oan khoe

Bē-hiáu 駛船嫌 溪 e̍h koh 彎。  Lán leh 看人功夫無夠chāi 無夠好 koh ài 嫌東怨西 ê 時， ē iōng chit 句 sió-khóa 深刻 ê metaphor 來 講 i。 是講， chit-chūn 環境 變化， 溪lih 駛船 真罕得 通 看 見ah， 人 tio̍h khah bē-tàng 體會。Chit 句話，也有無ài kā i ê 欠點 出破ê 態度，保留 人情1 線，日後koh thang 交陪。 論真講， che tī 人情世事 也真要緊，人 難免自覺態度， 自尊面水， 無ài hông 當面 chi̍h-iāng。Nā 真正hông 當頭 tiám-tù，khióng-kiǎⁿ ē 變面 khah 快，對siáⁿ人 lóng 無 助益。Án-ni se̍h khah hn̄g leh， hō͘ i ka-kī 去 chhōe， chhōe nā 有 kài 好， chhōe nā 無， 準 tú 好。意思 kàu tio̍h 好ah。

Án-ni tàu-té 算 認真 iah 無認真 leh？ 認真 tī 人情彎曲考慮，事項tio̍h khah chhìn-chhái boǎi kín ê 態度。久--來， soah tāi-chì bē-hiáu 分輕重、緩急， án-ni-siⁿ tio̍h kài hàm ah。

Lán 細漢ê 時， pat hō͘ 美術老師 khioh 去 講 beh 參加 比賽。 Tāi-seng ài piàⁿ 贏 同學 chiah ē-sái。 Hit pái， 比試，lán 圖 iā 畫kah 真歡喜，心肝也 táng-hiáⁿ 無siáⁿ 對重。Koh khòa lán 家境 bái， 水彩 ê 料 m̄-káⁿ siuⁿ hē，結果，輸hō͘ 同學。 Lán 觀 i ê 圖， 驚 tio̍h， 人是 sa 水彩膏 直接 kō͘ chu̍t--ê。 I kui 張圖 彩色繽紛，燦爛無比。Lán chhùi認輸，心內 m̄ 願認輸， chhōe 理由 講， he in tau 好額， 水彩膏 甘用 niâ。Lán bô 講出chhùi， só͘-pái 也無人 kā lán tiám-tù。 了後lán tio̍h 半放sak 畫圖ah。

入國中， koh tú遇 1 ê 同學，chiâⁿ gâu 畫圖，kan-ta 用 原子筆， tio̍h ē-tàng kā F14 F15  hiah-ê poe-lêng-ki 畫kah 足sêng， koh chhìn-chhái 紙 lóng 無要緊。Tī i 面前， lán to͘ kan-ta 欣賞，m̄-káⁿ giâ 筆畫， siōng chōe 畫 數學課 he 圓， 三角形 niâ。 Koh kàu 大學ê 時， 去參加 美術社， 看 人學弟 leh 畫， 1 張紙 400，lán 心肝 又閣 ...

Gún 理工大學， 有人 無辦 音樂會，i m̄肯畢業, 也有 無辦 畫展 m̄ 肯 畢業--ê！ Lán lóng 真him-soān， lán tī-sî bat ūi hō͘ ka-kī thiòng， sóng chhòng siáⁿ leh？ Thit-thô, sńg 也 差人 chi̍t 大截。Koh hō͘ 人 笑："我門在玩雞巴的時候，你還在玩泥巴" 。 厭氣 lah， hit 時 iàn-khì mā 無tè tháu， 事實，lóng 吞忍 m̄知 tio̍h tháu（phah-sǹg 奴隸性 完成）。

Chit-má 科技進步，電腦網路進步，不時都thang 看tio̍h 世界日日新。看he Youtube，根本 看 bē 了。 Ā有 he 4 5 歲 ê 天才畫家 Akiane， ā有7 8 歲á ê 音樂家，koh m̄ nā 1 2 ê。 Lán 看了， 心情chiâu chhê 底。Mài 講 kah 人 比phēng lah， 根本看bē tio̍h 人ê 後車燈 lah。

好ka-chài，lán chit-kú 知影 ah， 人 活leh m̄免 事事 比較，m̄免 事事chiⁿ 輸贏， hō͘ 人贏 mā bô 要緊，lán 有 lán ka-kī ê 人生， 有 ka-kī ê 世界。（án-ni-siⁿ kám 也是 hit句話 leh？）

iông-sio̍k ê ok 庸俗ê 惡 ？

昨昏 lán koh kā lán ê 學生經歷 sa leh kā lán chia ê 學生gín-á 講， ūi beh 講破 1 kóa 人生道理。

Lán 講 tio̍h， lán ē hō͘ 人 講 得 無？ 尤其是 lán ê pē-bú 師長、親chiâⁿ 朋友、kap 有相關無相關ê 人 講lán án-chóaⁿ tú án-chóaⁿ ê 時。Siōng 要緊ê，in an-nî 講，無論是 o-ló， iau-sí khau洗 chi̍h-iāng，lán ka-kī kám 也 贊同 in ê 講法 leh？ 

無的確in he 只是 1 時 心狂火to̍h 講出chhùi ê phái話 niâ。Lán soah 記 1 世人， 傷害ka-kī iā khioh怨 1 世人。 An-nî chin m̄值。
Lán tī 小學 5 年á ê 時 tio̍h 有 1 kái 親身ê 經歷。 Hō͘ 我 完全 了解，si-tòa 長輩 in 所知所bat 無 比 lán gín-á-phí khah 好 jōa chōe，自hit時起， lán tio̍h 決心 ka-kī ê 人生 ka-kī 過。


Lán chín 回想--起來， lán hia-ê 社會成就koân ê仝班同學，tī lán iah kah in tàu-tīn teh 學校 ê 時，in ê 行放 tio̍h kap lán 天地差ah！ Lán hit chūn 竟然 總 無知覺！ 莫怪 差hiah 大khùi。

如今，時間 bē 倒頭駛， 怨嘆，後悔 是 jú 加添 悲哀ê 色水而已！

Lán ē記得lán同班同學 hiah-ê 才情 lâng ê hêng-siōng： hiah ê  chit-chūn  teh chòe CEO ê，事業有成就ê， hām  chit-má  chhiūⁿ lán sio-siāng 對未來 iah 是 一片迷糊 ê。

Hit當時，liōng-iok-á 30年前 lah， 差別 chá chiū 已經 顯現ah。
Chit ê 差別 sī chiah-nih-a 巨大，致到 lán tī hit當時，竟然完全 無知無覺。


Góa m̄-sī leh pí。是 leh 看 人生。Hit句 怨嘆後悔ê 悲哀， 是 lerh 講俗人 ê 感慨 lah[同理心]。

5 hòe

Lán ēng 50 年， chiah 過 chit 款 5 歲 ê 日子。

Lán ē 記-eh 國校 ê 時， Gún pâ 有 chhōa gún kui 家口á， 去 兒童遊樂園，hit 陣 kap 台北動物園 lóng tī 圓山á。 入園 tio̍h 門票， ta̍k 項 thit-thô 物 koh tio̍h ài koh 買 票 排列 chiah ē-tàng 去sńg。

chit 項 叫做 UFO

Lán hit kú 也 m̄ 知án-chóaⁿ，頭殼 ē 想講 ài 加開錢， tio̍h m̄ 去sńg，也phah-sǹg gún 姊妹á也kâng款 án-ni 想，結局，阿pâ 買 ê 票 soah 用 無了，tio̍h tńg 厝 ah，pìⁿ做 kan-ta 去 看動物 niâ。

了後，kan-ta 1 pái 機會 kap A 芬á 去 Malaysia，坐 雲宵飛車 Roller coaster niâ其他 khah 刺激ê, khah 心色ê lóng 無sńg 過。Chit pái， 陪 a-sáng 去名勝地區 thit-thô， thâu 1 pái sńg hiah-ê thit-thô物á。

Khah 好ka-chài ê 是， lán 差不多tú好， 心理kap 5 歲 差不多，chiah thang sńg kah chiâⁿ thiòng。頂禮拜六， Topi 牧師講 lán chia-ê 人 chōe-chōe， 心內 lóng hō͘ koân-koân ê 圍牆á cha̍h leh，看bē tio̍h 外口 ê 世界， iā 外口ê 光彩 也 chhiō bē 入心。I 替lán 祈禱，耶穌已經用寶血替lán 洗清 ah，lán 是自由ê 人lah， m̄-thang koh 受 捆縛，lán tio̍h chhiūⁿ bā-hio̍h thián si̍t 高飛。

坐 高山流籠

Lán 體驗 頭殼知影安全，心理iáu是 kiaⁿ-hiâⁿ ê 經歷，UFO，chhèng koân 50 公尺， chiah 放落來 ê自由落體。Ta̍uh-ta̍uh-á chhèng koân， lán tio̍h 開始chhoah ah 講，tī siōng 頂頭 停 無半分鐘。 放！ lán聽tio̍h 別人teh 哀， lán 慣勢做 奴隸ê 款， bē 哀， kan-taⁿ 目睭 瞌ân-ân 一直kàu 椅á koh kā lán sîn起來。 落機台ê 時，kha nńg-nńg，心肝phih-phoh chháiⁿ， 阿芬á kāng 講， 心臟一直跳。 Lán soah 起愛笑講， ah 無 汝心臟 tī-sî bē跳？

了後，隨去坐流籠 往日月潭，有 3 chat。 Lán 心chiâⁿ iáu bē tiāⁿ-tio̍h，koh 坐 he kha 底 空空ê 流籠，心也tám-tám，好ka-chài 有人比lán khah 驚， Lán tio̍h khah 無咧 chhoah。 事實， 流籠足在， lán nā mài tín動， bē hián bē chùn。Tī 日月潭hit chat khah kiā，天氣nā koh khah 好--kóa， 光景 tio̍h ē jú súi。小khóa 落雨，mā 無kā PM2.5 洗清氣， chiâⁿ 害。

日月潭纜車站

Tī hia， lán 有 看 tio̍h 真chōe 團 來thit-thô ê， m̄-koh，好笑神ê kài 少， 尤其媽媽類ê。Lán 也 發現 有中國團，越南人。總--是lán iah 畏人， m̄ 敢kap lâng sio chih-chiap。

Hioh kah 雨 停，tio̍h koh 坐 翻頭。隨去坐 monorail se̍h 園， 差不多10 尺koân有， ûn-ûn-á 來，chin 安心 看光景， sim-chiâⁿ 安穩。

Koh 去 坐 旋轉馬á， 真正迴轉 chhin-chhiūⁿ gín-á， 心肝chiaⁿ 清爽。以上 lóng lán 頭 1 pái 經驗 50年 bē輸5歲。

Tiām-chīⁿ (2017 Silence )

Lán it-tio̍h kóng， kui ki 片 lóng tī 台灣 取景場，

所以， lán thàn 鮮 tio̍h 緊 來去看 講。
故事 內容， lán 早tio̍h 知影 ah， 影像 的確 phēng 文字 koh khah 利！ 利劍劍 tùi lán 心肝 chha̍k 落去， lán 一直 想起 承賢寫 ê 〈反背ê 疼〉。

Nā 有 電影 phah lán 台灣ê故事，he tō m̄ 知 jōa 好 leh....

聽講， 最近 日本人 有 phah 1 支電影講 台灣ê肝臟移殖ê 外科醫生... Lán mā 真 期待。

Chīn-chêng 法國人 有 phah 〈L'enquete〉 kap 台灣有 干連！

〈Taiwan Betrayed〉 jú 免講。

PS： hông問 看了siáⁿ 感覺？

幾ê khah 強ê 印象：1. ē 階層ê 人 所求， 活tio̍h chhin-chhiūⁿ 人 niâ，2. 活 leh ê 苦， 不如 殉教 chiūⁿ 天堂。 3. 人 m̄ 是 禽獸， ná ē 活 tio̍h bē輸 禽獸 leh ？ 4. ná ē 有chiah-nih chōe ê 苦？ Án-ni上帝ê 試煉 人 kám taⁿ tng ē 起？

主要角色 演出太有 人性， 附配完全無人性ê ē-kha 差役， hāi lán 看 kah 直直 起愛笑。 當然， i ū iōng Nâ-ga-sa-khi ê 居民 表現來 增加 說服力。

信基督 iah是 信教會？  信仰人落 入 現實 êkhún-tio̍k ap-pek ê 時， 該 án-chóaⁿ 選擇？

畫面， lán 直直看--tio̍h， chhēng-chhah 華麗ê 官員 kap 差役 一直 lia̍h hiah-ê 農民 chhòng-tī、侮辱殺害， ah hiah-ê 農民 無 1 ê 人 ê 衫褲是 chiâu-chn̂g，好好 ê.... 連 言語都 講bē chiâu-chn̂g， koh-khah 免講chhiūⁿ hiah-ê 官員 講 hiah-ê súi-khùi 文雅ê 言詞.....

Lán 感覺，1. 人 VS 禽獸cheng-siⁿ ê 價值， hit ê 幕府時代...
2. 電影 nih， 對日本人ê 精神信仰 kap 文化 批判， lán感覺 kap lán 台灣當今 mā khah 合！
a. 精神信仰 ：無才調相信精神的存在， 神；無才調脫離 自然物質。 Tio̍h 是 無才調 認識 超自然ê 神 ê 存在！
b. 文化 ：chhan-chhiūⁿ làm-ùn 地 發bē 出 有sìⁿ-miā ê 物

 — at 麻豆電影院.

jû-sù-bāng

嘉義chia̍h 日式料理

jû-sù-bāng

jî-sì-bāng(漳)/ jîr-sù-bāng(同)

[茹絮夢]

種種ê夢；夢想。

睏你做你睏，莫得∼∼∼。

Châng暝無睏改論文（足phái勢講，hō͘ 人點tuh 百幾項）， kiaⁿ日 tio̍h 量早倒落眠床， in 講 翻點 ē 寒 kah chhun 無 10 度， 早 bih 棉被khang 也好。 毯á，棉被 koh 1 頂 變態帽 sa 來 擋寒， 真緊tio̍h 落眠，睏 kah hôaⁿ。

景場 lán 真清楚是山坪頂，像真理koh khah sêng 淡江，是國立大學大教室 頭前 教師桌， 2 ê cha-bó͘ 教授 ná teh 討論，ná teh complain。 Lán 心肝 頭 起怨妒 kap 欣soān in 公立ê koh leh 嫌東嫌西。 爽 kah án-ni ah koh leh nga̍uh-nga̍uh 唸 sáⁿ  siâu leh？Phah算 日--時評鑑ê消息所致。

In kā 2 本 in 看 m̄ chiūⁿ目ê 教科書冊，tu hō͘ 我。 Lán iáu bē 表示意見tio̍h tōe 入 khă-báng nih， 1 phāiⁿ 大大phāiⁿ。 翻頭 beh 趕離開，落崎，lán kán-ná kō͘  飛ê leh， 10 外gám 1 步， he 潘小姐 看tio̍h 替lán 煩惱，出聲 kā lán 善勸講，m̄-thang án-ni。 Lán kā 應講， lán 落崎 lóng án-ni， 1 禮拜 siōng 無 1 pái，頂學期是 拜二。

Kàu 校門口，發現 lán 是 騎 o͘tobai 來ê，hit 款 scooter 塑膠車，仿Vespa 型 白色ê。 塗kha  tâm-tâm 落雨過ê 款式， koh 看tio̍h 鎖匙 phiaⁿ tī 邊á。 Leh 歡喜有 善心人士kā lán tàu 照顧， koh 好心行， khioh 起來tē 好勢。牽beh 出去，koh 發現。 疑， 鎖匙khang 已經 插 1 kōaⁿ 鎖匙 ah。行 無 2 步， 校門口ê 警衛á 行óa 來，態度hiau-pai，面色àu-àu，開chhùi kā lán 問。 Che 汝ê 車 ho͘ⁿh？ O͘h， m̄是lah， 我kā 朋友借ê。Lán怪奇 ka-kī ná chiah 老實。 I m̄ 相信， 叫我tio̍h 去 i 辦公室做記錄，lán tòe i 行， 心內是 m̄願。

Kàu 辦公室， 幾ā ê 工讀生tī hia，ná leh piàⁿ掃 iah 是 leh 賣mn̍gh件。 Lán 行 óa in tio̍h 認出來ah，kah我 相借問， 講老師好。 Hit kho͘ 警衛á 看 che 三年á 都bat 我， tio̍h 相信我ê chìn-chêng講ê 話 也 知影我ê身份， tio̍h kā 我放leh，i ka-kī 顧leh去 詼 hiah-ê 少年cha-bó͘ gín-á，lóng 無koh chhap 我。 

我 kā 警衛á叫 2 聲， koh 叫 另外ê cha-po͘ 學生 來 叫， i lóng 無 leh hiù gún， m̄ chhiù-chhái gún。 Góa 性地giâ， 入去 i ê 辦公室，i 警覺 出手 共 我 格，我1 ē 手 tio̍h kā ián 倒tī 塗kha。I 目睭展大蕊，kā 我kàng，我 kā 拖起來。 I siōng 無 百 khí-loh 有，看起來tio̍h 是 早前 ê 朋友。是講， chit tīn hoān chit tīn，我 開始 大聲kā i 罵理。 

意思是， 我 牽 1 台 o͘tobai-á 汝對我tio̍h chiah 囉嗦，ah chit chūn 有 me-á thang 詼， 人有tāi-chì sio chhōe， 汝 iah 放外外。 Án-ni 是siáⁿ 道理？ 警衛 ê 職責是 詼cha-bó͘ gín-á sioh？ Án-ni kám 對得起 汝ka-kī ê 職業？

Lán chit時 想起 cha-hng， 另外1 ê 做 chia̍h-si̍t ê朋友， 人 i 對 ka-kī ê 職業tio̍h chin 敬虔，連使用ê家私 洗tn̄g 整理都 lóng cha̍p-mo̍͘h。顛倒 chit-ê 公務人員 chiah-nih m̄-chiâⁿ 樣 m̄是款！Lán 一定一直對軍公教 反感， 哈！

I 目睭gîn ò͘-ò͘ kā 我 眼，我 無leh chhòa。 I 手 tī 鼻khang 回tio̍h 鼻血，jú siūⁿ氣 ， 我kā講 我早tio̍h 看tio̍h ah，sio phah ā teh 驚流血！心內 1 絲不安， i ê 身材顯明健康狀況無thang jōa 好， 萬不二 án-ni khiau 去， lán  tio̍h chia̍h bē ta ah。

不安 滿點 tio̍h 睏 bē 安穩 ah！

bāng sí

網路leh 傳ê 解夢笑話

醉生夢死， kap lán 個性 bē ha̍h，lán 也 無hit lō 身命。 M̄-ku，lán chang 暝確實夢死 ah， 初原頭 lán 看 tio̍h 小妹 kap 老pē leh 走chông，m̄ 知 厝nih siáng 過身， 尾á  chiah 知覺 原來 是 lán ka-kī， 哈哈哈。

Lán 看 tio̍h  lāu-pē  山坪  peh 起落崎， chiah 想起 i 都 中風 半遂 ah， ná ē？ Soah sió-khóa 起 愛笑， koh kap in 參詳， che 名牌 beh án-chóaⁿ 寫。  人 he 專業內行頭家 the̍h 幾張 見本 hō͘ lán 選， lán 看款。In he 大部份 lóng 寫 hō͘ kiáⁿ孫致蔭 ê 路用，ah lán ka-kī 都 無 後嗣，che 免 he 省 soah kui 張 白白。

Hit 時 心肝頭 soah hóaⁿ-hóaⁿ 鬱鬱，m̄-ku chi̍t 時á tio̍h 輕鬆起來 ah，想講 人 都死á，ā tio̍h khòa he chhòng-siáⁿ ？ 束信清清白白 來去，也輕鬆也樂暢。Koh 想翻頭， lán m̄ 是 beh chia̍h 百二，ná 五十 niâ tio̍h 來 khiau去？M̄ chiah leh kâng 講，人活 leh tio̍h ē 發生 好tāi-chì？ 人 已經 chhōe tio̍h iah 是 發明chhúi齒 再生 ê 辦法 ah？

Káⁿ ē 是 般若波羅密多心經 讀 siuⁿ 傷 hioh？ Lán ā 讀無 ah！ 以下 lóng 是台語讀經，色不異空、空不異色，色即是空，空即是色，受想行識 ，亦復如是，讀 kám 有？ 舍利子， 是諸法空相，是故空空無色 也無識 lah。

Chú-thé chài lūn

[氣苦心文]
主體 tī tá-lo̍h ？  Lán koh 1 pái 來 看--1-ē。Tī chit 幾年 lán tàu-tīn ê 1 kóa 台語人 nih。 有kóa 人 ē 借勢peh koân，in iáu bē peh 起去chìn-chêng， kài 禮數kāu kah 過分，he lán bak tio̍h lóng ē hân tio̍h 心肝，驚驚 m̄ káⁿ chham in 交陪。 有ê 是自底好額人子弟，海派、大方、慷慨，言語高尚行放也親民，敢衝敢lòng， lán 敬佩， m̄-ku 也 自覺 bē óa 得。Koh 1 kóa 人， 烏手底ê，做 tāi-chì 照起工照步行，勞苦無閒， soah 也無時間 好好á 交陪。結局， 講起lán 台語界， lán 也 朋友 交無 幾ê khah 知己ê。Kám ka-kī phái tàu-tīn khah 有影！Che pháng 也 thang 講 做是台語運動人ê 悲情。

為 ka-kī iah是 為台語，che 是 阿仁 看待in ê 分類法。Lán 來看 為台語 ê tio̍h 好。 Lán 台灣文藝 訂戶 khah 無 kàu 百ê [1]，liân 印刷費都 無夠thang phah 平，che 透漏 siáⁿ-mih 心理leh？ Lán 知影chit 幾年 真chōe 實體書店 kap 出版社倒， in 罕得 賣 台語文ê 冊， 意思 tio̍h 是講 in 華語冊 也是 bē-tàng 支持 出版 kap 開店。所以，台語文雜誌 賣了chhìn市，算無冤枉？

Lán 台語 kám m̄ 是 台灣主流語言？ 免koh 會 che iàn-khì ê tāi。Án-nóa 為台語， chhōe 無 1 百人客戶？Kan-ta全國母語教師 jōa chōe 人 leh？ 台語文相關系所 ê 教授leh， In  ná lóng m̄ 訂？

頭人 án-nóa tàu 鼓催？頭人永永 是 lán 頭前 講 hiah-ê 好額人底 ê， in ê 眼光 koân，目標hn̄g，有時看 bē tio̍h 身軀邊 kā tàu-saⁿ-kāng ê 烏手，iah是 tàu 牽 tàu 奧援 ê 朋友。Lán kā in 講 bē 輸 leh 討 人情、討功勞， koh 討無leh，ná 乞食 leh。Che 有人為 tio̍h 台語 lóng 吞忍，ka-kī 掩 tī 腹肚底， 變做酸水。 Koh leh tàu-saⁿ-kāng ê 時，因為烏手眼界， 總--是 khah ǹg-bāng 頭路chhòng khah 好勢，hō͘ 成果 khah 有水準leh，tio̍h ē 有相當ê 事項品質要求。 Che 也 thèng-hó 得失同志朋友， 可憐。 Lán 知 in 高人ê 目標 koân lah，kap lán 看 tio̍h ê無kāng， lán 要意 chi̍t 錢gō͘厘 ê 資源運用， 大人嫌汝 ke̍h kha pòaⁿ手， in 無 看在眼內lah。 Koh khah 嚴重ê，眾人lóng 各人有各人ê 頭路本業，有 kóa 職業論理、規範tio̍h 遵守，in 無khòa che，無 leh 驚 lán 無頭路， lán 都 m̄ 是 kap in kâng款 阿舍kiáⁿ koh。

Koh 有 另 1 類型，鱸鰻型ê，藝術本質革命做行動，目標平koân koh hn̄g， 現此時 ê 體制in 看tio̍h 觸惡 koh 看輕人ê 古意頭路， 往往 bē 體諒 chiah-ê 烏手做ê khang-khòe tio̍h kap jōa chōe 人 chih-chiap，也有 人情世事tio̍h 顧， 法律規章tio̍h 遵守。 所致， chiah-ê 烏手 tiāⁿ-tiāⁿ 雙面剋虧，也kan-ta 氣苦 ē-tàng 吞 niâ。

Lán 知影， 頭人 in 做 ê 任何 tāi-chì lóng 是 beh 成就in ka-kī 高遠目標，當然 lán 也贊成 koh 尊敬 in ê目標 kap 付出，in khah 無要緊過程 ê『小』事， kap  小人物。 M̄-koh lán 小人物  因為 chiah-ê 小事 tio̍h 東倒西歪 ah，chiah-ê 小事 phah-sǹg 也是 lán chiah-ê 小人物 tú-tú ē-tàng oân-sêng ê 小成就 niâ，差不多tī 大船ê 航程， éng-éng tio̍h 無痕無跡 ah，lán  chit 款 khioh 材添油ê  beh 算siáⁿ beh 準 jōa chōe？ 人 kā 汝講，為 理想 台灣國， 汝tio̍h歡喜做甘願受 leh， siáng kah 汝！

所致， lán 無才調chiâⁿ 做 chiūⁿ-kioh ê kioh-siàu， 永遠 是人喝來tio̍h 來 喝去tio̍h 去 ê kha-siàu niâ，成果 lán 看tio̍h kap 人leh 歡喜， leh 暢，lán  得 1 ê siáⁿ？ Lán 得1 ê  tàu 出力扛轎 ê 苦勞niâ，koh tio̍h 感謝 人 賜 lán chit 款機會leh。

頭人ê 心思 lán sa 無lah， lán 對重ê tāi-chì， in看都輕báng-báng，in 對重ê lán 真正擔 bē起。Lán 小人物 lán tio̍h 甘願， teh he 大目標、理想 sio-kāng ê 安慰nih。

M̄-koh 寫了 ná心肝頭 悲酸沉重，目墘 tâm leh？
[觀自在菩薩 行深般若波羅蜜多時 照見五蘊皆空 度一切苦厄 舍利子 ...]

[1]TOBG 總工程師 講 tio̍h 訂戶 ài 招 300 ê chiah 有夠「印刷費」。