si-jîn m̄ siá si

詩人 m̄ 寫 詩
是 leh chhòng siáⁿ
Terh che 雞排chìⁿ khah 要緊尊嚴 ê 社會
Hō͘ lír  hit sûn 過 kha ba̍k ê 金線記號

Kám 有lerh 保惜

總講 iáu koh ē 驚 iau-gō
排列六點鐘 tio̍h 等 ē tio̍h
Hit 塊 phang kòng-kòng ê 雞排
是講，阿婆 lí kám bóe bē 起？
無khòa 風吹 日 pha̍k
身體勇 chia̍h ē lo̍h 是福氣 lioh

雞排 hoān 雞排 政治hoān政治
Lír kāng koán，講實在
選票 tī i  ê 心
想換雞排 khah 贏

Chit khoán pān-sè，詩人
Sok-sìn 選票頂 寫詩
無sìn-táu i mā kan-na 廢票
頂頭 ê 詩文
人講是 文青文ê 廢文

聖神 甘願chia̍h 屎
自由意志講選擇價值 m̄免
koh 再講 不如換雞排
人 soah  不如 厝角鳥
M̄ ta̍t A-pa-pē ê 保領

lāu-pē siōng bér ê kà-sī

果然， 人nā thiám 夢 tio̍h khah ē kāu 。Ta̍k pái 冷氣 29 tō͘  thàu-chá 天光時 lán lóng ē kôaⁿ kah 精神。Nā 強補眠，tio̍h ē hām-bîn 得夢。

夢--lih， lán mā kôaⁿ kah 精神，發現 phōe ah 是 床布 lóng hō͘ 阿芬á 抽去 洗ah，chhun塗形kiap 稻草ê眠床。Ta̍k gê 講 berh khìr 1 ê 所在， lán tio̍h 起身kiâⁿ。

Tú kiâⁿ， lerh lo̍h kiā，沿路kiâⁿ 沿路 看光景，心情真輕鬆。看tio̍h 路邊 水溝蓋 頂koân 1 ê 水khut-á，lán 隨 sa 1 ê galas lok-á hô͘ 2 pái。小bēr in giâu-gî 講 ， berh chhòng-siáⁿ？ Lán kóng tēng-kui 有hîr， lán thèng-hāu he chúi chhē chheng， hîr chin-chiàⁿ bōe chió。

Koh tńg-khìr，kah ta̍k-gê chò-hóe hêng-tōng。Soah 變行 1 ê 樓梯， 是  四 kho͘ hêng tī大樓 tiong-ng hit 款，lán  kha手 輕快， kiâⁿ chòe 前chin 緊，聽 tio̍h in 後壁 leh 開講， mā 有 聽tio̍h 阿芬á ê 聲。

M̄-koh， ná ē 阿芬á kah siáng hō͘ 人 kō͘ nńg床 kng lo̍h--lâi leh？ Tng terh 會 ê 時，lán soah 看 tio̍h lāu-pē lāu-bú mā chò-hóe hông ēng nńg床 kng 來。 2 ê lóng kiu kah 差不多 十hèr gín-á ê SIZE，面容 看 無 kài 明。

總--是，lāu-pē  來，lán 知影。 I kā 我 講起， hit 時 無 聽 i ê 話，ta̍k 項 berh tèr kah kàu，chit-má chiah ē pìⁿ  chit款， 顛倒  lán 變 hit ê hông kng 來 ê，半身不遂款。Lán 無 hit ê 本 tio̍h m̄ thang thàn 人 sì-kòe khìr， berh tio̍h 有時有chūn chiah thang。

我 lerh 想 lāu-pē 到底 是 lerh 講 toh 1 件？

精神 lán berh khìr chhēr ta̍k-ê，kàu 位，原來是圖書館。 Berh 入門chìn-chêng 有別人 1 ê 女性，i kiâⁿ bōe 入khìr。 Hit ê 自動 攔篙 siuⁿ tēng i sak bōe kiâⁿ， lán siòng-siòng leh kā 出力 sak--khui。

Kàu 內面 有 1 位 歇睏 ê 所在 真 sù-sì，lán tio̍h chhēr 小bēr， kā i 講 chit ê 夢。M̄-koh，lerh 講 ê 時，lán 發覺 ka-kī 講 bōe 清楚， koh 人人 lóng berh chhap 話，lán lú 講 無路來。中間幾āpái Boán-á 叫in mài 吵， hō͘ 我 講 hō͘ 清，講 hō͘ 完。

場 soah 變做 lerh lán ka-kī ê房間，kah lán gín-á 時 hit-chūn kâng，人lóng sio 爭 棉被，kha lerh sio that。 連 阿芬á mā 來， liam-mi 琮琪 mā 來，koh 是 洗身軀 了， 阿芬á 講 真歡迎 i。 我 看 i làu 胸，體格真大，真 安心。

Lán kā in 講 lāu-pē tńg來 kà-sī 講， hit 時 ê tāi-chì。 Góa 想 是khìr 下港 tàu 鬧熱，kā Soat-á 講 是 洪美珍 （據實 是 黃美華）ê tāi-chì。 Soat-á， koh berh lia̍h 話 來ìn，辯解。

Lán soah 精神。

原來， lán tér-tér 1 點鐘 得 chit ê 夢中 tha̍h 夢。 Che 算 lán 頭á-pái 夢見 pē-bú。

bāng

In kóng  lâng  lâi  sè-kan ná  bîn-bāng.

Siáng ē-tàng tiāⁿ-tiāⁿ 做 bí-bāng leh？ Koh siáng ē-tàng oa̍h tī 美夢？ Lán khah chōe sī jû-sù夢，kap 惡夢。 Chăng，lán koh 得chi̍t夢， kâng-khoán 夢見 chhēr 無 辦公室， chhēr 無 教室， 時間 koh pek kah kiông-berh kàu ah。

斯民hip

Chit 遍 校園 換位ah，學生ia̍h 變 sêng 天使， 真 體諒 lán 老師人。M̄-koh， lán tio̍h-sī 無法度 明瞭校園 ê 環境kap方位， kan-na 直直 趕狂，ū-kàu chhiⁿ-chin。 Chit 款 夢自 台語系收soah liáu-āu tio̍h tiāⁿ-tiāⁿ 做，m̄-chai sī án-chóaⁿ。

Ah nā 八月三十 hit 日，lán 又koh 做 lak chhùi齒ê 夢。Hit 暝 寅時，gún lāu-pē-á 過氣。 天光透早chiah 知影。Line lih 家族群組傳來ê 消息。我 自 khah早 tio̍h 討厭 電話 chit 款 連絡科技。 Pháng lán ê 生活， 緊急事件， 重要事件 lóng bô 好ê ê 款。Án-ni bái--ê， ná tio̍h hiah 趕緊 連絡 咧？A̍h bōe-tàng 有心理準備，a̍h bōe-tàng 改變 siáⁿ，唯一phah phái sim-chiâⁿ koh 擾亂 生活ê  步調 niā。心肝 ē ke ak-chak--khiaih。

速速辦理lāu-pē ê hiō-sū。Lán 看 tio̍h 叔伯兄弟 koh 1 pái chiâu kàu， berh 歡喜 ia̍h m̄ tit，berh 悲傷 ia̍h m̄ tit，soah gāng-gāng。喪禮儀式方式 決定 kah 處理ê 程序，lán 親兄弟姊妹去chhoân， 去 chhiâu-chhek。雖然我是長子，lāu-pē 過身，lāu-pē pat 講 beh kō͘ 傳統 ê 儀軌，in kā 我 當做 基督徒，lán lóng m̄-bián 參與意見，bōe-su 外人。M̄-koh， kàu 路尾， mā m̄-sī 傳統儀式，而tāi-tí 佛教模式chham-lām 跪拜禮niā。Sǹg chheng-hiu bōe tak-tîⁿ。

 Chū i 中風， lán tio̍h 一直 leh 回想，思考， gún pē-á-kiáⁿ ê 關係。事實，kap gún pâ tàu-tīn 歡喜 快樂 ê 時 比 其他 sim-chiâⁿ khah chōe。

我 ē 記得 siōng 早ê tāi-chì， 應該 是 我 hō͘ gún 阿公 that lo̍h 眠床， lán iáu-bēr 2 歲足 lóng kah 阿公 阿媽 chò-hóe 睏。Hit 時，i m̄-chai 出台北 bēr？Ē 記得，2 禮拜 i ē tńg--lâi 1 pái，àn 埕bér chiàⁿ 手pêng hia peh khiaih。 Góa lóng 真 歡喜，chit-má ia̍h m̄-chai hit-chūn lerh hoaⁿ-hí sáⁿ。 Gún 阿公 tī 我 2 歲ê 時 tio̍h 過身ah。

Hit-chūn 厝邊頭bér， gín-á 足chōe， lóng chòe-hér thit-thô，唱歌lā 曲， 聽講 lán chiâⁿ gâuc tèr 音樂 跳舞， ta̍k-gê lóng 足 kah-i 看 。Nā 有 siáⁿ tāi-chì， 嬸á ，ḿ-á 厝邊 lóng ē khîⁿ óa 來，mā 真chōe，門 a̍h 無 lerh chhoàⁿ iah sī 鎖--ê。

有 1 日， gún，有gún 姊á，淑á，雪á， hông 趕 去 牛間，chit keng 早tio̍h 拆， 改建做茶間ah。Hit kang tio̍h sī Boán-á 出世。Hit kha-ta̍h-á， lán ē tiāⁿ-tiāⁿ 看 天光，看夜景，巡菜園，peh 柑á châng。

有1 日，阿媽講beh 去 下底bán 柑á，lán berh tèr，hō͘ 阿媽 āiⁿ。Tńg--lâi ê 時， 阿媽 phāiⁿ 1 tēr 大大tēr， góa tèr lerh  kiâⁿ。Koh 1 pái，阿媽 berh 送 飯 hō͘ 頂區做sit--ê 食， 我 mā berh tèr，沿路行， 沿路 歡喜，bōe 記得 chhùi 唸 siáⁿ-mih謠。 Kiâⁿ kah 半路， ài 過 ta 溪 大石鼓， lán tám-tám kiâⁿ 後壁， soah 看 tio̍h 1 bér 大蛇， 手骨hiah粗。阿媽 kā 我 講 he 好蟲， lán ia̍h m̄驚。

有 1 kái ē-hng， lán 洗 身軀 soah， thǹg theh-theh tī 門口埕， m̄-chai lerh chhòng siáⁿ。 Soah 1 ê 警察 來， 害 lán 驚1 tiô。

有1 日，lán kiâⁿ tùi 豬tiâu 後壁 koân khàm 去， tio̍h sī berh 去 peh 柑á châng hit tiâu 路。 Soah poa̍h 落--來，ai 1 聲 hūn--去。聽講，gún 叔伯兄哥 Seng-á 發現，緊 hoah 人 來救。Chit 段，lán ê 頭殼 無印象， 一直kàu 醫療程序 lóng kiâⁿ liáu-liáu ah。 Chhù lih 做 大lāu-jia̍t，lán pa̍k terh 門扇pang 食 kui kho͘ ê 豬肉kho͘。 中間 ê kì-tì 完全 消失。

Hit 中間 kài 重要。 因為，gún pâ，āiⁿ 我 出台北 hông 醫， 驚 ē 有 hiō-î-chèng， koh ke khòaⁿ 幾ā 位。 Koh ài āiⁿ tńg 山頂 chhù--lih lioh。 大人kha，àn gún tau kiâⁿ kah 坪林街á mā ài 點外鐘，lín kám chai？

Lán sǹg i ê 好種，o̍h bat 字 chiok 緊 chiok gâu。 是講， hō͘ 眾人thiàⁿ 眾人惜， lán 有tām-po̍h-á 天真幼稚。 Chhù 內 阿公阿媽 kàu 大姊 thiàⁿ， 厝邊（山頂chhù，罕得 有 隔壁）ê 阿姊 mā 來 tàu 惜， ē-sái 講 好命底。Tèr 阿姊 去 in hit 班 寄學，tèr in kiâⁿ 彎彎oat-oat  koh 起起lo̍h-lo̍h ê山路 2 點鐘 chiah kàu 漁光國校。中晝 課soah koh kiâⁿ tńg chhù，lán 人tér kha 肥nńg tiāⁿ-tiāⁿ kiâⁿ kah bōe 得去， m̄ kiâⁿ，阿姊in gâu kiâⁿ， m̄ sio 等。 我 tio̍h mah-mah háu，soah hāi 阿姊hō͘  厝邊 阿姊 phah，講 ka-tī ê 小弟m̄ 顧，放lerh hō͘ i háu kah án-ni。

有1 kái，漁光in hit pêng 鬧熱，聽講 gún是 阿姨（m̄ 知 tio̍h m̄ tio̍h） in hia berh tàu 鬧熱，暗時 soah 看tio̍h 人 lerh sio thâi， 棍á， 刀á lóng 出。 In hia 比 gún tòa chia ke khah 鬧熱 sī 有影。

總講， tī 山頂 ê 時間， 我頭殼內lāu-pē ê 印象 chiâⁿ chió。 Kàu 我 7 歲，tio̍h seng kah gún 阿姊 搬去 永和 tòa 台北伯á in tau，阿姊 去讀網溪，我無足歲 bōe-sái 入學。 阿ḿ tùi gún mā 足thiàⁿ惜。Góa m̄ 知外久gún  chiah lóng 搬去 丹鳳 tòa，ah 我 chiah去國泰插班入學。

Nā kèr年，tio̍h kui ke-kháu-á lóng chhōa tńg 山頂 kèr年。應該講阿媽 tī toh 1 tah，kèr 年 tio̍h ē 去 toh 1 tah。

無外久，gún a-pa， a-bú，阿姊，我，tńg 山頂 kā 阿媽，淑，雪，Boán 接來。有印象ê是 berh kèr 1 條 4 5 尺闊 ê 溪， a-pa āiⁿ 阿媽 kèr。

Liáu-āu， 阿伯 in kah gún hiah-ê chek-peh 兄弟姊妹 kèr 年 mā lóng ē 來 看 阿媽。Gún tau tio̍h pìⁿ kah 鬧熱滾滾。

...待續...

Sí-hêng

本底重病 ê Mini 砂輪機á 

Sî-kan kàu ah，Lí sí-hêng kai chip-hêng ah。 K oa̍t thâu khòaⁿ i, m̄-koh m̄ bat hit ê lâng。 Ná sīm chiah siūⁿ khí chit ê sí-hêng，téng lé-pài chiah phòaⁿ--ê。Kiò i ka-kī sî-kan nā kàu， ài chia̍h hêng-hêng ê io̍h-á。

I lú siūⁿ lú bêng-liâu ah, kì-jiân phòaⁿ liáu tio̍h kai chip-hêng, i un-sûn un-sûn àn lak-tē-á kā 1 koàn po-lê koàn-á-kiáⁿ jîm chhut--lâi, hō͘ khiā i kiⁿ-á ê lâng khòaⁿ，tōa-phài tōa-phài 1 chhùi lim lo̍h--khì，kài-sêng gêng-géng thàu-lām tāu-iû ê khì-bī。 M̄-koh， tán 1 khùn--á， ná bô hoán-èng， bōe thiàⁿ bōe ai iā lóng bōe kan-khó͘。

Liáu-āu, K koh siūⁿ--khiaih。 Phòaⁿ ê àn-kiâⁿ kóng i kā lâng cha-bó͘ kiáⁿ thâi--sí。 M̄-koh， châ àn ê kòe-thêng lih，pān-sū kèng-chhat ū hoat-hiān tio̍h hit-ê cha-bó͘ gín-á kun-pún bô sí iáu oa̍h thiàu-thiàu。

Chit ê kok-tō͘ ná sêng sī teh Tōa Eng-kok。K ka-kī leh sim-būn，sè-kan ná ū chit khoán siā-hōe ná chiah-nih siong-sìn lâng， kiò lâng ka-kī chip-hêng leh？

Sī-kóng kì-jiân phòaⁿ sí-hêng ah，phòaⁿ-koat mā bē thiat-siau， in-ūi K ū khui chhèng phah tio̍h cha-bó͘ gín-á ê lāu-bú， kā i ê chhiú phah tio̍h-siong。

K siūⁿ-kóng tio̍h-ài khì iau-kiû têng-sin soan-phòaⁿ， bô siūⁿ-beh án-ni kan-tan tio̍h lâi chē chōe ho̍k sí。I lú siūⁿ lú chheng-bêng，it-tēng ài khì sin-sò͘ kiû oa̍h，nā su-iàu khòng-cheng mā beh khì。

新營 親子天文探索

Àn 中班ê gín-á kàu 50 ê sī-tōa lóng ū, lóng-chóng 30 組， sim-sek。
Lán siūⁿ kóng chah lán 手頭 有 ê thit-thô mn̍gh khì hō͘ in sńg。Chiū-sì 2014 khì Tâi-pak 做ê tiàu-kiaⁿ kap li-li-khok-khok ê khì。

Khui-chhùi tāu(Pistachios)

 Khui-chhùi tāu(Pistachios)

                      Lîm jū-khái( 2008-02-13 )林裕凱

      Kôaⁿ-sih-sih, āu-chhiah-thâu 12 tō͘

      It-ti̍t sái khì ê kū-nî-tau

      Chóng-sī bô khó-lêng tán-hāu

      Sim ân-ân

      Kóaⁿ beh tńg-khì ê lâng-kheh

      Ko͘-toaⁿ thèng-hàu

      Iah-sī pêng-iú saⁿ tn̄g-thâu

      Chit-má Sî-kiâⁿ chit-lō

      Pit--khui ê khui-chhùi-tāu

     Tâu-ki bô tâu-ki ê ōe

     Kì-chāi i kóng gōa chōe

     Thâu-lō͘ būn-tôe, Kiáⁿ-jî sī-sòe

     Chia̍h-pn̄g chù-chheh

     Chhú-khì seng-o̍ah

     Ài koh hôan-ló siáⁿ-hòe

     Chhia-thâu óng-hôe ê lâng chiām-chiām khó-lâu

     Sin-chiaⁿ nî-thâu

     Khui-chhùi-tāu khui chhùi kóng thàu-lâu

     Eng-àm léng-hong huh-huh háu

 

    寒sih-sih, 後車頭 12度

    一直駛去ê舊年兜

    總是無可能等候

    心ân-ân

    趕beh轉去ê人客

    孤單thèng候

    Iah是朋友相當頭

    Chit-má時行chit-lō

    Pit--khui ê開chhùi豆

    投機無投機ê話

    據在 i 講gōa chōe

    頭路問題, 囝兒序細

    Chia̍h 飯註冊

    此去生活

    Ài koh煩惱siáⁿ貨

    車頭往回ê人漸漸洘流

    新正年頭

    開chhùi豆開chhùi講透流

    Eng暗冷風呼呼號

saⁿ-goe̍h ka-iam-kôaⁿ

1.                        三月天氣真lān-mōa，昨日燒熱liâm-piⁿ寒；認識台灣歷史線，人人chhiⁿ-chhìn ka-iam寒！

2.                        三月初八真可怕，土匪起山目chhâ-chhâ，可歎先民m̄-pat飽，chún--bô china 做阿爸。

3.                        精銳部隊 súi tang-tang，起山上陸隨thâi人，親身下令kui 島 láng，in 講lán kap in 無相kâng。

4.                        天然優良Ke-lâng 港，海港 kui phiàn soah chiâu 紅，無分老大iah幼紅，見面總掃無惜工。

5.                        了後戒嚴三八年，台灣 giâ 頭無看天，莫名奇妙 tio̍h pháng 見，無死奴隸年盤年。

6.                        In teh thâi人無為難，比較地獄khah 粗殘，人人風聲驚kah sán，kioh 是魔王降人間。

7.                        是真魔王lán m̄-pat，bē-hiáng phah-tat 真m̄ 值，迎請回島來chau-that，遺禍 kiáⁿ 孫出gōng力。

8.                        魔王虎á kui大tīn，化妝拯救大偉人，慈祥無限仁仁仁，解救台灣 lóng 講in。

9.                        Thâi人phēng chōe koh chiok 緊，就是魔王i親身，民族救星thâi 國民，神經亂kah chhāi 做神。

10.                    Ho̍k-sāi 魔王chiâⁿ 好kàn，致蔭 kiáⁿ 孫kâng 強姦，強佔別人ê 家產，nā beh tâⁿ 話chhèng sûi tân。

11.                    衙門開起kek 開化，法條萬千m̄准嘩，私偏魔王in 佔大，人民beh 告無khah choa̍h！

12.                    也設學校學別國，chhèng枝侍候 teh不服，滅絕台民tùi根 tok，教育gín-á 背母族。

13.                    如今台民châu變體，bē 輸神經兼tio̍h che，台灣kám無原住客，清醒ê 人有幾ê。

14.                    Mih 故 ka-kī phah ka-kī，hō͘ lâng 分化是一時，走狗liâm-piⁿ lia̍h 去煮，名列走狗都無 i。

15.                    走狗sau-phî m̄-sī 狗，講人體面無leh 留，貪名仗勢nā 講透，人格tàn leh 塗kha-tau。

16.                    台人變質先mài 說，本頂先民死三月，物資精神 in chiâu thoe̍h，毒刺tī-sî thang 來poe̍h？

17.                    魔王chōe 人teh ho̍k-sāi，台人ho̍k-sāi 真不該，thâi lán 先民絕後代，變做奴隸 koh m̄ 知。

18.                    魔王屍體bē àu nōa，大溪造廟bē豆干，hē tī 神社hō͘ 人看，豆干 káⁿ tio̍h 配人干。

19.                    Chit ê 政府m̄-sī 款，維護屍體為mih 端，共產國家ê習慣，中華民國真齊全。

20.                    真空法師講大概，蔭屍m̄ tâi kài chhi-gâi，姦殺台灣你kā 拜，ho̍k-sāi 魔王 真不該。

21.                    介石殺人真chiâⁿ chōe，本島超過 saⁿ 萬 ê；起廟 ho̍k-sāi 逆天地，莫怪台灣 teh 連回。

22.                    Taⁿ 講台灣出頭時，事件經過七十年，當初全島kui phiàn 死，兇手chhōe 無真怪奇。

23.                    講tio̍h 全是血kap 淚，無辜ê人死kui 堆，三代 m̄ 敢 ke sngh khùi，歷史脈落ke 減追。

24.                    三十八年大戰敗，走路逃亡台灣來，奪lán田宅 kā 人害，phòng 風 phòng kah 比天hai。

25.                    土匪 kiâⁿ 放 sì-kòe piàⁿ，chhèng-chí cheng-piàng phah bē贏，搶奪土地講放領，人人聽 tio̍h 心驚hiâⁿ。

26.                    Koh 有 chi̍t 味三七五，手術地主bē 糊塗，phah-sòaⁿ 社會ê 基礎，換in 大細過真舒。

27.                    In 舒台灣足艱苦，koh 有 四萬換chi̍t kho͘，sió-khóa 研究 tio̍h 知 ló͘， 日本都無lán chiah 塗。

28.                    三大政策 kiâⁿ 做頭，政府機關kā in 留，koh 嫌án-ni 食無夠，山海in 也lóng beh 包。

29.                    日本建設 ê 成果，設hō͘ 台灣進步多，講是 in 來chiah 起造，bē-hiáu hiān-sì lo 再 lo。

30.                    蔣家chhōa 人盡歪道，khà 油食錢 châu  oai-ko，莫怪大陸 phah 失落，輸了江山sì-kòe 逃。

31.                    逃來台灣真hiau-hēng，此去台灣失光明，介石總統自承領，koh 有米國 teh 後pêng。

32.                    Kiⁿ-ti̍t（驚蟄） 時kàu陳春雷，無辜慘死chiâⁿ 大堆，七十外年血 kap 淚，sak hō͘ 歷史無是非。

33.                    真空法師講大概，蔭屍m̄ tâi kài chhi-gâi，姦殺台灣你kā 拜，ho̍k-sāi 魔王 真不該。

34.                    過海thâi人koh放火，歷史bē-tàng kiâⁿ 倒回，兇手kàu taⁿ無tè chhōe，騙人共業當原初。

35.                    介石殺人真chiâⁿ chōe，本島超過 saⁿ 萬 ê；起廟ho̍k-sāi 逆天地，莫怪台灣 leh 連回。