Pài-hóng Siau Têng-chhun

1.
冬節過了北風捲，污染捲來遮天光；
飛沙掩路路頭長，年尾跤兜入龍門。

2.
大路知影罔共軁，小路毋知捎無門，
拄搪有人緊共問，先生徛在叼一方？

3.
福氣有影歹按算，學生拄好出田園，
相報引路半山庄，順順迎接入廳堂。

4.
初見先生頭拄搪，師娘好禮攢甜湯；
心肝燒燒和腹腸，圓仔好食紅豆湯。

5.
寫無台語心齊酸，洋番點著心頭光；
白話字母學齊全，講起台語話頭長。


6.
講著洋番無按算，台語閣好閣十全；
台人面水無塊囥，母語放咧齊拋荒。

7.
母語一日一日損，今欲挽回面青黃；
雖罔台人岸朝堂，可恨官人無擔當。

8.
文化根基如三頓，欠缺母語袂通光；
無緊救起根會斷，傳承斷橛心頭酸。

9.
民間豪傑是所向，恐驚母語臭腥荒。
基本人權一無兩，傳落囝孫會存長。

10.
為護母語毋通斷，賢人半隱半山庄。
歌仔書冊千百券，台灣母語攢欲傳。