mi-sou-si-ru

1. ú-tiū sī mi-so-si-ru A-kiông kap sù-siông sio-siâng, thàu-chá lâi kàu A-sam--á ê tiàm, iā sio-siâng tiám 1 óaⁿ khòng-bah pn̄g, 1 ti̍h-á thô͘-tāu, tāu-koaⁿ, hái-tòa chòe chá-tǹg. Kóng iā bô-leh gōa chá, ji̍t-thâu í-keng peh pí tùi-bīn ê ki-tē-tâi khah kôan ah. I khui-chhui kā A-sam--á mn̄g, hit ê iâⁿ-tūi lín kiáⁿ kám ū pò-miâ? Koh chhun nn̄g hi̍t tio̍h cha̍h-chí ah ô͘! Chū gín-á hioh-kà lé-pài gōa, i piān-nā lâi chia̍h chá-tǹg tio̍h it-ti̍t leh hōe chit chân tāi-chì ah. Chit ê sin lāu-su, khòaⁿ--khiaih chiok jia̍t-sim lioh. A-sam khang-khòe khah làng-chām, kiâⁿ óa lâi chē i tò-chhiú chiah khui chhùi kóng: Tio̍h ah, koh lâi góa chia, kā góa ko͘-chiâⁿ. Kóng gún kiáⁿ bô khì si̍t-chāi phah-sńg. Lán sī siūⁿ-kóng, gín-á 12 hòe ah, iā kai hō͘ i chhut-khì le̍k-iû, cheng-ka kóa keng-giām leh, koh chài kóng, chit ê iâⁿ-tūi chit-kú si̍t-chāi chiok sî-kiâⁿ lioh, lâi góa chia ê lâng-kheh 10 ê ū 8 ê leh hōe. A-kiông thâu ná tìm, iā ná sīm. Ba̍k-thâu sió-khóa khioh óa. Siūⁿ-beh kín khì pò-miâ koh hôan-ló, kóng kah chi̍h-chām, Sī-kóng, pō͘-pîn m̄-bat lī chhù hiah kú neh. Lán mā-sī teh hôan-ló kóng. M̄-kú, gún bó͘ mā chin sio-jia̍t, kóng cha-po͘ gín-á chóng-ū 1 ji̍t tio̍h ka-kī sêng-tam i 1 ke ê tāng-tàⁿ, chit ê iâⁿ-tūi thang hùn-lia̍n siōng hó. Bô lán kan-taⁿ khui tiàm, siōng-chōe chhōa i chhut-kok iû-lám, hāng-hāng lóng ū-lâng leh ho̍k-bū. Tio̍h sǹg khì surf, khì ski khì thiàu poe-lêng-ki, lâng mā lóng ûi-hō͘ kah hó-sè hó-sè. Kun-pún to͘ bô thiau-chiàn ê khong-kan ah. Ah, án-ni, lín kám khì pò ah? Gún kiáⁿ iah teh khó-lū. I kóng i teh siūⁿ khì o̍h thiàu-bú iah-sī khì iâⁿ-tūi. Lí mā chai-iáⁿ, chit ê gín-á nā koat-tēng lo̍h-khì, i tio̍h ē chīn chôan-la̍t, choan-sim khì chòe. o͘h, góa siūⁿ-kóng i nā khì pò ah, góa chiah chhōa gún A-lêng khì pò, hō͘ in 2 lâng ū-thang sio chiàu-kò͘. Gún A-lêng khah pì-sù, m̄-ku, chit ê iâⁿ-tūi i chin ài. Kah nā án-ni, góa mā lâi ko͘-chiâⁿ khòaⁿ bāi, pún-chiâⁿ góa sī lóng pàng i ka-kī koat-tēng. Iân-nā kóng, koh khì kò͘ tiàm, koh ū lâng-kheh lâi, sī A-chhun kap A-sioh in ang-á-bó͘. Khòaⁿ--khiaih tú cháu-kiān liáu. A-sam--á, kāng-khóan--ê haⁿh! Ji̍p-mn̂g, thâu o̍at lâi o̍at khì chiah khòaⁿ-tio̍h A-kiông, óa lâi chò-hóe chē. In lóng lāu chhù-piⁿ ah. Ah lin hāu-siⁿ kám ū pò-miâ ? 2 lâng chhiò-chhiò, A-sioh khui-chhùi kóng, ū ah, 2 ê hiaⁿ-tī-á sio-chio kóng beh khì, gún tio̍h hō͘ in khì ah.