le̍k-sú tio̍h sī le̍k-sú

2015 mar. 3 

cha-hng 5 點 半 khah ke, lán 看 tio̍h 日月同天, 想 beh kā hip khiaih. M̄-koh, lán 知影, 用che gōng人數位相機 來 hip, 有i 利便 koh súi-khùi ê 所在, m̄-koh 電子自動感光, i 真厲害也 真死tēng. Lán 用 sony chit 台, lóng 無法度hip tio̍h 月娘ê 貓面, 顛倒Olympus hit tâi khah hip 會起來.

柯市長 228 演講 hō͘ 人àn 心肝頭感動。 是講, i 無beh 拆 蔣ê 石[銅]像, 講：「並非精神上的屈服，而是我們終於可以超越歷史，作自己的主人！」 Chit 款話句, 足se̍k-sāi, 愛kap 和平, mā chiok se̍k-sāi。Lán 足chōe 人, 聽tio̍h真ngāi-gio̍h, chi̍t 方面, Tâi-oân ê tio̍h傷心理, bōe-tàng 得安慰, chi̍t方面, chit 條理, 無法度了解, 想透直, koh chit ê 看法, lán ná 看著 魯迅ê 阿Q！

蔣介石殘忍酷橫ê 殺人魔[án-ni 講無過份], 雖然i ê 像lóng 盡量做做溫和, 滿面笑容, 體恤黎民ê 模樣, che 也是i thiau 故意 激ê 形象, 當然beh 欺騙世人, lán Tâi-oân 人 kap 其他世界 ê lâng, tio̍h 算 講 in kā i phian 造1 ê 完全bô-kâng, 正面ê 故事, koh kau-kâⁿ 真有教育價值, 意義ê 成分, thang好教 gín-á, mā m̄免 ah！1. 有 其他真chōe 例thang 用 leh, 像 chit nn̄g 日ah, 高雄莊朱玉女 ê tāi-chì. He tio̍h thèng-hó 做模範ah, m̄ 免ngī lia̍p造 2. liap造ê ké-pâu 歷史來chhāi 像, che 對ka-kī kám bōe 心虛？ koh teh 面對序細ê 時, beh án-chóaⁿ 解說？ 3. chia ê 歷史m̄是kan-taⁿ lán chia 知影 neh, 全世界通人知, mā ū piak 破ê 時chūn！ ná tio̍h ngī keng 1 ê 白賊leh ？

汝ē-tàng 超越歷史, chit句 真阿Q。無！汝 ná-tio̍h 目屎流目屎滴？無去面對[治療]歷史事件, 人物,  無去處理, kan-taⁿ 講超越, án-ni tio̍h 會好？ lán 對所有ê 不幸, 創傷, 壓力, 悲哀也lóng ē-sái án-ni 超越ah！Nā án-ni, hông thâi hông 強, lóng 哭哭leh tio̍h ē-tàng超越 ah, [汝tio̍h 變做獅á ah], 免去了解真相, 免去分拆歷史濛霧, bián 去追究加害人,  免去治療傷痕 án-ni kám 會好？

茫茫渺渺 ná chia̍h 酒chia̍h 毒ê 人 kóng 會飛天會鑽地 sio-kāng ah。Chit 款症頭其實真簡單, tio̍h 是 自我防衛niâ, lán 其他ê lâng 看tio̍h, 會 lia̍h-chún i sī 神經病！Lán Tâi-oân 人 chit-kù tio̍h 是 普遍神經病, 有ê khah 重症, 有名 號做 Stockholm Syndrome 司督呼汙毋 症頭！