慮，思量， lán chiah 開始 看，是講 mā bē-hiáu 看。

I. Kont 四大問，lán iā m̄-bat聽，bē-hiáu liōng 早 想， 總講， 平凡庸俗。Chhun ê lán tio̍h 驚 道德虧欠，驚欠--人， che sī lán chhun--ê 人 siōng kē ê 條件 ah。斟酌看，連 che lán 也做kah 無 jōa 好勢。君子慎獨， lán tio̍h做 bē 到。

本底， m̄ 是 beh寫 che，soah 寫 án-ni。 Che tio̍h 是lán 永永bē-hiáu 計劃 所致，kàu taⁿ。人講 計劃 日日寸進有所功， 年久月深自然成。Lán ka-kī 無經驗。

Che mah。 Lán chit款 階級ê 人， 自sè-hàn，lán 所chia̍h chhēng 用過ê mn̍gh-kiāⁿ，kài 是 粗俗 mi̍h， che lán m̄ 敢 怨嘆， 自然tio̍h好。真正 ê好mi̍h 真罕得有，mài 講 lán ka-kī ē-tàng 擁有， 連看 mā 罕--得。 致到 lán 欠缺 去 爭取 ê 心性，phah-sǹg 也是自我防衛，先放棄爭取權，ē 度日--得 tio̍h好。好bái mn̍gh-kiāⁿ lóng bē-hiáu 寶惜，koh 有時 m̄-bat 好bái koh-khah 害。Jú 慘ê 是， bē-hiáu 過 好日子， m̄ chai 好日子 生做 siáⁿ 形。

大概 cha̍p 數年前， 科元 mn̄g lán，明明 lán 有才調， 有機會，ē-tàng 得tio̍h 好缺 iah 是 好物，ná m̄ 積極爭取？  Lán chit chūn 翻頭看， pháng 是 án-ni：好物好缺 bōe 輪 kàu lán，無可能。Louise L. Hay 寫ê： In 切足雞卵糕，hia-ê 平常時á tio̍h chia̍h ē tio̍h 雞卵糕 ê 人， 有ê koh the̍h 2 3 塊，kàu 路尾，老師行 kàu góa 面頭前ê 時， 雞卵糕 已經無ah， 連 1 塊 to͘ 無。（chit-má 看 án-ni ê 心態 chiâⁿ bái-châi，Louise I 講了 chin tio̍h。Lán koh ē 阿 Q 講 he 雞卵糕 無siáⁿ 好chia̍h lah，gún 無 leh 稀罕！ 大hàn 過程 chit 種心念soah 變信念！）去爭取，失敗，ke hông phì-siùⁿ keng-thé khioh-chhiò niâ。 卑微人 ê 尊嚴 chiàⁿ-chiàⁿ sī 拖累人 ê 心理 ah！ 所致， lán ē-tàng 理解 《房思琪》所講 ê hit ê 自尊 造成 受害 bōe 講出來ê 狀態。

Tio̍h 社會普遍 bē 鼓舞人 挑戰自身極限，也bē 鼓舞人去 關心別人， 顛倒ē kâng chi̍h-iāng， 漏氣 niâ。 Koh ē 檢討 受害人，bē kā 加害人追討正義、補賠。變成 受害者 是 o͘-bi （應該）死好，ka-kī m̄ 認份 m̄ 認命， 也 m̄ 認清 環境險惡。

M̄-koh， 俗語 kám 無講 一、 牽成 二、才情 三、命運，kō͘ 現代話 講 tio̍h 是， 一、人脈、貴人 saⁿ助贊 tàu 牽khioh， 第二 tio̍h 個人ê 能力、經驗、技能、判斷、知識五項，第三命底 kap 世道，《宇宙兄弟》內底 有 chit 句：運氣 mā 是 實力。Lán 回想 lán chit chi̍t 世人， 運氣 siōng 好 大概 tio̍h chhōa tio̍h 好bó͘， koh 來tio̍h 豬 kha chia̍h 免驚 chit 2 項。是講，也 無 運氣 jōa bái ê 時，tio̍h 有影，總講 3 項 lán lóng  普普ah，só͘-tì，lán平凡 kah 有chhun。

聽 人 講， lán bē-hiáu 感謝 chit ê 性， 人 tio̍h khah bē beh kā lán 助贊，thīn tháⁿ。 有影，gún chin-chiàⁿ bē-hiáu kâng 感謝，心肝 kám 無感恩？ 有lah， tùi gún 來講，實在 困難， 人 ē-tàng 助--lán ，lóng khah chiâⁿ 樣 chiūⁿ-kioh， lán beh án-nóa 表示 感謝？Kō͘ chhùi 呼， lán 感覺 無誠意，chhin-chhiūⁿ 人 nā chhùi 講beh 助， kha kap 手 lóng 無tín-tāng， lán mā 感覺 i 虛假 。Lán soah 陷tī 兩難。

我 ē 記得， gún 1 ê 隔thiāu伯á，kui世人獨身 á，話真少 ，四界 做 雜工á，iah 是加減 tòe lâng 做 土公á 度日， 烏烏， 人笑--起來 chiâⁿ 斯文。 I ta̍k 遍來， lóng ē kōaⁿ 1 kōaⁿ 豬肉，chhiⁿ-ê。 來， 厝 lih， 無大人， iah 是 in 無閒， lóng 無人招呼 款待， i mā 無要緊，tiām-tiām 膨椅坐leh tuh-ku，tán gún 爸。聽 gún 爸講， phah-sǹg bē kā i 趕--ê chhun gún 兜。Gún 雖然 m̄ 知án-nóa kap i 對應，mā lóng bē kā 趕。Tio̍h，gún 爸講 i 叫 ông--á， mā m̄ bat 叫 gún tio̍h 叫 i 伯 ia̍h 叔， gún soah tòe leh 叫 ông--á。

Án-ni 莫 kòe 佛陀講眾生是苦，根本，連基本人 ê 日子 都 bē-hiáu 過 leh。人，高貴ê 人，soah 無自由意志，茫茫渺渺過一生。N. Mandela 講siáⁿ？

總--是， 卑微 無力 ê人 總 免不了 kā 大 部份ê 時間 khai tī chn̄g ka-kī ê khang-thiàⁿ。

mn̄g būn-tôe

Lán 一直寫 直直寫 kám tio̍h ē 變做 作家？ Káⁿ 是gōng想 lah hoⁿh？ Lán 想起 《IL Postino》。

問題，in 愛  mn̄g 天、mn̄g 地，mn̄g 死人， mn̄g 神靈， 文藝人 愛mn̄g 雲、花、風、水、魚、海。 Lóng 借景講情 lah，根本m̄是問題。

聽講 lah， chimps iah是 gorilla 真khiáu，有相當ê 聰明， 學 ē-hiáu 用字枋 kap 人 對話，甚至 ē-hiáu討mn̍gh-kiāⁿ koh 聽有 人講 Robin Williams  過身ê tāi-chì， i真 艱苦 án-ni。M̄-koh， in bōe mn̄g 問題。

Ah lán leh？ Beh mn̄g siáng， mn̄g 世人。

頭chi̍t 條： án-chóaⁿ 一直 感覺 遠方 會有  好 mi̍h-kiāⁿ leh？ Lán nā kā lán khiā起ê 生活環境 lóng 舞kah àu-chhàu khì。

Lán 活leh， kám 有法度 kap 邪惡 分捨kah 離離離？ Iah是 換 話講， 痛苦、不幸、悲哀、悲慘、鬱悶、恐怖、驚 hiâⁿ che？ Iah是 lán 註定 ài kap 惡魔 妥協？ éng 無盡 ê 妥協 leh？ 對抗 iah-sī 奮鬥 也是 kàu 路尾bô-soah？

所以， lán tio̍h 同理Sisyphus ê 心情。 大哲學家 講 i sak 石頭起lih山頭 ê時，心內一直充滿快樂， 所以 bē 感覺 i ka-kī 一直受 苦刑。Che to̍h 是 lán 度活 ê 日子？ 魚 回答講，lín 看bē tio̍h 我 ê 目屎。

是講 siáng 知影， lín ê目屎 kám m̄是 像 Sisyphus 歡喜 koh 感激 ê 目屎 leh？

自 lán sè-hàn lán tio̍h 足 激骨， 人 kā lán 講 世事 m̄-thang 想 siuⁿ chōe， mā m̄-thang kheng-hun。 Lán  漸漸 tio̍h 對 chit 2 種 做法 反感 kàu 極！ Lí bē-hiáu 想 soah leh 嫌 人 想 siuⁿ chōe，siuⁿ 深， m̄ bat 道理 是非 烏白 soah  leh 講人 gâu kheng-hun。 Bo̍k-kòe lán ê 國親鄉民 頭殼 死tēng， phái 教， koh bē 變竅，bē 輸人幾百tang 前。M̄-koh， 人 ah， 人 經過 che 幾 百tang，jǒa 進步leh， tak-gê mā 有看。超過350 tang 前ah 講。 Lán chit-má ê 人 iáu-kú 聽無， bē-hiáu。

汝看，Issac Newton 是 25 December 1642 – 20 March 1726 lioh。Ah 鄭成功 Tīⁿ Sêng-kong1624年8月27日－1662年6月23日！知影bô？ 永曆十五年（1661年，清順治十八年）

然後， lán chia chiah-ê 問題 beh mn̄g siáng ？ Beh toh mn̄g？ Lán teh chit ê 奇怪 ê 體制，hông束縛 tiâu leh， beh 按 toh 走，往 toh 位 去 lóng 真 費氣。 In khah 愛 用 "ùi" kap "tùi" lah， 有 ê 講 ùi  to͘ kap 對 kâng ì-sù， 字 mā kâng， 發音 無 kâng niâ。 有ê 講 ùi 是 對應 from 對 對應 to án-ni。 Nā án-ni mā kài sim-sek， chhù-bī。

Koh lán  一直 kâng 講 透早 m̄-thang 起床， soah 變 笑詼， 事實，lán 所知 "起床" 真正 kap 死人有關連。用 "精神" khah 好lah。

lâu

Kóng i 是日本作品，流，koh 是台灣人 去日本寫ê， tio̍h 直木獎，全數評審lóng 通過。 有夠gâu。

欣羡人 讀書人數 足chōe 足 普遍。 閱讀 ē-sái ná chia̍h食慣勢， ē-sái chhùi-pe̍h， ē-sái 揀chia̍h， M̄-koh， m̄ chia̍h, 無chia̍h 人 bē 活！ 無讀書， 人 kám ē 活？

asleep till awaken...

Lán 看i 1 句："台灣 ta̍uh-ta̍uh-á 換過愛迪達慢跑 鞋ê 氣氛"。 Lán beh 論 寫作 tio̍h 輸人 thiám-thiám ah。I 減 lán 2 歲， 人 tī 台灣有活leh， lán leh？ 茫茫渺渺，有魂無體稻草人， ài 讀 人 寫ê mn̍gh，hip ê 影像 chiah 有才調kā hit-chūn ê 生活 khioh--轉來tām-po̍h-á。

Lán chit chām， 不時 回想。 Tiāⁿ-tiāⁿ 發見 人in ê 經歷 有夠 精彩多姿，lán leh？ Chhiūⁿ i 講ê 愛迪達慢跑鞋，lán mā tòe bē tio̍h tīn。 Che koh hō͘ lán 想起 hit ê 夢。

Lán iáu 是 gín-á， teh 國校， 下課時間， lán 走去 學校ê遊樂園， 想 beh 去 hàiⁿ-kong-chhiu。 Lán kàu tè，he 位 早tio̍h 無chhun ah， lán khiā 邊--á，一直siòng，一直siòng。 In hàiⁿ kah 歡喜  kī-kā 叫， 無人beh 讓lán hàiⁿ， 根本 無人注意tio̍h lán tī 邊á tán。尾--á， in hoah 1 聲 四散， lán 心肝 浮 1 ê 光，歡喜ê 時，上課鐘á tân。Lán ka-kī 知影人在世，罕得 thang 自在 háu。應該講，m̄-nā háu，任何情緒宣洩 lóng hông 禁止。 Lán soah háu kah phēng he 鐘á khah 大聲。自án-ni 精神。4 5十歲 做 chit 款夢，是 siáⁿ 報頭， lán mā m̄ 知。

Lán ê 現實生活， 大概tio̍h 是án-ni 慢人 幾ā phek，無的確是 lán 頭殼 gōng，kha手慢tūn 所致。世間事， 了解oh，體會慢，認bat koh ē 走chhoa̍h khì。Thèng-hāu 人 kā lán tiám-tuh， lán chiah sió-khóa 長進， 有時koh ē gōng-sèng，ngī-khì m̄ 肯 受人 牽教。 Kàu kah 最近chiah khah 知影人肯 出聲kā lán hiám 1ē，hoah 1ē， he 是人 leh kā lán khan-khioh。是講， kám bē siuⁿ chōe 歲ah haⁿh？ Lán tiāⁿ-tiāⁿ án-ni ka-kī giâu 疑 ka-kī。

Koh再講，lán ê té-tì，beh kín mā kín 無路來，beh 巧 mā 巧無步。Chit ê 世間，lán oa̍h tih 慢鈍ê 世界， lán 是慢鈍 ê 人。

思想、情感、語言， lán 感覺 lóng 有 sio liân-sòa ê 性質，是 cháiⁿ-iūⁿ 寫做文字（尤其漢字，漢字kám m̄ 是 表意？）， lán hit 種 連續性 tio̍h ē hō͘ i phah 薄 去， 甚至， phah 斷去？ Beh 寫作， án-ni m̄是足bái-châi？是講， 別人ê 文字 雖bóng khah 讚， khah súi， 總hō͘ lán 感覺 欣慕， m̄-koh sa 無 siáⁿ niau-á-mn̂g， 無 hiah kín 入心。

文字 kap 文字 中間 互相牽in，互相 kau-tîⁿ， 互相khan-kiⁿ， 的確ài ū sió-khóa thian-hūn lah， che  lán phah-sǹg 無 夠額 iā-kú-káⁿ。親身sìⁿ-miā ê 經歷 lán 也 欠缺，tio̍h 算講 有經歷， lán 也 是 gōng-tuh， 感應極差， 只好靠讀書來 彌補、加強，好ê lán 讀hō͘ khah chōe pái leh。總 ē-tàng khioh 2 3--ê-á 好mi̍h。 Koh 驚 kan-ta o̍h tio̍h 人 ê 話屎， sîn 人ê chhùi-nōa niâ！實在 為難 ah！

Lí-liām kap sè-kan

Schrödinger 感覺世間極無平安 ê 時 mā ē án-ni 講： Àn chit ê 世界 góa 的確學了 iáu 無夠，phah-sǹg góa iáu bē chhoân 好勢 thang 面對 chit ê世界。

 理念thang 堅持單純 ê 人，lán 也 欣羡，究--竟 i 也是 單純ê 人。 是講， 世間 kám 有單純 ê 理路 iah是 mn̍gh-kiāⁿ leh？ Lán 知影 物理 ê 理念， 理路， lóng 是 kā 現實狀況 簡化 再簡化， lia̍h 關鍵 1 2-ê-á 因素 tio̍h beh 解說 世間 bó͘ kóa 現象。

顛倒頭 講， 理念 iah 是 理路 應當 tio̍h 是 kā 世間事 簡化，chiah ē 出現ê virtual reality。 Lán án-ni 理解 也 應當bē 差 siuⁿ hn̄g。Ah nā 人 簡化ê 要件 kap 所 khioh ê   因素無 sio kâng， án-ni 得tio̍h ê 理念kap 理路 對 世間 現象 描述出來ê 必然 無 kâng。

M̄-koh， lán kám 知影人 簡化ê 要素 leh？有ê 知影iā-kú-káⁿ， m̄-koh 也 無的確 知影 jōa 詳細。 Ah ka-kī 所取ê 點，ka-kī 當然siōng 清楚， ka-kī 建立ê 路線 當然 siōng 明瞭， siōng ē-tàng 說服ka-kī。 Ah nā án-ni 來 論 別人ê 理念 路線 cheng-chha，誤tâⁿ， án-ni， 是 m̄ 是 sió-khóa-á 自以為是？

Siōng 無保留 1 線 機會 （probability）， 是lán 學了 quantum mechanics 了後，siōng 深  ê 反省。Koh 按chia知影， chhin-chhiūⁿ Newton ê 絕對ê 客觀 kap 理性世界觀（以早 Newton ê 思想基礎， i ka-kī mā giâu疑， 所以 最後 soah 用 聖經來解說物理現象 ），tī 真實ê 宇宙 lih un-nā ē 失效。Lán chit ê 物理世間 hō͘ lán ê 面貌，mā án-ni，lán 人 án-nóa 去 看， 用siáⁿ-mih 去探， i nā 無回應， lán ē 真簡單 想 i bô chit ê siáⁿ-mih ê 性質， i nā ē 回應 siáⁿ-mih， lán tio̍h lia̍h-chún i 有 siáⁿ-mih。

所以， beh 認bat chit ê lán 依存ê 世界，iā tio̍h 先知影 i sī siáⁿ-mih。 M̄-koh， lán 在來m̄ 知ah，beh án-nóa？ Kō͘ ioh--ê， 好運， i 回應 lán， lán tio̍h 暢kah lia̍h bē tiâu，lia̍h-chún 世間 真正 hō͘ lán ioh--tio̍h leh。過--幾年á，人 ioh 別項，jú gâu jú hó， lán chìn-chêng ioh-ê tio̍h thèng-hó phiaⁿ hìⁿ-sak ah。 án-ni-siⁿ。

Koh khah 免講極複雜ê人文社會ê現象。

gín-á sèng

Siōng可嘆 ê， lán 發現 1 種 新症頭， lán 以早 有 tì 過， 大發過， 就是 大頭症，也是佛陀一直 訓誡 lán ê。

Lán leh 想，淺想 childish kap childhood  toh 1 ê khah 接近 child leh ? Siáng sī  child-like leh？ Lán 有夠 ǹg-bāng， lán ê 朋友 五十 ē-tàng khah gín-á 性leh， 早起時á 絕交， 中tàu 時á  tio̍h  koh 做伙 食tàu ah！

Lán án-ni ǹg-bāng 在水 mā ē hông 講 gín-á 性，m̄-koh， 在來 in 講 人 gín-á 性， 八siâⁿ leh tu̍h--lâng， bōe kā 當做 優點。Hoān-sè iā有人 ē 講 無tiāⁿ-tio̍h iā-kú-káⁿ。

Lán 聽過 Pang-kiô cha-bó͘ súi koh chhiò，義竹cha-bó͘ 無tiāⁿ 無tio̍h， che m̄ chai kap 真實 jōa óa。Lán 也 發現 有kóa tāi-chì， lán m̄-bat m̄-thang 厚話 喝聲， che 有理，是講 有 ê lán bat， koh 比人 khah bat， mā bē-tàng 出聲， che tio̍h  牽纏 tī 深深 ê 文化 內底 ah， 也是足chōe人ê 意識形態 lih ê 規矩。論事理 總困難 照理路、照logic，khah chōe 是 tòe 情感、情緒leh 走、戰，chìⁿ kah 半路， tio̍h cháu-cheng koh 失路 ah。

朋友（chhin-chiâⁿ），弟兄（姊妹） tī chia 拆破面， koh 激氣，koh kài ngī氣， kài-sêng講 tio̍h án-ni 堅持 chiah ē hông 尊重 leh。M̄-koh，lán 觀察 實況 kap 真實發展， éng-éng 無 lah， 連ka-kī 都 ē 後悔koh厭氣， koh-khah 嚴重 ê 失志。就算 chìⁿ 贏 hit 頭 mā bô leh khah 好結局。

M̄-koh，lán 台灣人chit 點卻是bōe ké-pìⁿ。Ài 冤家 ài niû-chè， m̄-koh kan-ta 為tio̍h ka-kī ê 面水leh 冤家， 為 ka-kī ê 名聲 leh chìⁿ niâ。I 贏 人 mā 不服， i 輸 koh-khah 免講， chhi̍h hō͘ 死。 Che tio̍h lán 台灣 ê 工商界 ê 潛意識運作 ê 道理。 有 幾ê 真心 beh 服務， 為眾人好ê， mā ē hoān-lâng-khia hoān-lâng 疑。Lán 講che 也 是 中國國民黨害ê， 人 koh 反 kā lán 講 lán 泛政治化 去。

Lán nā i 問， 請 你講看bāi， siáⁿ-mih 是 人？ 人 kap 人 之間 ài án-chóaⁿ 互相對待 leh？ 根本 m̄-bat 想過 chit 款問題， m̄-koh 講 tio̍h 道德、禮貌、國家、社會、人民， 意見了了， 真正 childish， koh lia̍h-chún ka-kī jōa gâu tú jōa gâu。虛無飄邈 lah，a̍h soah tio̍h pián-sian-á， ka-kī tio̍h 是 siōng 大 siōng 厲害ê pián-sian-á ah 講。

求真求理 chiah 困難， 不如 childish childhood！Góa ê 態度是： 台語原底有ê 詞 m̄通 hō͘ 華語 取代 去。UJ I 講ê 是 感覺（lú） ，cha-po͘ 人 聽 tio̍h mā kā i 當做事實。

1. 我khah 傾向 善意解讀（ lâng nā 講 góa thiaⁿ 無ê， iah-sī 違反 góa 信念 ê； 總--是 看 i ê 言 kap 行 kám ū tàu-tah） 2. 我 物理ê 素養 kā我 講： 我 所知ê 世界， 是 我ka-kī 去 建構ê， góa iōng siáⁿ物 眼光 看， i tio̍h變做 siáⁿ-mih hō͘ 汝 看。

phah tio̍h ē koai， mā tio̍h ē chheng-chhíⁿ

M̄ 知 án-chóaⁿ， lán 台灣人 chiah-nih fetish, ē 相信 罵 lâng， 人 tio̍h ē chheng-chhíⁿ， i nā 無 清醒， 其實是，無 接受 lí ê 想法niâ， i tio̍h是 毒， tio̍h 是罪惡。 Án-ni kám bē kài 恐怖？

Lán 講語文教育 kài 專業， beh 討論， 對手ài 相當，i 講 lán leh 資格論。Lán 認為 任何 tāi-chì 人人lóng ē-sái 討論， 無 m̄ tio̍h， m̄-koh beh 深入談 tio̍h ē有  ta̍k 種 資格 ah。 Lí leh m̄ 願siáⁿ？

資格論， 有時 無應當， 有時卻是必要。能力資格，情感資格，chit ê 議題 kám 免？Lín 一直 leh 講 "台灣人"，lín 了解ê "台灣人"， 設想ê 台灣人，kap 真實ê 台灣人 差 jōa tōa 碼， lín lóng kā 定罪 "華" tio̍h 解決 問題 ah sìm？

Lán 講 lín 無 做siáⁿ 貢獻， khah mài 批評 lâng 做 kah khám-khám-khia̍t-khia̍t ê， lí soah leh kóng 原來lán 重視 勞苦 無重視 核心價值，koh sa 敵人 iáu koh 強大 來 kóng 人 做hiah 久 無效， lí 又koh 知ah。 慘！

Lí beh 批，批 hō͘ i 對 mah！ mài 開chhùi tio̍h 講 人 "華"，chit 款 批評 充滿 複雜ê 思維， 人人解讀lóng 無kâng lioh。 Lí soah koh leh 講人 m̄ 知你leh 批 siáⁿ tio̍h kā 你 mā， kā 你 講 你無 資格。按chia， tio̍h 一直 情緒去ah！ Chit ê世間， m̄-nā 台灣人 kap "華" 人，汝 ē 判斷 做 "華"， 人 mā ē-sái 講 lí ê 心 有 華毒 ah， 無 ná m̄ 講 是客、是原毒？Lín kám 有 才調 專業 針對 批判？ Nā ū 直接 講 ah！ 眾人看tio̍h mā ē kā 你 贊聲， o-ló，hō͘ 你 批 ê 人， mā thang 知影 ka-kī 欠點， thang 改進， khah 好ê koh ē 感激--lí 。

Lán 看tio̍h che， li̍h 心肝niâ， 了後 失khùi-la̍t，sit-chì ，koh 斷交陪 niâ... Siáng 贏 siáng 輸？Kám有差？翻頭 想-khiaih， 你 是siáng？ 是 siáⁿ-mih 人物？（資格？ chia 是 牽 情感資格） lán tio̍h chiah 對重--你？

Che hō͘ lán 深想：覺醒，是人性唯一ê 價值， che 我真贊同， 我mā 真 ǹg-bāng ka-kī 覺醒。Koh， lán leh 想，真正 ê 覺醒者， i 言語 kap 行放 ē  有耐心 kap thiàⁿ，因為 i 真正 覺醒，對 ka-kī ê 覺醒有自信， 所以， i tio̍h是 覺醒本身，i m̄免 一直喉叫， m̄ 免lé bē 覺醒ê 人 ，ǹg 無覺醒者 證明 ka-kī 覺醒ah，ka-kī 是覺者 ah。

Kám m̄ 是用 無盡ê thiàⁿ kap 話語 安慰、說服 lán ka-kī chiah-ê  受傷沉重ê人？ 尤其lán chiah-ê 為台語 受傷 ê 人？ Lín soah 顛倒 koh kā pa kā 搧， 譴責 i ê khang-chhùi， i ê 中毒。

Sio mā 無好話， 確實 傷人 傷身體！

Do Androids Dream of Electric Sheep?

Lán cho--ji̍t  偷偷á kā Blade Runner 1997 final_cut 看了。 因為 lán 看 tio̍h Youtube 半瓶醋 kap FB 朋友 夏途島 leh 講 起， lán chiah án-ni 想 beh 了解 。 I 到底 有jōa gâu。

chit 幾年，米國 koh 重 phah bē-chió 電影， 其中 sci-fiction chit 類 ê， 有 電腦進步, 後製技術 提升足chōe， koh兼本錢落價 ê 利便 kap 好處， jú 明顯。Tron kap Total Recall góa ìn-siōng khah chhim。

本底， nā 少年時，lán tio̍h ē  真興去 看che sci-fiction ê 作品， m̄-koh hit-chūn lán tih 考大學（實際， leh hui）， 無閒、無閒錢 ， koh-khah kun-tóe 是性地 iáu 無 chiah 有 耐性 thang 去電影院 看戲。 橫直種種原因。 Ah chit-chūn， mā 退hông ah， bē 愛看 he 假 kah 有 chhun ê 科幻 影戲。

看了， lán ê 感言： 1. 科學設定 bē bái， 2. 探討 siáⁿ-mih chiah ē-tàng 講做 "人"，3.  人 kan-ta 有 理智 kap 體能 kám 有夠額？ 4. 接 3 kám thang 講 有 sìⁿ-miā？5. 做夢？ē 做白日夢？ 6. Android 知影 ka-kī m̄ 是人，sìⁿ-miā ê 意義 kap 價值 tī toh ？ In ná ē 想 beh 延長 sìⁿ-miā？

劇情 安排， lán chit ê 歲看無 sáⁿ 稀罕ah， Ford ê 表現 lán 感覺比 tī 法櫃奇兵 khah 有深度，情緒、情感方面。

Nā beh 比較， 應當 ē-sái kā Frankenstein sa 來， in 美國人 信仰基底iáu 是 基督 一神創造論。 被創造 kap 創造主對話 （所以chit 塊 用 replicant， 無用 robot，無用 clone bē bái）， 不時出現。Lán也看過 幾ā 塊，類似  robot，生化人 ê 影戲， 也有 歐洲系 ê。 In leh 探討ê 大部份  ē-sái 講  tih 講 "人" ê 資格、人 ê 界線。身體、心理、靈魂， 頭 1 項 身體 lán 人 khah 確定  ē-tàng 做出來， 其他 2 項 tio̍h iáu 無 明朗 ê 進步。不jî過，心理 ê 理智部份，hō͘ lán lâng 看做 是 ē-tàng 處理 ê ah，tio̍h 是 AI， 所以， lán chit ê lâu-pái是 m̄是 ē-sái 講 lán 是半創造神ah leh？

Koh 來， 創造者 ē 愛 i 創造chhoaih ê  無？Ē 是 ē án-nóa， bē 又koh ē án-nóa？
我看 1982版 （1997 final cut） 就夏途島 i 寫ê 點 來回應：replicant（回應者、迴響者 似有雙關）physically enhanced (robot part)with ability of reasoning (human part as known as robot reaction)學做人 ê 過程 1. 故意 反對 "我思考所以 我存在" 的 哲學顴，  2. 作者 認為情感（含 情緒） chiah 是 靈魂 ê 核心 replicant 無 這項 3. 相信 是屬 "推理" iah-sī "情感" leh？

相關ê 語詞， 也是 新詞就是： cyber, clone，robot，android ， nā beh 探討人性， mā bē-sài kā yaho͘ 放 bē 記得。 Lán 上課 ê 時 有時chūn ē kā 學生 講che 語詞 ê 緣由， che tio̍h 是 創造文化， chiah 是 文化 創造。

世界觀， 是 Ngôo  Hê-bí tī FB 講 ê。M̄-koh，
Lán 看電影內容 世界觀看無 siáⁿ ē chhoaih。 畫面大多數hō͘ 人 感覺 陰暗、sip-chhî 、黏thi，ak-chak， 噪雜紛亂，對正常人ê 生活 無 siáⁿ 表達呈現， 街á 路 kap chit-má 差不多。有 真chōe mn̍gh-kiāⁿ m̄-sī in  Bí-kok ê， koh khâ bē-chió 漢字。

Tâi-gí、bûn、 súi-khùi

Lán 發現 lán 寫 ê 台語文， kan-ta 順 niâ， bē-tàng 講 夠額 súi。怨妒 人 有châi-tiāu 讀書， kui pún lóng 記ē tiâu？對文字， lán 實在 無 hit 款情感！Hit 款對真言、種子字、聖符，聖言、 聖經金句文字ê 拜服 kap 感動，lán chin-chiàⁿ 無！In 寫ê 大字 khah súi lán mā 無 感動... Chin-chiàⁿ lán 活tī 無kâng 世界ê lâng ê 款。

Chiū 算 真實ê 人生經驗， lán mā 是， lia̍h 要點 記 leh niâ，足chōe lóng 漏 sak ah。佛陀所講 ê 有漏， lán m̄-nā 有漏， 根本 記無 萬分chi̍t。 Che khah早 讀書 tio̍h 考試ê 時，課本、自修想beh 記， 一直 捶頭殼 mā 無效， sian 記都記無。Koh有時 lán mā真歡喜án-ni， in-ūi phái tāi-chì 真kín tio̍h 漏sak。Kàu taⁿ, nā mài 去 kap 別人比phēng，lán ē 記ê tāi-chì， sim-sek 樂暢 ê khah chōe， 算khiaih 也是福氣。

Lán 自 gín-á 時 tio̍h án-ni ah。 讀書 讀了， 大意 lia̍h tio̍h， tio̍h 準 讀好ah， hiah-ê 好文句，súi 句讀 lán 真chiàⁿ無才調 記khiaih。Ah nā 故事 冊， hiah-ê 故事 也 kâng 款， 故事大綱 sa leh，chhun ê hiah-ê 結構，設局 讀 了 tio̍h lóng 放sak 去 ah。

Koh-khah 要緊， 欣賞 hit kóa 設計，修辭ê 能力足欠缺。Iah 是講， lán看輕  he 暗唸 ê 能力，也厭惡 che， 致使 lán  意識 潛意識 lóng 反對 暗唸 記憶 ê 功夫 leh。

讀過 有 印象，文字印象深 無深，描述明 無明，情感表達 通 無通 ，lán ê 知覺 lóng 差不多。  Che kám 有法度 thang 訓練？

早前，lán 是欣羡 人讀冊人足斯文足有文化素養，kài-sêng 對人生真 了解、對人性透徹， lán ka-kī siáⁿ-mih lóng 懵懂無知。 Chiah kín tòe 人 讀 文學書，歷史書、koh hoa̍h kàu 哲學書去， 結局， lán mā iáu-kú 無博士款。 世界文學讀 幾十本 去，斯文 mā bē tiâu身， 人生 lán jú m̄-bat，人性 lán jú 無知。連 文字修辭、文化書寫、意識表達 mā 無 ke bat jōa chōe。致到 lán ê 心肝一直 hiāuⁿ-hiāuⁿ， koh 台灣社會現況 也 使人 心cho 意煩亂。

其實， seng mài 講 台語文 寫 tit súi-khùi， seng kā 語法， 改 端正，語詞  chhōe--tńg-lâi， tio̍h 真 無簡單， nā 有  也 tio̍h真 好 ah。尤其 是語法，台語 beh hông當做 1 種 語言， kap 別款 語言 分別出來 siōng 根基  ê mn̍gh-kiāⁿ， 也 siōng 看 bē 出 問題 ê 所在，因為， 台語 hông 當做語言 來 教育， chiah tú 開始 niâ， ta̍k 方面研究 iáu 無真徹。Koh-khah 嚴重ê， tī 台語發展ê 基地，台語 hông 壓制 kah 強beh 無去。 In koh leh siáu 英語！

生活（文化、商業、娛樂）語言場域 台語漸漸 消失， m̄是流失，是 kui ê 語言環境 hông 取代 ê 現象。Koh-khah 免 講 教育、學術、官方 ê 文書 kap 法律語言，台語 根本 hông 忽略、忽視。台語語法 siōng 尾 ê 防線 也強 beh pang-khiah 廢無khì！

su-siá liâu-tī

最近 lán 連讀 2 本 台灣中文小說， 1 本 因為 作者自殺，tio̍h 是 《房思琪 的初戀樂園》， 1 本 算 好朋友 頭kài 創作出版《錢鴻鈞激情書》。 Lán 發現， in sio siāng beh kā ka-kī ê 人生 經歷 轉換 做 小說型式，也 差不多sêng 回憶錄，ka-kī ê 獨白kap ka-kī 對話， in 1 段 過去人生ê 回顧， 結局卻是 天 差 leh 地 leh。

《房》koh 進 1 步 改編做日記， 總--是 無kā 日記標 kah 真明。Koh 設計 2 ê 人， 1 ê 發生故事， 1 ê 觀察 書寫。M̄-koh，事實 lán lóng 知影 怡婷 kap 思琪 就是作者（我），《激情書》tio̍h 真明白用（我） kā hiah-ê 事件 kǹg 連 leh。

Koh 有 1 項sio kāng： （我） 無 pē-bú， 書內底 lóng 差不多 無 siáⁿ 寫 in pē-bú tùi i ê 影響。 《激情書》kan-ta 四書五經 影響 i，《房》是 中國文學， bē 輸 he chiah是 生 in ê pē-bú。 In án-ni 講 lán 也 是 ē-tàng 理解 lah， 心靈ê pē-bú， 心靈 ê 故鄉 lán m̄ 是 m̄-bat。Koh 來 tio̍h 是  in 重大ê 事件 lih， lóng 無 kâng輩ê 意見， 無 kâng 輩 ê 對話。 In lóng 看 hiah-ê 平輩ê人 bē 起， lóng beh kā in 展 風神 臭iāng niâ ！ Che 顯示lán chiah 少年人 ê 人格 ê 裂縫。 然後， 是 對 i ê 環境描述也是 lóng 無，無 tio̍h chin phàⁿ，lán bē-tàng 了解， 無 背景，無 人文、社會、自然、歷史 án-ni ê 人， kám m̄ 是 漂浮 ê 幽靈 leh？ Kā hiah 周圍ê mi̍h kap tāi-chì lóng 切離， án-ni kám ē-tàng jú 突顯 人性， iah是 人性 ê 虛hàm？

Lán 讀了， éng-éng 胸坎tīⁿ-tīⁿ，心肝cho-cho， 了後， 回想， 記無 siáⁿ khah 明確ê 內容。 Phah-sǹg lán 讀 了， 無熟，也 對 che kì-tî bái，iah 是 lán 無 斟酌讀， iah 是 siuⁿ 過頭斟酌讀。 Lán 讀 無in hiah-ê 文學人 討論 hit 款 kì-tî。回頭 koh 讀 mā sio siâng。

《房》作者 寫了，i 講 無thang 得tio̍h救贖、無得昇華、無thang 淨化， 總講無 法度 療治 i ka-kī。I ê thiàⁿ-khang 足 疼， i koh 一直 去 kā póe， 去 kā hiau， 去 kā kiāu，傷痕 beh ná ē 好？I 講（後記） 寫 che 驚 "消費" 其他 ê 受害者，koh kā 自尊 看做 失禁ê 屎尿。 Hō͘ lán 受tio̍h  刺激， kài 大，chìn-chêng lán 認為 書寫 chiàⁿ-chiàⁿ  ē-sái 療治 人 ka-kī， ē-tàng 昇華， ē-tàng 淨化， ē-tàng 救贖 kóng。 Lán 看 chit ê 例， soah 感覺 che， chit 款 要求人書寫傷痕 ， siàⁿ-siàⁿ tio̍h 是 消費 "受害者 ka-kī"。 Chit ê 結論 sù góa tio̍h 驚。身心靈受傷害，應當 先療治 chiah 書寫， 先救贖chiah 書寫。Ah chìn-chêng hit 款講 有 昇華作用 ê書寫感覺，應當是同理心。無真chiàⁿ 受傷， m̄-koh 體會受傷 ê 人 ê 感受所寫ê。

《激情書》寫ê 人 本chiâⁿ tio̍h 爽、暢ê 心態， 寫了 jú 歡喜， 完全 無kâng 世界ê 感覺。 為tio̍h beh 寫我，i 真 iāng，看 ka-kī 是 好，koh 1 pái 完成 chit ê 足好ê（我），chit ê 作者根本無需要療治，i 滿足，歡喜，i ê 未來 按chia 繼續。《房》卻m̄是。 閱讀人， phah-sǹg 無的確 ē kah-ì 《激情書》hit 款， 自以為是 溫柔，多情，明理 ê 書寫。看《房》， kám 無 "偷siam" ê 心態？ I koh m̄ sī 惡徒心理描寫， beh引起lán 同理同情，是 kā 罪惡心 kap 行放 出破，ǹg 大眾告訴社會 kap 依附其中 ê 為師者 ê 醜惡形象 。I 受傷 已經  人格 分裂 做 理性ê怡婷 kap 物質 ê 思琪 ah， 2 人 心靈 lóng khih角去 ah，無作用 ah。Chhin-chhiūⁿ I 寫 ê：13歲 hit ê 教師節， i tio̍h 死ah。 Nā ka-kī seng kā ka-kī  放sak， i tio̍h bē-tàng koh kā i 放sak ah！

Hó pêng-iú ê chheh hō͘ lán tha̍k

讀 《房思琪》chìn前八月 16， i 親身sa lâi sio 送， 當然 也 beh 去 送 別位（張教授、陳老師）。 離開 gún 厝chìn前， tio̍h 講 ah， beh 去 chhōe 張教授， 我 soah 失約。Lán 真正 歡喜 i ē-tàng 出版 chit 本書 晉級做創作者，行入文學 ê 核心。Lán 認為比i 寫ê 論文khah 有文藝價值。是講 i 無 kō͘ 客語 來寫 有khah 可惜 sió-khóa， lán 知影 i 有 chit ê才調。

百幾頁無 2 日， lán tio̍h 讀了ah。內容 講 i kap 幾ā ê cha-bó͘ 人 ê 情感 發展， kap i 自身  ê 成長ê 關係，當然 i 也 kā i 批判 古（中）文ê 意見 寫落去， 古文 chit 項影響 i 真深沉， ē-sái 講 是 i ka-kī 起造自身ego siōng 重要ê 成份。 I 也 真kín 察覺 che 害 i 真重。

Lán 講 藝術家 bē-tàng 無自戀， 你 看 i chit 本 冊， tio̍h 知 i 自戀有夠額做 藝術家 ah。Chhun ê tī chhiau-chhōe 主題  lah， 選用 素材 lah kap工具 ke-si ，koh 有 tio̍h 是 創作方法 kap 技巧。

Tī chheh nih， 行文完全主角（我）自述，hit ê 我， kap 現實 ê 我，大概 差 m̄-chiâⁿ mi̍h， nā 小說ê 事件 人物， 確實i 有 講： bē-sái 講 是 真 iah 是 假， 以免 破害 讀者趣味， 也保持 kap 回憶記錄 ê 隔界。總--是， 讀tio̍h bē 輸 sī 回憶記錄 有影，m̄-koh i koh 有 強調 有ê 是夢境， 茫茫ê 夢，chhiⁿ-chhioh ê 夢，未來ê 夢 lóng tī-teh。

Só͘-pái， 文字寫出來，kap  i 講話， 差不多， 無斟酌聽， 無 hē 心chiâⁿ 聽，  hu hu hu tio̍h 無去ah。 Koh，i 造詞 tàu句 也 無 特別 用力，kan-ta 一直 póe會 講 i ê 事件 lóng 是 自然發生，發生tī 人ê 本性 án-ni。愛 lih， 無互相虧欠、無互相責備、也無 後悔 也 免懺悔， kan-ta 互相包容 互相 允准，疼惜。

（後壁 開始 ... 事實 chit pún 冊 有kā lán 刺激， 叫 lán tio̍h ke 加強反省）
Lán 無 i hiah 自戀， chit 款 自戀 lán tī 金庸 ê 武俠， 日本 ê 漫畫 看kah beh 溢chhiah 酸ah。M̄-koh， kap 鍾肇政 hit 本 saⁿ pí， lán khah 白 lán khah ē-tàng 接受 i 這本。Kha̍p-bē-tio̍h tio̍h 目屎流目屎滴，che in 2 本 lóng 有， lán tio̍h khah m̄-bat， lán kan-ta 知影台灣人 khah chōe 是 苦， 苦也 笑， 叫 苦笑。是講 hit 種 感動 無 用 流 目屎， beh án-chóaⁿ 形容 lán mā bē曉。

講 女性 hō͘ i chiâⁿ 做 cha-po͘ 人， chiâⁿ做 人， chiâⁿ做 1 ê 滿足ê 人，chiâⁿ 做有未來ê 人。 Che kám 是 kap 鍾肇政 ê 意見 有關聯 leh？所謂 ê "永恆的女性" ？ 講 tio̍h che lóng 是cha-po͘ 人 ê 真情真性（kap 慾望 ê 差別 sī siáⁿ？） Che lóng 是 人 應該 愛有 ê 自然（也 tio̍h 是 人性）反應？ Án-ni kám tio̍h？

Koh 點出情感教育，tī lán 台灣教育體制 lih 完全欠缺，致到 lán 男男女女 kè lóng m̄ bat 感情bē-hiáu 處理情緒 。人kap 人 中間無學習，也 bē曉 án-chóaⁿ 互相對待， 互相疼惜， 尤其是 beh 談男女感情 ê 時chūn， che iū-koh hiah-nih-á 要緊 hiah-nih 必要。I chit 本冊 ê 事件 卻是ná  感情手冊， ē-sái tāi-seng ke 了解， ke 認bat，感情發展， 肢體動作表現 leh。當然， i m̄ 是 交友手冊， jú m̄ 是 睏人手冊。

結構來講，ta̍k 篇 無 sio 連sòa，m̄ 免 照順序 讀，ē-sái chhìn-chhái 選 chhìn-chhái 讀， 應當差  bē kài 遠。唯一連續 ê 線索 是 主角（我）。Che chit-má soah 是 優點， 人無愛， bē 慣勢 讀 長篇文 ah。

Lán 看 tio̍h 慾望、情感、感情 人人lóng 有， che tio̍h是共識， tio̍h 是 對話 ê 基點， koh 來 是 beh án-chóaⁿ 對話。不倫、婚外情、婚前身體關係 也 lóng tī i chit 本冊討論在內。 Chiah-ê 正正 是 i hiah-ê 四書五經 hō͘ i ê 束縛， 也 是 hō͘ lán 台灣 人ê 束縛， tio̍h是 i 激情 beh phah 破， beh lòng 斷 ê 要點， hō͘ lán 台灣人 恢復 做 人， 做 真真正正 有人性 的人。

Pâng Su-kî poe̍h kóng

中秋tú kòe，iáu 真 hip joa̍h，日頭 已經落海， iáu 有 31度，聽講 tit-beh 欠水ah。Lán kàu in hia， 風起， 涼涼。

Tòe 阿芬去 hông 請。 In 人leh 烘肉 聚會，lán 去取chia̍h 取lim。In 人來客去， 話東話西， 聽起來 lóng 家庭 和樂圓滿 ê 故事。風吹 涼涼， 想講 lán ka-kī 當時 thang án-ni-siⁿ 靠俗歡喜leh？

-----------------------
好朋友 Ahim in 母á，chō-ji̍t 過身ah。願上帝阿爸父保守in 全家。

Pâ pài-jī 醫生講，ē-sái 拔管ah， chit  2 日á teh 訓練 i 自主呼吸， tio̍h 是 ka-kī 喘khùi， 免 靠呼吸機器， 算 khah 好轉ê 意思。 自主呼吸 訓練， tio̍h ná sêng 中風 ê 復健， m̄肯 忍疼吞艱苦復健， iah 是 復健 bē 好勢， 身軀hit 部份 機能tio̍h 失效ah 。 拔管 khah 嚴重tio̍h 是， 人 nā bē 喘khùi， 無 jōa 久tio̍h ē 過氣。Che lán 自前tio̍h 有 思考ê問題。 在來問題關鍵lóng 出 tī i 本身 身體 kap i 靈魂。

I 中風了後， tio̍h 足失志， tī 厝lih ê 時， m̄ 願 復健， 哀苦哀thiàⁿ，hoah bó͘ hoah kiáⁿ。 Gún bú-á ka-kī tiòng-hong 3 pái， lóng ka-kī  復健 kah ē 行 ē 煮食講。 M̄-koh， chit 時 也 因為長年糖尿症， chiàⁿ kha  剁 1 koe̍h khì， hō͘ gún pâ hoah kah 心狂 人bē 爽。 連帶， 厝lih 做伙tòa ê 小弟小妹， 也 bē 堪得，chiah 姑不終 送 安養院。 I 講tio̍h jōa 好聽leh， 講 無ài hō͘ gún 麻煩，叫gún mài 煩ló i ê tāi-chì。

I 去 hia 也真正 ná tòa kah 真自在， kap he 護理人員 有講有笑。Lán 去soah 顛倒生份。Bóe-á 漸漸 話句 jú 來jú 少， 過年過cheh， lán beh the̍h siáⁿ 去， i lóng講 m̄免。 Kan-ta ài gún bú-á khì，m̄-koh 實在chin bô 方便。Kàu gún bú-á 過身， gún iáu m̄敢 kā i 講。

Téng pang， gún 阿伯 過身， 叔伯阿兄講beh 叫i 去， i mā 驚 費氣麻煩 mā m̄ 肯， hō͘ gún hit ê 阿兄 足鬱卒傷心。 Lán ko͘-chiâⁿ 也無法tit。Taⁿ ōaⁿ i 重症，阿兄 un-nā 足關心， 有時lán 感覺 lán 足不如 叔伯阿兄。 是講， lán leh 想，人 1 世人 lóng 孤單生存， 有緣tàu-tīn， 做 ang-bó͘， 做 pē-kiáⁿ， 也 無 的確 thang saⁿ 陪 saⁿ phōaⁿ，ngī khiú 做伙 顛倒 ē 無好尾 khah chōe。Lán 體認 pē-bú in 無論如何也 過in ka-kī ê 一生ah， he lóng in ka-kī ê 性地、脾氣、選擇、意念、堅持， lán 1 sut-sut-á  也 改bē tín 動。

有sī lán 幼年， hō͘  in 疼惜、照護，hō͘ lán tih 茫茫人生ê 起頭 lih 有 kóa 幸福ê 享受， lán 深深感受也深深感激在心，koh che 也 pìⁿ做 lán 人格ê 1部份 ， hō͘ lán ē曉去 照護別人， 疼惜別人。

Bîn-á-chài，tio̍h ài 趕轉台北， chiah thang 知影進一步 ah。 難免，雖然lán 理智了解、明白， che 一切進展，心iáu 是茹亂。

有時lán 足ǹg-bāng 上帝 kā chit 杯phâng 走。是講 lán m̄ 是耶穌，苦湯 tam--2-3-pái ah， lán  tio̍h 慣勢ah。 Kap 以早 iáuleh 學校 讀書 sio kâng，苦， 有時苦中 ngī 取樂， 發現 jú 苦。Lán 記tî 也 bái， 酸甜苦澀，好bái,  phang 臭， lán liam-mi tio̍h 無 siáⁿ ē 記得。Án-ni m̄知是 幸 ia̍h 不幸， Lán 感覺 好ka-chài。

----------
Lán kā 阿芬 講， 網路有人講 《房思琪》是反殖民書寫，i 無同意。Lán 只好訂 《房思琪》轉來讀，看到底 án-nóa。

M̄-koh chit-chūn chit 種心情讀 che 真正bē 好勢。Lán 開始讀， 讀 四分一， 斷站。想起 三毛、邱妙津 kap  陳燁。 邱lán 完全 m̄ bat， i ê 冊lán 也 讀 bē 落去。三毛 kap林 lán tī 電視 看tio̍h in 本底活，ē 講ē 笑， 無jōa 久 死。陳 帶先天症頭lán bat 親身見過， 講過話，無感覺i siáⁿ koh-iūⁿ， 無jōa 久 mā sī 死。 Lóng 為 情 自殺。
------------------
Lán m̄敢siuⁿ 講， 驚 ē 陷tī 檢討 "受害者" ê 角度。 M̄-koh，lán 摸ē tio̍h ê 資料 kan-ta chit 本冊 kap 網路 影像， 文章。Koh lán 無法度 kā 冊lih ê 主角 kap 作者拆離來 讀。Án-ni，lán 言語 ê 五四三成分真驚 ē oh póe會。

總--是，lán 含苦讀了ah！ 讀了無 救贖， 無昇華，鬱悶bē 得消tháu！Lán 知影 檢察官 撤消案件 ah。 事實 當事人已經過身， in 加1 事 不如減 1 事， koh m̄ 免 去 chhek惡tio̍h 官廳 iah 是 社會 惡勢力。也 i ê pē-bú ē-tàng án-nóa？ 發 幾篇 聲明， pháng 有夠額 ah，m̄-koh tùi siáng 夠額？Lán kám ē-sái 出chhùi？ iah 是出力？反殖民leh？ Kám 有要緊？ Ta̍k 年 有 hiah chōe 有知無知 少女（少男） 受害， chit ê 社會 也無 sáⁿ chùn-būn， ná 小燈泡 事件。 Che lóng 是lán 社會烏暗hit 面ê tāi-chì phah算 oh 講。

M̄-koh， 蕭曉玲、郭瑤琪 、陳水扁案leh chit 款 社會司法指標案件， che 是白明chit 面， kàu 最近 世大運 陳俞璋 台灣旗案， 在在顯明 人格 kap人權， tī 中華民國殖民體制 lih 根本iáu無 任何實質ê保障。

In leh 講 民不與官鬥， 疑， 我 ē 記得是tó-páiⁿ neh！ 讀書 人 讀kah khong去ê 款。

關係 chit 本冊， lán 應該先 kā 當作 fiction、novel 來讀， kā 作者捨離。M̄-ku， 真實比小說koh-khah 刺激、koh-khah失常。人 tio̍h 有法度 kā lia̍h 大綱出來。

1. Tī 書寫 lih， 文字 i 表現 靈魂離開肉體， lán 確實 感受tio̍h。Hit ê 思琪 自 13歲 教師節了後，發生ê 任何事件，i  lóng 無tī-teh 現場， 參與 tī hin ê kan-ta 是 一直大漢ê 肉體，i 講 hit chūn tio̍h i 死 ah。 M̄-koh，lán ē-sái kā che 講做 i ê 修辭，因為究竟 i koh 活 5 tang， i ē-tàng 假影為 愛活得真實（lán 感覺 愛 ná ē hō͘ 人 kan-ta 痛苦？）， iā in-ūi koh 活 5 tang，i 講 i 活tī 異世界（án-ni 苦對toh lâi？）， i jú 活  khioh jú chōe 痛苦， kàu 累積 夠額 tio̍h 行對真正ê死亡（siáu khì）去。

2. Lán 感覺 i描述出來ê 世界 siuⁿ 單純 ah lah， iah 是i 已經無法度感知 真實世界leh？Tī i ê 人生 i kài-sêng kán-ná 看 tio̍h i ka-kī， i ka-kī kap 李國華，i kap 文學（lán 感覺 i ê 文學  kan-ta 是 i 駛性地 ê 路用 iah sî 性質 niâ ）， 李國華kap 文學， chhun-ê lóng 是 世界另 1 面 án-ni。 Án-ni ê 世界 kài 恐怖neh！Lán 看bē tio̍h 任何光明。 Che tio̍h 是 lán 講ê 無能量狀態，當然無正能量，chhiūⁿ i 寫ê "不是救贖、不是昇華、不是淨化"，  Baudelaire 也hō͘ i phah 無話 去。Lán 看也 m̄ 是 負能量， i 講 m̄ 是恨， i ǹg-bāng ē-sái 恨， lán 也 án-ni ǹg-bāng。Siōng無 恨 ē hō͘ i 有行動 ê 動機，chhiūⁿ 郭曉奇 ē 行動， 落 jú 深， 也ē-sái 反抗（雖然無效）。

（Lán講 i 是 hō͘ ka-kī ê "愛" 淹--死， hō͘ ka-kī ê "愛" chhui--死， án-ni kám ē hông kiāu hông chhoh？ ） 思琪對怡婷ê 愛，對 伊紋ê 愛， 有 siáⁿ  實質行動？顛倒頭看 mā sio-kâng。 In ê 愛 思想 真進步， 真活動，愛 ê行動卻是無 lám 無ne， lóng 完全 被動式！ Che 真可悲 可嘆， 也是 教育體制下ê 產品。 Thèng-hāu 老師 hō͘ in 標準答案，雖罔 in 討厭 pē-bú hō͘ in 世俗 ê 答案， koh-khah 優秀早熟， 竟然， 總也行 bē 出 ka-kī ê 路。

3.思琪 bat kā in 母á 透漏，in bú-á 是chit ê 殖民體制下ê 社會母親ê 象徵，隨 kā i koat loh， iah 是 kā i chhi̍h hō͘ bē 喘khùi。I 講 in 同學 kap 老師 leh 行。 Che lán tī 網路有看過， 越戰 ê 故事，hit ê 也 自殺 ah。

4. 出破 別人 ê 慾望， chit 款 m̄-nā 悖德 koh thái-ko ê 慾望， 文學的寫 chhoaih，kám 有 美感？ Lán 知影 暴露ka-kī 慾望 ê 作家 bē 少， 地位也 hông 足肯定。 Ah chit 款 leh？ Lán 險險 讀 bē 了， chit 點 pháng 是因素之中。 In 悖德 描寫 是 teh 講 社會 落伍，bōe 進化， 失 人性。 Ah chit 本ê 悖德 soah 是 落伍、bōe 進化 sit 人性 ê 殖民地行放， chit 種行放描述，文字koh-khah án-nóa súi-khùi， 典故koh-khah án-nóa 深刻，  lán 也讀 bē 出 美學感，連 暴力美學都無。

Kám ē-tàng 講李國華 kap in hiah-ê 同事 kap 蔡 是人性 ê《惡之華》?

5. 原來，Lán 感受 bē tio̍h 美學ê 底蒂tio̍h 是， 李國華虛假 ê 文 kap 愛，用知識 合理化 包裝ê 斯文kap 愛情去欺騙 天真、單純、hē sìⁿ命真ê 愛情，chit 款 行放 實在 使 lán 艱苦 bē soah。完全 是 i 1 人 ê 慾望，而且 自開始 tio̍h 是邪惡ê慾望，chit 項是 真， 機關巧變 koh 真有對人ê 知識， 了解人 ê 弱點， sa 去 利用。思琪 用sìⁿ命 ê 愛情，落lo̍h chit ê 吞chia̍h 人羅網。 應該講 社會羅網早tio̍h 設 好勢， chit ê 老師人， 無 教人 án-chóaⁿ 應付羅網， soah 利用 chit ê 羅網 害人， koh 利用 chit ê羅網 thang 脫身。 政府體制（法律）、社會文化 chiâu sī chit ê 羅網ê 經 kap 緯！

6. 郭曉奇， 因為 新ê 受害者也就是思琪 出現，hō͘ 李國華 按小公寓趕出去了後。Soah ka-kī 去 亂交， 亂chhōe 人 相幹，，kā 思琪看做敵人，koh tī 網路公佈 李國華， 也 失敗。 一直 kàu 收tio̍h 李 國華寄 hō͘ i ê 思琪毛蟹相， i ê 心態 sī án-chóaⁿ 變？ 值得lán 探討， m̄-koh 資料kài 少。

受害者 sio 爭sio phah  極 ǹg-bāng 得tio̍h 加害人垂愛 ê 眼光。 Iā 是kài 恐怖， lán 台灣人 普遍 也是án-ni-siⁿ ê 款式！


結論： 房思琪重傷 了 ka-kī 插管維生， 拖磨 4 5 tang， 了後， i ka-kī 決定 拔 sak。M̄-koh， 插 入去 ê， tio̍h拔 bē --出來ah， 拔起來，i tio̍h 註定死期 ah！李國華 tio̍h 是 害i 重傷 ê lâng soah koh假做醫生， 假影 仁醫 kā i 醫療 ，kàu 現出真面目  tu̍h 最後 1 刀---

延伸：林奕含  〈進學篇〉
---

原來 涼涼， leh 鬱雨， koh 無jōa 久， 開始滴。日月潭 相疊 hit 9 隻 石水蛙， 走7隻出來 ah。
Lán chit-chūn 發覺 落 tī 話語 lih，beh 表達 情感 發洩情緒，好ê bái ê，歡喜ê 憂愁ê，憤怒ê 清閒ê 等等，卻是無夠額thang 用。 莫怪， in kha̍p bé-tio̍h tio̍h kō͘ 譬喻，用 che 比he， 用 sêng che sêng he leh 講話，lán sa 無 sáⁿ 有。 M̄是 lán 無才調抽象，感受情感， sī lán 罕得用， gâi-gâi，gâi 久soah 失功能 ê感覺。 Lán 欠缺 情感教育，情感詞彙，思想 chiâu 是觀察客觀事項，描述，比較論理，分別真假án-ni。人生 缺 1 大半。

goe̍h siōng îⁿ ê ji̍t

月 siōng 圓 chit 日， lán 心 soah 茹亂。 心 但茹亂， lán tio̍h m̄ ài 講話，ut leh，lán 話語 tio̍h ē li-li-lak-lak，iah 足chōe 台語詞lán tio̍h phah-m̄-kìⁿ 去。

Pháng  有人 替lán可憐。 Lán sī-tōa 操心勞苦 超過 4 分 3， siōng 尾 ê 日子， 清閒 無 幾日， 身命病 tio̍h piak ah。 Lán beh 奉待 in thang hō͘ in 過 好日 也無 jōa chōe 日， 又閣 苦頭 苦尾。 In心念 又閣 驚 勞煩 gún chiah-ê sī-sòe。 Haih！何mih 苦， 久病無孝子， gún tau bē lah！Lín ná  hiah 無信心 leh？！

Lán 自gín-á 時， tiāⁿ 看 tio̍h 街路頭， 有he 老人 hông 趕出門ê。 事實， lán 無 看tio̍h leh 趕ê時， lán 看tio̍h ê 總是 in 已經 leh 街路流連 ah， án-ni lán lia̍h準 he tio̍h是 leh 連回。Gún bú-á 也án-ni tiāⁿ kā lán 警誡， lán 幼chíⁿ ê 心肝 hiah-nih軟， ná ē  無 聽chhùi leh？
Lín 堅心苦勞， gún  lóng 有 看tio̍h ah， tùi gún 溫暖牽成， gún 也 絲絲 入心 ah。 人 ē 互相 ah， gún 幼 lín chhiâⁿ， lín 老換gún 照顧， 理所當然，lín soah 顛倒 leh 客氣 客tak， gún sī-sòe soah mā m̄ chai tio̍h án-nóa 好。

Lán 知影 i phah 算 tī 前半世人 tio̍h kā 福氣 用了去 ah！前十幾日á 拜五（9月15日），開學chìn前，pâ 又閣出tāi-chì， hō͘ 中英送入 樂生ICU。 插管，講 因為 感冒， 引起 肺積水，khùi 喘 bē 起來，人 昏迷。Àn 肺內底抽水出來， koh 有 發炎，驚 感染， 所以有 注藥， phah-sǹg 是 抗生素。 Lán 隔日 拜六，去看 有 khah 好--sió-khóa。 總--是 bô-thang 樂觀。 無樂觀ê 原因主要sī i ê 態度。Kàu taⁿ， 2 3 禮拜 ah，聽講 下禮拜一， ē-sái pak管 ah。 情形 也 無 確定。Chìn 前 雪 煩惱，操心 ko͘-chiâⁿ lán 去看，lán kan-ta khì khòaⁿ hit chōa。 Kàu chit chūn lóng 看 LINE 了解進程。淑，chit pái 也 開始煩惱 ah。

Lán 知影， chit 款症頭 chin bái， 尤其對老人，  久m̄ tín 動 ê 人，身體機能 漸漸退化， khùi 無法度ka-kī 喘，送醫也是拖niâ。 插管抽水 送 sàng-sò͘ kàu氣切 tàu 管， 病人艱苦， bē tàng 講話 表達意見。Lán 也m̄ 知tio̍h án-nóa 決定。 Chō日 Seng--á 講氣中英 看無人，chiah 知影 hông 送去 樂生， 有siū-khì， che lán 真正也 m̄ 知 ài án-nóa 做khah tio̍h。 Kan-na 1 日 過 1 日。

事實，醫院ê處理 總 khah 專業lah。 Lán tī hia siáⁿ tāi-chì 也 無才調插手、喢話。親人中間也討論， 也 煩惱， 也茫茫渺渺。 Lán認為 人ê性命 lóng tio̍h ka-kī 負責，也 tio̍h 交hō͘ 上帝，lán 祈求 上帝保守 in ê靈魂。 人kap 人 ê 親疏，lóng sī 孤立ê關係， 也 lóng m̄免去強迫別人符合lán ka-kī ê 認知 kap 情感要求。親人也是 chit ê 原則。 Che kám 代表lán chin 無人情？ 不孝？Lán ê 認知án-ni，對i ê 態度是盡量順i ka-kī ê 意， 親人 mā 是。Nā 自然界流程 án-ni， lán 無必要 強阻擋，親kap情 也 無一定必要 表現hông 看。

Lán kin-á-ji̍t tòe 阿芬 kàu 南化中坑。FB 朋友 講：kè是 老人。 Tio̍h， 活動 來-ê，kè 是 老人 ah。是講，nā 算做 拜五，上班日， 中青年確實 tio̍h 出外， m̄-koh， chia 農村， 上班？ Koh 中秋 chiah 過， 日頭雖漸漸短--來， iáu 是 熱 kah hō͘ 人kui 身軀 bē 爽快。

Lán 過 玉井 南化街á 走20乙， ē thàng 左鎮 hit 條， soah 走 過頭，kàu 西埔 koh 去， 阿芬有看tio̍h 左鎮交界， chiah kín 翻頭， 果然 tī 南天宮 hit 位。 Lán kàu 位ê 時， hiah ê 兄姊 lóng tī hia ah，淑慧小姐 鼓舞， 人人坐椅á 運動。


Lán cha-hng 開破 現代人 1 kóa 問題 hō͘ 學生聽。三、四歲á gín-á chai tio̍h hông sàng 去幼稚園，kap pē-bú thiah 分離，有夠 可憐，kap pē-bú 關係都 iáu-bē 建立好勢 leh， tio̍h koh 去 kap chhiⁿ份ê老師 iáu koh ū 其他ê gín-á tàu-tīn 生活。此去，一直kàu 出社會，學校 ê 生活變做 1 日 內底時間siōng 長 koh siōng有精神 kap siōng 要緊ê 部份，家庭 leh soah chhun 食 好料 kap 睏 ê 功能 niâ 。 莫怪， pē-bú kiáⁿ-jî 關係 bái， 兄弟姊妹 mā 無thang 好，  siōng 明顯 ê 人格影響tio̍h是 人人無誠信。M̄-koh， che 無人 甘願 iah 是 佮意。

人 tī 家庭親人感情bōe 穩定， bōe 好，去外口 kap 朋友五十 mā bōe 好， 無誠信， siáng ē 好 ？Ka-ki mā m̄ 知 án-chóaⁿ ē án-ni-siⁿ，kan-ta 苦悶 無tè tháu。Liáu-āu， 青春期 holemon 發動， liam-mi tio̍h 結做堆， 甚至 結婚 組新家庭， 生gín-á ， mā iáu 無誠信， 所致， 無 jōa久 tio̍h 離緣。 Án-ni，beh chhōe 人 做伙 soah 無 能力 建立親近 ê 關係， 致到 苦楚 kui 世人， koh 遺傳 hō͘ i  chhìn-chhài kap 人生出來 hit ê 幼嬰á， án-ni 惡性循環。

無結婚 kám tio̍h bē 受chit 項苦？ 無誠信 kui 社會lóng thòaⁿ kah， lín beh 走閃去 toh？ 莫怪，妙禪 hiah 興， 人人敬愛seafood，顛倒親chiâⁿ 朋友ê話 聽 bē 入心。 Án-ni！

Ah beh án-nóa phah 破 chit ê循環？  唯一， tio̍h 是 ài 學習真知識， 察覺 ka-kī ê 處境，困境，走chhōe 出路 lah！ Nā 無 真正 生活 khah 輸 豬á！Seafood he m̄是真知識 heh！ He kap 迷幻藥 khah sêng lah！ 食久 食 siuⁿ chōe 頭殼 ē 破khang ， koh ē kiu， 膀胱mā ē kiu。

Lán chit-má 所做ê一切 lóng ē 影響 lán ê 未來， 汝beh sńg 電動， beh tuh-ku beh 放空，beh 學習， beh 精進，lóng án-ni， che chiah sī 業karma lah。

Pâ ê狀況， lán 有ê 看有， 有ê m̄ 知， koh bē-tàng 講話表明 che chiah 是 lán 為難ê 所在 ah！講起來， gún pē-á-kiáⁿ 情份 mā 一言難盡。兄弟姊妹 中， lán kap i  算交陪siōng 久，看 i 青春 kàu hiông-hiông 中風 kàu taⁿ。 頂pang 講 i 實在thiàⁿ kiáⁿ sioh kiàⁿ， lán算做 i thiàⁿ siōng chōe，i  leh bòng（chin hàm ê tāi-chì） 也 知影 siōng chōe， lán 有時ē 感覺lán 了解 i， 也ē-tàng 體諒 i，感激 i。

Tiong-chhiu hoán-séng kám-giân

Kàu taⁿ， lán 做人老師也 足chōe tang ah， 如今 jú 來soah jú giâu-gî ka-kī ê 行放kám 有 老師人ê 格 iah-sī 質？尤其， 幾 ā年ah，學生普遍無leh 要緊學校ê 學習ah，睏、hôe 手機á、sńg 電動 lóng 比 聽lán 講課 khah 好。Lán 看tio̍h 也 無火氣ah， kan-ta 憂心藏 tī 心肝頭 niâ。Iā án-ni，社會 iah-sī 學校當局 lóng ē 要求 老師 ài 變竅， ài 變猴弄， nā 變無súi-khùi， iah是根本變無lián， tio̍h lóng kā 學生學習責任 tu tī lán ê 肩胛頭。 有幾ā回，lán óa beh 10 ê 博士老師，為tio̍h 1 ê m̄ ài 讀書 m̄ ài 上課ê 學生gín-á khui 會 檢討 老師管教 siuⁿ 嚴、 課程內容 siuⁿ 難。Siūⁿ  tio̍h kám bē 使人 iàn-khì leh？ Koh 有he 學生教學評量烏白寫， lán改進報告tio̍h寫bē 了。

Lán 社會人算是bē-bái， 看 tio̍h 老師人人真 ē曉 敬重，是講 m̄ 知leh 敬重 sáⁿ hòe， kap lán chōe-chōe 人 拜神拜佛 kâng 款， khah 大面 giâ 香tòe 拜 niâ。 而且， koh kan-ta ńg-bāng 神明 ē  tiám-tîn 保庇， lóng 無 leh khòa 念 i 神明 對重ê 精神生活。

我bat 問過 gún 親身老bú， i tio̍h 是 án-ni。I 也算做 台灣cha-bó͘ 人 ê 典型代表， 8 9歲 分 hō͘  gún A-má io，pún-chiâⁿ beh kap gún A-kū sak 做堆， m̄-koh in 兄妹情 贏過 pē-bú 意，chiah ē 嫁gún pâ， chhiâⁿ gún chit tīn gín-á。

8 9 歲， hit 時 chng-kha 所在 ê gín-á 有ê 早 tio̍h ài 款 kui 家 ah，所以， 有 bat 事 ê， gún bú-á 照講 人 無leh gōng，thài ē m̄-bat leh。是講 in chhin-siⁿ pē-bú 家境實在 bē 講tit， 分--人了後， 也 bē-sái koh 來去。Lán án-ni 想， 看 tio̍h 8 9 歲 cha-bó͘ gín-á， pē-bú kìⁿ bé-tio̍h，lán kám-bē 心肝頭chiâu 酸 leh？  Kap pē-bú 拆離， siáng ē 堪 tit！ Án-ni tùi i 影響， kám bē 1 世人 ？Koh pun--人 m̄-sī 去做 小姐人á lioh， sī 去做奴kán lioh。Só͘-tì，lán 一直認為 i 心理 ê 傷痕 早tio̍h 變做 khih-khiah， chit ê khih-khiah永遠 bē 好，人永遠無 thang 爽快，án-nóa 補也補 bē tīⁿ，che 也 éng-éng 影響 tio̍h gún chiah-ê gín-á。

Só͘-í， i 國校三年 tio̍h 無 koh 入學園 ah。I bé-á tio̍h kā ǹg-bāng lóng hē tī kiáⁿ-jî sī-sè 身軀。 I bat 講 nā i ē-tàng， i beh 有冊讀kah 無冊，ta̍k 項都 beh 贏--人，鼓舞 gún 人人盡量讀，m̄-koh gún pâ tio̍h 無 án-ni 想。Gún pâ khah kah意 人生輕鬆度日 tio̍h 好， m̄ 免 kah 人 爭siáⁿ 名聲，成就，也m̄ 免ūi tio̍h 金錢相爭kah 流血流滴。Gún hō͘ gún bú-á 影響khah 大，也是gún pâ 愛樂暢ē 關係。

Gún pâ 賭 飲， nn̄g 項 無 chat 無chè， iah 嫖 góa tio̍h m̄ 知，bat 幾ā pái， 半暝á， gún bú-á 挖我起來 陪i 去 kiáu 窟 lia̍h 人，有時， tio̍h koh 去 路頭 扛人。 Tì-kàu， gún bú-á 怨嘆 1 世人。Kàu 過氣 ，chhùi to͘ m̄ 願 原諒gún pâ。是講， lán mā giâu疑，i chiah nih chheh gún pâ， ah ná ē gín-á siⁿ kah 7 ê leh？ 事實講， gún 爸 bòng bóng bòng， tùi gín-á koh 極有量 koh thiàⁿ惜，chit點 應該 是in nn̄g-ê ê 共同點。

家內事講 chiah chōe。 Kàu chia先chhé。Lán 是beh 講，尊師ê 觀念 kap 態度 lioh。 Lán nā ē-hiáu 尊師， tī chia 算做是人格ê優點之一。Kui ê 社會lóng án-ni 教示 lán，m̄-koh， lán 警覺tio̍h， lán 自 入學校開始，kàu 離開 學校， kám bat 讀過 "尊師" ê 課文leh？

Lán 想無， phah算 是無。Ná ē 無 he to̍h 真怪奇ah！也lóng bô 講tio̍h siáⁿ-mih gâu人， 是受 tio̍h siáⁿ-mih 老師 教育khan-khioh-ê， ná ē án-ni lah？Kan-ta 叫lán ài 尊師， soah lóng 無leh 講 án-nóa tio̍h 尊， chun ê 理由 leh？ 免理由，一日為師，終身師， kah 奇！

唯一講tio̍h 孔子公， iah是 韓愈 寫 1 篇 "師說"， 內面 lán kan-ta ē 記得 講：師者，傳道授業解惑也。 講án-ni leh 講， 也 m̄ 知i leh 講 ê 道、業、惑 是sáⁿ！

Ka-tī 無ê， kám ē-sái hō͘ 人 leh？ 師 ka-kī kám 得道 ah？ Ē-tàng 傳siáⁿ-mih 道 hō͘ 學生 leh？ In m̄ 是講 道可道 非常道... Ka-kī  iáu無得道，beh án-nóa 傳？授業 mā sio-kāng ah，吾不如老圃、吾不如老農，beh 授 siáⁿ 業。 經濟學大師kám ū 才調 教人 thàn 大錢？解惑 koh jú 淺明， 做老師ê 人 疑惑也是 kui 山phiâⁿ， 自身ê， 家庭ê，社會ê，國家ê，差不多無 1 項 有才調 解惑 lah！

Án-ni 講起來，到底 老師是 sián leh？ ài 做sáⁿ？ 孔子公講 三人行必有我師， hit ê 師 是 sáⁿ？

thâu-mn̂g phòa-pêng

有1 ê 人， 頭毛 落kah chhun 3 ki， 有時 人ē kā i khioh笑講， chhun 3 ki niâ  ná m̄ 總 剃 sak khah kui-khì。 I 笑笑 ìn 講， 3 ki 留leh， 我 ài 梳 tò-pêng tio̍h 梳 tò-pêng， ài 梳chiàⁿ-pêng tio̍h 梳chiàⁿ-pêng lioh, kài sù-sī lâng sóng。

有 1 日， 1 ê chok-gia̍t 人 起意, soah kā i 中ng hit ki 挽 sak， 想講， 看你 koh án-nóa tò-pêng, chiàⁿ-pêng 梳。 M̄-koh 人 i 講 án-ni 也是好， chit-má ē-sái phòa-pêng 梳 ah。

ti thian-bēng

Lán sa 手機á 來， sńg 無siáⁿ 路來， m̄-koh，lán khah bē 嫌講 手機á 無好，設計bái，人機介面 差， tio̍h 是 真 自然 bē 嫌 溪e̍h koh oan lah。 Che sī 對 科技 投降ê 心理， 想in sin 科技， sin 發明 ， in tio̍h是 足khiàng 足 進步， lán ka-tī bē-hiáu， sī lán ka-kī 落伍，ka-kī ē 想講 m̄ 通講 khah bē落氣。 事實， 無的確按呢siⁿ。Gún 同學 tio̍h 有人，10數年前 tio̍h 嫌講 Windows 系統 ná m̄  chhi̍h 1 ê key， i  tio̍h ka-kī an-chng 好勢ah leh？ Lán hit-chūn sim-lāi hiâm i pîn-tōaⁿ m̄-khéng ha̍k-sip. Taⁿ chiah 知影 人是天才， 問 he 是 表面話， 下底 leh 想 khah 進步ê mn̍gh。

確實， 科技ē hō͘ lán 感覺落伍，soah bē 記得， bē 去想思考、議論， 科技終極目標也是服務lán 人 ah， lán 人 chiah 是 主體， chiah 有永恆ê價值ah。 是 án-chóaⁿ， 科技進步 lán tio̍h kā 人趕走leh？ 制度、團體也相siâng，家庭、學校、工商活動、 大kah 講國家、iah 是 國際組織也lóng 是。Lóng bô 應該因為i án-chóaⁿ 大 án-chóaⁿ 進步，tio̍h kā 人 chit ê 主體 看輕。

講起來， lán ta̍uh-ta̍uh-á ē了解 孔老 kiáⁿ， i ē tī 50歲 講 i 知天命， hit 時ê sim-chiâⁿ ah。 窮實， 天命 tio̍h 是 ka-kī ê 志向 志氣 niâ， i 50歲 知影， 算 siuⁿ 慢ah， siuⁿ òaⁿ ah。 Lán kám 知影 ka-kī ê 天命？ 日本ê 動畫 kap bàn-kah  tiāⁿ-tiāⁿ 出現 chit ê主題。

知影了後， kám 免行動實踐？ Ē-tàng 承受jōa chōe 失敗 打擊 iah是 冷水chhiâng leh？ Lán cha-hng 頭pái 見tio̍h 史明 本人， i 號 史明 pháng ū 2 層 意義：第一， 台灣人 ài 知影ka-kī 台灣ê 歷史， 讀 hō͘ i bêng，第二、kā 台灣歷史 póe會 hō͘  i 明 也是 i ê 使命。本名 施朝輝， 今年 100 歲ah。Chhùi齒 lak 了了 ah，講話 無利便 ah，lán iáu 聽ē chhut i 頭腦思路 iáu-koh 真 清明，台灣tio̍h 獨立， 理念意志堅定。

Lán tī che 台灣歷史nih，茫茫渺渺 beh kàu tī-sî leh？ 老 O͘jisang 講： 1. 理念 ài 清楚、明白、堅定 2. 人ài 有 熱情， 有行動 3. tio̍h ài 有活路ê 戰術、戰略 4. 個人 ài 有修養，tio̍h ē-hiáu 反省，ài 讀冊，ài 學習。 Che lán 知影  thài 少人 做 ē kàu lah。Ah nā lán ka-kī， lán ê 理念都 分拆 bē 好勢 ah, koh leh 講 孔子...

Chit pái 算做lán koh 1 pái kap 心靈ê 大人 當面 相見。 Ta̍k-pái， lán lóng sa 無話 thang kap in 對話。 Lán 知影 有對話 chiah 有 交流， 有交流 chiah ē 共鳴。 雖bóng，lán 也有台獨建國 ê理念 kap in 連結 ， 總--是 lán 總 感覺 ka-kī tio̍h 是 Yeats 詩 lih 所講ê hit ê phah石 ê。

是cháiⁿ-iūⁿ-á， kā 責備ka-kī ê 心理活動 擋 tiām 放 soah， chiah 困難leh？ Pháng 有 1 項因端， m̄ 肯，lán-si 學習 新觀念、新知識， 目bē 光 看bē 深 、想bē hn̄g， gâu 怨嘆niâ。Nā gâu 怨嘆 tio̍h ē 失志無khùi力，精神也 tòe leh ià-lán。Che bái。