kòe-sin

鄭清文 cha-hng （04）過身ah。 Lán tī時見過伊 人leh？ 十外tang ah ô͘，lán kap 錢 教授去 車頭chih 伊，了後 koh 送 伊 坐 火車 iā-kú-káⁿ？ Lán kan-ta ē 記得， 伊 hō͘ 錢教授 邀請來kā lán 真理ê 台文系 （看像 是頭一屆台語系， lán 無 伊 ê 像）演講 台灣文學，lán ê 學生 soah 惹伊 siūⁿ氣。

lán ê 學生無知天真 bōe-tàng 責怪  lah， m̄-koh態度giān-giān 無要無緊， khah chhì-chha̍k 人 ah！ 伊 已經有 相當地位 ê 人，lán ka-kī m̄-bat niâ，soah kā i 當作 普普 ê 普通人。 伊 ê chheng-chhah 的確 普普，tio̍h lán 台灣人o͘-jí-sáng hit 型。Koh-khah 早 伊也 pat hō͘ 本校 ê 其他人 看輕過。就算 台灣文學界 也是， koh-khah免講 學術界，人 知影賴和、李喬 tio̍h bē bái ah！三腳馬 siáng 知？

Taⁿ，伊 過身 ah。Lán 知影 伊 短篇 寫 真chōe，尾á  挑戰寫 gín-á 讀 ê文學。Taⁿ，伊 過身 ah。可惜， 無 寫台語ê。

Lán ê bāng

月娘是圓 iah 鉤， kah  lán  siáⁿ tî-tāi？ 魚缸 lih ê 魚á 夢 kám 有要緊？有影，故里 總 會摧 人心肝。Bus 坐 無kâng位， tio̍h 有 bô kâng ê 光景。翻頭 看，卻是 面目全非。

Lán kā 伊 mn̄g， 汝 kám ē 記得 我 bat 去 lín tau？ Lín chhiáⁿ gún chia̍h 果汁。Lán 無 khòa i bē 認得lán iā-kú-káⁿ， 開chhùi tio̍h kā i mn̄g。I 講 當然 ē 記得。 Lán 看 i ê 形貌， 明明 kap lán kâng款 有歲 ah。Lán 去 hit chūn pháng國中 ê 時， kap lán 換帖ê 做伙， 烏白 走， 胡亂sńg， 行 kàu hia。 Lán m̄ 知 án-nóa， ná ē  kā in tau ê住址 記kah hiah 清 記kah hiah 明， 寫 tī 畢業紀念冊 lih he。

講siáⁿ ， 早tio̍h bē 記得， lán kan-ta ē 記得。 Lán 無 辦phoe 講 i ē 歡迎 gún， 坐 in 兜 phòng 椅soah 顛倒 ka-kī phái-sè 講 "gún 是 同學 lah"。  事實， lán hit-chūn mā m̄ chai 同學前 深淺 án-nóa， 也 無khòa 禮貌， 無 chhoân 伴手 tio̍h 直直 kâng ji̍h 門鈴。 話 無3句， lán tio̍h 想 beh soan ah。Chit má 想--起來， 實在感覺ka-kī  han-bān 也 好笑。

故鄉新ê 地標

M̄-koh， lán 心目中， i 是 目睭金靈，chhùi唇朱紅、面肉幼棉紅霓á紅霓 ，不時笑面 ê青春少女模樣。Hit pái 了後， lán soah 無 法度 koh 再 去。 Tio̍h是 陶淵明寫 he 桃花源， hit 種感覺。 Kàu taⁿ 30 外tang， lán 漸漸 體會 hit 種 感覺，也 iah m̄ bat hit 種 感覺。Lán bē-tàng 理解， bē-tàng 明瞭 ê 世事 thài chōe ah。

Hit chūn lán 其實 有 去 幾 ā ê 同學 in tau， 照 he 住址 chhōe-ê。M̄-koh， 入 國中了後，lóng 差不多斷線。Lán sió-khóa-á 明白， 30 外 tang ê 日子， bo̍k-bo̍k siû，昏昏暗暗，根本無光明 引chhōa--lán。Phah-sǹg， 光明 一直 teh 引chhōa--lán iā 無的確，是 lán ka-kī 心目 m̄ 開所致。

Bóe ah， 聽講 i  mā去讀護校， lán 讀附中，tio̍h àn 新莊海山里 坐 bus ê 時 ē 看tio̍h 1 2 ê-á 台北護校ê 人， hit-chūn 讀 護校ê 差不多lóng cha-bó͘ gín-á。大概 1 種 足孤單ê 感受，透早 kheh 車 去 學校ê 時，éng-éng ē siàu-liām lán ê 朋友親chiâⁿ hit 款。Lán tī 國校 足 天真， 人人好， 也 人人 疏，kan-ta 2 ê 換帖ê， 國中 也 疏遠去。Lán tio̍h 30 gōa tang chiah 知影， che 是 lán ê 生活， 鐵籠ah 生活， 魚缸lih ê生活。 Lán hit時 m̄ chai lán  mî-mî-chiⁿ-chiⁿ 強beh 無暝無日 khì 追求ê 竟然 是 水缸底ê 生活。

大物理學家 S. Hawking 安慰 lán， lán koh-khah gâu，也無法度 kha̍p tio̍h 真實世界 1 分。Lán 確實 tī 水缸內底 度日。 在內 lán ê 世界 是lán ka-kī 頭殼捏造 ê 世界（信號處理過程 ê 結果），lán 無可能有 全知 ê眼光（佛陀、神 ê 眼光）。 在外 有 W. Heisenberg ê uncertainty principle 遮 leh， lán bong bē tio̍h  宇宙客觀 ê 實體。眠夢的確 khah 幸福 lah，lán 是 世界ê中心點，koh lán 所 ǹg ê 財富、健康 lóng 有， koh ē-tàng 隨在人 使 性地 。Inception ê 設定， 侵入別人ê 夢， kám 有 可能？ 照 頭 1 條理， 應當無可能， 信號到底存在 tī toh？ Beh測lia̍h，第二條理， 一定 ē 干擾 ah！

Lán ê 夢 kám ū jōa要緊？Lán ê 桃花源 kám 有 要緊？ 魚缸 lih ê魚á 夢 kám 有要緊？ 頭殼  經歷、記tî té chōe 了後，siáⁿ-mih khah 要緊 chiâu 花去， 花去了後 霧去， 霧去 了後， 消si 去。宇宙 照常 運行， 日頭 月娘 照常 起落。

kè-ōe

N. Mandela 講siáⁿ？I walked out the door toward the gate that would lead to my freedom, I knew if I didn't leave my bitterness and hatred behind, I'd still be in prison. 換lán ê 話來講，就是：我 àn  監牢 chit ê 門 行出去，我 tio̍h 恢復自由ah， hit 時 góa tio̍h知影 我 nā 無 kā góa ê 痛苦 kap 怨恨 hē leh，我 tio̍h iáu hông 關 tī 監嶽。

生是苦。自sòe-hàn， 人 tio̍h 教 lán ài 計劃，Lán 卻是 o̍h 無 半phiat。一生度活 lóng 隨心所願，也隨身所至 leh 做 tāi-chì。 是講， 心有siáⁿ 願？

環境 ân-ha̍t、chō-sêng 身心衝突、後悔，tio̍h kā 日子that kah tīⁿ-tīⁿ，心 bē 平和，日日亂紛紛，chi̍t日化消 chiah 有 1 日 ê 清hiu niâ。未來，lán m̄-bat kā 看，m̄-bat kā 想， 根本 bē-hiáu 看 bē-hiáu 想，ta̍k 日 beh 度 to͘ 是 艱難，精神 khùi-la̍t用盡，連 慢慢á chhoán-khùi to͘ 算做 討債。

少也微賤， 故多能鄙事。 是lah，生活瑣事， lán 項項tio̍h ka-kī 親身備辦，bē-hiáu mā tio̍h chhòng kah ē-hiáu，ē-tàng 度過 1 關 算1 關。心神荒狂 bē-su hô͘-sîn iāⁿ-iāⁿ 飛， m̄-chai 頭尾，m̄-chai 目標，siōng 慘 連 身在 何處 都 m̄-chai。

Lán 足想 beh chai， m̄-koh，lán 眼界 微弱， siáⁿ mi̍h lóng 看無，koh-khah 免講 未來。Kàu taⁿ 知天命 時機過ah， iáu kâng 款。M̄-koh， 聽人講 有 未來 tio̍h考慮，思量， lán chiah 開始 看，是講 mā bē-hiáu 看。

I. Kont 四大問，lán iā m̄-bat聽，bē-hiáu liōng 早 想， 總講， 平凡庸俗。Chhun ê lán tio̍h 驚 道德虧欠，驚欠--人， che sī lán chhun--ê 人 siōng kē ê 條件 ah。斟酌看，連 che lán 也做kah 無 jōa 好勢。君子慎獨， lán tio̍h做 bē 到。

本底， m̄ 是 beh寫 che，soah 寫 án-ni。 Che tio̍h 是lán 永永bē-hiáu 計劃 所致，kàu taⁿ。人講 計劃 日日寸進有所功， 年久月深自然成。Lán ka-kī 無經驗。

Che mah。 Lán chit款 階級ê 人， 自sè-hàn，lán 所chia̍h chhēng 用過ê mn̍gh-kiāⁿ，kài 是 粗俗 mi̍h， che lán m̄ 敢 怨嘆， 自然tio̍h好。真正 ê好mi̍h 真罕得有，mài 講 lán ka-kī ē-tàng 擁有， 連看 mā 罕--得。 致到 lán 欠缺 去 爭取 ê 心性，phah-sǹg 也是自我防衛，先放棄爭取權，ē 度日--得 tio̍h好。好bái mn̍gh-kiāⁿ lóng bē-hiáu 寶惜，koh 有時 m̄-bat 好bái koh-khah 害。Jú 慘ê 是， bē-hiáu 過 好日子， m̄ chai 好日子 生做 siáⁿ 形。

大概 cha̍p 數年前， 科元 mn̄g lán，明明 lán 有才調， 有機會，ē-tàng 得tio̍h 好缺 iah 是 好物，ná m̄ 積極爭取？  Lán chit chūn 翻頭看， pháng 是 án-ni：好物好缺 bōe 輪 kàu lán，無可能。Louise L. Hay 寫ê： In 切足雞卵糕，hia-ê 平常時á tio̍h chia̍h ē tio̍h 雞卵糕 ê 人， 有ê koh the̍h 2 3 塊，kàu 路尾，老師行 kàu góa 面頭前ê 時， 雞卵糕 已經無ah， 連 1 塊 to͘ 無。（chit-má 看 án-ni ê 心態 chiâⁿ bái-châi，Louise I 講了 chin tio̍h。Lán koh ē 阿 Q 講 he 雞卵糕 無siáⁿ 好chia̍h lah，gún 無 leh 稀罕！ 大hàn 過程 chit 種心念soah 變信念！）去爭取，失敗，ke hông phì-siùⁿ keng-thé khioh-chhiò niâ。 卑微人 ê 尊嚴 chiàⁿ-chiàⁿ sī 拖累人 ê 心理 ah！ 所致， lán ē-tàng 理解 《房思琪》所講 ê hit ê 自尊 造成 受害 bōe 講出來ê 狀態。

Tio̍h 社會普遍 bē 鼓舞人 挑戰自身極限，也bē 鼓舞人去 關心別人， 顛倒ē kâng chi̍h-iāng， 漏氣 niâ。 Koh ē 檢討 受害人，bē kā 加害人追討正義、補賠。變成 受害者 是 o͘-bi （應該）死好，ka-kī m̄ 認份 m̄ 認命， 也 m̄ 認清 環境險惡。

M̄-koh， 俗語 kám 無講 一、 牽成 二、才情 三、命運，kō͘ 現代話 講 tio̍h 是， 一、人脈、貴人 saⁿ助贊 tàu 牽khioh， 第二 tio̍h 個人ê 能力、經驗、技能、判斷、知識五項，第三命底 kap 世道，《宇宙兄弟》內底 有 chit 句：運氣 mā 是 實力。Lán 回想 lán chit chi̍t 世人， 運氣 siōng 好 大概 tio̍h chhōa tio̍h 好bó͘， koh 來tio̍h 豬 kha chia̍h 免驚 chit 2 項。是講，也 無 運氣 jōa bái ê 時，tio̍h 有影，總講 3 項 lán lóng  普普ah，só͘-tì，lán平凡 kah 有chhun。

聽 人 講， lán bē-hiáu 感謝 chit ê 性， 人 tio̍h khah bē beh kā lán 助贊，thīn tháⁿ。 有影，gún chin-chiàⁿ bē-hiáu kâng 感謝，心肝 kám 無感恩？ 有lah， tùi gún 來講，實在 困難， 人 ē-tàng 助--lán ，lóng khah chiâⁿ 樣 chiūⁿ-kioh， lán beh án-nóa 表示 感謝？Kō͘ chhùi 呼， lán 感覺 無誠意，chhin-chhiūⁿ 人 nā chhùi 講beh 助， kha kap 手 lóng 無tín-tāng， lán mā 感覺 i 虛假 。Lán soah 陷tī 兩難。

我 ē 記得， gún 1 ê 隔thiāu伯á，kui世人獨身 á，話真少 ，四界 做 雜工á，iah 是加減 tòe lâng 做 土公á 度日， 烏烏， 人笑--起來 chiâⁿ 斯文。 I ta̍k 遍來， lóng ē kōaⁿ 1 kōaⁿ 豬肉，chhiⁿ-ê。 來， 厝 lih， 無大人， iah 是 in 無閒， lóng 無人招呼 款待， i mā 無要緊，tiām-tiām 膨椅坐leh tuh-ku，tán gún 爸。聽 gún 爸講， phah-sǹg bē kā i 趕--ê chhun gún 兜。Gún 雖然 m̄ 知án-nóa kap i 對應，mā lóng bē kā 趕。Tio̍h，gún 爸講 i 叫 ông--á， mā m̄ bat 叫 gún tio̍h 叫 i 伯 ia̍h 叔， gún soah tòe leh 叫 ông--á。

Án-ni 莫 kòe 佛陀講眾生是苦，根本，連基本人 ê 日子 都 bē-hiáu 過 leh。人，高貴ê 人，soah 無自由意志，茫茫渺渺過一生。N. Mandela 講siáⁿ？

總--是， 卑微 無力 ê人 總 免不了 kā 大 部份ê 時間 khai tī chn̄g ka-kī ê khang-thiàⁿ。

mn̄g būn-tôe

Lán 一直寫 直直寫 kám tio̍h ē 變做 作家？ Káⁿ 是gōng想 lah hoⁿh？ Lán 想起 《IL Postino》。

問題，in 愛  mn̄g 天、mn̄g 地，mn̄g 死人， mn̄g 神靈， 文藝人 愛mn̄g 雲、花、風、水、魚、海。 Lóng 借景講情 lah，根本m̄是問題。

聽講 lah， chimps iah是 gorilla 真khiáu，有相當ê 聰明， 學 ē-hiáu 用字枋 kap 人 對話，甚至 ē-hiáu討mn̍gh-kiāⁿ koh 聽有 人講 Robin Williams  過身ê tāi-chì， i真 艱苦 án-ni。M̄-koh， in bōe mn̄g 問題。

Ah lán leh？ Beh mn̄g siáng， mn̄g 世人。

頭chi̍t 條： án-chóaⁿ 一直 感覺 遠方 會有  好 mi̍h-kiāⁿ leh？ Lán nā kā lán khiā起ê 生活環境 lóng 舞kah àu-chhàu khì。

Lán 活leh， kám 有法度 kap 邪惡 分捨kah 離離離？ Iah是 換 話講， 痛苦、不幸、悲哀、悲慘、鬱悶、恐怖、驚 hiâⁿ che？ Iah是 lán 註定 ài kap 惡魔 妥協？ éng 無盡 ê 妥協 leh？ 對抗 iah-sī 奮鬥 也是 kàu 路尾bô-soah？

所以， lán tio̍h 同理Sisyphus ê 心情。 大哲學家 講 i sak 石頭起lih山頭 ê時，心內一直充滿快樂， 所以 bē 感覺 i ka-kī 一直受 苦刑。Che to̍h 是 lán 度活 ê 日子？ 魚 回答講，lín 看bē tio̍h 我 ê 目屎。

是講 siáng 知影， lín ê目屎 kám m̄是 像 Sisyphus 歡喜 koh 感激 ê 目屎 leh？

自 lán sè-hàn lán tio̍h 足 激骨， 人 kā lán 講 世事 m̄-thang 想 siuⁿ chōe， mā m̄-thang kheng-hun。 Lán  漸漸 tio̍h 對 chit 2 種 做法 反感 kàu 極！ Lí bē-hiáu 想 soah leh 嫌 人 想 siuⁿ chōe，siuⁿ 深， m̄ bat 道理 是非 烏白 soah  leh 講人 gâu kheng-hun。 Bo̍k-kòe lán ê 國親鄉民 頭殼 死tēng， phái 教， koh bē 變竅，bē 輸人幾百tang 前。M̄-koh， 人 ah， 人 經過 che 幾 百tang，jǒa 進步leh， tak-gê mā 有看。超過350 tang 前ah 講。 Lán chit-má ê 人 iáu-kú 聽無， bē-hiáu。

汝看，Issac Newton 是 25 December 1642 – 20 March 1726 lioh。Ah 鄭成功 Tīⁿ Sêng-kong1624年8月27日－1662年6月23日！知影bô？ 永曆十五年（1661年，清順治十八年）

然後， lán chia chiah-ê 問題 beh mn̄g siáng ？ Beh toh mn̄g？ Lán teh chit ê 奇怪 ê 體制，hông束縛 tiâu leh， beh 按 toh 走，往 toh 位 去 lóng 真 費氣。 In khah 愛 用 "ùi" kap "tùi" lah， 有 ê 講 ùi  to͘ kap 對 kâng ì-sù， 字 mā kâng， 發音 無 kâng niâ。 有ê 講 ùi 是 對應 from 對 對應 to án-ni。 Nā án-ni mā kài sim-sek， chhù-bī。

Koh lán  一直 kâng 講 透早 m̄-thang 起床， soah 變 笑詼， 事實，lán 所知 "起床" 真正 kap 死人有關連。用 "精神" khah 好lah。

lâu

Kóng i 是日本作品，流，koh 是台灣人 去日本寫ê， tio̍h 直木獎，全數評審lóng 通過。 有夠gâu。

欣羡人 讀書人數 足chōe 足 普遍。 閱讀 ē-sái ná chia̍h食慣勢， ē-sái chhùi-pe̍h， ē-sái 揀chia̍h， M̄-koh， m̄ chia̍h, 無chia̍h 人 bē 活！ 無讀書， 人 kám ē 活？

asleep till awaken...

Lán 看i 1 句："台灣 ta̍uh-ta̍uh-á 換過愛迪達慢跑 鞋ê 氣氛"。 Lán beh 論 寫作 tio̍h 輸人 thiám-thiám ah。I 減 lán 2 歲， 人 tī 台灣有活leh， lán leh？ 茫茫渺渺，有魂無體稻草人， ài 讀 人 寫ê mn̍gh，hip ê 影像 chiah 有才調kā hit-chūn ê 生活 khioh--轉來tām-po̍h-á。

Lán chit chām， 不時 回想。 Tiāⁿ-tiāⁿ 發見 人in ê 經歷 有夠 精彩多姿，lán leh？ Chhiūⁿ i 講ê 愛迪達慢跑鞋，lán mā tòe bē tio̍h tīn。 Che koh hō͘ lán 想起 hit ê 夢。

Lán iáu 是 gín-á， teh 國校， 下課時間， lán 走去 學校ê遊樂園， 想 beh 去 hàiⁿ-kong-chhiu。 Lán kàu tè，he 位 早tio̍h 無chhun ah， lán khiā 邊--á，一直siòng，一直siòng。 In hàiⁿ kah 歡喜  kī-kā 叫， 無人beh 讓lán hàiⁿ， 根本 無人注意tio̍h lán tī 邊á tán。尾--á， in hoah 1 聲 四散， lán 心肝 浮 1 ê 光，歡喜ê 時，上課鐘á tân。Lán ka-kī 知影人在世，罕得 thang 自在 háu。應該講，m̄-nā háu，任何情緒宣洩 lóng hông 禁止。 Lán soah háu kah phēng he 鐘á khah 大聲。自án-ni 精神。4 5十歲 做 chit 款夢，是 siáⁿ 報頭， lán mā m̄ 知。

Lán ê 現實生活， 大概tio̍h 是án-ni 慢人 幾ā phek，無的確是 lán 頭殼 gōng，kha手慢tūn 所致。世間事， 了解oh，體會慢，認bat koh ē 走chhoa̍h khì。Thèng-hāu 人 kā lán tiám-tuh， lán chiah sió-khóa 長進， 有時koh ē gōng-sèng，ngī-khì m̄ 肯 受人 牽教。 Kàu kah 最近chiah khah 知影人肯 出聲kā lán hiám 1ē，hoah 1ē， he 是人 leh kā lán khan-khioh。是講， kám bē siuⁿ chōe 歲ah haⁿh？ Lán tiāⁿ-tiāⁿ án-ni ka-kī giâu 疑 ka-kī。

Koh再講，lán ê té-tì，beh kín mā kín 無路來，beh 巧 mā 巧無步。Chit ê 世間，lán oa̍h tih 慢鈍ê 世界， lán 是慢鈍 ê 人。

思想、情感、語言， lán 感覺 lóng 有 sio liân-sòa ê 性質，是 cháiⁿ-iūⁿ 寫做文字（尤其漢字，漢字kám m̄ 是 表意？）， lán hit 種 連續性 tio̍h ē hō͘ i phah 薄 去， 甚至， phah 斷去？ Beh 寫作， án-ni m̄是足bái-châi？是講， 別人ê 文字 雖bóng khah 讚， khah súi， 總hō͘ lán 感覺 欣慕， m̄-koh sa 無 siáⁿ niau-á-mn̂g， 無 hiah kín 入心。

文字 kap 文字 中間 互相牽in，互相 kau-tîⁿ， 互相khan-kiⁿ， 的確ài ū sió-khóa thian-hūn lah， che  lán phah-sǹg 無 夠額 iā-kú-káⁿ。親身sìⁿ-miā ê 經歷 lán 也 欠缺，tio̍h 算講 有經歷， lán 也 是 gōng-tuh， 感應極差， 只好靠讀書來 彌補、加強，好ê lán 讀hō͘ khah chōe pái leh。總 ē-tàng khioh 2 3--ê-á 好mi̍h。 Koh 驚 kan-ta o̍h tio̍h 人 ê 話屎， sîn 人ê chhùi-nōa niâ！實在 為難 ah！

Lí-liām kap sè-kan

Schrödinger 感覺世間極無平安 ê 時 mā ē án-ni 講： Àn chit ê 世界 góa 的確學了 iáu 無夠，phah-sǹg góa iáu bē chhoân 好勢 thang 面對 chit ê世界。

 理念thang 堅持單純 ê 人，lán 也 欣羡，究--竟 i 也是 單純ê 人。 是講， 世間 kám 有單純 ê 理路 iah是 mn̍gh-kiāⁿ leh？ Lán 知影 物理 ê 理念， 理路， lóng 是 kā 現實狀況 簡化 再簡化， lia̍h 關鍵 1 2-ê-á 因素 tio̍h beh 解說 世間 bó͘ kóa 現象。

顛倒頭 講， 理念 iah 是 理路 應當 tio̍h 是 kā 世間事 簡化，chiah ē 出現ê virtual reality。 Lán án-ni 理解 也 應當bē 差 siuⁿ hn̄g。Ah nā 人 簡化ê 要件 kap 所 khioh ê   因素無 sio kâng， án-ni 得tio̍h ê 理念kap 理路 對 世間 現象 描述出來ê 必然 無 kâng。

M̄-koh， lán kám 知影人 簡化ê 要素 leh？有ê 知影iā-kú-káⁿ， m̄-koh 也 無的確 知影 jōa 詳細。 Ah ka-kī 所取ê 點，ka-kī 當然siōng 清楚， ka-kī 建立ê 路線 當然 siōng 明瞭， siōng ē-tàng 說服ka-kī。 Ah nā án-ni 來 論 別人ê 理念 路線 cheng-chha，誤tâⁿ， án-ni， 是 m̄ 是 sió-khóa-á 自以為是？

Siōng 無保留 1 線 機會 （probability）， 是lán 學了 quantum mechanics 了後，siōng 深  ê 反省。Koh 按chia知影， chhin-chhiūⁿ Newton ê 絕對ê 客觀 kap 理性世界觀（以早 Newton ê 思想基礎， i ka-kī mā giâu疑， 所以 最後 soah 用 聖經來解說物理現象 ），tī 真實ê 宇宙 lih un-nā ē 失效。Lán chit ê 物理世間 hō͘ lán ê 面貌，mā án-ni，lán 人 án-nóa 去 看， 用siáⁿ-mih 去探， i nā 無回應， lán ē 真簡單 想 i bô chit ê siáⁿ-mih ê 性質， i nā ē 回應 siáⁿ-mih， lán tio̍h lia̍h-chún i 有 siáⁿ-mih。

所以， beh 認bat chit ê lán 依存ê 世界，iā tio̍h 先知影 i sī siáⁿ-mih。 M̄-koh， lán 在來m̄ 知ah，beh án-nóa？ Kō͘ ioh--ê， 好運， i 回應 lán， lán tio̍h 暢kah lia̍h bē tiâu，lia̍h-chún 世間 真正 hō͘ lán ioh--tio̍h leh。過--幾年á，人 ioh 別項，jú gâu jú hó， lán chìn-chêng ioh-ê tio̍h thèng-hó phiaⁿ hìⁿ-sak ah。 án-ni-siⁿ。

Koh khah 免講極複雜ê人文社會ê現象。

gín-á sèng

Siōng可嘆 ê， lán 發現 1 種 新症頭， lán 以早 有 tì 過， 大發過， 就是 大頭症，也是佛陀一直 訓誡 lán ê。

Lán leh 想，淺想 childish kap childhood  toh 1 ê khah 接近 child leh ? Siáng sī  child-like leh？ Lán 有夠 ǹg-bāng， lán ê 朋友 五十 ē-tàng khah gín-á 性leh， 早起時á 絕交， 中tàu 時á  tio̍h  koh 做伙 食tàu ah！

Lán án-ni ǹg-bāng 在水 mā ē hông 講 gín-á 性，m̄-koh， 在來 in 講 人 gín-á 性， 八siâⁿ leh tu̍h--lâng， bōe kā 當做 優點。Hoān-sè iā有人 ē 講 無tiāⁿ-tio̍h iā-kú-káⁿ。

Lán 聽過 Pang-kiô cha-bó͘ súi koh chhiò，義竹cha-bó͘ 無tiāⁿ 無tio̍h， che m̄ chai kap 真實 jōa óa。Lán 也 發現 有kóa tāi-chì， lán m̄-bat m̄-thang 厚話 喝聲， che 有理，是講 有 ê lán bat， koh 比人 khah bat， mā bē-tàng 出聲， che tio̍h  牽纏 tī 深深 ê 文化 內底 ah， 也是足chōe人ê 意識形態 lih ê 規矩。論事理 總困難 照理路、照logic，khah chōe 是 tòe 情感、情緒leh 走、戰，chìⁿ kah 半路， tio̍h cháu-cheng koh 失路 ah。

朋友（chhin-chiâⁿ），弟兄（姊妹） tī chia 拆破面， koh 激氣，koh kài ngī氣， kài-sêng講 tio̍h án-ni 堅持 chiah ē hông 尊重 leh。M̄-koh，lán 觀察 實況 kap 真實發展， éng-éng 無 lah， 連ka-kī 都 ē 後悔koh厭氣， koh-khah 嚴重 ê 失志。就算 chìⁿ 贏 hit 頭 mā bô leh khah 好結局。

M̄-koh，lán 台灣人chit 點卻是bōe ké-pìⁿ。Ài 冤家 ài niû-chè， m̄-koh kan-ta 為tio̍h ka-kī ê 面水leh 冤家， 為 ka-kī ê 名聲 leh chìⁿ niâ。I 贏 人 mā 不服， i 輸 koh-khah 免講， chhi̍h hō͘ 死。 Che tio̍h lán 台灣 ê 工商界 ê 潛意識運作 ê 道理。 有 幾ê 真心 beh 服務， 為眾人好ê， mā ē hoān-lâng-khia hoān-lâng 疑。Lán 講che 也 是 中國國民黨害ê， 人 koh 反 kā lán 講 lán 泛政治化 去。

Lán nā i 問， 請 你講看bāi， siáⁿ-mih 是 人？ 人 kap 人 之間 ài án-chóaⁿ 互相對待 leh？ 根本 m̄-bat 想過 chit 款問題， m̄-koh 講 tio̍h 道德、禮貌、國家、社會、人民， 意見了了， 真正 childish， koh lia̍h-chún ka-kī jōa gâu tú jōa gâu。虛無飄邈 lah，a̍h soah tio̍h pián-sian-á， ka-kī tio̍h 是 siōng 大 siōng 厲害ê pián-sian-á ah 講。

求真求理 chiah 困難， 不如 childish childhood！Góa ê 態度是： 台語原底有ê 詞 m̄通 hō͘ 華語 取代 去。UJ I 講ê 是 感覺（lú） ，cha-po͘ 人 聽 tio̍h mā kā i 當做事實。

1. 我khah 傾向 善意解讀（ lâng nā 講 góa thiaⁿ 無ê， iah-sī 違反 góa 信念 ê； 總--是 看 i ê 言 kap 行 kám ū tàu-tah） 2. 我 物理ê 素養 kā我 講： 我 所知ê 世界， 是 我ka-kī 去 建構ê， góa iōng siáⁿ物 眼光 看， i tio̍h變做 siáⁿ-mih hō͘ 汝 看。