Kū-tē

色空不異siáⁿ 人講，是諸法空相苦空，顛倒夢想bōe 停擋，西方極樂bā 無蹤。

Lán hit-kú iáu teh 聯考制度 ê 時，頭kài 先考chiah 選學系志願。Hit-chūn lán tio̍h tùi 師範系統莫名 ià-lak-lak，堅心 師範ê 學校 lóng bô 標寫，結局 chiah 去新竹讀交通大學。

Chit kúi tang leh 學校，kah 做台語運動，lán lú-lâi-lú 發見 究竟 chit ê 系統 正是 siōng 威權ê 制度，lāi-tē ê 人員，運作文化、風格 kap 流程 to͘ lóng 是。Chhiūⁿ 講 kàu taⁿ iáu m̄-goān hō͘ 台語 ka-kī 號做台語， 強壓講是閩南語。

Chêng 幾日， 台大koh 有 大教授 禁止人 tī 會議頂面 kō͘ 台語講話，koh 講 人講台語 bē-su 二手hun， ē  害人中毒。 2019 年，中文人ná iáu oa̍h tī 15世紀 lìn，無論in 手頭 ē sa sáⁿ gōa 進步 ê科技產品。莫怪，lán ê 人 kan-na chhun chhoh-kàn-kiāu thang 出聲。

In to͘ 無leh kap 人 講人話，koh 佔tī 社會高階地位 chiâⁿ 久，in 四 kho͘ 圍á 也 chhăoh hit khoán 人。而且，nā hông 刺激，in tio̍h ē pn̄g hit-ê 威權體制 ê 威力 kâng hip，甚至 kâng chhòng-khang。 學術 in sa 來 leh 欺壓 人， chau-that 人 niâ，liân in ka-kī kho͘-á 內 mā án-ni 互相khoán-thāi。

kū-tē

舊地，舊底 1993 ê khoán，tī chia chhòng ē hông lia̍h ê khang-khòe，kiam--ê lah，重遊 ...
Hit chūn，kám-hòa 1 ê sìn-tô͘。Kî-tha ê lâng lóng thâu-khak bô hó kap lán chit-má thiaⁿ--tio̍h--ê he kâng-khoán...

Sī-kóng， koe-á-lō͘ lóng kiông-beh bōe jīn leh ah！

khùn kú kāu bāng

khùn kú kāu bāng （睏久kāu 夢）

Lîm Jū-khái

May you Requiescas in pace, my dear father.

Káⁿ sī 父親節 kàu ah leh。Lán chū 早tio̍h m̄-bat lerh tèr sōng lerh 過 he sáⁿ 母親節iah父親節，koh-khah 免講he情人節 chiah-ê koài-koài ê chereh-ji̍t。 Choan seng-lí-lâng chhòng khang chhòng phāng beh choán-chia̍h--lâng ê chhut-thâu。 Pêng素時á，好好á 過日 kám bōe-sái chit？人倫天理顧 hō͘ hó-sè kám 無 lerh khah 贏 ？目今lán看社會、經濟制度 kā 家庭拆li̍h kah li̍h kereh-kereh ah chiah lerh chhēr chit-khoán 有khang 無sún ê 理由 chhiⁿ-chō pe̍h-siat hiah-ê 節日 berh choán 人 ê 錢 pián 人 ê 心。

Lán koh 夢 tio̍h kap chi̍t tīn lâng chò-hére chia̍h 飯，in 其中有 thoân-soat tiong ê 作家，the̍reh  chi̍t 篇小說， hō͘ lán 讀。 我 pō͘-pīn pîn-toāⁿ 讀， tu hō͘  gún中風 ê pâ。

Gún pâ chih 過手，無幾分鐘 chia̍h飯會 tio̍h soah 場ah， lâng四散回tńg。Ah 小說gún 爸也 tio̍h tha̍k liáu ah。 Lán tio̍h 問 i 講 beh án-chóaⁿ tńg--khì。Lán siat-sióng nn̄g ê 提案，chē kheh-têng-á kàu chhù，iah-sī khì chēr 公車。 I 講 berh chēr 公車 toak。Koh 問我講， ah 你寫ê 有tio̍h 獎--bô？我？ he 是 tú-á hit-ê 作家-ê， 我無寫lah。Hit-ê 是姓李ê 大作家 lioh。 I kā 我 ìn，chit 篇 ah 無lerh gōa 好。

M̄-ku，chhia-pâi-á koh 有--chi̍t-tè-á， i kha bōe lī-piān，oh kiâⁿ，kiâⁿ chin oh。 Lán tio̍h seng cha̍h chi̍t chiah haih-iah，載gún khì 車牌á kha。Ū-iáⁿ 公車隨來，kā gún 爸 chhah 上車 hō͘ i seng tńg--khì。Lán soah 變做 haih-iah ê ùn-chiàng。

是講，黃色ê kheh-têng-á， lán事實卻是bōe-hiáu 駛，soah ēng tu--ê。 Koh 直直 kâng khok--tio̍h， lán 看 m̄-sī sè，tio̍h kā lu khí-lih 路中央ê分隔島， hia 有 chi̍t chōa hō͘ 人 kiâⁿ ê 通道， nn̄g-pêng koh hō͘ 人 chhah o͘-tó-bái。 Lán ná lu soah 直直 khê tio̍h 別人ê o͘-tó-bái，khiak-khiak-khiak kui 路直tân。 而且 lán lu--ê， 也變做黃色 haih-iah o͘-tó-bái。

Chi̍t ê 警察chhut-hiān sûi 走來 kā lán cha̍h lerh， 講 lán án-chóaⁿ án-chóaⁿ， beh kā lán 開罰單，lán tio̍h kā i ko͘-chiâⁿ 巴結求情。講起 gún pâ 中風 seng tńg--khì ê tāi-chì， i 問我 gún tau ê 電話， i beh khà hō͘ gún pâ，khòaⁿ góa kám 烏白亂 chòaⁿ。 Lán soah 想 kui po͘ 久， 想無hit ki電話號碼， khòng jī， jī sam...。 警察 koh 真chiâⁿ 有耐性， tī hia thèng-hāu， m̄-ku lán 有影想無。I 講 tio̍h--lah， 高雄電話hoan phái 記，î， khòng-jī ná ē sī 高雄？

Lán kui pau皮包á lóng the̍reh 出來交-- i， 證件有，電話hoan 無。Koh kā 警察講 hit tah 四kho͘-liàn-tńg choan hit-lō koân 樓十gōa chàn 公寓 chiok phái 認。Taⁿ，tám-tám mi-mi berh án-chóaⁿ leh？ Hiông-hiông 想起，tio̍h 搬救兵來 phah火。 Lán kín kā 警察講， 請你 khà hō͘ gún 太太， che i 記siōng 清楚，lán 心內想講 i 話 khah gâu 講，póe-hēre khah ēre chheng。警察 mā 同意， the̍reh 紙筆叫我寫， lán the̍reh 來， 笑水青色，筆sûn chiaⁿ 粗， 開始寫：096328...  筆sûn siuⁿ 粗 soah 看bēre 清， lán ná 唸。

Chiah lerh 起 giâu-gî，khòng-jī 應該台北 ah，印象lìn lāu-pē tú-á 確實 chēr 車去高雄， choan 大樓 á chhù 人phái khiā ê 所在。

im-ga̍k hām-bîn

Lán 聽 lâng 善khoàn， 冊 chi̍t pái 讀 bô，ke 讀--kúi-pái。買 kúi-ā 年ê  Ulysses，ho̍k-sāi tī 冊櫥á téng kúi-ā tang，thàn chit chām 有sim-chiâⁿ， sa 來讀。Kan-ta 讀 chi̍t 頁 tio̍h beh óa  chi̍t 點鐘久。 Pháng lán ê 英文能力 確實 bái。

Mark my words
Joyce chit tōaⁿ chiò 1 ê tiāⁿ-tiāⁿ kì-tì kap tì-sek chiâu ē chhò-loān ê lâng kóng--chhoaih

Koh，m̄-bat ê words，tio̍h péng 辭典，péng kah o͘-àm-hîn。Siōng chia̍h-la̍t--ê， iā sió-khóa khah sim-sek ê，sī hiah-ê ná bat ê words。 Têng hian， chhâ chiah ē 知影， lán kan-na chai chi̍t m̄-chai nn̄g， koh hóng-kiam saⁿ。 Joyce ê Eng-bûn 實在有夠複雜 kiam 幼路。 Bo̍k-kòe i 講 chit 本是 encyclopedia。

Ah nā sī encyclopedia，讀 tio̍h ná 有 趣味 leh？Nā 無 pique tio̍h curiosity。

Lán cha-hng 讀 第一 chiong 第 saⁿ pái liáu， chiah 安身 lo̍h-khì 睏。結局，眠夢 lah！夢tio̍h，lán kā 人 講， lán 音樂 lóng 無法度，節奏 板嘹 lia̍h bōe tiâu， ah nā pitch tone sī 人 chhit 音 十二音， lán lak kah chhun 無 chi̍t pòaⁿ。

朋友 面á bî-bî-á ná beh 笑 ná 無笑， chi̍t 半 m̄-sìn，chi̍t 半 起 m̄-kam， beh kā lán 教， lán 有夠 phái-sè，直kā the辭。 i 講  無要緊，lí 試看bāi leh。 有影， lán khui chhùi，板嘹 sûi 走cheng，聲音 音階無 chi̍t khang 準確。 Lán soah kiàn-siàu kiàn-siàu。

Khêng-si̍t ，lán án-ni，讀 ê 時，lán tio̍h kám-kak he 不時 出現ê 歌，一直kā góa 擾亂，直直拆散 lán ê 思路 kap 注神。Koh lán iā m̄-chai he 歌 ê 意思， 旋律 án-nóa，koh 有 kâng khioh笑ê，thit-thô 做sńg--ê， iā 有 chin正莊chiàⁿ-pān-ê。Lán lóng hun bōe chhoaih。Iah koh 有 hit ê bī-chhai。

lán chò lâng

Lán 做人 kám 有 原則？

Chang mî   烏狗兄牽 lán 散步，tńg kàu chhù to͘ hoan-tiám ah，想講 sok-sok thǹg hiû-á 長褲 lo̍h-khì 睏。M̄-koh， 現代人症頭，tó--lo̍h chiah leh hiāuⁿ 想，kui-khì 手機á sa lâi hôe-hôe--leh， 看 kóa ē 清心 安靈 ê 影片。

果然， bô 10 分鐘 tio̍h 起愛睏。 報講 koh有一波寒流，棉phōe kah leh khah sù-sī 好睏。聽講夢lih 所有ê 人 châu ka-tī ê  化身。

1 ê chió-hòe gâu人 出現tī lán ê 場，tu̍h 破sian-siⁿ  設全部 ê機關，thian-thong kap tauh-á。Lán chiâⁿ 欣慕。是講lán iā 有 nn̄g-saⁿ hāng 撇步 引 i ê 注意，然後 tio̍h tiāⁿ tàu-tīn ah。

Gún 談文論武道玄機，講 kah tau-tah，雙人極 歡喜。I 講 beh 去 看 太陽系 其他ê 遊星，講beh 驗證 人leh 講 ê he gōa kôaⁿ  tú gōa kôaⁿ， gōa sio tú gōa sio， koh 看 有 其他ê 人 tī 頂頭--bô。

I kā góa 手拖leh tio̍h beh 出發。 Lán soah tò-kiu， kā i 講，現象，道理，學問 góa 是 足gâu 講， m̄-koh 我 肉身 做 bē kàu hia 去。Nā khì，m̄-sī 無khùi sí， tio̍h sī kôaⁿ--sí。 I iā kài 體諒，kā 我ê 手 放離，ka-tī siu--- tio̍h 飛去 ah， i ê kha尾soah 化做 火箭 ē phùn火 直衝天頂。

無gōa久， i 翻頭 來 chhōe 我，講 he ā 無sáⁿ。 Lán kā i 講 lán 做人ê 原則 有 2 項。頭chi̍t項，lán bōe 講（phòng-hong） 超過lán 個人能力ê tāi-chì。Lán teh 講， 心肝內phàⁿ-phàⁿ， ná toh 位á 無tùi-tâng， 致使 第二項 想足久，講 bē 出--來，chhiūⁿ chit-má， koh bē 記得ah。

Lán nn̄g kâng 前， chiah leh 想，lán sī cháiⁿ-iūⁿ ē kiâⁿ kah tī chia hông chau-that， hông 侮辱 kah liân ka-tī to͘ beh giâu-gî ka-tī？Lán做人 tàu-tí tùi chit ê 世界 kám 有 siáⁿ 貢獻？自sòe-hàn hông 講 khiáu，聰明， gâu， kám 有 khah 才情？Iah sī lán kap lán leh 講ê hiah-ê 普普眾生 sio kāng，lán tio̍h 是 hiah-ê hóaⁿ-hóaⁿ 眾生？Khiok 是 m̄甘願？

想--起來ah，第二項，tio̍h是別人ê tāi-chì，kap lán 無關係，m̄-bián lán chhap（出chhùi  iah 出手）。 Tī Facebook 直直 寫文， kám 有符合 chit 2 項？

Chit 幾年，lán 身軀 衰退kah 有看見，koh tiāⁿ-tiāⁿ 不明 thiàⁿ，ām-kún，kha-chiah-phiaⁿ，āu-khok，胸坎，kha，手股， kám sī teh kā lán 抗議？Lán 無 好好á kā in 照顧， 好好á thiàⁿ-sioh ka-tī？環境、公義 ê tāi-chì，chit ê 天年，離lán lú 來lú hn̄g ah。資訊kap知識 ê 流通利便是利便kah，m̄-koh，lán chia 人ê 品質 卻是lú 來lú  反智，m̄-chai 是sáⁿ 症頭， hiah-ni̍h-á 甘願 做奴隸。

Sìⁿ-miā 生活 kan-ta chhun 錢有意義niâ？ 家庭親人 chhun 1 iân 薄薄無親 ê 血緣關係 niâ！

ē tín-tāng ê siōng