beh koâⁿ m̄ koâⁿ

Thiⁿ ná beh-koâⁿ-á beh-koâⁿ
Lán iah ún-sim-á chiú leh chit kak hoáⁿ-hoáⁿ
Koan-sióng
Tiān-náu iā chiàu-khí-kang sàng--lâi
M̄-sio-pat pêng-iú sio-kāng ê sim-chiâⁿ
Cheng-tok soah chi̍t bió chi̍t bió thi̍h-siông
I kóng
Che̍k-bo̍k che̍k-bok che̍k-bo̍k...
Che̍k-bo̍k che̍k-bok che̍k-bo̍k...

Tiām-chīⁿ àn mn̂g-chhùi khai-sí chhiⁿ-hūn--khiài
Lán kiu tī chit kak ûn-ûn-á tam
Kiâm-siam kiâm-siam tài sng-bui sng-bui
Bô-ì ê hō͘-mî-á bīn-se̍k-á bīn-se̍k
Lán sim-būn sim-būn án-choáⁿ tùi saⁿ lī-khui khai-sí
Che̍k-bo̍k che̍k-bok che̍k-bo̍k...
Che̍k-bo̍k che̍k-bok che̍k-bo̍k...
Moa koè hit phiàn bô chhiⁿ ê soaⁿ

Hoáⁿ-hoáⁿ lō͘-teng chhiⁿ-léng-á chhiⁿ-léng
Lō͘-thâu oat-kak kám beh koh sio tng
Iah-sī ngó͘-ô͘-sù-hái chhàu-tú-khám tú-tn̄g
kú-kú tn̂g-tn̂g lán chhián siūⁿ
Thian-chin-á thian-chin
Loān-sim ê sè-sū thang lī-khui kah chiok hn̄g chiok hn̄g

六--月田嬰

自lán出目睭
M̄是頭一pái過五日節
Pō͘-pîn soah聽tio̍h siān-thâng-á講話
紅毛塗壁頂，幾點？
Cinderella敢有注意--tio̍h
To̍h算是六--月茉莉正清芳
橫直lán也boē了解 Pheromones
白白ê花蕊， kah花心黃透枝 ê 祕密

Hiàng時lán to聽bô hiah ê話句
田嬰大出，Tī beh晝á 時
Cha-bó͘雨 毛毛á落 , Hit日mā是
一直kàu
虹khan tī運動場對面
黏黏siûⁿ-siûⁿ
帶一絲á áu-ut熱ê chhek-ò͘
Khâ-tîⁿ tī DNA 螺旋雙股ê感覺

一káng ká螺á風使弄
Lán只好順thàn駛一時船ê命運
Saⁿ牽行過十八份溪
Lán想講
好花也tio̍h有人挽

三ê cha-bó͘ 肯為我犧牲

Bat 有3 ê 願替我 犧牲ka-kī sìⁿ-miā ê cha-bó͘

我英雄年少ê時，有1 ê cha-bó͘ gín-á , i 心願為我失去sìⁿ-miā。
I 意志足堅定kā 我講：「你koh再來ko-ko纏，我tō 來去死！」

我tī 外地phah-piàⁿ ê時，有1 ê cha-bó͘ gín-á i 肯等我kàu 下世人。
I kā 我講真溫柔婉約：「你想 beh 做我 ê 男朋友，你ài等下世人lah！」

我窮困潦倒ê時chūn，有1ê cha-bó͘ gín-á，i 願意 kap 我做陣 同赴黃泉。
I 目kho͘ 紅紅kā 我講：「你koh m̄ kā錢還hō͘我，我tō kap 你同歸於盡！」......

Chi̍t ê富有（pù-ū）ê律師

[台語版]

2014.12.13 白鶺鴒

Chi̍t日 下晡，有chi̍t-ê富有（pù-ū）ê律師 ，tī tńg chhù ê 半中途，看tio̍h 路邊nn̄g ê人 teh chia̍h草。

伊心肝有 淡薄á  ngiāu-ngiāu，tō吩咐司機停車hō͘伊落車去查探。

伊問in其中chi̍t-ê人，“是怎樣 lín會 tī chia chia̍h草？”

Hit ê人ìn 講，“Goán 無錢thang買食物，所以goán tio̍h-ài chia̍h草。”

“Nā án-ni，lí ē-sái來gún 厝，我hō͘ 你 chia̍h-mi̍h。”律師án-ni 講。

“M̄-koh 我 koh有某 kap nn̄g ê gín-á，in lóng tī hit pêng 樹á kha。”

“Kā in lóng做伙chhoā --來去。”律師講。

伊oa̍t 頭kā 另外hit ê人講，“你mā ē-sái tàu-tīn 來。”

Hit ê人講，“M̄-ku我mā 有某 koh 有 6 ê gín-á lioh。”

“Kā in lóng 做伙chhoā --來去。”律師回答。

雖然hit台是chi̍t台真大台ê 轎á車，in iah是費了put-chí-á chōe ê khùi-la̍t，chiah kā全部ê人載上車。

路nih，其中chi̍t人講，“先生，你有影是chi̍t-ê大好人，真多謝你kā gún全部lóng chhoā 來。! ”

 律師回答伊講：“我mā感覺真歡喜。Lín 的確會真kah-ì gún 厝，gún hia ê草足足有一米koân neh。"

花店口亭仔kha (新使者127 2011/12/10刊出)

花店口亭仔kha
Lîm Jū-khái

若拜六、禮拜，iah 是歇睏日，lán tiāⁿ-tiāⁿ 會 thang 看tio̍h choē-choē lâng kui家口á sio-chhoā 去 thit-thô，歡喜快樂 ê 都合。有 ê beh 去大都市 kap 人 tàu 鬧熱，有 ê beh 去 khah 郊外~外踏山看青，有 ê tio̍h 去chhoē siáⁿ 好chia̍h-mi̍h。Lán khiā tī chit ê 半城市半庄kha ê 所在，所看 ê，人就是án-ni 車lu來lu去 chiâⁿ 無閒款，tio̍h 是罕得有人oē-thang khoaⁿ-khoaⁿ 行。
現此時家家戶戶差不多 lóng 有車 chit ê 現代化 ê 記號，本底講是beh節省時間，結局…；轎á車也好，o͘-toh-bái 也有，出入lóng tio̍h 車，kha 若加tàu ê leh 。Siōng hàm 古ê tio̍h是：講chit-má khah 有ah，gín-á tio̍h-ài 好好á栽培，m̄-thang hō͘ i 像ka-kī ê gín-á時，透早上課tio̍h載、下晡放學也tio̍h 載，也無leh kap人chih-chiap；無khoah i有生目睭thang看，有kha thang行路，走跳，結局連in tau kàu 學校goā 遠 to͘ m̄知，路草koh-khah免講，也bē-hiáu kap人sio借問。
有時 lán beh 行 kah 教會會堂，辦胚2、3鋪路 niā-niā，也thang看tio̍h hia ê為tio̍h度活趕狂ê人，連青紅燈to͘ 無法度調制in ê kha步。Lán想講行亭-á-kha的確會khah安全，phah-sǹg mā有sio-bat ê人thang 小會話--1下，m̄-koh根本boē行得。車插kah cha̍t thóng-thóng，khah橫霸ê koh會tu kah壁邊盡磅，1 sut-á kha路lóng m̄ 留，khah nńg-chiáⁿ ê hō͘ 車侵門踏戶，i也會thang容允。
也koh有 chhāi旗開店ê，mī車刁工插tiàm mn̂g-chhùi，生財器具mī 排kah 路nih， thái-ko花khaⁿ也that kah e̍h chiⁿ-chiⁿ，hō͘ lán boē惜花連盆得。Chit款pān-sè，若beh行路真正tio̍h犯險行車路，tī赤iā-iā ê日頭kha lán肉kha tio̍h kap hia ê 鐵lián-á sio爭出路。
Hit phiàn青草á埔，boē細phiàn，會堂邊á，lán會記得，chit時會開白花，細細蕊á，boē芳，m̄-kú 真古椎，有時閣有幾á 種蝶á 會來來去去，lán印象siōng 深ê 是茄-á 色，南台灣日頭光鬚照射tio̍h，你to̍h知。Taⁿ都市化ê紅毛塗kā 死死khōng 起來ah，為tio̍h beh hŏng 插hiah ê 無閒來來去去ê車。Taⁿ車插kah滿滿，kap亭-á-kha sio-siâng-á sio-siâng。雖罔7日1 pái，oān-nā 緊來緊去 ，gín-á tio̍h 補習leh，chiâⁿ 無閒款。
現代生活ê人，為tio̍h siáⁿ貨趕狂，無thang小停--1下，無thang注意tio̍h天邊hit 頭有虹，kap花店口tú開ê蝶á花若蝶á。花店頭家khiā leh邊á sīm-sīm-á笑， i講人he i 專工按遠遠ê所在割來分lán鼻芳ê lioh，店頭前也量2 台o͘-toh-bái ê kha路。

Jī-hio̍h-Siông Sin-kut Oan-khiau

Ba̍k-chiu-jîn kàu chia chiâu tńg khóng-chhiⁿ
Sió hioh kha lán chhóan 1-ē-á khùi
Chhiah-chhêng jī-hio̍h-siông oan-khiau tēng-gī
Lâi, lán lâi pí sèng-lī
ū iáⁿ nn̄g hio̍h chiam-chiam Victory(Ví-kho-tho-li)




kòa li̍h oán-kó͘ ê thiⁿ

風吹會消失的 by Jū-khái Lîm on Saturday, 13 November 2010 at 20:41

Chhōe kui po͘ kú, Chit tiuⁿ sió-khóa-á khah sêng góa ê hiat-jiah-tē--Pîⁿ-nâ-bér. Góa3 kì-tî lāi ê ka-hiong, bô tê, sī móa-soaⁿ kam-á kim-n̂g, kah 1 khám 1khám ê tiū-á chhân, chhân piⁿ khóe-á ē-tàng lia̍h káu-kam-á, khoe-ko-á, kap hê-á, chhân-hoāⁿ piⁿ-á ê chúi-lō͘ iā ū chhân-lêr thang ó͘. Oan-oan khiau-khiau ê soaⁿ-lō͘, liân-lo̍k téng-...ē chhù, lō͘-kîⁿ thang bán kim-kam-á sek ê kim-chiam.Gún tāu(chhù-āu) koh chèng 1 châng lí-á, ta̍k-nî pe̍h-hoe liáu, thang chia̍h âng-âng sng-khùi sng-khùi ê lí-á. Beh khì keh-piah(poâⁿ kòe sió soaⁿ-lûn-á) poàⁿ-lō͘ 1 châng hái-lê-á. Góa tio̍h sī the tī teng-koân chia̍h kah thiòng chiah ū tńg khì.

Góa tī hia koh tha̍k kòe "漁光國小", lán hit chūn lâng sòe-hàn kha té, kiâⁿ lō͘ chì-chió ài kiâⁿ 2 tiám thóng cheng chiah thang kàu ūi. Koh tio̍h keng-kèr tông-chhong in tau, hō͘ in tau ê káu heh-kiaⁿ m̄-káⁿ kèr chio̍h-pán-kiô.


找了半天， 這一張稍微有像我的血跡地--坪林尾。 我記憶中的家鄉，從來不是茶香，而是 滿山金黃的橘子，和一砍一砍的稻田，田旁的小溪是我們 玩水抓魚抓蝦的地方，田岸旁的水道是挖田螺加菜 的；沒種稻的蜿蜒山路是採金針的。