ToPoj chrome téng ê extension

Chit-má, in-ūi MS Windows 10/11 ê "chìn-hòa", FHL su-ji̍p-hoat só͘  su ji̍p ê pe̍h-ōe-jī pian-bé, it-ti̍t piàn, bo̍k-kòe lán pian-pâi ē bái. Chit chân tāi-chì, in  tong-jiân  bōe thong-ti lán, ah lán ná ē chai-iáⁿ?

In-ūi lán ū leh î-hō͘ TaigiLMJ101, lán ū siat-kè pe̍h-ōe-jī choán chòe THBK Bân-lô im-phiau ê thêng-sek, beh hō͘ lán Tâi-gí lâng  lī-piān èng-hù in bô-lí ê iàu-kiû. Lán téng kúi ji̍t á, hoat-hiān, pe̍h-ōe-jī ê o͘ hē-lia̍t lóng choán bōe kòe khì, si̍t-chāi iàn-khì, lán tio̍h kā i gián-kiù cheh, chiah hoat-hiān chit ê thian-thong.

Iā, lán kā TaigiLMJ101 kái sin-pán ah, TaigiLMJ101_23Oct.dat sī chit-má siōng sin pán--ê. Beh ài--ê chiah kià phoe lâi thó heh.

Lán í-chá chiap chhiú î-hō͘ Taiwanese Package(AKA TP), siâng-sî, ū Venila, FHL ê Tâigí su-ji̍p-hoat. Lán kiaⁿ TP   ē in-ūi Word kái-pán liáu-āu, MS ē hùi sak VBA. Hó-ka-chài MS in  kàu taⁿ lóng bô hòe sak VBA. Só͘-í, TP iáu-koh ē-sái ēng.

Lēng gōa, lán khó-lū kàu-io̍k hiān-tiûⁿ, chin chōe tian-náu siat-pī, lóng bô khui koân-hān hō͘ lâng an-chng nńg-thé, só͘-í nā i bô an-chng FHL, beh an-chng tio̍h kài hùi-khì, koh FHL an-chng liáu ài têng-sin khui ki, ū chng khoe-ho̍k Card ê  tian-nāu án-ni an-chng ê su-ji̍p-hoat tio̍h ē siau bô khì, bô hoat-tō͘ ēng. Só͘-tì, lán it-ti̍t siūⁿ  khòaⁿ beh án-chóaⁿ tio̍h hó. Lán chai-iáⁿ óa-khò THBK chèng-hú sī bô-bāng. Lán tio̍h khì chhōe khòaⁿ pa̍t kok ê lâng án-nóa chhú-lí in ê jī. 

Lō͘-bóe chhōe tio̍h Russian ê toCyrillic, lán iōng lán chho͘-chhián ê Javascript jīn-bat kap lêng-le̍k kā i siu-kái, tio̍h chiâⁿ-chòe lán ka-kī ê toPoj extension, kèng-jiân koh ē-ēng-tit.  Chòe-kūn MS Windows seng-kip kah 10 iah-sī 11, FHL an-chng bōe chió lâng tú tio̍h būn-tôe, bōe-tàng an-chng, iah-sī an-chng liáu mā bōe sái ēng, án-ni lán chit  ê toPoj tio̍h kài lī-piān.

Tong-jiân, chit  ê toPoj ài tī chrome lāi-té ēng, Lán Tâi-oân lâng koàn-sì kah-chhiú ê MS Word bē-sái ti̍t-chiap ēng, ài seng tī chrome lāi-té keyin liáu, chiah copy ji̍p Word.

Lēng-gōa, lán chit ê toPoj koh ū 1 ê hó-chhù, góa kài chia̍p ēng, tio̍h sī tú tio̍h ēng-gí iah sī gōa gí, lóng bián chhiat-ōaⁿ sū-ji̍t-hoat..

Bi̍t-pô

 Chêng nn̄g saⁿ lé-pài, lán siōng-pan chia khai-sí ū 1 khoán koài bī, bô hó phīⁿ. Ū lâng kóng ná sêng chia̍h-mi̍h phái-khì ê chhàu-phú bī, góa   kóng chin sêng bó͘-mih tōng-bu̍t ê chhàu-sái  koh hō͘  iām ji̍t-thâu pha̍k ta ê bī. Kiat-kio̍k, lán khah gâu, ioh tio̍h.

Gôan-lâi chi̍t siū bi̍t-pô bih tī chang-chhiū-á ko͘-ta ê hio̍h-á lāi, beh-ám-á chhut-chhut ji̍p-ji̍p, pàng kui phiàn sái jiō. Hó sī kóng bi̍t-pô ē chia̍h báng thâng, lán chia kàu-sek báng kài kāu, koh tōa chiah, chin chōe ha̍k-seng gín-á tiāⁿ-tiāⁿ hō͘ báng-á  kā kah ai-ai kiò. 

Taⁿ nā bô chhú-lí, ji̍t pha̍k chi̍t ê bī, hō͘ lâm chi̍t ê bī, che mā chin bōe sù-sī. Che kap  in tiāⁿ bih hia phok hun kâng-khoán, lán phīⁿ khah lāi ê lâng, tio̍h  khah khek-khui.

pit-gia̍p 2023

 

Chi̍t nî chi̍t kái sî-ki kàu, ha̍k-seng pit-gia̍p m̄-thang lâu；chhiú-ki ōe-bīn kò͘ tiâu-tiâu, hiâm lán o̍h-tiàm tián i gâu.

chhêng-peh khui-hoe khah hán kìⁿ, sù-sî khòaⁿ tio̍h chhia̋ⁿ tián chhiⁿ,

lán ê jı̍t-chí kán-ná chìⁿ,sûi-sî hoe siā àn-ni-siⁿ.

jı̍t-thâu lo̍h-hái thiⁿ chiām àm, pòaⁿ-mî m̄ khùn sī hū-tam;

kio̍k-sè m̄ bat koh khám-khám, chóng-thóng káⁿ ē soán khong-am!

kui chhiū ū hoe tōa-tōa lúi, âng-iām kiô-sek siuⁿ chá khui; bông-chéng bô hō͘ leh khiàm chúi, lâng kòe gō͘-cha̍p miā tı̍t chhui.

Ko-thih chīn iâⁿ piàⁿ sok-tō͘, lú-tô͘ pêng-ún ūi kài so͘;

kho-ki bûn-bêng tōa chìn-pō͘, hēng-hok tī tó góa hô͘-tô͘.

pòaⁿ pah hòe-thâu kám sǹg chōe, sè-chêng leh khòaⁿ lóng chiâu hoe; bó-gí sū-kang ke-kiám chòe, nā tn̄g beh khàu bô lâng pôe.

siūⁿ tang siūⁿ sai sak bó-gí, ōe-tô͘ kóng kó͘ liām-koa-si

khńg lán kok-chhin tio̍h chì-khì, thoân-thn̂g Tâi-gí bān-bān-nî.

https://jukhai.blogspot.com/2016/06/kau-pang-jio-tioh-gia-kha.html

ke-kiám liān chhit-jī-á

io hâ pe̍h tòa iûⁿ-chhiⁿ bīn, pó-to hoan-gêng sin-chū-bîn；

hûiⁿ-pà thó-chia̍h lóng chhiúⁿ chīn, sit-lo̍h thian-liông chōe put-khin.

thiⁿ-kong kán-ē m̄ chiàu-kò͘, bô thàn thiⁿ-lí lâng hô͘-tô͘;

saⁿ siâⁿ siu-sêng lâi bóng-tō͘, koaⁿ-thiaⁿ ū lâng sim-koaⁿ o͘.

Gín-á m̄ io kau lâng koán, io̍h-á thāu lo̍h khah bōe hoan,

jîn-kan sè-chêng châu piàn khoán, siáⁿ lâng iàu-kín lâng sam-koan.

La̍k-ge̍rh hóe-sio hoe seng-tióng,

chhù-piⁿ chhiū-lân kài sù-siông；

àm-àm chheng phang lâng khòaⁿ tiōng

kiat chí píⁿ-píⁿ chhit-lí-hiong.

Hong-thai óa lâi lâng jû-loān, hông-hō͘ hông-pī kám ū chhoân;

iâu-giân o͘-phoe bô lâng koán, phòng-hong bîn-chú ài Tâi-oân.

hō͘-chúi khiàm-kherh jı̍t phái tō͘, ta̍k-jı̍t jı̍t-thâu ná hér-lô͘; hong-thai berh kàu iā kan-khó͘, Tâi-gí m̄ kiò án-ná ho͘ ?

chit chūn tāng-tàⁿ oh sêng-siū, hāu-tiúⁿ kìⁿ-bīn hoah ka-iû;

óa-khò Siōng-tè ē pí-iū, m̄-bián jîn-kan bo̍k-bo̍k-siû.

chúi-khì cheng-ka khì-ap kē, hong-thai beh cháu hiàn âng-hê;

hông-hun kūn-óa jı̍t chiām té, bó-gí sū-kang mài e-the.

sin-khu khùi-la̍t châu ēng chīn, pòaⁿ-mî báng-á gâu chhá bîn,

thiⁿ-tē kah-chí kóng m̄ sìn, lí-lō͘ bêng-bêng khòaⁿ m̄ chin.

Àm-sî chı̍t chūn kòe soaⁿ phang, phang ia̍h bô lâi hoe bô âng;hong-thai pò-thâu tı̍t-tı̍t sàng, chiah òaⁿ khui-hoe siâⁿ siáⁿ lâng?

M̄ bat le̍k-sú kòe-óng-sū, Tâi-oân lâng-á ū khah-su;

sat-jîn mô-thâu chhāi hāu-khu, kà lán an-sim tha̍k gōng chu.

Tôa-thúi bo̍k-bêng lia̍h leh thiàⁿ, lâu-thui phái peh iáu ē kiâⁿ；

kóng chi̍t ê iáⁿ siⁿ chi̍t kiáⁿ, m̄-pat án-ni siūⁿ ē kiaⁿ.

chit-chām hò͘-chúi sǹg bōe sòe, tōa-chúi káu-hiā iāⁿ-iāⁿ poe；soán-kí bōe su tōa biō-hōe, hit tóng m̄-nā thau lia̍h koe.

Liông-kài Iú-gî chhiú khan chhiú, Tai-lâm ū-iáⁿ bô ba̍k-chiu, o͘-liông se̍h-toh chāi lâng khiú, hō͘ in hia-pai koh chhàng-chhiu.

chò sit chhiau sî bô hiō-hóe, chhut mn̂g âng hoe khui móa oe；

sin-thé kū phòa lâng ū hòe, m̄-chai koh thang chòe kúi hôe.

hō͘ lûi-kong khà

 Hit ji̍t thàu-chá, lán leh siōng-khò kóng tio̍h jîn-seng ê chêng-chhù（chhù-bī, chêng-ì, lí-sióng, sìn-liām téng-téng） káng ：

"Chêng-chhù"，iā ū pōe-kéng sî-tāi kah khoân-kéng ê éng-hióng, jīm-hô tāi-chì, jîn, sū, bu̍t tio̍h ài tī pōe-kéng chit khoán context lih chiah ē théng-hiān kè-ta̍t kap kū-pī ì-gī.

Lán kóng khí lán ka-kī ê nî-tāi, kok-bûn sian-siⁿ kà lán kóng ko-tiong pit-gia̍p tio̍h ē-sái/ ū chu-keh khì Tiong-kok  chòe koān-tiúⁿ, in chi̍t ê koān tio̍h phēng lán kui Tâi-oân khah tōa. Bián kóng lán hit chūn lâng sè hàn, thâu-khak mà iù-chiúⁿ, su-siong lêng-lek lám-jio̍k, lán hông koàn hong tōa hàn, bōe-su koe-kui-á, ka-kī khòaⁿ ka-kī kài tōa, kài éng-hióng khì-khài.

Koh kóng gín-á sî, sian-siⁿ mā tiāⁿ ē kiò lán siá "lán ê lí-sióng" chit khoán chok-bûn  ōe hō͘-lán ê mn̍gh. Lán kkóng gín-á sî khak-si̍t lán ē hē goān chòe "úi-tāi ê kho-ha̍k-ka", m̄-koh kok-tiong niâ  sûi hông  chi̍h-iāng, pìⁿ chòe "kho-ha̍k-ka",  kàu ko-tiong pìⁿ  sêng "jīn-bat kho-ha̍k ê lâng" niâ, kàu tāi-ha̍k "pó-chhî thâu-khak  chhèng-chhiⁿ"  tio̍h hó. M̄-koh, che oan-nā bô hiah kan-tan lio̍h,  lán  chheh tha̍k lú chōe, lú hoat-kiàn ka-kī bat lú chió...

 

Só͘-í, lán  chai-iáⁿ in keng-le̍k chha-put-to 2,30  tang chêng ê "小確幸" 無厘頭、魔幻、穿越、架空，一拳超人 téng-téng，lán Tâi-gí ē-sái kóng hiau-hēng ê sì-tāi, koh  kàu taⁿ ê "躺平",  só͘-í ū "逃跑雖然可恥，但是有用" chit khoán chok-phín.

Lán ná kóng, sim-chiâⁿ  bōe-bái, koh khòaⁿ gōa-kháu  òaⁿ lâi ê chhun-hō͘ lú hoaⁿ-hí, kóng khí lán chha chi̍t-su̍t-á lâng kiò lán khì chòe bo̍k-su, chha chi̍t-tih-tih-á khì thih  thâu  chòe hôe-siūⁿ ê keng-le̍k. Gōa-kháu lûi-kong tio̍h khai-sí tōa siaⁿ khà, lán  ê ha̍k-seng gín-á bīn-á chhiò-chhiò ná  pí, kóng "hô͘, lāu-su beh hō͘ lûi-kong kòng ah"， lán thiaⁿ tio̍h mā sim-sek hèng kóng "hioh, khó-lêng góa kóng liáu bô siáⁿ tō-lí, hō͘ lûi-kong chhek-ok,  góa ài khah sé-jī leh, hah hah hah",  koh kè-siok kóng, "m̄-koh, góa lóng kóng chin-sim ōe lioh, kóng láu-si̍t ōe lûi-kong èng-kai chai-iáⁿ, bōe kā góa kòng， hah hah hah" ta̍k-gê  mā  chhiò. "Bô tek-khak lûi-kong leh kā góa chhi̍h chán,  lín thiaⁿ, tio̍h bô, chán chán chán,  hah hah hah.    

 

Tâi-gí LÔ-MÁ-JĪ 101

 Tâi-gí lô-má-jī 101 template

sī Tī  MS Word lāi-té kái-ōaⁿ Tâi-gí lô-má-jī pian-bé ê kang-khū, chhiáⁿ chham-khó sú-iōng, chú-iàu

hó chhù tī kū pán nńg-thé, pian-chip nńg-thé lāi-té sū-iàu tp-encode （Taiwanese package） jī-hêng chiah ē chèng-siong, chiah ē súi.

tāi-seng ài downlaod siōng  sin pán ê TaigiLMJ101_22Dec.dot ,

（tiám lo̍h-khì, google ē khui 雲端文件，beh Download ài soán MicrosoftWord ê .doc keh-sek，

Download liáu, chiah kā .doc kái chò .dot）  

lia̍h--tńg-khì, kā i khǹg khì  chit ê só͘-chāi （folder）：

I tī MS Word khé-tōng liáu-āu tio̍h ē chū-tōng kā kang-khū tī 增益集 lāi-té  siⁿ--chhut-lâi.

kok chióng kang-khū kong-lêng：

1. sò͘-jī tiāu-hû choán ōaⁿ chò unicode ê pe̍h-ōe-jī

2. unicode Tâi-gí choán tńg lâi sò͘-jī tiāu-hû

3. sō͘-jī tiāu-hû choán chò tp-encode pian-bé （su-iàu Taiwanese serif  jī-kut font）

4. kū ê tp-encode Tâi-gí bûn-chiuⁿ choán chò unicode

5.  unicode choán chò tp-encode

6. unicode ê  Bân-lô choán chò pe̍h-ōe-jī unicode

7. pe̍h-ōe-jī choán-chò Bân-lô thoân-thóng pán

8. pe̍h-ōe-jī choàn-chò Bân-lô chèng-sek pán （KIP pán）

Kang-khū choán-ōaⁿ ê sî, ài ēng sî-kan, che hām su-iōng-chiá ê tiān-náu téng-kip ū koan-hē, sî-kan chòe-chiò khòaⁿ tô͘-hap.

Iā ē-sái,  ka-kī chòe khàng-kū ji̍h-á （button） ài download chit ê tòng-àn： Word.officeUI

Download liáu, khǹg tio̍h ū, Word tio̍h ē ke che 

Apple Mac  ê Word mā ē-sái ēng  

an-chng ê siong-sè soeh-bêng su Tī Mac Word An-chng TaigiLMJ101.pdf

Beh chhiūⁿ Windows lāi-té án-ni chū-tōng ài chhōe tio̍h  ē-kha chit--ê （Sin-pán ê Mac OS kap MS Word）

Chit ê só͘-chai bōe chhut-hiān tī  tô͘-hêng kài-bīn, ài kō͘  copy ê hong-hoat. 

Góa kā TaigiLmj101 download hē  tī  toh-bīn （Lán ka-ki  ê Desktop）

Copy ê pō͘-sò͘  chhiūⁿ ē-kha án-ni：

1. seng àn Word ê Tools lāi-té ê Templates and Add-ins chhōe tio̍h

só͘-chai, 

2. khé iōng terminal 

3. tī terminal lāi-té cd khì hit ê só͘-chai （chhiūⁿ kóng key in cd Libr, ji̍h tab i ē chū-tong pó͘ āu-piah ê jī, múi 1 chat, lóng ē-sái án-ni, it-ti̍t key kah Word）

ji̍h enter, án-ni. 

4. cp Desktop/TaigiLmj101_22Dec.dot  ./ 

ji̍h enter, án-ni tio̍h copy hó-sè ah, ē-sái kā terminal kuiⁿ--khiaih ah（command +Q）

* Ē-kha sī Kū-pán ê

1. Tī Word ê Preferences lāi-té chhōe Find Locationgs

2.  kā tiám 2 ē, chhōe tio̍ph Startup

3. Startup tiám 2 ē, ē-tàng chai-iáⁿ TaigiLmj101_22Dec.dot ài khǹg toh-ūi

4. Tiông-sin khé-tōng Word  tio̍h ē chū-tōng chài-ji̍p.

Téng-bīn sī kū-pán ê hē-thóng kap Word.

AstraZeneca chù-siā

 Lán pún-chiâⁿ bô siūⁿ berh chiah chá chù ī-hông-siā. Ū tām-po̍h-á beh tián ióng ê ì-sù. Sī-kóng, nā òe tio̍h, berh án-chóaⁿ chiah hó leh？ Khòaⁿ sin-bûn ū pò, ū ê lâng òe--tio̍h soah m̄ chhoán-khùi, koh ū lâng sim-chōng m̄ thiàu, koh lóng put-ti-put-kak. Lán tio̍h án-ní iā pòaⁿ choán-sèng pòaⁿ sūn-thàn chhù-lāi-lâng ê ì, tòe leh teng-kì, ī-iok, hông an-pâi khì chù AZ.

Che AZ èng-tong sī Ji̍t-pún sàng ê. In hia chhàu-sim ê lâng kóng kóa bô thian-liông ê ōe, siáⁿ-mih berh kòe-kî ah lah, hòe-té lah, si̍t-giām phín lah... ū-iáⁿ choan-choan pàng ke-sái ū, ke-nn̄g siⁿ bô pòaⁿ lia̍p.

Lán chiàu in ê an-pâi, ē-sái téng lé-pài 5 khì chù, m̄-ku thàu-chá tio̍h khì bûn-ha̍k-koán khui-hoe, lán tio̍h soán keh 1 ji̍t thàu-chá, koh àn-sǹg kóng nā ū siáⁿ side effect hù-chok-iōng tú-á-hó thang hioh 1 ji̍t tah-tah.

Koh kah A-hun chham-siông kóng siáng seng chù, thèng-hó hō͘-siong pàng-phōaⁿ chiàu-kò͘. Ā soán 1 ūi  siōng óa ê chín-só͘ , sīm-sīm leh iau-sí nn̄g lâng pâi kâng sî-kan 9：30 kàu 10：30  chit phāng khì.

Seng tiàm gōa-kháu thèng-hāu pa̍t-lâng, koh thiⁿ siá chu-liāu. Bô gōa-kú, tio̍h lûn--tio̍h ah, hō͘-sū i-seng lóng chiâⁿ kheh-khì, kong-ōe iù-siaⁿ iù-siaⁿ, lán chōe hòe lâng ê hīⁿ-á thiaⁿ bōe sáⁿ bêng, lâng tio̍h chù hó ah. Kan-na hō͘ báng-á tèng tio̍h niâ. Kiò lán tio̍h sió koh tī hia hioh 15 hun chiah thang cháu.

A-hun gōa-kau hó, i kap ti-bah-tiam thâu-ke thâu-ke-niû  khai-káng. Ti-bah-tiam thâu-ke hit kha-ta-á ê lâng. In lāu-pē 90 gōa ah, kū chhù tē chiah bōe niâ. I ti̍t-ti̍t ngāu in a-hiaⁿ bōe-hiáu bōe, bōe siūⁿ sio̍k. 

Lán àm siūⁿ, chit tah chōe-hōe lâng iah kā kū kè-ta̍t-koan tau leh m̄ pàng, tiāⁿ-tiāⁿ tì-su hiaⁿ-tī-á sit-chhin bōe-ha̍h, khah giâm-tiōng sió-khóa koh ē giâ to sio thâi...

Chù liáu, lán kui ji̍t lóng bô kám-kak--án-chóaⁿ. M̄-ku, A-hun-á, i e-po͘ 6 tiám gōa tio̍h khai-sí hoat-sio, thau-thiaⁿ, kàu chia̍h-pn̄g pah kín the leh sió hioh, koh ē ùi-kôaⁿ.  Án-ni, it-ti̍t kàu cha-hng tiong-tàu chiah khah khoe-ho̍k, kî-kan hoán khí hoán tó, chha-put-to 4 5 tiám-cheng 1 hôe. Gún lóng chiàu lâng kóng--ê lim chúi, hioh khùn, koh sóe sio-chúi. I ê ūi-kháu ná ū hō͘ i éng-hióng tio̍h, chit-má chhun thau- kah lîm-pa thiàⁿ. 

Ah lán lóng chha-put-to, kán-ná cha-hng sió-khóa-á hang-hang, sin-khu hi-hi ê kám-kak.

Taⁿ, tē 3 ji̍t ah, sin-khu ê kám-kak kap pêng-sî-á chha m̄-chiâⁿ mi̍h ...

Hō͘ e̍k-biâu tiám iû chò kì-hō ê Lâu-lâng ah ...

PS：chit chiah phang-á saⁿ tang chêng kā góa tèng 1 pái ... mā án-ní, tèng ê só͘-chai sió-khóa khí 1 bô͘ niâ, bián pòaⁿ-tiám cheng tio̍h siau khì ah... Góa bián-e̍k hē-thóng kám ū būn-tôe ah ... ？