Khui-chhùi tāu(Pistachios)

 Khui-chhùi tāu(Pistachios)

                      Lîm jū-khái( 2008-02-13 )林裕凱

      Kôaⁿ-sih-sih, āu-chhiah-thâu 12 tō͘

      It-ti̍t sái khì ê kū-nî-tau

      Chóng-sī bô khó-lêng tán-hāu

      Sim ân-ân

      Kóaⁿ beh tńg-khì ê lâng-kheh

      Ko͘-toaⁿ thèng-hàu

      Iah-sī pêng-iú saⁿ tn̄g-thâu

      Chit-má Sî-kiâⁿ chit-lō

      Pit--khui ê khui-chhùi-tāu

     Tâu-ki bô tâu-ki ê ōe

     Kì-chāi i kóng gōa chōe

     Thâu-lō͘ būn-tôe, Kiáⁿ-jî sī-sòe

     Chia̍h-pn̄g chù-chheh

     Chhú-khì seng-o̍ah

     Ài koh hôan-ló siáⁿ-hòe

     Chhia-thâu óng-hôe ê lâng chiām-chiām khó-lâu

     Sin-chiaⁿ nî-thâu

     Khui-chhùi-tāu khui chhùi kóng thàu-lâu

     Eng-àm léng-hong huh-huh háu

 

    寒sih-sih, 後車頭 12度

    一直駛去ê舊年兜

    總是無可能等候

    心ân-ân

    趕beh轉去ê人客

    孤單thèng候

    Iah是朋友相當頭

    Chit-má時行chit-lō

    Pit--khui ê開chhùi豆

    投機無投機ê話

    據在 i 講gōa chōe

    頭路問題, 囝兒序細

    Chia̍h 飯註冊

    此去生活

    Ài koh煩惱siáⁿ貨

    車頭往回ê人漸漸洘流

    新正年頭

    開chhùi豆開chhùi講透流

    Eng暗冷風呼呼號

saⁿ-goe̍h ka-iam-kôaⁿ

1.                        三月天氣真lān-mōa，昨日燒熱liâm-piⁿ寒；認識台灣歷史線，人人chhiⁿ-chhìn ka-iam寒！

2.                        三月初八真可怕，土匪起山目chhâ-chhâ，可歎先民m̄-pat飽，chún--bô china 做阿爸。

3.                        精銳部隊 súi tang-tang，起山上陸隨thâi人，親身下令kui 島 láng，in 講lán kap in 無相kâng。

4.                        天然優良Ke-lâng 港，海港 kui phiàn soah chiâu 紅，無分老大iah幼紅，見面總掃無惜工。

5.                        了後戒嚴三八年，台灣 giâ 頭無看天，莫名奇妙 tio̍h pháng 見，無死奴隸年盤年。

6.                        In teh thâi人無為難，比較地獄khah 粗殘，人人風聲驚kah sán，kioh 是魔王降人間。

7.                        是真魔王lán m̄-pat，bē-hiáng phah-tat 真m̄ 值，迎請回島來chau-that，遺禍 kiáⁿ 孫出gōng力。

8.                        魔王虎á kui大tīn，化妝拯救大偉人，慈祥無限仁仁仁，解救台灣 lóng 講in。

9.                        Thâi人phēng chōe koh chiok 緊，就是魔王i親身，民族救星thâi 國民，神經亂kah chhāi 做神。

10.                    Ho̍k-sāi 魔王chiâⁿ 好kàn，致蔭 kiáⁿ 孫kâng 強姦，強佔別人ê 家產，nā beh tâⁿ 話chhèng sûi tân。

11.                    衙門開起kek 開化，法條萬千m̄准嘩，私偏魔王in 佔大，人民beh 告無khah choa̍h！

12.                    也設學校學別國，chhèng枝侍候 teh不服，滅絕台民tùi根 tok，教育gín-á 背母族。

13.                    如今台民châu變體，bē 輸神經兼tio̍h che，台灣kám無原住客，清醒ê 人有幾ê。

14.                    Mih 故 ka-kī phah ka-kī，hō͘ lâng 分化是一時，走狗liâm-piⁿ lia̍h 去煮，名列走狗都無 i。

15.                    走狗sau-phî m̄-sī 狗，講人體面無leh 留，貪名仗勢nā 講透，人格tàn leh 塗kha-tau。

16.                    台人變質先mài 說，本頂先民死三月，物資精神 in chiâu thoe̍h，毒刺tī-sî thang 來poe̍h？

17.                    魔王chōe 人teh ho̍k-sāi，台人ho̍k-sāi 真不該，thâi lán 先民絕後代，變做奴隸 koh m̄ 知。

18.                    魔王屍體bē àu nōa，大溪造廟bē豆干，hē tī 神社hō͘ 人看，豆干 káⁿ tio̍h 配人干。

19.                    Chit ê 政府m̄-sī 款，維護屍體為mih 端，共產國家ê習慣，中華民國真齊全。

20.                    真空法師講大概，蔭屍m̄ tâi kài chhi-gâi，姦殺台灣你kā 拜，ho̍k-sāi 魔王 真不該。

21.                    介石殺人真chiâⁿ chōe，本島超過 saⁿ 萬 ê；起廟 ho̍k-sāi 逆天地，莫怪台灣 teh 連回。

22.                    Taⁿ 講台灣出頭時，事件經過七十年，當初全島kui phiàn 死，兇手chhōe 無真怪奇。

23.                    講tio̍h 全是血kap 淚，無辜ê人死kui 堆，三代 m̄ 敢 ke sngh khùi，歷史脈落ke 減追。

24.                    三十八年大戰敗，走路逃亡台灣來，奪lán田宅 kā 人害，phòng 風 phòng kah 比天hai。

25.                    土匪 kiâⁿ 放 sì-kòe piàⁿ，chhèng-chí cheng-piàng phah bē贏，搶奪土地講放領，人人聽 tio̍h 心驚hiâⁿ。

26.                    Koh 有 chi̍t 味三七五，手術地主bē 糊塗，phah-sòaⁿ 社會ê 基礎，換in 大細過真舒。

27.                    In 舒台灣足艱苦，koh 有 四萬換chi̍t kho͘，sió-khóa 研究 tio̍h 知 ló͘， 日本都無lán chiah 塗。

28.                    三大政策 kiâⁿ 做頭，政府機關kā in 留，koh 嫌án-ni 食無夠，山海in 也lóng beh 包。

29.                    日本建設 ê 成果，設hō͘ 台灣進步多，講是 in 來chiah 起造，bē-hiáu hiān-sì lo 再 lo。

30.                    蔣家chhōa 人盡歪道，khà 油食錢 châu  oai-ko，莫怪大陸 phah 失落，輸了江山sì-kòe 逃。

31.                    逃來台灣真hiau-hēng，此去台灣失光明，介石總統自承領，koh 有米國 teh 後pêng。

32.                    Kiⁿ-ti̍t（驚蟄） 時kàu陳春雷，無辜慘死chiâⁿ 大堆，七十外年血 kap 淚，sak hō͘ 歷史無是非。

33.                    真空法師講大概，蔭屍m̄ tâi kài chhi-gâi，姦殺台灣你kā 拜，ho̍k-sāi 魔王 真不該。

34.                    過海thâi人koh放火，歷史bē-tàng kiâⁿ 倒回，兇手kàu taⁿ無tè chhōe，騙人共業當原初。

35.                    介石殺人真chiâⁿ chōe，本島超過 saⁿ 萬 ê；起廟ho̍k-sāi 逆天地，莫怪台灣 leh 連回。

Chhiau-kip Móa-goe̍h

Chit 張 透早beh óa 6 點 ê 時 hip--ê， tih 車頂， 車 一直tiô，鏡頭對月娘， i bē 輸 兔á 直直 跳。Hip-khiaih tio̍h chhiūⁿ án-ni。Chit 2 張 算 siōng 讚ê ah。

寧靜海 iáu 看 ē tio̍h。 聽 lâng 演講（Youtube）chiah 知影，Mare 是 Galileo（1564-1642） 號 ê。Galileo tio̍h 是 lán chit-má leh 講ê 現代科學 起源點。 Pisa 塔 ê 傳說 kài 出名， koh 來tio̍h 是 用 i ka-kī 改良 ê 吊鏡 觀看天星，i有看 tio̍h Saturn 有 圓環 有 衛星。

I ê 吊鏡 是 2 塊 hàm鏡 組合ê，原理是光線ê折射。主鏡，tio̍h是 相對 beh 看 ê 方向去ê hit 塊，ài khah 大 leh， thang 收集 khah chōe ê 光鬚。因為，天星離lán chiok 遠， kàu lán chia 光線已經真微弱，收集 khah chōe chiah ē 明。M̄-koh， nā beh 看 ē 明，che 號做 "角度鑑別度"， tio̍h-ài 要求主鏡材質本身 ài 真齊勻，koh 製造 鏡面 ài 磨 kah 真 tú好 hō͘  所有 ê 光鬚 經過 i 折射，lóng 聚集tī 鏡後 ê焦點，nā 無， 看 tio̍h ê lóng ē 花花，khah 差ê koh ē 霧霧。 另 1 塊   接tī 目睭 chit pêng thang 看，kā 主鏡 ê 影 koh 放大 1 kái， 也 方便人 目睭 來觀察。Siōng 尾， 吊鏡 ê 放大率 tio̍h 是 主鏡ê 焦距 去hō͘ 接目鏡 ê 焦距 除。 Chhiūⁿ 講， 主鏡 焦距 nā 50 cm，接目鏡 ê 是 5 cm， án-ni， i  放大率tio̍h 是 50/5 = 10 倍， ē-sái kā 遠遠 所在ê mn̍gh-kiāⁿ 放大 10倍（長度）。

Chit 種 設計， 有 先天ê 缺點。頭 1 項， beh 做大 足困難，第二，lán 知影光線 頻率 無kâng，折射率 也 ē 無kâng，光鬚聚集 tio̍h bē 利。

Galileo  kap W. Shakespeare （莎士比亞）kâng 年出世，也是 Michelangelo 過身；死 hit 年， tio̍h 是 西班牙離開 lán Formosa（1626-1642） 北部 hit 年。

From wikipedia

Pài-hóng Siau Têng-chhun

1.
冬節過了北風捲，污染捲來遮天光；
飛沙掩路路頭長，年尾跤兜入龍門。

2.
大路知影罔共軁，小路毋知捎無門，
拄搪有人緊共問，先生徛在叼一方？

3.
福氣有影歹按算，學生拄好出田園，
相報引路半山庄，順順迎接入廳堂。

4.
初見先生頭拄搪，師娘好禮攢甜湯；
心肝燒燒和腹腸，圓仔好食紅豆湯。

5.
寫無台語心齊酸，洋番點著心頭光；
白話字母學齊全，講起台語話頭長。


6.
講著洋番無按算，台語閣好閣十全；
台人面水無塊囥，母語放咧齊拋荒。

7.
母語一日一日損，今欲挽回面青黃；
雖罔台人岸朝堂，可恨官人無擔當。

8.
文化根基如三頓，欠缺母語袂通光；
無緊救起根會斷，傳承斷橛心頭酸。

9.
民間豪傑是所向，恐驚母語臭腥荒。
基本人權一無兩，傳落囝孫會存長。

10.
為護母語毋通斷，賢人半隱半山庄。
歌仔書冊千百券，台灣母語攢欲傳。

Chiah chia̍h Tang-cheh îⁿ-á

Chiah chia̍h Tang-cheh îⁿ-á/ Chiah食冬節圓á

－－Kì global warming

Chiah chia̍h tang-cheh îⁿ-á
Koh ke chi̍t hòe
Môa-tāu iū-á-châng chhiⁿ chhiⁿ
Móa chhiū móa ki
Khui-kah pe̍h-súi pe̍h-súi
Kúi-ā tāi Kāng-khóan ê phang hoe-lúi
Bô tán ú-súi Sī pe̍h-pe̍h ê hoe-lúi phang
Gōng-gōng ê súi
Pe̍h-lō͘ bûn-tàn
Bô tio̍h-sî bōe kiat chí
Chhò-lōan--khì ê chhun-thiⁿ
Tang-thiⁿ

---------------------------------

Chiah食冬節圓á
Koh 加 1 歲
麻豆柚á欉 青青
滿樹滿枝
開kah白súi白súi
幾ā代
Kāng 款 ê phang花蕊
無等雨水
是白白ê花蕊phang
Gōng-gōng ê súi
白露文旦
 無 tio̍h 時 bōe 結籽
 錯亂--去 ê 春天
 冬天

Tâi-oân lâng ê Hiong-chhiû （hiong-chhiú）

台灣人ê 兇手
聽來ê
不比相思有病ê 款
本成是讀冊人niâ
心肝 it-tio̍h in ê 四君子
Soah 認 m̄ tio̍h 祖家
引狼入室
故地鄉人受窘逐了後
鄉土 ê 人聲土味淡薄去
故人飄零四散
束信心靈神經 kek 痲痺
有目睭ê tio̍h 看
變相thang 看現現
家園 chhiⁿ 份 kah án-nóa ē 認得
流浪 ê 美感soah 超越
人ê 距離
有耳khang tio̍h 聽
Kiàn聽 bē tio̍h pē-bú 話音
溫柔安慰 lán人 ê 苦痛 iah 是 痲痺神經
Beh 回轉台灣人 ê 故鄉
每 1 步 lóng tio̍h 血流血滴
Lóng 是 ui 心肝 ê 苦痛
走chhōe bē tio̍h ê 故鄉故人故事


[文青文]
死狼
印記在遠遠的鄉愁
盡付東風
他死不願意的土地
不成人的白玉骨頭
舌頭仍如蛇一樣柔軟吐信
從嘴角滴下血的時候
他仍可塗抹成
美麗的紅蓮想
而白鬣藍馬也沒忘恩寵他
連死者的子孫都景仰他
崇拜他感念他
一如獨裁者
直到過氣
仍能鏗鏗捍衛他唯一的凶狠

thau-tō͘

Cha日 台灣文學獎贈獎典禮， lán 有去觀禮，lán tih chit 款 場 ê 時sim-chiâⁿ  lóng ē put-chí-á bái。Lóng lán ka-kī ê  人， 納稅金錢chhòng ê，卻是 一直 teh kā lán ka-kī ê 母語舌 chhui--死，直直 kā lán 人 ê 面貌 割 kah 爛 hôe-hôe，免jōa久，世界tio̍h ē kā 台灣人 放 bē記得，tio̍h 無koh 有人知影地球 竟然有1 款人號做台灣人 。

Kám kap hit ê 夢 有瓜葛絪纏？In kō͘ lán 聽無ê 話語leh 慶祝，leh 歡喜，lán 卻是在地 ê 局外人。

Chiūⁿ台烏白thi̍h ê 內容 kap thi̍h ê 人 siat-thái觸惡--lán。致到，lán 有時 ka-kī ē 想， 有 1 日lán nā chiūⁿ台， kám 也 ē án-ni-siⁿ 顧人怨 leh？ Só͘-tì， lán lóng 盡量 避免 hit 款 都合kap 機會，甚至 thiau工 kā 機會 毀sak 也 無惜。 Kài-sêng kap lán 以早 hit 款 "富人厭惡症" 有 87 分sêng。

Lán 想 lán án-ni ê 態度m̄好， 無任何好處， koh 看 che  比 目khang 赤 iah khah 無健康 ê 款。初起頭， 應當 是 目khang 赤 ê 情緒，怨妒出 kioh ê ná m̄ 是 lán？ 是講 hit 場 確實是人khah 贏 khah gâu chiah thang chiūⁿ 台。了後，漸漸 明白，人 m̄-nā ài  靠 phah-piàⁿ，koh-khah 要緊 ê 人有 ê 家世 bah-khuh kap 社會人眽， he 顯示出 ê，tio̍h 是 lán 出世帶ê 身命無夠。

只恨枝無葉， 莫怨太陽偏。 Lán bē-tàng，lán 用盡 頭殼，設想 萬項因端， 狀況 來 安慰 lán ka-kī ê le petit prince，soah 慣勢。In ê 才情 是 假， 人 phô͘-tháⁿ--出來ê，bē kham-tit 真火煉，koh 再講盡靠家世背景，算siáⁿ ná 有gâu？Koh 再 phah-piàⁿ lán ê 家世背景 mā bē 變。路尾lán ta̍uh-ta̍uh-á 養成 1 款信念，好 khang--ê in lóng ē bauh 去，lán beh 去 sio chiⁿ，mā chiⁿ 無，顛倒hông khioh笑 niâ，ke 心傷niâ。不如mài 參與 落去，koh ē-sái 激高sióng，純粹無破phah。

Siōng 慘ê， lán nā 有機緣 kap 世俗gâu lâng 熟sāi， chhím 見面， lán lóng bē 曉 kâng phô͘，iah 是 退 1 步 sió kâng chun-chhûn--1ê，koh leh 天真專想講， 人in大人大量， bē 計較 che 細節， 尤其lán ka-kī 看輕 ka-kī ê 心態，in 也 必然 ē 看 lán 無。M̄-koh， 真正 lán 社會小行leh mā 知影講，真性情 ê 人少 lah，而且人 kap 你 初會 加減 lóng mā 各種面前話 seng 話，烏龍seng se̍h， ná 有人 chhiūⁿ lán án-ni 白目 seng kâng 踏話（鞋）頭 lah！

Án-ni-siⁿ 想--起來，lán 的確 無 social ê 頭殼，當然tio̍h 免ǹg 人 kā lán 牽成。三去其一，koh 無富， koh 去其二，haih。Sa 半chhiⁿ-âu ê 理由 安慰 ka-kī，想 kah koh 加減 有 1 枝柄，soah jú ka-kī 想ka-kī tio̍h。

結果， 也無 khah 好過日，日日 hóaⁿ-hóaⁿ 海海， ka-kī 看 人 霧霧， 人mā 看 lán phú-phú，koh phái phiah--了了。功利分析無半點好得，人格 也無得thang 真誠看待 ka-kī，也學tio̍h一直指責ka-kī， che lóng 變做 精神負擔包袱 á。

真正好 ka-chài，對真理 ê 好玄 kap 欽慕心lán 有，人生 hit ê 金光，m̄ thang phah hoa 去。

本底 標題beh寫 "態度"， phah m̄ tio̍h去 soah pìⁿ "thau-tō͘"， mā 真 óa 意。