àm-mî tiām-chīⁿ

無始劫以來無明是眾生
M̄ 知敬畏耶和華
是智慧ê開端
是講，無明kám m̄ to̍h是 烏暗？
Iáu-ku，上帝講 tio̍h 有光 就有光
Ah 無光 chìn-chêng leh？

混沌無明正正tio̍h是人性
Kap 聖神 相 lo̍h-láu ê狀態
無分人 iah 是神 ê 時chūn
是 toh chi̍t-ê 講 tio̍h 有光
I tio̍h 變成 神

Berh kā 混沌無明 khún-tio̍k
因為i 講 che 光 是 好
M̄-ku 光 有時 hoa
Hit 時烏暗 tio̍h 侵khàm--lâi
事實， 烏暗chiah 是本性
光 nā hoa， tio̍h 顯現 ê 本性
莫名， m̄ 知名
無始劫以來ê 恐怖
驚人 ê 本性

追 jiok 光 久ah soah 污染心性
Ná-chún ka-kī 是 光明神聖
眾生 soah 驚烏暗
認bat ka-kī soah 變做恐怖
無khòa kóng
無始劫以來無明tio̍h 是 i ka-kī

hóe-kim-ko͘

火金姑 之一                          林裕凱 2006/7/21故鄉之三

天暗暗無雲清風ná吹

Thô͘-kha出火金星，lán歡喜tiô 1-ē

金sih-sih，是講無gōa chōe

起心pâi徊，強beh óa作伙

I soah hām lán terh bih-sio-chhēr

靜chiauh-chiauh i無聲無說

暗時門口埕，gún mā bih-sio-chhēr

金sih-sih，che是gún kì-tî lih ê寶貝

看in光點，菜股後溝1四kòe

Gún tau tī深深山兜ê內底

路hn̄g-hn̄g無停時間走過

相tú無按算，心內chhia̍k 1 ē

金sih-sih，lín mā iân-chhiân tī外地

金金對相，1時浮雲遮過月

m̄知án-chóaⁿ ìn，cháiⁿ-iūⁿ回？

Ām kòa-kòa，草葉有傳說

齷齪生存愛kap恨ê土地！

金sih-sih，為tio̍h生湠chōe-chōe

光sih m̄止停，心頭 koh有1點á血

絲絲吞忍，phoe死 piàⁿ kàu底

deadline

Kòe-siàu hit sî Gō͘ chheng, nn̄g chheng, chi̍t chheng Kè-ta̍t lí chai--bô  Thiⁿ thiah-ha̍h lí ka-kī ê lō͘ Ē án-chóaⁿ chiap-sòa iah sī Iū chit ji̍t, ji̍t-thâu chiàu kiâⁿ cha-ji̍t ê lō͘-tô͘ Cha-hng ê hôan-hó Koh tāng chi̍t hun koh chhim-tîm chi̍t hun Lî kiám-cha ê sí-sòaⁿ jú-lâi-jú óa Thiⁿ o͘ liáu-āu lí ka-kī ê sim Ē án-chóaⁿ an-tah iah sī Iū chi̍t mî chīn, sim-thâu o͘-pe̍h siūⁿ chiân-tô͘ lōan  hun-hun Kū-nî ê iu-chhiû  Koh chhiân chi̍t sî koh thoa-bôa chi̍t sî Lî kiám-cha ê sí-sòaⁿ jú-lâi-jú óa Jú-lâi-jú óa Sí-sòaⁿ chin-chêng lí ka-kī it-seng lí ka-kī ē án-chóaⁿ khòaⁿ

過siàu hit 時  五千, nn̄g 千, chi̍t 千  價值汝知--無  天thiah-ha̍h 汝ka-kī ê 路  會án-chóaⁿ接sòa iah 是  又chi̍t日起，日頭照行  昨日ê路途  昨hng ê煩惱  Koh重chi̍t分 koh深沉chi̍t分  離檢查ê死線愈來愈óa  天烏了後 汝 ka-kī ê 心  會 án-chóaⁿ安搭 iah是  又chi̍t暝盡，心頭烏白想  前途亂紛紛  舊年ê憂愁  Koh chhiân chi̍t時 koh拖磨chi̍t時  離檢查ê死線愈來愈óa  愈來愈óa  死線chìn-chêng 汝 ka-kī一生  汝 ka-kī會 án-chóaⁿ看

goe̍h-niû

母親像月娘 kâng-khoán

來kàu 學校, 景緻算真好, 入秋 也 chhiu-chhìn chhiu-chhìn, 人 身軀 爽快, m̄-ku, 心肝頭 cho-cho。 Hông lōng terh 辦公室 外口, koh-khah 心酸。

Chi̍t時間, 想起 阿娘，頭chi̍t pái，同意母親chhan-chhiūⁿ 月娘，照lán 家庭 門窗，也安貼lán 兄弟姊妹 幼幼 ê 心肝窟á。

阿母I 不論lán tī時 轉, i lóng 真歡迎， koh ē chhoân 滿桌 lán 愛chia̍h ê 手路菜 hō͘ lán。 是講, lán 驚 i kha手 無好勢, koh動鼎動灶, lóng thiau 工 m̄ kā i 講tī 時ē 轉。 Taⁿ，tò-khìr， i 知也m̄知leh？

I 離月娘 gōa hn̄g ah， nā 是 teh 天堂？ 阿母 ê 面 khah 圓 iah是 月娘 面khah 圓？ Siōng 無 我知影 阿母ê 鼻 足圓。
 -------------------------------------
夜色chiaⁿ súi人tah-hiaⁿh 
月娘光光照大埕
 淡水河口鹹也chiáⁿ
牛津學院想阿娘

Phah-piàⁿ出外m̄是閃
白白轉厝驚人嫌
阿母kám知 kiáⁿ siàu念,
暝日心悶床椅 tiam

Khîⁿ 家chhoah年koh chhoah節
阿母面模chhan-chhiūⁿ月
Ka-kī 開用真儉khoeh
Chhiâⁿ養sī-sòe 足chám-choe̍h

奉待阿娘順天理
天頂燕á háu 依依
討食chiah 著來拆離
袂赴翻頭chhun 記tî

暗時滬尾光iāⁿ-iāⁿ
心亂m̄知按怎kiâⁿ
奔波前程無保領
風颱欲來人kiaⁿ-hiâⁿ
---------------------------------------------------------------
王昶雄, 淡水人寫了 一首好詩歌-- 阮若拍開心內 ê 門窗；lán leh？ 無旋律 kap 節奏ê 神經, kám 有才調寫歌？
----------------------------------------------------------------

Gún 來 離開故鄉 ko͘-put-chiong
M̄是少年 phiau-phiat 愛 展勇
粗坑石kó͘ tēng khong-khong

Tâi-gí sin chheh

台語新冊

​​《台語文發展年表》,《 台語作家著作目錄》 是國立台灣文學館『台語文學史料蒐集出版計劃』 ê 成果，  是lán 會會員 施俊州 博士 ê 大力之作。是當今lán 台語文學， 文學美學本土化, 極要緊ê khang-khòe kap 成就。因為台灣主體性ê歷史， 人物，事件，, tī chit ê 外來政權政策壓制下，也kā lán 台語文 相關ê 發展 kap 成就 放hō͘ 無要無緊，有ê koh khah 橫逆ê 刁工 iap--起來，致使，  lán hiah-ê 台語文過往, kap 當teh 發生ê 重要事件， 強強beh tī 時間 消磨nih 消失去ah。也造成chi̍t-kóa 文學史家無意無意放hō͘ 看bōe tio̍h, lán 讀in ê 文學史, koh kā ka-kī ê 語言放sak 了後，也soah 變做m̄-bat 台語先輩 ê 異邦人。

Chit nn̄g 本冊 tú好thang 當做 lán 對台語文界青瞑ê 解藥， 明目丸。按1865 開始，到2013年beh óa 150 tang 內， 重要，無重要ê 台語文歷史發展，先輩人物ê 貢獻kha 跡，tī hin 有siōng 詳細ê 整理 評述， 聽講chit-má chhìn-chhái 列也有超過 2000人， 人ô͘， m̄是 文章ê 數量。當然, 史料文獻蒐集是chit 項khang-khòe 極基礎ê 難關所在，也是冊nih 立論ê 根據。

Kā chiah-ê歷史陳跡放爛，hō͘ i 毀壞 lóng 加真簡單，ah tī 過去liâu-liâu-á 消無去ê 狀況 beh koh kā khioh--轉來， tio̍h 加 真費氣極厚工， koh kā i 整理分列，khioh 起台灣文學專門知識，lú 是需要耐性 kap 意志。Lán 實在 tio̍h kā 施博士 致敬。

Badriangalaai Gō͘-go̍eh sēng-khui

Badriangalaai Gō͘-go̍eh sēng-khui

Lîm Jū-khái(2008/5/11)

Bô tiuⁿ-tî o͘-im ê gō͘-go̍eh thiⁿ

Siūⁿ-khí-tio̍h lán tàu-tīn iu-siong

Áu-ut-jo̍ah ê ji̍t-chí

Lí chhah chi̍t ki o͘-kut ê Badriangalaai[1]

Tī tōa-biō tiâⁿ tàu-tīn hit ji̍t

Kán-ná Kiâm-chúi phang-á tiûⁿ

Sin-khu kap sim lóng chiâu sio-jia̍t

Lí kā góa kóng pek-ha̍p-hoe tng sēng-khui

Pe̍h-ji̍t chiò-siā gō͘ pah nî

Hit keng nâ-sek chhù-kòa ê tōa-biō

Lán ū siang-sûn ê hiaⁿ-tī

Nn̄g ki chhèng ah leh

Lāi-tóe bî-bî-á chhiò ê lâng

Chi̍t-si-á khùi-si to-bô

I phīⁿ bōe tio̍h gōa-kháu pek-ha̍p-hoe khui

Kah chhek-ok lâng ê phang-chúi

Le̍k-sú ūn-tōng sio-jia̍t chóng ē siau sòaⁿ

Hoe ki

Chham lām saⁿ--go̍eh ê sí-thé

Ìm-pûi

In tau mn̂g-thâu-chêng hit châng Pek-ha̍p-hoe

Chìm-thàu gō͘ chheng nî

Hoe-hio̍h tián-khui sêng sai-kong-giang-á

Ho͘-chhiáⁿ bî-bî-á chhiò ê tōa mô͘-sîn

Khui--khui, Tōa chhùi khui-khui-khui

Pek-ha̍p-hoe gō͘-go̍eh sēng-khui

Kì-tî lāi, Ū chi̍t ki o͘ kut

Chit-má in tau pek-ha̍p-hoe

Hoe-hio̍h kài tōa kái pûi

Tǹg chhut âng tiám âng pan kui phiàn

Tò͘ kah âng-gê~âng-gê ê bīn-iông

Tàm-tàm-á khui tī piàn-thiⁿ ê bî kng tiong

Sin-khu ti̍t-ti̍t iô-chho̍ah bōe thêng-tiām

Ba̍k-thâu sîn-sîn hàiⁿ bōe chí

---

[1] Badriangalaai, Rukai gí, pek-ha̍p-hoe.

sim-būn le̍k-sú Formosa

心悶歷史 Formosa

Siáng知影100萬 kap零 ê 關係

相除是無窮無限

Ah 若 相乘是虛無

太複雜 leh, chi̍t時 berh來póe會

Hit kóa khiap-sì ê 歷史殘跡

Ná póe ē清 che 渺茫山phiâⁿ

Jû chháng-chhàng ê墓龜 ē-kha

人性ló-chhó am-khàm 淺埋

Hit-chūn 應當是媽祖生 "大家樂" ê時

曠野有人大聲喊講

Kap thâi 狗 ê 外地狂人無關

受害 ê 牌支暗bo̍k-bo̍k

管 thài i 大人gín-á, ta-po͘ cha-bó͘

"都是我們同文同種的同胞"

Ē 記得iah無？ Chit ê 甜蜜ê口號

人性 taⁿ 孤用數字來 táⁿ

也 lóng 免講

Chhèng 枝押lerh, 銨鉛線 kǹg leh

Chhia 落海底 ê tāi-chì

Ah無直接 塚 á 埔, 天清地明

Lín 活活tâi，親像野狗死 tio̍h 死--落去

"長官列入特別交代"

Hō͘ in teh 破碎 ê kì-tî chhōe無

In ê 身軀 命底

"哪裡不死人，哪天不死人"

免 koh 講 正直人berh án-chóaⁿ

經歷 hia ê 殘忍酷刑

Siōng 驚人ê 是 活人人人安chi̍t-ê

"匪諜就在你身邊"

Che 也是依法不依人ê 生存原則

失親chiâⁿ ，無朋友，有夠恬靜

你看，若無口號，標語 tī 頭前

生活ná 有味, tī chit-ê無聲 零ê社會

有 ê是結構問題 siuⁿ過頭複雜

有才調出張做官

有讀書人mā 來berh póe會

Lán 需要時間chhiâu 出一致 ê 共識

而且惡法也是法，che你也知

M̄ 是 你chi̍t-ê人 ē-tàng 負責

"應即槍決可也" 白紙頂明明紅字

Ah 無，紙已經反黃蛀蟲

Kiáⁿ孫á 看bōe 出受害者 ê 面chhiuⁿ

弄獅弄龍歡迎祖國ê相片

Koh tio̍h-beh hip 1 pái

了後 ê 社會歷史 lóng ē-tàng kō͘ 結構補thīⁿ

照 lán 勝者為王 ê 文明正義

並無註寫任何 1 ê 加害者

Tio̍h 了解100萬受害者延續

歷史輪迴100萬年