Sî-sǔ Chhit-ji̍t-á

 

Aug.11 ~ Sep.1

lo̍k-soán miâ-siaⁿ hoan kúi pōe,

m̄-kiaⁿ chhiú-bé phah-chhek-soe,

kim-chîⁿ liû-tōng phe-sí chōe,

sàng khì thô͘-siâⁿ pìⁿ iam-koe.

 

in lâng hông lia̍h chiok siūⁿ-khì,

chháu-á chhi-sim beh kiù i,

kè-sio̍k kià-hù chîⁿ hō͘ i,

khó-thàn chhi-gû bô io̍h i.

 

chhia-kó͘-àng-tāng chhiau thàu-thàu,

péng bô giâu-gî thâu kau-kau,

hu-khang khang-hu bô-tè cháu,

siáng thang kā lán seh thàu-lâu.

 

khang-hu sè-kan keng chì-chài,

bē kiàn-siàu m̄-kiaⁿ lâng chai,

chháu-á kam-goān chòe kú-chhài,

m̄-kiaⁿ chhi-gâi m̄-kiaⁿ tai.

 

khang-hu sè-kan keng chì-chài,

bē kiàn-siàu m̄-kiaⁿ lâng chai,

chháu-á kam-goān chòe kú-chhài,

m̄-kiaⁿ chhi-gâi m̄-kiaⁿ tai.

 

Koa á pe̍h tóng gâu ōe piáⁿ,

chhit goe̍h pòaⁿ ah bē chhut siaⁿ,

bān hāng i to chìⁿ kah iâⁿ,

taⁿ hông siaⁿ-ah iah m̄ kiaⁿ.

 

A-peh khui-chhùi tio̍h sī chán,

chhiau-oa̍t nâ-le̍k chin kan-tan,

siu chi̍p o͘ kim lóng bián tán,

chháu-á koah liáu chiok chho͘-chhân.

 

i lâng it-seng gâu káu-piān,

ai-khiu phòng hong koân jî thian,

kan-na tham chîⁿ bô siūⁿ siān,

lán beh phoe-phòaⁿ kháu bû giân.

 

thiⁿ kng thiⁿ àm bô pòaⁿ hāng,

bông-bông biáu-biáu koh chi̍t kang;

ba̍k-chiu peh kim khia̍t-khia̍t khàng,

khàng beh chi̍t-ji̍t chhan-chhiūⁿ lâng.

 

Tâi-gí ke-kiám o̍h：

chhùi gâu oai ōe ti̍t-ti̍t koái,

chhim-sìn ê lâng chiok chia̍h-koai；

bêng-bêng sám chòe tìⁿ koai-koai,

sin chiàⁿ bô leh kiaⁿ iáⁿ oai.

 

bē-hiáng kiàn-siàu chi̍t kháu chàu,

lang-lang khòaⁿ i m̄-chiâⁿ kâu,

khui-chhùi pe̍h-chha̍t tio̍h leh làu,

sìn-chiòng iû-goân kiông-beh lâu.

 

chhit goe̍h sî-á o͘-pe̍h sìn,

phiàn-su̍t chia̍p thiaⁿ bô leh sin,

siâ sim bōng-sióng oang kui tīn,

chhùi liām siān keng chhiú bo͘ lin.

 

tio̍h-kip chhōe lâng lâi hē-siàu,

thái-ko bô lâng beh chhap-siâu,

kóng it-ngó͘-chhit ū gōa khiáu,

sám chò liam-mi chiūⁿ kha-liâu.

 

tâi-gí chín-kiù chin kip-kè,

lí-góa m̄-thang sio e-the,

khui-chhùi bú-gí chiah ū té,

chū chun chū sìn thang thoân ke.

 

bûn-tàn siu-sêng chiām-chiām óa,

tiong-chhiu kám ū khah khùiⁿ-oa̍h?

thiaⁿ-kóng chóng-thóng lâng sìⁿ lōa,

m̄-chiâⁿ kok-ka bô khah choa̍h.

 

kang-hu tio̍h ài ke-kiám liān,

chu-sìn chìⁿ su̍t liān hō͘ i chhian,

kok-ka pó-ūi ē sio-chiàn,

kám beh chio̍h-thâu the̍h leh khian.

 

choán-hêng chèng-gī m̄ kín chò,

hun-loān ké-siōng ké pêng-hô,

sī-hui khiok-ti̍t bô thang khò,

chèng lâng sim-koaⁿ loān cho-cho.

 

Tâi-oân bí-lē sī pó-tó,

sī-kóng khah chōe ba̍k-chiu lô,

phô͘-sat ùi in lâng ùi kó,

gû-chhi pí-phēng ú-tiū to.

 

nn̄g chheng khòng la̍k bōe kòe-sim,

bân-lô kong-iōng tiōng chù-im,

lô-má jī-bú tio̍h iōng-sim,

pe̍h-ōe-jī siá ē thàu-sim.

 

jī khòng jī-sì ōe bóng ōe,

tâi-oân lâng sim lân bán hôe;

Tâi-bûn kàu taⁿ lō͘ iáu oe̍h,

iú-chì tâng-sim bô chhin-soe.

 

kui sin o͘ o͘ ê o͘ káu,

kó͘-chui iah bô tio̍h khòaⁿ thâu,

cha̍p la̍k sǹg sī ū-kàu lāu,

sin khó͘ pīⁿ thiàⁿ lóng bē tâu.

 

lâng nā pàng nōa ji̍t kōe tō͘,

liâm-mi hó thiⁿ koh thiⁿ-o͘

sim nā pêng-an bián chia̍h-pó͘,

bián kiû gōa so͘ tòa kiaⁿ-to͘.

 

chhit--goe̍h lâi thiaⁿ kúi-á kó͘,

hō͘-lâi chap tih lâng siⁿ-ko͘;

lán-lán bān-hāng m̄ ài kò͘,

soaⁿ piⁿ put-sî hûn o͘-o͘.

 

chia̍h kah la-phóe hó sim-kéng,

iā bat chia̍h kah ōe that-heng,

so͘ -so͘ ji̍t-chí chiâⁿ chhèng-éng,

goân-lâi hām-bîn ké chheng-êng.

 

chhit-goe̍h pòaⁿ ah bô lâng kò͘,

liâm-mi iū-koh thiⁿ o͘-o͘;

bo̍k-bêng tháu-hong kiam lo̍h-hō͘,

kiàn-kok bī chiâⁿ bô thang so͘.

 

lûi-kong sih-nà chai sī tiān,

bûn-bêng AI tián sin-ian,

bîn-sio̍k nî-cheh chiâⁿ khoài piàn,

chit cho̍k ê lâng kài khiàn-thian.

 

Olympic sè-kài nāu,

Tâi-oân gín-á ū-iáⁿ gâu

tiong-hôa tâi-pak ngī beh tàu,

tī-sî Tâi-oân thang phû-thâu?

 

hip-hip o͘-im ê cheh-khùi,

te̍k chéng khan-gû teh tōa khui;

hō͘-siong chìn-pō͘ kiû làu-khùi,

chi̍t-ê bāng-sióng ti̍t-ti̍t tui.

 

liam-mi joa̍h kah kiông-beh sí,

hō͘ lâi chap tih chhit goe̍h sî,

hoán-tùi tài-gî bô lí-khì,

bú-gí tī-sî chhut-thâu-thiⁿ？

 

chhi-bê bîn-chiòng sim kam-goān,

hông koah kú-chhài lóng bē oan,

bé-su siâ kàu tiong-kok khoán,

Tâi-oân beh hó bē oân-choân.

 

chhia-lō͘ thong-tháu bô chó͘-gāi,

phun-pho bā-chia̍h khì koh lâi,

bô mî bô ji̍t bô kong-chhái,

pêng-an sī hok lâng m̄-chai.

 

tōa-koaⁿ tōa iūⁿ chin chhiú-chhèng,

chia̍h chîⁿ e chîⁿ choân iú-pêng,

kì-chiá hōe tiong sià-sì-chèng,

oân-choân hū-chek put-ti chêng.

 

chi̍t ji̍t cheng-sîn sim thòe tàng,

bông-bông jû hoàn jī-gō͘ tang,

óng-sū chiân-tîn bô pòaⁿ hāng,

m̄-chai án-chóaⁿ chhan-chhiūⁿ lâng.

 

chū-jiân khoân-kéng tōa kái-piàn,

in-iû lâng sim m̄ sūn thian,

jîn-chêng gī-lí khòaⁿ bē hiān,

ko͘-khu̍t lāu-lâng bô khó-liân.

 

kok-ka bē khí m̄-bián oàn,

chò-hóe kiàn-li̍p lán Tâi-oân;

khoe-ho̍k bú-gí ē oân-boán,

kok-hông thang chò thâu-bóe koan.

 

3 ji̍t oa̍h-tāng khin-sang kèr,

m̄ bat ê lâng hoah hàuⁿ-têr,

sin-thé sim-lêng ná chia̍h bêr,

sim-chiâⁿ hoaⁿ-hí khoaⁿ-khoaⁿ per.

 

kang-hu tio̍h ài ke-kiám liān,

chu-sìn chìⁿ su̍t liān hō͘ i chhian,

kok-ka pó-ūi ē sio-chiàn,

kám beh chio̍h-thâu the̍h leh khian.

 

chhián soaⁿ mā ū hó kong-kéng,

kiô-sek sek-tī khui siang têng,

Tâi-oân ì-chì tio̍h kian-tēng,

Hiok-têng kim-pâi chin kong-êng.

hiān-si̍t

      Sì goe̍h cha̍p-la̍k, lán thàu-chá ba̍k-chiu peh kim, oa̍t-thâu khòaⁿ piah téng ê sî-cheng, cha̍p tiám cha̍p-gō͘ hun, chhoah chi̍t-ē thiàu--khí-lâi, cha̍p tiám gō͘ hun tio̍h-ài tī kàu-sek káng-khò lioh. Kín-mé ōaⁿ-saⁿ, sóe-bīn, siu-sip, chhiú pió-á kòa leh, lán chhiⁿ-kông cháu chhut-mn̂g. Ná chông ná khòaⁿ chhiú pió-á, chiah kám-kak koài-koài, kàu ūi chiah hoat-hiān chiah poeh tiám jī-cha̍p niâ. Hó ka-chài. 

     Tio̍h-sí, chang-àm lán  pòaⁿ-mî khùn bōe siáⁿ ē khì só͘-tì. Chăng chiah àn Môa-tāu chē bus khí--lâi Tâi-pak. Hit mî tī Môa-tāu tio̍h khùn bô kàu pá ah, iân-lō͘ tī chhia-té lán mā khùn bōe hó-sè, siūⁿ-kóng kàu ūi  seng khùn--nn̄g-tiám-cheng thang hó thiaⁿ lâng ián-káng, mā bô, kan-na khùn sì-gō͘ cha̍p hun niâ. Sòaⁿ-téng ián-káng lah, Tài-gî Ke-si-mi siong-koan--ê. Kun-pún bô hoat-tō͘ an-sim chù-sîn lo̍h-khì thiaⁿ. Bong tang  bong sai, koh leh siá thêng-sek.

      Tńg kàu-ūi, goân-pún khoán-khoán leh tio̍h beh lâi khùn. Soah seng-khu sé-sé leh thoa kàu nn̄g tiám gōa chiah tó lo̍h-khì. Koh bōe kì-tit kòa chhiú pió-á, ū siat chhiú-ki-á loān-cheng poeh tiám sì-cha̍p, ná ē bô tân ？ Chhiú-ki-á phái-khì？

        X    X     X

     Sì goe̍h cha̍p-chhit, chăng-àm chhit-poeh tiám-á lán tio̍h tó lo̍h-khì beh pó͘ bîn. Sin-khu thǹg kah chhun chi̍t niá lāi-khò͘-á,  to kui kang hip-joah lah, pòaⁿ-mî sió-khóa hoán koân, khiú so͘-so͘ ê thán-á lâi kah, kè-sio̍k khùn. Chi̍t mî peh khiaih nn̄g pái pàng jiō. Mî-bóe soah chò bāng. Bāng tio̍h lán kap Tián-á àn Tâi-pak chē hóe-chhia kàu Tiong-le̍k, pôaⁿ-chhia khì bó͘ chi̍t ūi m̄-chai-iáⁿ ê só͘-chāi. 

    Tī chhia-té, lán ná leh pó͘ bîn, phāiⁿ-á kâng-khoán chit kha, kàu ūi,  chêng-sin, soah chhōe bô chhiú-ki-á, péng khí péng lo̍h, thâu-bóe chhōe sì-gō͘ pái, lóng bô.

    Soah khì lâng tāu hō͘ lâng chiau-thāi, in koh hó-sim, the̍h chi̍t tâi Apple ê sáⁿ beh hō͘ góa thóe-ōaⁿ ēng. Lán kam-kek chāi sim-koaⁿ. Sim lāi ná  siūⁿ hit lō Apple pháng kiàn khì ē-sái khòaⁿ  cháu khì tó ūi ê kong-lêng siūⁿ-beh chhōe--tńg-lâi. It-ti̍t siūⁿ niâ, koh siūⁿ-kóng chhōe bōe tńg-lâi,  beh án-chóaⁿ chiah hó leh.