Kū-nî tē-it kài niâ, lán hit-chūn siūⁿ-kóng in sī-beh kó͘-bú ha̍k-seng gín-á tùi-tiōng seng-thài kap pún-thó͘--ê, lán tio̍h tī káng-khò ê sî tōa-la̍t kó͘-bú, ah lán ka-kī mài chham-ka. Khó-sioh, lán chia ha̍k-seng gín-á bô thiaⁿ kóng beh.
Bóe--á, koh hoat-seng ū tit-chióng-lâng kū-cho̍at niá chióng ê sū-kiāⁿ, gôan-in kóng-sī phêng-sím kiat-kò͘ khiàm chiu-chì. Lán siūⁿ-kóng chit ê chióng nā in-ūi án-ni lâi phah tn̄g thêng pān, si̍t-chāi tio̍h chin bô-chhái, lán Tâi-gí ê kó͘-lē kap hoat-piáu khong-kan thái m̄-sī tio̍h koh kiám 1 ê khì ah, só͘-í lán chū-án-ni ji̍p chàu-kha m̄-kiaⁿ ba̍k chhàu-chho khì kā chham-ka. Kin-nî tē-jī kài, lán tio̍h kín mî-mî-chiⁿ-chiⁿ siá chit phiⁿ tio̍h jī-chióng--ê chhut--lâi. Kiat-kó, lán khì kah chú-pān tan-ūi ê lâng chih-chiap, lán liáu-kái, in hia ê lâng khak-si̍t m̄-chin-pat Tâi-gí-bûn, m̄-nā lán Tâi-gí si in lóng mā chhiàⁿ gōa-kháu ê phêng-sím.
Chiah ê phêng-sím, in cháiⁿ-iūⁿ chhōe, chhōe siáⁿ lâng, chhōe kúi ê, lán lóng bô ì-kiàn. M̄-kú, Lāi-tóe àm khǹg 1 hāng, tio̍h-sī lán Tâi-gí lâng siuⁿ-kòe tiōng-sī Tâi-gí, kā Tâi-gí giâ kah pí bûn-ha̍k-sèng khah kôan. Tì-sú, hŏng kóng lán Tâi-gí bûn : Kan-taⁿ ū Tâi-gí bô bûn-ha̍k. Khak-si̍t, ē-hiáu kóng-ōe siá-jī, iah bōe-tàng sǹg bûn-ha̍k chhòng-chok-chiá. Chit tiâu lí kài pe̍h, m̄-kú hia ê tōa kàu-siū phìⁿ-siùⁿ lán Tâi-gí bûn bô bûn-ha̍k, sit-chāi sī chin bô lí-lō͘, iā in ka-kī péng phòa-phah khiàm-tiám hŏng khòaⁿ. Tē-it, in chin-chiàⁿ sī m̄-bat lán Tâi-gí, Tē-jī in mā m̄-bat Tâi-gí bûn, tha̍k bô Tâi-gí bûn-pún, in ka-kī thêng tī gí-giân chân-chhù, bô hoat-tō͘ chìn-seng kah bûn-ha̍k chân-chhù, tian-tó kiàn-siàu tńg siūⁿ-khì, ēng in ê siā-hōe tē-ūi lâi teh khau-sé keng-the lán ê Tâi-gí bûn-ha̍k. Chit-tiám iā sī lán thun bōe lo̍h-khì ê 1 kháu khùi, in iā m̄ tha̍k ah. Sī-kóng khì-sí giām bô siong, siūⁿ-siūⁿ-leh put-jû lán ka-kī seng kóaⁿ-kín lâi siá.
Chóng--sī lán kám ū châi-tiāu ? Mā sī tio̍h-ài ū sian-hêng-chiá kā lán khan-kà kiam phín-kàm. Lán siūⁿ-beh siá lán Tâi-gí, Tâi-oân, oan-nā ā sī sî-ūn, ā put-hēng, lán Tâi-oân kok-thó͘ kiâⁿ kah taⁿ, thian-chai nî-nî kāu, lâng ê sim lú lâi lú bōe pêng-an. Cheng-sîn seng-oa̍h khang-hi, jîn-bûn kì-tî sit-lo̍h khì-khiah, put-sî sì-kè ti̍t-ti̍t hoat-seng, ti̍t-ti̍t hō͘ lán thò͘ tōa-khùi, kiông-beh sit-la̍t. Lán the̍h chit ê chióng, m̄-sī kài lo̍k-thiòng hoaⁿ-hí, in-ūi lán sī ui lán ka-kī ê thiàⁿ-khang ai hŏng thiaⁿ tit--lâi-ê. M̄-kú, chóng--sǹg, tùi lán kò-jîn lâi kóng, ū hŏng khòaⁿ-ē-khí ê siá ê lêng-le̍k ah.
Chit-má, lán ū 1 chióng hiông-hiông tńg tōa-lâng ê kiaⁿ-gî. Lán khai-sí hòan-sióng lán kóng ê ōe khah ū lâng beh thiaⁿ. Lán mā hòan-sióng ū chin chōe lâng tha̍k ū lán ê Tâi-gí-bûn, ē-hiáu him-sióng bûn-ha̍k, si, lán ā ǹg-bāng lú lâi lú chōe lâng lâi siá khah hó ê Tâi-gí bûn-ha̍k. Siōng-bóe, lán iah-sī tio̍h kám-liām Hok-tiân bûn-kàu ki-kim-hōe taⁿ khí án-ni ê tāng-tàⁿ. Chit-tiâu léng-chhìn-chhìn ê lō͘, kám bô lán ka-kī
Lán mā tōa sim-koaⁿ sim-gōan lán Tâi-oân ê hó-gia̍h-lâng, pù-ū ê lâng, thang kó͘-bú chèng-lâng ke tha̍k chheh, hō͘ lán Tâi-oân ē-tāng sán-seng khah-chōe khah chū-iû ê choan-gia̍p bûn-ha̍k chok-ka. Che sī lán Tâi-oân ê hok-khì, ā sī sè-kài jîn-lūi ê hok-khì.
沒有留言:
張貼留言