天應該出虹

天應該 ē 出虹 chiah tio̍h
M̄-kú, 你看, 雨直直落 m̄ 停
Chit 條東西向ê大車路、人
雨傘 1支 1 支 thián khui
五花雜色 ê 街景，1 lê 白白ê想法
"團結tio̍h有力量"
Teh lāu-jia̍t街頭
用 àm-phuh 出力hiu

雨你chn̄g 看bāi
Hiám-hoah lóng tài 酸苦味
Oân-ná 無人聽 ē 明
"受外邦統治了數百年"
你看 kám m̄ 是
Ta̍k人sin-ian 進口 ê 衫褲、鞋á
M̄甘 hō͘雨ak tio̍h
實在 m̄ 信
福地 gōng人khiā 起
早起有報，也無人thang 走閃 ē 離
天公答應過
Beh出虹做號
Liâm-mi soah 天烏
Kan-kan he 往西ê 車燈刺目

 天應該 ē 出虹 chiah tio̍h
M̄-kú, 你看 雨直直落 m̄ 停
Chit 條東西向ê大車路、人
雨傘 1支 1 支 thián khui
五花雜色 ê 街景，1 ê 想法
"Tio̍h 團結 chiah 有力量"
Khiā 算 用 Àm-phuh
Teh lāu-jia̍t 街頭
Hiám-hoah mā lóng tài 酸苦 ê 雨味
Koh lóng 無人聽 ē 明
"Lán lóng 是 台灣人"
你看 kám m̄ 是
Ta̍k 人sin-ian 進口 ê 衫褲 鞋á
M̄甘 hō͘ i ak tio̍h雨


早 tio̍h 知
Chit ê 大地 liân 1 ê義人 mā 無
實在 m̄ 信
福地 gōng 人khiā 起
講 beh 落雨滿40 暝日
早 tio̍h 知，也無人thang 走閃 ē 離
天公答應過
天應該出虹做記號
Lán siàu想 boē 得 tio̍h
Liâm-mi soah 天烏
Kan-kan he 往西ê 車燈刺目