Nn̄g chiah ìⁿ-á teh khai-káng

Nn̄g chiah ìⁿ-á teh thang-á piⁿ khai-káng, ná khoàⁿ pak-hng ê kong-kéng. Lán, kiaⁿ kā in chhá--tio̍h, khin-kha neh-chhiú keng-kòe. Iah-sī hō͘ in siòng tio̍h. Chiu chi̍t siaⁿ, toā-toā siaⁿ kā láng koáⁿ. Lán sī beh kòe hit thâu sóe chi̍t-ê-á chhiú niâ lah. Chhiáⁿ lín mài kiàn-kòe lah.
Koh chiu chi̍t siaⁿ, chi̍t chiah poe cháu, chi̍t chiah kim-kim  kā góa siòng. In kha-chiah-phiaⁿ mā sī kim-kim khóng-chhiⁿ kah thiⁿ kāng sek, heng-khám chi̍t chiam chi̍t chiam ka-pi sek pho͘ teh pe̍h-sek té ê lāi kah-á téng-bīn. Phian lâm ê ji̍t-thâu chhiō bōe-tio̍h.
Soah, lán kín koh khin-kha, se̍h tńg khì chi̍t ê  sì-kak kheng-á só͘-chāi, chò he bô chháu bô siâu ê m̄-chiâⁿ tāi .

Thâu-tú-á, nn̄g chiah ìⁿ-á teh khai-káng, ba̍k-chiu khoàⁿ tùi pak-hng ê thiⁿ. Ang-á-thâu kah kha-chiah-phiaⁿ kāng sek, lóng thiⁿ hit pān ê khòng-chhiⁿ. Káⁿ sī teh chham-siông chó͘-kong-á lâi ê lō͘-soàⁿ leh.