Têng tha̍k Moby Dick

Hong-thai ê sî,  lán ji̍t-chí kòe kah bâ-bū bô chu-bī. To án-ni ā m̄--tit, án--ni ia̍h m̄--tit,  lâng hông pa̍k tī Tām-chúi, in-iû Hô-him hóng hôe Ko-hiông,  Tâi-lâm--ê thêng sái. Koh lán tap-èng--lâng ê tāi-chì khiok tī Pài-la̍k, Pài-sì hong-thai chiūⁿ Ko-hiông liáu-āu, bô-gî-gō͘ bô gōa kú tio̍h siau-si khì, liân-tài Tâi-lâm mā hó-thiⁿ. Lán tio̍h ài kóaⁿ-kín kóaⁿ tǹg-khì. Nā kan-na siōng-khò, lán ū ū-kò kóng lán nā bōe tú-hó, ē online siōng-khò. M̄-koh, lâng an-pâi ê káng-chō, bōe chhiâu tit.

Iā thèng-hó lâi khioh chhù-lāi ê mi̍h-kiāⁿ, ná khoán, pêng-siông-sî-á bô sim-chiâⁿ. Hûiⁿ-ti̍t, chi̍t lia̍p sim bē an-tēng. Tio̍h koh siūⁿ beh lâi tha̍k kóa gâu-lâng ê chheh. Marquez ê té-phiⁿ, kiat-kó hoat-kiàn he hoan-e̍k, ū-iáⁿ bô siáⁿ ha̍h lán ê khùi-kháu. Neruta hoan chòe 尼爾達 sī sáⁿ lah？Tio̍h tōa sim-koaⁿ siūⁿ berh tha̍k goân-bûn, sī-kóng phô-tô-gâ/Se-pan-gâ gí lán iā iah bē o̍h bē-hiáu. Só͘-tì, lán lâi tha̍k Eng-gí--ê. Í-chá lán tha̍k kè Ulysses thâu 1 chiuⁿ, lán ka-kī ê chù-kái phēng goân-bûn khah chōe. Tha̍k kòe, mā bē kì-tit siá sáⁿ, kan-na sió-khóa ìn-siōng ū hái-piⁿ-á, ū Iû-thài lâng, ū chîⁿ...

Kàu chhù koh tńg khì péng Moby Dick, hoān-hiân lán m̄-chai gōa kú í-chêng mā ū tha̍k kòe, khòaⁿ chù-kái kap kì-hō, tha̍k kah tē la̍k chiuⁿ, oân-choân bô ìn-siōng. Koh khah khah-chá í-chêng, lán ū seng tha̍k kèr hoan-e̍k pán. M̄-koh, lāi-iông kah goân-bûn chha siuⁿ chōe. Liân chù-kái mā bô ìn-siōng....ló͘

Moby Dick tī Google tô͘-su-koán ū,  ē-sái tha̍k bián chîⁿ--ê. Iphone mā  ē-sái lia̍h, chit ê pán-pún kah góa chhiū-thâu--ê koh bô kāng. 

Jī ìn chin sòe jī, koh chi̍t chōa kah chi̍t chōa làng phāng chin oe̍h, tāi-khài chit pún lāi-iông chiok chōe, tì-sú tio̍h ìn chiah kāu. Ū khòaⁿ lâng siá kóng chit pún sī  lia̍h hái-ang  ê pah-kho choân-chu.

Koh, chit pái lán beh chē chhia chiūⁿ pak pòaⁿ-lō͘ khòaⁿ tio̍h Chiam lāu-iâ in tau ū tiàu hûn-ang-á sek ê ko͘-á-teng, chhia̍k chi̍t-ē, sió chim-chiok khòaⁿ--chi̍t-ē, lāi-té ū 2  ê cha-bó͘ lâng, piah-téng kó-jiân siá Chiau kong kòe-sin ah.

Koh-khah iàu-kín ê ji̍t-chì:

Tī bāng-lō͘ khòaⁿ tio̍h lán Tâi-gí sian-pòe Tiuⁿ Jū-hông kàu-siū ê hù-im, chū i poa̍h tó bô hó choán sim-koaⁿ thâu  tio̍h thau-thau-á sió-khóa ū chi̍t ê té ah,  iah-sī ū-kàu m̄-kam. 

Chòe-kūn, chóng-sǹg ē-sái ēng Tâi-oân Tâi-gí ê miâ. M̄-koh, Koh ū kheh-lâng li̍p-úi m̄-goān leh chhá,  si̍t-chāi bô thian-liông. 

Chia̍h sng-á

Kin-á-ji̍t, kì-liām-ji̍t, thiaⁿ lâng kóng sī Tâi-oân 1911 nî, choân tó lerh piàⁿ sng-á. Góa só͘ kì-liām--ê,  góa sère-hàn ê sî, pháng-ǹg saⁿ-sì hér-á, iah tòa terh Piâⁿ-bér soaⁿ-téng bér-liu. Hit ji̍t tīr pa̍t-lâng tau, gún tòa khah koân, in tau khah kē, só͘-í ē-sái kiò chère ē-keng chhù, èng-kai sī gún bú--á ê chí-bēr-á phōaⁿ in tau.
Khìr hia, lán m̄-chai ūi siáⁿ tāi,  kán-ná beh khai-kang niâ, iah sī berh chham-siông kau-ōaⁿ kang,  hit chūn lán m̄-bat. Bô gî-gō͘, hiong-hiong thiaⁿ tio̍h, soaⁿ kha, sīr-si̍t sī tiâⁿ-bér piⁿ-á  khí-lâi ê soaⁿ-lō͘ hia, ū pāⁿ-pu siaⁿ. In tōa-lâng lóng chai-iáⁿ, sī-kóng lán lóng m̄-bat. In sûi kā i kiò lâi, chi̍t ê cha-po͘ lâng tì chi̍t téng pau-pò͘ ê koe-le̍h-á, chhēng àm chháu-á sek tn̂g-ńg ê saⁿ, chit-má chai-iáⁿ he sī peng-á saⁿ, taⁿ nn̄g tháng mn̍gh-kiāⁿ khiaih. In kóng kóa ōe, liáu-āu gún bú--á the̍h chi̍t ê hō͘ góa, kóng ē chia̍h-chit.

Lán thâu chi̍t pái chia̍h tio̍h chit khoán mn̍gh, hō͘-chère sng-á. Lâi ē-káng liáu-āu, lâng kā lán kà kóng he sī ō͘-peng, koh ū lâng he sī pāⁿ-pu.  Sère-sère ê á, chi̍t kiû, chu-bī, khioh khí tiⁿ, chá tio̍h bōe kì-tit ah, m̄-koh hi̍t ê thiⁿ kng-iāⁿ khóng-chhiⁿ kah kóa pe̍h-hún, liâng-hong chhoe bin, peng-peng liâng-liâng, kah bú--á ê chhiò-iông  ê kong-kéng iáu ē kì eh.

----

Châng-ng àn Tâi-pak chēr ba·suh, lâng chhah-chhah-chhah, khòaⁿ pió, ta̍k pang lóng kheh-móa. Hó ka-chài, chit pái lán ē kì-tit seng phah phiò. Chiūⁿ chhia, seng tha̍k kóa chu, sòa khùn kui lō͘  kàu Môa-tāu.

Lé-pài beh hoan-thâu hit pang mā chha-put-to chōe lâng. 

Kàu chhù, O͘-môa kah A-hun-á tú hó terh mn̂g-kháu. Lán ná berh chhú-lí tiān-chú chheh, ná chhó-chhó pó͘ chia̍h àm-tǹg, ū sún-khak-hîr chi̍t kho͘ kap thng. 

---

Khùn, ū-iáⁿ kāu bāng. Bāng kⁿ lán lerh phah-piàⁿ káng, kàu-sek āu-piah chi̍t tīn lóng lerh thó-lūn in ka-kī ê chok-gia̍p, thó-lūn kah peh khìr toh-á téng, lán hoah siaⁿ, in soah cháu-cháu chhut-khir.  Lán m̄ kam-goān chhiàng kóng berh kā in kì khiàm-sek,  mn̂g só--khiaih. Sīr-si̍t lán sim-koaⁿ chin siūⁿ-khì, in chiah--ê sian-siⁿ lâng ha̍k-seng chiok phòa-keh.

M̄-koh, só bōe khiaih, chún soah. Lán chiap-sòa khìr khiâ chhia, berh khìr chhah chi̍t ê só͘-chāi. Soah kā lâng ê o͘-tó-bái tu̍h phòa iû-tháng. Hit kha iû-tháng iû tio̍h khai-sí ti̍t-ti̍t lâu, àm chhiⁿ-sek ê khì-iû. Lán hoan-ló lâu kah chi̍t-sì-kòe, bān-put-jī hèr to̍h hoat-seng hóe-sio-chhù. Kín siūⁿ pan-hoat berh tòng. Lán siūⁿ-tio̍h McGuyver, chhiū-lin-thn̂g, kín  cháu khì thâu-chêng kam-á-tiàm. Lán khòaⁿ tio̍h chhiⁿ-chìⁿ, m̄-koh in lóng kúi-ā pau pau chòe chi̍t tōa pau, lán kan-na su-iàu chi̍t sió pau. Sim-koaⁿ ná chhia̍k--tio̍h, tiàm thâu-ke-má leh kò͘, káⁿ sī kheh-lâng. Lán kā i mn̄g kám ē-sái thiah chi̍t pau bōe góa chi̍t pau sère pau á tio̍h hó, i m̄-khéng. 

Lán sim-lāi sió-khóa iàn-khì, lerh siūⁿ kóng kám berh bóe chi̍t tōa pau, bóe-á m̄-goān. Oa̍t thâu cháu, khòaⁿ tio̍h  piⁿ-á nn̄g saⁿ  ê cha-bó͘ ha̍k-seng lerh pò͘-tì oa̍h-tāng, lán kín khìr kā in chioh liâm-pò͘. Terh thèng-hāu ê sî soah cheng-sîn.

Hân-lō͘ kì

 Hân-lō͘ tú-kòe. Thiⁿ-khì choán liâng, iáu ū hong-thai leh eng-hiông, Tām-chúi liân-sòa hō͘ lo̍h saⁿ kang. Pài-saⁿ khí hō͘ chiām siu soah. Pài-jī àm, tio̍h sī Hân-lō͘, hoán koân, lán lâng thiám, chhhit poeh tiám á, tio̍h tó lo̍h khùn, koh chhiâu chi̍t ki tiān-hong leh pháng, chhoe kha-bóe. Cha̍p-it tiám gōa, kôaⁿ kah chêng-sin, kín kā tiān-hong kìm--khiaih, chiah koh khùn. Lán hoat-kiàn, tōa thúi chhhiú bong liâng-liâng, tôa-thúi i ka-ki bô sáⁿ kám-kak, sió-khóa kám-kak léng niâ. Giú phōe kah, ū tām-po̍h-á kú chiah koh khùn khì.

Kui mî, èng-kai sī beh cheng-sîn chìn-chêng, ti̍t-ti̍t hâm-bîn bîn-bāng, bé-su tī lēng chi̍t ê sè-kài seng-oa̍h. Ín-iu lán tiāⁿ-tiāⁿ bāng ji̍p kâng chi̍t ê te-lī khong-kan kap chêng-kéng,  chhù-lí kâng-khoán ê būn-tôe. 

Lán ta̍k lé-pài ūi tio̍h beh káng khò, lóng tio̍h chē basuh lâm-pak phun-pho, thiaⁿ kî-tha ê tông-sū in lóng kóng in án-ni bē-kham-tit. Lán lia̍h-chún ka-kī iah-koh siáu-liân sin-khu ióng.

Tī bāng-kéng, lán ē hoat-hiān sî-kan chiok pek, kau-thong lô͘-soaⁿ koh chiok tēng,  bē-tàng chhiâu, kò͘-tēng ài seng chē kàu hia, choán hit pang kò͘-tēng  ê kong-chhia, nā bô chē ē chi̍t pang, tio̍h bē hù kàu tī soaⁿ-lih hái-piⁿ ê ha̍k-hāu. 

Chún nā ē hù, kàu ha̍k-hāu,  iā ē bē kì-tit kàu-sek tī toh chi̍t tòng lâu, toh chi̍t chàn, toh chit keng kàu-sek. Beh kín chhōe, chi̍t tòng chhōe kòe chi̍t tòng, khí-khí-lo̍h-lo̍h, kàu-sek mn̂g thâu-chêng  khoàn khò-pió,  chhiú-ki-á chhōe khò-pió, koh ji̍p kàu-sek ēng tiān-náu chhōe siōng-khò sî-kan,  kàu-sek. Chia-ê lóng bô chi̍t hāng sūn-lī. Sim-chiâⁿ iā hoan-ló, iā kín tiuⁿ, koh ē siūⁿ beh kín liân-lo̍k kiù-chhiⁿ, soah siūⁿ-khí bô lâng sī lán ê kiù-chhiⁿ, choăn chiah chêng-sin.

Chit sî ê sin-khu, kái-sêng lóng bô ti-kak,  ū-sî lán ē hō͘ ka-ki kiaⁿ--tio̍h, tio̍h sī án-ni. Lán siūⁿ-khí A-ka （Tân Hêng-ka）, lú hoan-ló. Ko͘ sin chi̍t lâng tī sok-sià, nā án--chóaⁿ, ū-iáⁿ tio̍h bái ah. Lán chit-kú, bōe koh siàu-liân hong-sîn khì-khài,  khah kiaⁿ sí ah.

Só͘-tí, lán chin chù-ì chia̍h-si̍t, bē hi-hán siáⁿ-mih sin-sián ê hó-liāu, an-choân tē-it. Taⁿ, ū-iáⁿ khah chōe hòe ah, koh chit kúi nî phiau-phû bē tiāⁿ-tio̍h ê le̍k-thêng, hō͘ lán bé-tang an-sim ióng-sîn kò͘ sin-thé, koh tio̍h put-sî khòaⁿ chhiú-ki-á, sin-khu ka-sok thè-hòa, chi̍t ê hioh-joa̍h chhùi-khí kèng-jiân kā lán lak saⁿ  khí. 

Cho̍h--ji̍t mā án-ni, cheng-sîn ê sî, bé-su kan-na thâu-khak chêng-sin, sin-khu m̄-chai tī toh.

Ūi-tio̍h tâu phiò hō͘ sin chú-jīm,  koh hō͘ lâng mā chi̍t pái. Lán tī-teh thoân-thé ê sî, tiāⁿ-tiāⁿ ē án-ni, chhú sià ē kah lâng bô-kâng. Lâng mn̄g lán lí-iû, lán soah phái-sè kóng. Sū-si̍t lán tī thoân-thé lih, bô chū-su ê siūⁿ-hoat, m̄-sī ūi ka-kī, m̄ bô leh khioh-hūn, khioh siû. M̄-koh, án-ni mā ē jiá lâng bô hoaⁿ-hí. Lán khòaⁿ in lóng tiòng-to̍k kài chhim ah. In ka-kī mā lóng sêng-jīn ah, m̄-koh chin-chiàⁿ kiò in bīn-tùi, in lóng m̄ goān, m̄-goān sêng-jīn, mā  m̄-goān kap lâng  hô-kái, kap tùi-hong, kap ka-kī, in lóng bô-ài. Lán khiok sī in kù-chāi in khì hò͘ phun-chúi sio phùn, phùn tio̍h góa, góa mā kan-na koh tńg--khì sóe-sóe leh tio̍h hó. Chia ā m̄-sī lán ê sè-kài ah, m̄-sī lán ûi-it ê sè-kài, lú m̄-sī lán ûi-it ê seng-oa̍h ah.  

Koh kóng, góa ài chhiáⁿ in cheh. Khêng-si̍t, chiàu in án-ni ê kau-poe, lán tòe bē tio̍h, iā bōe ài tòe. Lán lêng-khó khì chòe Tâi-gí ê sū-kang. M̄-koh, lán pôe lâng chia̍h hiah chōe pái khì ah. Lán kóng chhiáⁿ, OK ah, ná tio̍h lí-iú, in hāu-siⁿ beh tō͘-chòe, ha̍k-ūi the̍h tio̍h, seng-téng thong-kòe, lóng kā in kiong-hí. Sio-chhiáⁿ bô lūn lah, lán  chhiáⁿ bián lí-iû. 

Kóng tio̍h che, it-ngó͘ nî hit sî, lán kōaⁿ chi̍t siuⁿ būn-tôe khì. Chhòa the kóng bián, koh kèng-jiân khui chhùi  kóng, sī lán it-téng ài kā i pa-kiat/o͘-se chit khoán ōe. Lán hit-sî sió-khóa gông-ngia̍h, kan-na gōng chhiò.

Tio̍h Chióng acceptance speech

       Lán m̄-chai siáng kā lán chhui-chiàn, ū hông soán ji̍p  tio̍h chióng. Koh sī 林茂生教授台語教學優良獎, lán chin hoaⁿ-hí, iā kám-kak chin kám-sim, m̄-koh koh-khah chōe--ê, sī sió-khóaⁿ tám-tám, kiaⁿ lán taⁿ bē khí chit ê chióng ê ì-gī kap miâ-siaⁿ. 

Chai-iáⁿ hit mî, sûi chòe 1 ê koài-kî ê bāng： lán bāng kìⁿ khì chham-ka  林茂生教授 ê 火化, khì kàu hia, ài seng niá sin-si, jīn sin-si. M̄-koh, niá bô 林茂生教授 ê,  soah niá tio̍h lēng chi̍t ê lán Tâi-gí kài ê chiân-pòe, bāng kéng ū-kàu chhiⁿ-chin, niá ê sî, sió-khóa chai-iáⁿ chit ê chiân-pòe sī siáng, m̄-koh khiok kì bōe bêng. Pún-té èng-kai sí--ê sin-khu, phôe-hu í-keng lóng nóa bô khì ah, chhan-chhiūⁿ sa̍h kè  ê koe, phoe liù liáu-liáu ah,  iā siau chúi kah ē-tàng ti̍t-chiap khòaⁿ tio̍h kiàn-chí bah án-ni,  khah sim-sek--ê sī i soah peh khí-lâi kau-tāi chi̍t kóa ōe,  ì-sù tio̍h sī kiò lán kè-siok phah-piàⁿ hùn-tàu ê ì-sù. Liáu-āu lán tio̍h cheng-sîn ah, sim-koaⁿ m̄-kam koh hi-bî.

成大第三屆台語文獎學金共22人獲獎

Chit ê chióng sǹg góa kin-nî siōng chán ê kàu-su chiat lé-mi̍h, iā hō͘ ka-kī chi̍t ko͘-bú kap chi-chhî, lán ē  kè-siok chòe chit ê bú-gí ho̍k-heng kap kiàn-kok ê sū-kang. Sī-kóng, lán ê kàu-su chiat ji̍t-chí sī kì-liām Lîm Bō͘-seng ê 3 goe̍h 11.

Lán ka-kī sīm ka-kī, jī-cha̍p kúi tang ê Tâi-gí kàu-ha̍k le̍k-thêng, ū-iáⁿ khó͘ khah choe kam, tú-gū ê kong-kek, phí-siùⁿ, keng-thé kap 敵意 m̄-bat tn̄g kòe. Taⁿ,  lán iā àn siàu-chòng kiâⁿ kàu ū-hòe ah, hiah-ê phái-mi̍h-á chá tio̍h lóng ē-tàng kā i tòng-chòe tùi-bīn hóng-soa, ū-sî khau tio̍h bīn ē ui-thiàⁿ, chha̍k tio̍h ba̍k-chiu  ē tiam kah ba̍k-sai bē tòng chit, chit-má lán lóng sió khóa póe leh tio̍h ē-sái kè-sio̍k koh kiâⁿ ah. 

Koh lán khòaⁿ lán ka-kī tī chit kiāⁿ úi-tāi ê sū-kiāⁿ lāi-bīn ē-tàng chòe--ê, khêng-si̍t tōa pō͘-hūn lóng sī  chiân-pòe tiám-tuh kap pêng-iú khan-khioh chiah thang oân-sêng chió-chió ê khang-khòe. Lán móa sim kám-siā in, iā kám-siā gún pe-bú, a-má thn̂g hō͘ góa ê Tâi-gí té-tì, koh ài kám-siā gún A-hun chi-chhî góa ê chí-goān koh chiàu-kò͘ góa ê seng-oa̍h. Kám-siā ki-kim-hōe pan hō͘ góa chit ê chióng. 

pò-thâu

 Tú-chiah koh khì tē saⁿ kò͘-hiong, chit ê pòaⁿ chng-siā kiâⁿ-kha-hoe. Hiah-ê chip-siú ka-hn̂g chhù-the̍h ê lâu-lâng, chha-put-to berh bô liáu-liáu ah. Iū-á the̍h châu-châu hoan khí hoàn-chhù, pia̍t-chong ah, chit khai-hoat m̄-sī lán kah-i ê hoat-tián, ke-á lō͘ kâng-khoán 4, 5 bí khoah, chhù khí kah 6 lâu, 7 lâu, ah khah khoah ê tio̍h khí kah 16, 17 lâu, beh 20 lâu. Lâng m̄-sī chiáu-á heh, mā m̄-sī ài khiā koân-soaⁿ khòaⁿ bé sio that, khí hiah koân, lâng chi̍p-tiong, chhut-ji̍p kha-lō͘ tio̍h bái, koh kéng-koan iā bái, si-koe oe̍h chiⁿ-chiⁿ choan-choan lâng hō͘ chhù kiap leh.

Lán goân-té it--tio̍h ê hiah-ê chhiū-á, kiông-beh kah hiah--ê lâu-lâng kâng-khoán siau-si khì ah. Bo̍k-koài leh joa̍h, ka-kī nā ài chok gia̍t, khah kan-khó͘ to ka-kī ài thun--lo̍h-khì.

Sī-kóng, lán chit khoán ài chū-jiân, sioh chêng--ê, kám ū-iáⁿ cháu lóng bô lō͘ ？

Tâi-pak chhī, Tâi-oân chu-goân siōng chi̍p-tiong ê só͘-chai, jîn-kháu iā leh kiám-chió, che tio̍h sī tōa chèng-chhek bái ê pò-thâu lah.

Tiong-chhiu

tiong-chhiu lo̍h-hō͘ bô kòe khoe,

giâ-thâu khòaⁿ thiⁿ  sio hong chhoe,

thiⁿ kheng tiām-tiām bô kóng-ōe,

chòe ok ê lâng ē liân-hôe.

in khó-lêng ín-iōng Quantum Physics lāi-té

2 ê koan-liām：

1. indisguishable 2. wave funcion convolution

leh chhú-lí in ê chîⁿ；

chîⁿ tī tó ūi, lín/lán lóng bô hoat tō͘ khu-pia̍t, tàu-té sī siáⁿ-mih chîⁿ, àn tó-ūi lâi--ê；

kā kok chióng chîⁿ ká-ká chò-hóe, sán seng hok-cha̍p ê wave function, lín tio̍h bô hoat-tō͘ chai-iáⁿ chîⁿ ê lâi-lō͘ kap khì -hiòng.

bó-gí lêng-le̍k chiah leh tàu,

hi-seng hioh-khùn mî-ji̍t chhau,

bô-chhái ko-châi phái chhùi-táu.

jīn-chin giâm-keh lóng beh tâu.

lâng nā tōa chāi oh khan-kà,

beh sí beh oa̍h bô cheng-chha,

phian-kiàn sêng-kiàn iau-pá chhá,

būn-tôe khùn-lân o͘-pe̍h sa.

lán chòe chit hāng liáu ke-hé,

tio̍h tam sin-miā kài giâ-kê;

chiok gâu tâu kò chèng-keng bē,

hāi lán lāi-siong hê-hê-hê.

chòe lâng lāu-su tio̍h jīn-hūn,

jīn-chin phah-piàⁿ bōe kheng-hun,

in m̄ jīn-lō͘ oh thun-lún,

koh hǒng chau-that sit chū-chun.

kim-gûn châi-pó thàn lâng hán,

bô loān sim-koaⁿ bô kán-tan,

bián chhan bô lâng kà khui gán,

sūn-ho̍k thiⁿ-lí chhú sim an.

lâng nā koh-iūⁿ tio̍h chín-tī,

m̄-thang khǹg kú tāng bô i;

chi̍t-khoán kiâⁿ-pàng tài khong-khì,

chia̍h kiⁿ kāng-khoán bōe kái-î.

pe̍h-lō͘ kèr liáu chin hán-kiàn,

si̍t-chāi khoân-kéng tōa piàn-chhian,

beh iâⁿ ke-kiám ài sio-ián,

chín-kiù bú-gí bo̍k iân-chhiân.

ōe nā loān kóng kiaⁿ lûi khà,

gōng lâng siáu lâng lóng bô chha,

hāng-hāng ngī-beh kah lí chhá,

sū-si̍t chōe-gia̍p chia̍h bē ta.

sè-kan put-pêng bián siūⁿ-khì,

hoaⁿ-hí khai-ha̍k sin ha̍k-kî,

siōng-khò ke-kiám kóng tō-lí,

beh sìn m̄ sìn kì-chāi i.

ji̍t iú só͘ su iā iú bāng,

to͘-chhī seng-oa̍h sim bâng-bâng,

khoài-lo̍k ji̍t-chí thiⁿ bē kàng,

nā m̄ hùn-tàu sī khang-khang.

lán lâng hòⁿ-hiân sì-kòe khòaⁿ,

hit-sî hó-miā khì peh soaⁿ；

chi̍t chōa chhia-lō͘ kàu koân-soaⁿ,

lâng nā sim sóng m̄-kiaⁿ kôaⁿ.

tâi-oân-lâng sì pah nî sú,

ji̍p ka beh tha̍k ū khah su,

ké-iáⁿ ài tâi ba̍k su̍h-su̍h,

chiok i lāi-lî it-ti̍t ku.

thái-ko kiâⁿ-pàng ê tāi-chì,

bîn-kan hoán-èng chin koài-kî,

kuiⁿ-khiaih choân kok lóng hoaⁿ-hí,

khó-thàn khó-chheh kiam khó-pi.

chun-chhûn i lâng kiò a-peh,

si̍t-chāi phòng-hong tōa chúi-ke,

chia̍h-chîⁿ oai-ko ū-kàu chē,

pì-bi̍t chhut-phòa khì giâ kê.

bo̍k-bêng hoat-koaⁿ lâng chhò kàn,

tiong-hoa bîn-kok loān put an;

chèng-gī cheng-gī bē-hù tán,

chhìn-á lia̍h pîⁿ bô kán-tan.

chit tia̍p chèng-lâng khiu gán-kài,

ìn-á the̍h-lâi tǹg m̄-chai,

hoat-koaⁿ to̍k-it ê kiàn-kài,

koài lán lok-sōng koh gōng-tai.

oan-oan-khiau-khiau liap chîⁿ-châi,

chi̍t siaⁿ m̄-chai phiàn lâng tai,

káⁿ--ê bān-hāng thang bô tāi,

to-chhiám chia̍h lâng huih sai-sai.

kui nî khui hoe thiam sek-chhái,

hāu mn̂g chi̍t châng hó hoe-chai,

lâng hiâm chhàu-chiān koh chhìn-chhái,

tiû-chhun goe̍h-kùi miâ m̄-chai.

hit ê hoat-koaⁿ káⁿ sī chháu,

thiau-tî pàng lâng m̄ khu-lâu,

gín-á tōa-sè hē-hē háu,

a̍h bô sī-hui loān chhau-chhau.

chhit tiám saⁿ-cha̍p kóaⁿ thàu-chá,

kan-siong kau-pôe tiám teng-lâ,

chi̍t kù m̄-chai chin káu-chà,

kan-kúi chhàu-sim chin a-cha.

Sî-sǔ Chhit-ji̍t-á

 

Aug.11 ~ Sep.1

lo̍k-soán miâ-siaⁿ hoan kúi pōe,

m̄-kiaⁿ chhiú-bé phah-chhek-soe,

kim-chîⁿ liû-tōng phe-sí chōe,

sàng khì thô͘-siâⁿ pìⁿ iam-koe.

 

in lâng hông lia̍h chiok siūⁿ-khì,

chháu-á chhi-sim beh kiù i,

kè-sio̍k kià-hù chîⁿ hō͘ i,

khó-thàn chhi-gû bô io̍h i.

 

chhia-kó͘-àng-tāng chhiau thàu-thàu,

péng bô giâu-gî thâu kau-kau,

hu-khang khang-hu bô-tè cháu,

siáng thang kā lán seh thàu-lâu.

 

khang-hu sè-kan keng chì-chài,

bē kiàn-siàu m̄-kiaⁿ lâng chai,

chháu-á kam-goān chòe kú-chhài,

m̄-kiaⁿ chhi-gâi m̄-kiaⁿ tai.

 

khang-hu sè-kan keng chì-chài,

bē kiàn-siàu m̄-kiaⁿ lâng chai,

chháu-á kam-goān chòe kú-chhài,

m̄-kiaⁿ chhi-gâi m̄-kiaⁿ tai.

 

Koa á pe̍h tóng gâu ōe piáⁿ,

chhit goe̍h pòaⁿ ah bē chhut siaⁿ,

bān hāng i to chìⁿ kah iâⁿ,

taⁿ hông siaⁿ-ah iah m̄ kiaⁿ.

 

A-peh khui-chhùi tio̍h sī chán,

chhiau-oa̍t nâ-le̍k chin kan-tan,

siu chi̍p o͘ kim lóng bián tán,

chháu-á koah liáu chiok chho͘-chhân.

 

i lâng it-seng gâu káu-piān,

ai-khiu phòng hong koân jî thian,

kan-na tham chîⁿ bô siūⁿ siān,

lán beh phoe-phòaⁿ kháu bû giân.

 

thiⁿ kng thiⁿ àm bô pòaⁿ hāng,

bông-bông biáu-biáu koh chi̍t kang;

ba̍k-chiu peh kim khia̍t-khia̍t khàng,

khàng beh chi̍t-ji̍t chhan-chhiūⁿ lâng.

 

Tâi-gí ke-kiám o̍h：

chhùi gâu oai ōe ti̍t-ti̍t koái,

chhim-sìn ê lâng chiok chia̍h-koai；

bêng-bêng sám chòe tìⁿ koai-koai,

sin chiàⁿ bô leh kiaⁿ iáⁿ oai.

 

bē-hiáng kiàn-siàu chi̍t kháu chàu,

lang-lang khòaⁿ i m̄-chiâⁿ kâu,

khui-chhùi pe̍h-chha̍t tio̍h leh làu,

sìn-chiòng iû-goân kiông-beh lâu.

 

chhit goe̍h sî-á o͘-pe̍h sìn,

phiàn-su̍t chia̍p thiaⁿ bô leh sin,

siâ sim bōng-sióng oang kui tīn,

chhùi liām siān keng chhiú bo͘ lin.

 

tio̍h-kip chhōe lâng lâi hē-siàu,

thái-ko bô lâng beh chhap-siâu,

kóng it-ngó͘-chhit ū gōa khiáu,

sám chò liam-mi chiūⁿ kha-liâu.

 

tâi-gí chín-kiù chin kip-kè,

lí-góa m̄-thang sio e-the,

khui-chhùi bú-gí chiah ū té,

chū chun chū sìn thang thoân ke.

 

bûn-tàn siu-sêng chiām-chiām óa,

tiong-chhiu kám ū khah khùiⁿ-oa̍h?

thiaⁿ-kóng chóng-thóng lâng sìⁿ lōa,

m̄-chiâⁿ kok-ka bô khah choa̍h.

 

kang-hu tio̍h ài ke-kiám liān,

chu-sìn chìⁿ su̍t liān hō͘ i chhian,

kok-ka pó-ūi ē sio-chiàn,

kám beh chio̍h-thâu the̍h leh khian.

 

choán-hêng chèng-gī m̄ kín chò,

hun-loān ké-siōng ké pêng-hô,

sī-hui khiok-ti̍t bô thang khò,

chèng lâng sim-koaⁿ loān cho-cho.

 

Tâi-oân bí-lē sī pó-tó,

sī-kóng khah chōe ba̍k-chiu lô,

phô͘-sat ùi in lâng ùi kó,

gû-chhi pí-phēng ú-tiū to.

 

nn̄g chheng khòng la̍k bōe kòe-sim,

bân-lô kong-iōng tiōng chù-im,

lô-má jī-bú tio̍h iōng-sim,

pe̍h-ōe-jī siá ē thàu-sim.

 

jī khòng jī-sì ōe bóng ōe,

tâi-oân lâng sim lân bán hôe;

Tâi-bûn kàu taⁿ lō͘ iáu oe̍h,

iú-chì tâng-sim bô chhin-soe.

 

kui sin o͘ o͘ ê o͘ káu,

kó͘-chui iah bô tio̍h khòaⁿ thâu,

cha̍p la̍k sǹg sī ū-kàu lāu,

sin khó͘ pīⁿ thiàⁿ lóng bē tâu.

 

lâng nā pàng nōa ji̍t kōe tō͘,

liâm-mi hó thiⁿ koh thiⁿ-o͘

sim nā pêng-an bián chia̍h-pó͘,

bián kiû gōa so͘ tòa kiaⁿ-to͘.

 

chhit--goe̍h lâi thiaⁿ kúi-á kó͘,

hō͘-lâi chap tih lâng siⁿ-ko͘;

lán-lán bān-hāng m̄ ài kò͘,

soaⁿ piⁿ put-sî hûn o͘-o͘.

 

chia̍h kah la-phóe hó sim-kéng,

iā bat chia̍h kah ōe that-heng,

so͘ -so͘ ji̍t-chí chiâⁿ chhèng-éng,

goân-lâi hām-bîn ké chheng-êng.

 

chhit-goe̍h pòaⁿ ah bô lâng kò͘,

liâm-mi iū-koh thiⁿ o͘-o͘;

bo̍k-bêng tháu-hong kiam lo̍h-hō͘,

kiàn-kok bī chiâⁿ bô thang so͘.

 

lûi-kong sih-nà chai sī tiān,

bûn-bêng AI tián sin-ian,

bîn-sio̍k nî-cheh chiâⁿ khoài piàn,

chit cho̍k ê lâng kài khiàn-thian.

 

Olympic sè-kài nāu,

Tâi-oân gín-á ū-iáⁿ gâu

tiong-hôa tâi-pak ngī beh tàu,

tī-sî Tâi-oân thang phû-thâu?

 

hip-hip o͘-im ê cheh-khùi,

te̍k chéng khan-gû teh tōa khui;

hō͘-siong chìn-pō͘ kiû làu-khùi,

chi̍t-ê bāng-sióng ti̍t-ti̍t tui.

 

liam-mi joa̍h kah kiông-beh sí,

hō͘ lâi chap tih chhit goe̍h sî,

hoán-tùi tài-gî bô lí-khì,

bú-gí tī-sî chhut-thâu-thiⁿ？

 

chhi-bê bîn-chiòng sim kam-goān,

hông koah kú-chhài lóng bē oan,

bé-su siâ kàu tiong-kok khoán,

Tâi-oân beh hó bē oân-choân.

 

chhia-lō͘ thong-tháu bô chó͘-gāi,

phun-pho bā-chia̍h khì koh lâi,

bô mî bô ji̍t bô kong-chhái,

pêng-an sī hok lâng m̄-chai.

 

tōa-koaⁿ tōa iūⁿ chin chhiú-chhèng,

chia̍h chîⁿ e chîⁿ choân iú-pêng,

kì-chiá hōe tiong sià-sì-chèng,

oân-choân hū-chek put-ti chêng.

 

chi̍t ji̍t cheng-sîn sim thòe tàng,

bông-bông jû hoàn jī-gō͘ tang,

óng-sū chiân-tîn bô pòaⁿ hāng,

m̄-chai án-chóaⁿ chhan-chhiūⁿ lâng.

 

chū-jiân khoân-kéng tōa kái-piàn,

in-iû lâng sim m̄ sūn thian,

jîn-chêng gī-lí khòaⁿ bē hiān,

ko͘-khu̍t lāu-lâng bô khó-liân.

 

kok-ka bē khí m̄-bián oàn,

chò-hóe kiàn-li̍p lán Tâi-oân;

khoe-ho̍k bú-gí ē oân-boán,

kok-hông thang chò thâu-bóe koan.

 

3 ji̍t oa̍h-tāng khin-sang kèr,

m̄ bat ê lâng hoah hàuⁿ-têr,

sin-thé sim-lêng ná chia̍h bêr,

sim-chiâⁿ hoaⁿ-hí khoaⁿ-khoaⁿ per.

 

kang-hu tio̍h ài ke-kiám liān,

chu-sìn chìⁿ su̍t liān hō͘ i chhian,

kok-ka pó-ūi ē sio-chiàn,

kám beh chio̍h-thâu the̍h leh khian.

 

chhián soaⁿ mā ū hó kong-kéng,

kiô-sek sek-tī khui siang têng,

Tâi-oân ì-chì tio̍h kian-tēng,

Hiok-têng kim-pâi chin kong-êng.