無 野望志氣 ê 世代？ 社會 hō͘ 少年家 siáⁿ 款 環境？ Phah-piàⁿ iah-sī 認真讀書 kám tio̍h ē 有 出路？ 一才情二牽成三命運， kám án-ni-siⁿ？少年gín-á ê 厭世觀 án-chóaⁿ 來ê？ Siáng 教ê？Siáng kioh--ê？
有時，lán ē án-ni 反省， 敢講 lán káng ê mi̍h-kiāⁿ hiah-nih-á 無路用，tùi in 無sim-sek？有時 lán kā in 問， in 也 ìn 講，睏， peh bē 起來niâ。真無ta-ôa。Ah nā 來leh。無 2 分鐘， tio̍h 手機á sa leh hôe， 頭 àⁿ loeh，taⁿ bē 起來，心思 lóng 無hē tī 課程內容。所致， lán 認為 "少子" m̄-sī 問題 lah。問題 tī lán ê 教育體制 beh kā lán ê gín-á， 少年人 教做 sáⁿ 款， ah chit-má 又koh 變 做sáⁿ 款。Chit ê 結果 根頭kám 真正在師資 ？ Chit-má chia-ê 現象 beh án-nóa khah 好？
是án-nóa lán 政府 kap教育界一般，lóng 無beh 探討 教育本質、目標ê tāi-chì， kan-ná leh 講 數字？ 人 ê sìⁿ-miā kám 是 數字 thang 代表？人 ê 品質 kám 是 數字？
就算是淪落奴隸地位也有品質koân-kē ah！也thang tī lán學校 chia ke 學 kóa 反身 ê 知識 kap 才調 ah！In soah也 看 m̄ chiūⁿ 目。學生 m̄ 來， in 也 bē 煩hó 學分 the̍h bē tio̍h， 顛倒lán tih chia 替in 操心扒腹。又koh，人微言輕， lán póe 會 也無罕得 有人 beh 聽。 小khóa 安慰 ê， tio̍h tī 教室 hit 幾蕊 iah bē khoeh 去ê 目睭 teh kā lán 相， koh 有時tòe lán 笑笑。
聽歌tháu 心悶 lah。 Lán 透早 tio̍h 有 預感。 Téng 禮拜， kā i 講 lán ē chah 原住民冊（華文）來 hō͘ i 選，lán sa beh 10本。 M̄-koh， 冊 無人 愛讀， 連 大學生 mā 認為 真正當，真理所當然。
Lán 開 Youtube 來聽， 想tio̍h Moscow night chit 塊。 因為 客家電視台 連續劇 有 kā 配詞做陂塘 ê主題曲，kài-sêng 號做 月光在跳舞， 旋律 lán 真 kah-ì。有 1 種 憂憂 ê 感覺， 真 合 無人 ê 時陣 聽。 客語歌詞， 寫了 khah 歡喜快樂， 旋律也sió-khóa 改 khah 輕快， 所以 lán chhōe in Russian 人 ka-kī ê 演唱 來 聽， 果然 氣味無sáⁿ kāng。 Koh 連sio-sòa 聽 幾ā 條 Russia 民謠。In ê 歌 lóng 有哀而不傷 ê 感覺。
Phah-sǹg teh 闊漭漭 ê 天地， 人ê 身軀，sìⁿ-miā 是何等渺小 hit 種 有ná 無 ê 稀微感， koh 因為 chit款極脆弱極短ê sìⁿ-miā， 所致，也感覺萬物 kap lán 人 性命 互相 依存 ê 寶貴 kap 可愛。
Lán 人的確 保守， khah 看 都 beh 看 翻頭，淡水河源頭 to͘ lán ê 血跡地。 Lán本底 beh 講 lán 也是重情ê 人，m̄-koh 情 nā無才調 維持， kám ē-sái 講 是 重情 leh？ 聖經 有例，情份 、態度tio̍h 靠 財物 維持， 也有講，錢tī toh-tah， 心肝 tī tī toh。
Lán 想 lán 驚情傷心，所致 m̄敢 表明 ka-kī ê 感情。Khài 是因為 lán 自sè-hàn 所 kah-ì ê 人事物， 無 1 項 lán 有才調維持。Lán 意愛ê故鄉山田、柑果園、菜園、門口 tiâⁿ，田嬰、火金姑、ia̍h-á，舊厝，無 1 項 保ē tiâu。Lán 愛ê 衫、褲、鞋á、thit-thô-mi̍h，冊 mā 1 項 1 項 走無去。Gín-á 伴、親愛ê同學、老師 1 ê 1 ê 四散，lán mā 無才調連繫，老感情 一直無去，to̍h連親人ê 感情也 kâng款。Che phah算 也tio̍h 是 lán ē 感覺 孤單 ê 緣故。
1 kái 1 kái kap意愛拆離，kā lán 教講萬事無tiāⁿ-tio̍h，執有、愛別離是苦 ah，所以 lán siuⁿ 少歲，無hoat-tō͘ 體會常 ê 通達， kan-ta 心傷無盡，痲痺求生niâ。
Liáu-āu，kā 愛 ê 心理態度kap 能力 lóng phah ka-la̍k 去，lán koh m̄知 che 正正是三界火宅景，kek 痲痺痲痺 lia̍h-chún 好thit-thô leh。
是講， lán 頭殼 無 phái 去， iáu ē 記得 lán hiah-ê 意愛， hō͘ lán kah-ì hō͘ lán歡喜 ah。Hiah ê lán 相tú sio 交陪 ê 人， lóng 是 菩薩 lóng 是 天使， 是 lán 貪戀幸福感受ê 款， chiah ē 受 愛別離苦。人 活leh。 kám 真正 ē-sái m̄ 免 愛， 無 愛？Nā án-ni-siⁿ， lán 人ná ē 為 愛 受苦 leh？
