那群該死的笨蛋

Thiⁿ-koà hip khàm Che hâng-lia̍t teh hiàn-chè Tiám-á-ka lō͘ haⁿh kah kiông-beh iûⁿ--khì Ā bô khoà in kui sin-khu tāng koāⁿ "Ióng-kám ê Tâi-oân lâng" M̄-chai tē kúi piàn soah Chiam-chhù-téng ê Thài-iông bô chùn-būn Iā kāng-khoán phah tī siang pêng lâu-á-chhù Chhù-koà, thang-á-mn̂g iàⁿ kah kim-sih-sih Hún-chiáu boe tī hin, thau siam Lâng, lō͘-chhiū kha, lō͘-chng, ian-tîn phiau-phû Hit thâu in léng-léng kè-kàu--ê sī Phek-le̍k iah-sī Sīn-lûi tio̍h tī hia Án-choâⁿ phian-pâi kiat-kio̍k Sîn-bûn choá téng-thâu khah chhio-thâu Án-choáⁿ pâi jī chiah ē khah súi-khùi "那群該死的笨蛋" Thiaⁿ--kìⁿ chit thâu thâu-chêng ū-lâng teh hoah-siaⁿ "Thiàⁿ kap Hô-pêng" "Thiàⁿ kap Hô-pêng" khàm koè koe-lō͘ siaⁿ Lán soah toā siaⁿ háu--chhut-lâi Chhiú am bīn m̄ káⁿ thiaⁿ an-ùi Kiâⁿ khó͘-hēng ê Lāu-pē ah, Im-kan bô Iok-sek M̄-kú, ū a-má kah siang-siⁿ-á saⁿ khan Kiâⁿ koè sí-ìm ê soaⁿ-kok Thiàⁿ, sìn-sim, it-tēng ē chhoā in kàu Thiⁿ-kok Nńg-nńg ê sim soah kian-tēng--khí-lâi "Thiàⁿ kap hô-pêng" M̄-khéng pàng khì-sak sìn-liām Tâi-oân lâng ah, "Thiàⁿ kap hô-pêng" Lán siūⁿ bô lah, "... Tâi-oân lâng kāng sim-koaⁿ..." Ná ū-iáⁿ ! Thiàⁿ, Siáng thiàⁿ kah ji̍p-sim Thiàⁿ kah li̍h sim-koaⁿ " Kâng-khoán ê ūn-miā" Thong khì bī-lâi chit tiâu lō͘ Sī siáng teh hèng che bû-ko͘ ê hi-seng Siáng teh hèng he Âng-kì-kì ê huih phoà-li̍h ê sim-thâu-bah 1 táu koh 1 táu Hō͘ kah kheng lóng ut tī thiⁿ-nih Kám beh kàu éng-sè-tāi bô soah? Iah-sī kìⁿ bīn chiah chai-iáⁿ "Siōng-tè bô-ài lín ê hiàn-chè lah"

天蓋 hip khàm Che 行列teh獻祭 Tiám-á-ka 路 haⁿh kah 強beh 熔去 Ā 無 khoà in kui 身軀重汗 "勇敢ê 台灣人" M̄知第幾 piàn soah 尖厝頂 ê 太陽無 chùn-būn 也 kāng款phah tī 雙 pêng 樓á厝 厝蓋, 窗á門 iàⁿ kah 金sih-sih 粉鳥boe tī hin, 偷 siam 人，路樹kha、路磚， 煙塵漂浮 Hit 頭 in 冷冷計較ê是 霹靂 iah-sī 迅雷 tio̍h tī hia Án-choáⁿ 編排結局 新聞紙頂頭khah chhio頭 Án-choáⁿ 排字 chiah 會 khah súi-khùi "那群該死的笨蛋" 聽--見chit 頭頭前有人 teh 喝聲 "Thiàⁿ kap 和平" "Thiàⁿ kap 和平" khàm 過街路聲 Lán soah 大聲號--出來 手掩面m̄ 敢聽安慰 Kiâⁿ苦行ê Lāu-pē ah, 陰間無約瑟 M̄-kú, 有阿媽 kah 雙生á 相牽相chhoā 行過死蔭ê 山谷 Thiàⁿ, 信心, 一定會 chhoā in kàu 天國 軟軟ê 心soah 堅tēng--起來 "Thiàⁿ kap 和平" M̄肯放棄sak信念 台灣人 ah, "Thiàⁿ kap和平" Lán 想無 lah, "... 台灣人kāng 心肝..."  Ná 有影 ! Thiàⁿ, Siáng thiàⁿ kah 入心 Thiàⁿ kah 裂心肝 "Kâng-khoán ê 運命..." 通去未來 chit條路 是siáng teh 興 che 無辜犧牲 Siáng teh 興 he 紅kì-kì ê 血 phoà裂 ê 心頭肉 1 táu koh 1 táu 雨 kah 虹 lóng 鬱 tī 天 nih Kám beh kàu 永世代無 soah? Iah是見面 chiah 知影 "上帝無愛 lín ê 獻祭 lah"